13th MAY 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ မေလ ( ၁၃ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ မင်းတပ်မြို့နယ်တနေရာမှာ လက်နက်ကြီးကျည် ပေါက်ကွဲ

 

မင်းတပ်မြို့ အခြေစိုက် အမှတ် ၂၇၄ ခြေလျင်တပ်ရင်းက လက်နက်ကြီး (ဟောင်ဝစ်ဇာအမြောက်) ပစ်တဲ့ ကျည် ၃ လုံး မင်းတပ်မြို့နယ်၊ ကျေးရွာတနေရာမှာ ပေါက်ကွဲတယ်လို့ သိရပါတယ်။

မေလ ၉ ရက်နေ့ မနက်ပိုင်းမှာ စစ်ကောင်စီက ပစ်တာဖြစ်ပြီး မြို့အနောက်တောင်ဘက်က တိုက်နယ် အမှတ် ၄ ရှိ ကျေးရွာတွေမှာ ပေါက်ကွဲတာလို့ သတင်းအရင်းမြစ်က ဆိုပါတယ်။

“အိမ် ၃၊ ၄ လုံးလောက် လောင်တယ်၊ လူလည်း ထိထားတာ ရှိတယ်၊ အခြေနေတော့ မဆိုးလောက်ဘူး ထင်တာပဲ။ နေပူထဲ မီးငြိမ်းနေရတာနဲ့ကို တနေကုန်သွားတယ်။” လို့  ပြောပါတယ်။

ထိခိုက်သူတွေကို ဆေးကုသမှုပေးနေတယ်လို့ သိရပြီး ဒဏ်ရာအတိမ်အနက်ကိုတော့ မသိရသေးဘူး။

ပြီးခဲ့တဲ့ မေလ ၇ ရက်နေ့ကလည်း မင်းတပ်မြို့နယ် မြောက်ဘက်ခြမ်းကို ခလရ ၂၇၄ ကနေ လက်နက်ကြီး ၅ ကြိမ်ထက်မနည်း ပစ်ခတ်ပေမယ့် ပျက်စီးထိခိုက်တာတွေရှိတယ်လို့ သိရပါတယ်။

စစ်ကောင်စီက မင်းတပ်မြို့နယ်အတွင်း ရည်ရွယ်ချက်ရှိရှိ လက်နက်ကြီး ပစ်နေတာတွေကြောင့် ပြည်သူတွေ အမဲလိုက်တာ၊ ချောင်းသွား (ငါးပစ်) တာမျိုး မလုပ်ကြဖို့ ချင်းကာကွယ်‌ရေးတပ်ဖွဲ့ (မင်းတပ်) က မေလ ၄ ရက်နေ့မှာ အမိန့်ထုတ်ထားပါတယ်။

 

========================

 

📌📌 ၂။ ချင်းလဲန်ကာကွယ်ရေးတပ်ဖွဲ့ (ဆဲန်ထန်း) ကောင်စီရုံး လေကြောင်း တိုက်ခိုက်ခံရပြီး ၂ ဦး အသက်ဆုံးရှုံး

 

ဟားခါးမြို့နယ်၊ ခွါပီးကျေးရွာမှာ လေကြောင်းတိုက်ခိုက်ခံရပြီး ကာကွယ်‌ရေးတပ်ဖွဲ့က ၂ ဦး တိုင်းပြည်နဲ့ လူမျိုးအတွက် အသက်စတေးတယ်လို့ ချင်းလဲန်ကာကွယ်ရေးတပ်ဖွဲ့ Senthang က ထုတ်ပြန်‌ ကြေညာပါတယ်။

မေလ ၈ ရက်နေ့ ညနေ ၆ နာရီဝန်းကျင်မှာ စစ်ကောင်စီရဲ့ Mi – 35 နဲ့ ခွါပီးကျေးရွာတိုက်ခိုက်ပြီးတဲ့နောက် ချင်းလဲန်ကာကွယ် ရေးတပ်ဖွဲ့ (Senthang) ရဲ့ ဗဟိုအလုပ်အမှုဆောင် ကောင်စီရုံးပါ တဆက်တည်း လေကြောင်းတိုက်ခိုက် ခံရတာလို့ ထုတ်ပြန် ထားပါတယ်။

ကျဆုံးသူတွေဟာ လက်ထောက် အထွေထွေအတွင်းရေးမှူးနဲ့ တပ်ခွဲမှူးတို့ ဖြစ်ပါတယ်။

လေကြောင်းတိုက်ခိုက်ခံရတဲ့ ခွါပီးကျေးရွာမှာ ထိခိုက်ဒဏ်ရာရသူတွေ ရှိတယ်လို့လည်း ချင်းလဲန်ကာကွယ်ရေးတပ်ဖွဲ့ (Senthang) က ဆိုပါတယ်။

၂၀၂၃ မတ်လ၊ ဧပြီလ ၂ လအတွင်း ချင်းပြည်နယ်မှာ စစ်ကောင်စီရဲ့ လေကြောင်းတိုက်ခိုက်မှုပေါင်း ၃၇ ကြိမ်ရှိပြီး ဗုံးအလုံး ၁၂၀ ကျော်နဲ့ တိုက်ခိုက်ခံထားရတယ်လို့ ချင်းအမျိုးသားတပ်ဦး သတင်းနှင့်ပြန်ကြားရေးက မေလ ၈ ရက်နေ့ ထုတ်ပြန်ထားပါတယ်။

 

========================

 

📌📌 ၃။ Mocha Cyclone ကို အနီရောင်အဆင့် သတ်မှတ်

 

ရခိုင်ပြည်နယ်၊ ချင်းပြည်နယ်၊ မကွေးတိုင်းနဲ့ စစ်ကိုင်းတိုင်းက ပြည်သူ ၁၇ သိန်းကျော် မုန်တိုင်းအန္တရာယ် ခံရနိုင်တယ်လို့ (GDAC) က အသိပေးထားပါတယ်။ ဘင်္ဂလားပင်လယ်အော်မှာ ဖြစ်ပေါ်နေတဲ့ Mocha Cyclone ကို ကမ္ဘာ့သဘာဝဘေး သတိပေးချက်ထုတ်ပြန်ခြင်းနှင့် ပူးပေါင်းဆောင်ရွက်မှုစနစ် (Global Disaster Alert and Coordination SYSTEM − GDACS) က အနီရောင်အဆင့် သတ်မှတ်လိုက်တယ်လို့ ၁၁ ရက် ထုတ်ပြန်ပါတယ်။

လာမယ့် ရက်သတ္တပတ်ထဲ မြန်မာနိုင်ငံကို အမြင့်ဆုံးလေတိုက်နှုန်း ၁၆၇ ကီလိုမီတာ (တစ်နာရီ ၁၀၃.၇ မိုင်) ရှိ ဆိုင်ကလုန်းမုန်တိုင်း ဝင်ရောက်တိုက်ခိုက်မယ့် အခြေအနေကြောင့် လူဦးရေ ၁၇ သိန်းကျော် မုန်တိုင်းအန္တရာယ် ခံရနိုင်တယ်လို့ လည်း ဆိုပါတယ်။

ရခိုင်ပြည်နယ်က လူဦးရေ ၉၃၀,၀၀၀၊ ချင်းပြည်နယ်က လူဦးရေ ၂၁၀,၀၀၀၊ မကွေးတိုင်းက လူဦးရေ ၁၇၀,၀၀၀ နဲ့ စစ်ကိုင်းတိုင်းက လူဦးရေ ၄၄၀,၀၀၀ တို့ဟာ အန္တရာယ်ရှိတဲ့ လေပြင်းတိုက်ခိုက်ခြင်းကို ခံရနိုင်တယ်လို့ GDACS က ထုတ်ပြန်ထားပါတယ်။

ရခိုင်ပြည်နယ် စစ်တွေမြို့၊ ချင်းပြည်နယ် ပလက်ဝမြို့တွေမှာ လေပြင်းမုန်တိုင်းကြောင့် ထိခိုက်မှုတွေ ရှိနိုင်တယ်လို့ ဆိုပါတယ်။

ဒါ့အပြင် စစ်တွေ၊ ထီးလင်းနဲ့ ဂန့်ဂေါလေယာဉ်ကွင်းတွေ ထိခိုက်ပျက်စီးနိုင်တဲ့အကြောင်းလည်း GDACS က ဖော်ပြပါတယ်။

ဒီလိုအခြေနေတွေကြောင့် နိုင်ငံအနှံ့ကပြည်သူတွေ ရေမိုင် ၁၀၀ အတွင်း သွားတာ မပြုလုပ်ကြဖို့၊ လေပြင်းတိုက်ခတ်နိုင်တဲ့ အန္တရာယ်တွေအတွက် ကြိုတင်ပြင်ဆင်ထားကြဖို့ မိုးလေဝသဖြစ်စဉ်တွေနဲ့ ပတ်သက်ပြီး ကျွမ်းကျင်တဲ့ အသိပညာရှင်တွေက အကြံပြုထားကြပါတယ်။

 

========================

 

📌📌 ၄။ PDF တွေ လက်နက်အပ်ရင် ငွေပေးမယ်လို့ စစ်ကောင်စီပြော

 

တဖက်မှာတော့ စစ်ကောင်စီတပ်သား ၁၃၀၀၀ ကျော် အလင်းဝင်လာတယ်လို့ NUG ရဲ့ PDF ၂ နှစ်ပြည့် ထုတ်ပြန်ချက်မှာ ဖော်ပြထားပါတယ်။

ပြည်သူ့ကာကွယ်ရေးတပ်ဖွဲ့ (PDF) တွေ လက်နက်အပ်ရင် ‌‌ငွေပေးမယ်လို့ စစ်ကောင်စီက ပြောလာပါတယ်။

အာဏာသိမ်း ၂ နှစ်ကျော်အကြာ လက်နက်ကိုင် တော်လှန်မှုတွေ အားကောင်းလာချိန်မှာ စစ်ကောင်စီက အဲ့ဒီလို မက်လုံးပေးတဲ့နည်းကို ပထမဆုံးအကြိမ် ထုတ်ပြန် ကြေညာလာတာပါ။

လက်နက်ခဲယမ်းနဲ့အတူ ဘက်ပြောင်းလာမယ်ဆိုရင် သေနတ်အမျိုးအစားအလိုက် ဆုကြေး ၂ သိန်းကနေ ၇၅ သိန်းအထိ ချီးမြှင့်မယ်လို့ ပြောပါတယ်။

နိုင်ံငံတည်ဆောက်ရေးအတွက် အတူပူးပေါင်းဆောင်ရွက်ရမယ့် ကာလဖြစ်လို့ အခုလို ဖိတ်ခေါ်တာလို့လည်း ဆိုပါတယ်။

လက်နက်အပ်လာတဲ့သူတွေဟာ လူသ၊တ်မှု၊ မုဒိမ်းမှု ကျူးလွန်ထားမယ်ဆိုရင်တောင် ပြစ်မှုအတိုင်းအတာဖြေ‌လျှော့တာ ပြုလုပ်ပေးမယ်လို့ ဆိုပါတယ်။

NUG နဲ့ လက်နက်ကိုင် တော်လှန်ရေးအင်အားစုတွေက စစ်ကောင်စီလက်အောက်ကနေ လက်နက်နဲ့ အလင်းဝင် သတင်းပေးတာတွေလုပ်မယ်ဆိုရင် ဆုကြေးချီးမြှင့်မယ့်အကြောင်း အစောပိုင်းကတည်းက လှုံ့ဆော်ထားဖူးသလို ပြည်သူဘက်ကူးပြောင်းလာတဲ့ တပ်သားဦးရေ ၁၃၀၀၀ ကျော်ရှိတယ်လို့ NUG က ပြည်သူ့ကာကွယ်ရေးတပ်မတော် တည်ထောင်ခြင်း ၂ နှစ်ပြည့်မှာ ထုတ်ပြန်ထားပါတယ်။

#RadioNUGLocalNews

#SpringRevolution