1st JUL 2023 - (Ethnic language program-CHO_DAAI) by Radio NUG

 

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇူလိုင်လ ( ၁ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ လုပ်ခေးကျေးရွာအနီး လေကြောင်းတိုက်ခိုက်ခံရ၊ အနောက်ရပ်ကွက်မှာ အသက် ၅၀ ဝန်းကျင် ပြည်သူတဦး စစ်ကောင်စီကျည်ဆံ ထိမှန် 

 

မင်းတပ်မြို့နယ်၊ လုပ်ခေးကျေးရွာအနီးမှာ စစ်ကောင်စီဂျက်ဖိုက်တာက ဗုံး ၂ လုံးနဲ့ မနက်အစောက လေကြောင်း တိုက်ခိုက်မှု ပြုလုပ်ခဲ့တယ်လို့ ဒေသခံပြည်သူတွေကထံက သိရပါတယ်။

 

“ဗုံး ၂ လုံးလို့ ကြားတယ်၊ လူအထိအခိုက်ကတော့ သေချာမသိရဘူး၊လောလောဆယ် ဖုန်းလိုင်းကလည်း ပြတ်နေတာ၊ အခင်းဖြစ်တဲ့နေရာ ဖုန်းဆက်မရသေးဘူး။” လို့ နေ့လယ်ပိုင်းက The Mindat Post ကို ပြောပါတယ်။

 

မင်းတပ်မြို့နယ်အတွင်း လေကြောင်းတိုက်ခိုက်တဲ့ ဂျက်ဖိုက်တာတွေဟာ တံတားဦးလေတပ်ကလို့ စစ်ကောင်စီ လေကြောင်းရန်စောင့်ကြည့်နေတဲ့အဖွဲ့ရဲ့ ဖော်ပြချက်အရ သိရပါတယ်။

 

မြို့တွင်း စစ်ကောင်စီအထိုင်ဂိတ်၊ ခလရ ၂၇၄ တပ်ရင်းအထိပါ ဆက်တိုက် ပစ်ခတ်တာတွေ ရှိလာတာကြောင့် အခုလို လေကြောင်းပြန်သုံးလာတာလို့ ချင်းကာကွယ်ရေးတပ်ဖွဲ့ (မင်းတပ်)နဲ့ နီးစပ်တဲ့ မြေပြင် သတင်းအရင်းအမြစ်က ပြောပါတယ်။

 

စစ်ကောင်စီတပ်ဟာ မြို့တွင်းပစ်ခတ်မှုရှိလာရင် ပြည်သူနေထိုင်တဲ့ ကျေးရွာတွေကို ဦးတည်ပြီး လက်နက်ကြီး ပစ်ခတ် တာ၊ လေကြောင်းပစ်တာတွေ အမြဲလုပ်နေတာပါ။ 

 

ဇွန်လ ၂၇ ရက်နေ့ကလည်း အနောက်ရပ်ကွက်မှာ စစ်ကောင်စီရဲ့ ကျည်ဆံထိမှန်တဲ့ အသက် ၅၀ ဝန်းကျင် အမျိုးသားတဦး ပြင်းထန်ဒဏ်ရာရထားတယ်လို့ သိရပါတယ်။

 

မင်းတပ်မြို့အထိုင် ၂၇၄ တပ်ရင်းအနီး ဇွန်လ ၂၇ ရက်နေ့က ပစ်ခတ်မှုဖြစ်ပွားပြီးတဲ့နောက် ညသန်းခေါင်ယံမှာ စစ်ကောင်စီ ဘက် ရမ်းသမ်းပစ်တဲ့ကျည်က ထိမှန်တာပါ။

 

ဇွန်လ ၂၈ ရက်နေ့ မင်းတပ်မှာ လေကြောင်းတိုက်ခိုက်ခံရတဲ့ ထိခိုက်ပျက်စီးမှု အသေးစိပ်ဖြစ်စဉ်နဲ့ ကျည်ဆံထိမှန်ထားတဲ့ ဒဏ်ရာအတိမ်အနက်ကို ဖုန်းခေါ်ဆိုမရတာကြောင့် The Mindat Post အနေနဲ့ သီးခြားအတည်မပြုနိုင်သေးပါဘူး။

 

မင်းတပ်မြို့၊ ခလရ ၂၇၄ တပ်ရင်းကနေ ကျေးရွာတွေဘက် ရည်ရွယ်ချက်ရှိရှိ လက်နက်ကြီးပစ်ခတ်တာတွေပါ ရှိခဲ့တယ် လို့ HKL Mindat က ရေးသားဖော်ပြထားပါတယ်။

 

========================

 

📌📌 ၂။ ချင်း - မကွေးနယ်စပ်တိုက်ပွဲမှာ စစ်ကောင်စီဘက် ၁၀ ဦးထက်မနည်း သေတယ်လို့ ချင်းကာကွယ်ရေးတပ်ဖွဲ့ (မင်းတပ်) အတည်ပြု

 

ချင်းပြည်နယ်၊ မကွေးတိုင်းနယ်စပ် ရွှေအောင်သာကျေးရွာတိုက်ပွဲမှာ စစ်ကောင်စီတပ်ဖွဲ့ဝင် ၁၀ ဦးထက်မနည်း သေတယ်လို့ ချင်းကာကွယ်ရေးတပ်ဖွဲ့ (မင်းတပ်) က အတည်ပြု ထုတ်ပြန်ပါတယ်။

 

မကွေးတိုင်း၊ ကျောက်ထုမြို့ကနေ ထီးလင်းမြို့ဘက်ကို ရိက္ခာပို့တဲ့ စစ်ကောင်စီယာဉ်တန်းကို ချင်းကာကွယ်ရေးတပ်ဖွဲ့ (မင်းတပ်) နဲ့ ပူးပေါင်းတပ်ဖွဲ့တွေက ဇွန်လ ၂၆ ရက်နေ့ ကြားဖြတ်တိုက်ခိုက်ခဲ့တာလို့ CDF မင်းတပ်ရဲ့ တပ်ရင်းမှူးတဦးက ပြောပါတယ်။

 

တိုက်ခိုက်ခံရတဲ့ ယာဉ်တန်းကို စစ်ကောင်စီဂျက်ဖိုက်တာ ၂ စင်းက ၇ ကြိမ်အထိ လေကြောင်းကနေ ပစ်ကူပေးခဲ့တယ်လို့ သိရပါတယ်။ ဇွန်လ ၂၆ ရက်နေ့ ရွှေအောင်သာကျေးရွာအနီး တိုက်ပွဲမှာ ချင်းကာကွယ်ရေးတပ်ဖွဲ့ (မင်းတပ်) ရဲ‌ဘော်တဦး မစိုးရိမ်ရတဲ့ ဒဏ်ရာရတယ်လို့လည်း ပြောပါတယ်။

 

မင်းတပ်မှာ ၂၀၂၃ ဇွန်လအတွင်း တိုက်ပွဲတွေဆက်တိုက်ရှိနေသလို မင်းတပ်မြို့ ခလရ ၂၇၄ တပ်ရင်းကိုလည်း ဒေသကာကွယ်ရေးတပ်က တိုက်ခိုက်ခဲ့တယ်လို့ ဒေသခံတွေက ပြောပါတယ်။

 

ချင်းကာကွယ်‌ရေးတပ်ဖွဲ့ (မင်းတပ်) ကို ပိုမိုကျစ်လစ်ခိုင်မာပြီး စည်းစနစ်ကျတဲ့ တပ်ဖွဲ့တခုအဖြစ် ပြောင်းလဲနေတယ်လို့ ကြေညာထားတဲ့နောက်ပိုင်း စစ်ကောင်စီရဲ့ အထိုင်ဂိတ်၊ စစ်ကောင်စီယာဉ်တန်းတွေကို ပိုမိုတိုက်ခိုက်လာတာလည်း ဖြစ်ပါတယ်။

 

========================

 

📌📌 ၃။ စစ်ကောင်စီကို အရေးယူ ပိတ်ဆို့တာတွေ တိုးလုပ်ဖို့ အိန္ဒိယကို CRPH တိုက်တွန်း 

 

စစ်ကောင်စီနဲ့ စီးပွားရေး၊ သံတမန်ရေး၊ စစ်ရေး ပူးပေါင်းဆောင်ရွက်နေတာကို ရပ်တန့်ပြီး ပိတ်ဆို့ဖိအားပေးမှုတွေ တိုးလုပ်ဖို့ ပြည်ထောင်စုလွှတ်တော် ကိုယ်စားပြုကော်မတီ (CRPH) က အိန္ဒိယနိုင်ငံကို ဇွန်လ ၂၈ ရက်နေ့ တောင်းဆိုတဲ့အကြောင်း ဘီဘီစီ မြန်မာပိုင်းရဲ့ သတင်းတပုဒ်မှာ ဖော်ပြပါတယ်။

 

အိန္ဒိယဝန်ကြီးချုပ် နရန်ဒြာ မိုဒီနဲ့ အမေရိကန်သမ္မတဂျိုးဘိုင်ဒန်တို့ အမေရိကန်ပြည်ထောင်စုမှာ တွေ့ဆုံခဲ့ပြီးတဲ့နောက် မြန်မာပြည်တွင်းက ယိုယွင်းနေတဲ့အခြေအနေတွေကို စိုးရိမ်ကြောင်းပြောထားတဲ့နှစ်နိုင်ငံခေါင်းဆောင် တွေရဲ့ကြေညာချက်ကို ကြိုဆိုရင်း CRPH က အခုလို တိုက်တွန်းတာလို့ ဆိုပါတယ်။

 

အိန္ဒိယနဲ့ မြန်မာဟာ ကိုလိုနီနယ်ချဲ့စနစ်အောက်ကနေ လွတ်လပ်ရေးကြိုးပမ်းမှုအပါအဝင် သမိုင်းအရ နက်ရှိုင်းတဲ့ဆက်ဆံရေးရှိခဲ့တဲ့ အိမ်နီးချင်းနိုင်ငံတွေဖြစ်တာကိုထောက်ပြပြီး အိန္ဒိယနိုင်ငံအနေနဲ့ စစ်ကောင်စီနဲ့ ပူးပေါင်းဆောင်ရွက်တာတွေကို ရပ်တန့်ဖို့အပြင် အမေရိကန်နိုင်ငံနဲ့ ပူးပေါင်းပြီး ပိတ်ဆို့ ဖိအားပေးမှုတွေကို တိုးမြှင့် လုပ်ဆောင်ဖို့လည်း CRPH က တိုက်တွန်းထားတဲ့အကြောင်း ဖော်ပြပါတယ်။

 

အိန္ဒိယ - အမေရိကန် ခေါင်းဆောင်တွေရဲ့ ထုတ်ပြန်ချက်မှာတော့ မြန်မာပြည်တွင်းအခြေအနေကို စိုးရိမ်ကြောင်း ပြောထားသလို စစ်အာဏာသိမ်းပြီးနောက် ဖမ်းဆီးထိန်းသိမ်းထားသူတွေကို လွှတ်ပေးဖို့ အချက်လည်း ပါဝင်တယ်လို့ ဆိုပါတယ်။

 

စစ်ကောင်စီကတော့ ဥပဒေချိုးဖောက်တာတွေကြောင့်သာ ဖမ်းဆီးမှုတွေပေါ်ပေါက်ခဲ့တာဆိုပြီး အဲဒီထုတ်ပြန်ချက်ကို ပြီးခဲ့တဲ့ရက်ပိုင်းမှာပဲ ပြန်လည်တုံ့ပြန်ထားတာပါ။

 

လက်ရှိမှာတော့ မြန်မာစစ်‌ကောင်စီနဲ့ အိန္ဒိယဟာ ဆက်ဆံရေးဆက်ရှိနေပြီး အိန္ဒိယသံအမတ်က သူ့ရဲ့ သံတမန်ခန့်အပ်လွှာကို မြန်မာစစ်ခေါင်းဆောင်ကိုပေးအပ်တာ၊ အိန္ဒိယနိုင်ငံခြားရေးအတွင်းဝန် ၂ ဦးက နေပြည်တော်ကို လာရောက်ထားတာအပြင် ကုလားတန်မြစ်စီမံကိန်းလို စီမံကိန်းတွေကိုလည်း ဆက်လုပ်နေတယ်လို့ ဘီဘီစီ မြန်မာပိုင်းက ဖော်ထုတ်ရေးသားထားပါတယ်။

#RadioNUGLocalNews

#SpringRevolution