30th SEP 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ စက်တင်ဘာလ ( ၃၀ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ကန်ပက်လက်မြို့တွင်း စစ်တပ်အထိုင် ၂ နေရာကို CDF ကန်ပက်လက်က ဝင်ရောက်စီးနင်း ပစ်ခတ်

ကန်ပက်လက်မြို့တွင်း စစ်ကောင်စီတပ်အထိုင် ၂ နေရာကို ကာကွယ်ရေးတပ်ဖွဲ့က စီးနင်းပစ်ခတ်ခဲ့တာကြောင့် ၂ ဖက် အပြန်အလှန် ပစ်ခတ်မှု စက်တင်ဘာ ၂၇ရက်နေ့ အစောပိုင်းက ဖြစ်ပွားခဲ့တယ်လို့ ချင်းကာကွယ်ရေးတပ်ဖွဲ့ (ကန်ပက်လက်) က သတင်းထုတ်ပြန်လာပါတယ်။

မြို့တွင်းထွေအုပ်ရုံးနဲ့ ပညာရေးရုံးမှာ တပ်စွဲတဲ့ စစ်ကောင်စီတပ်ဖွဲ့ဝင်တွေကို မနက် ၆ နာရီမှာ ချင်းကာကွယ်ရေးတပ်ဖွဲ့ (ကန်ပက်လက်) က ဝင်ရောက် ပစ်ခတ်ခဲ့တာလို့ ပြောပါတယ်။

ကန်ပက်လက်မြို့၊ ထွေအုပ်ရုံးပစ်ခတ်မှုအတွင်း စစ်ကောင်စီတပ်ဖွဲ့ဝင်တချို့ ထိခိုက်၊ သေဆုံးမှုကို အတည်ပြုထားပေမယ့် ပညာရေးရုံးဝန်း ပစ်ခတ်မှုကို အတည်မပြုရသေးဘူးလို့ ဆိုပါတယ်။

မြို့တွင်း ၂ နေရာ ပစ်ခတ်မှု ၆ နာရီလောက် ကြာနိုင်ပြီး ကာကွယ်ရေးတပ်ဖွဲ့ဘက် အထိခိုက်မရှိ ပြန်ဆုတ်ခွာနိုင်တယ်လို့ ထုတ်ပြန်ချက်မှာ ဖော်ပြပါတယ်။

ကန်ပက်လက်မြို့၊ အထွေထွေအုပ်ချုပ်ရေးရုံးကို သိမ်းယူနိုင်ဖို့ အခြေအနေဖြစ်ခဲ့ပေမယ့် တိုက်ခိုက်ရေးအသုံးပစ္စည်း မလုံလောက်တာကြောင့် တပ်ဆုတ်လာရတာလို့လည်း ချင်းကာကွယ်ရေးတပ်ဖွဲ့ (ကန်ပက်လက်) က ပြောပါတယ်။

လက်နက်ကိုင် ၂ ဖက် စစ်ရေးတင်းမာနေတဲ့ ကန်ပက်လက်မှာ ပြည်သူတွေ စစ်ကောင်စီတပ်စခန်း အနီးအနားမှာ နေထိုင်သွားလာတာ မလုပ်ဖို့ ထုတ်ပြန်ချက်မှာ အသိပေးထားပါတယ်။

လက်ရှိမှာ ချင်းကာကွယ်ရေးတပ်ဖွဲ့ (ကန်ပက်လက်) အနေနဲ့ “ဝိတိုရိယသူရဲကောင်း စုပေါင်းအားသစ်လောင်း” ကျပ်သိန်းငါးထောင် Campagin ပြုလုပ်နေပြီး သတ်မှတ်ထားတဲ့ ပမာဏပြည့်မှီဖို့ လိုအပ်နေသေးတယ်လို့လည်း ရန်ပုံငွေရှာဖွေရေးအဖွဲ့ထံက သိရပါတယ်။

========================

📌📌 ၂။ CNC - Mindat နဲ့ မီဇိုရမ် ပြည်နယ်ဝန်ကြီးချုပ် တွေ့ဆုံ

ချင်းအမျိုးသားကောင်စီ (မင်းတပ်) Chin National Council - Mindat တာဝန်ရှိသူတွေကို မီဇိုရမ် ပြည်နယ် ဝန်ကြီးချုပ် ဇိုရမ်းထန်ငါက လက်ခံ တွေ့ဆုံခဲ့တယ်လို့ သိရပါတယ်။

၂၀၂၃ စက်တင်ဘာအစောပိုင်းက အလွတ်သဘော တွေ့ဆုံခဲ့ကြတာလို့ Chin National Council - Mindat တာဝန်ရှိသူ ဆလိုင်းယောမာန်က ပြောပါတယ်။

“အလွတ်သဘော တွေ့တာပါ၊ အဓိက စစ်ရှောင်အရေး ပြောဖြစ်တယ်၊ နောက်ပြီး မူးယစ်ဆေးဝါး သယ်ယူနေတာမျိုးကို ဘယ်လိုတားဆီးဖို့ဆိုတာမျိုးလည်း ပါတယ်။” လို့ ‌ပြောပါတယ်။

စစ်ဘေးဒဏ်ကြောင့် ထွက်ပြေးတိမ်းရှောင်လာသူတွေကို မီဇိုရမ်ပြည်နယ် အစိုးရအနေနဲ့ အကူအညီတွေပေးနေသလို ဆက်လက် ပံ့ပိုးသွားမယ့်အကြောင်း ဒီတွေ့ဆုံပွဲအတွင်း အပြန်အလှန် ပြောဆိုကြတယ်လို့ ဆိုပါတယ်။

မြန်မာပြည်ဘက်က တရားမဝင် မူးယစ်ဆေးဝါးသယ်ယူပြီး ရောင်းဝယ်နေတာတွေကို ဒေသအဖွဲ့အစည်းတွေအနေနဲ့ ဘယ်လိုတားဆီးဖို့ပါ ဆွေးနွေးဖြစ်တယ်လို့ ဆလိုင်းယောမာန်က ဆက်ပြောပါတယ်။

“ခုကာလ နယ်စပ်မှာ မူးယစ်ဆေးတွေ ဖမ်းတာမနည်းဘူး၊ ဒါမျိုးကို ဘယ်လို တားဆီးရမလဲ ဆိုတာမျိုးပေါ့။” လို့ ပြောသွားပါတယ်။

မြန်မာပြည်ဘက်ခြမ်းက သယ်ယူလာတဲ့ မူးယစ်ဆေးဝါးတွေကို မီဇိုရမ်ပြည်နယ် အာဏာပိုင်တွေက ၂ နိုင်ငံနယ်စပ်မှာ တရားခံတွေနဲ့အတူ ဖမ်ဆီးတာ နေ့စဉ်နဲ့အမျှ ရှိနေတဲ့အကြောင်း မီဇိုရမ်ဘက်က လာတဲ့ သတင်းတွေမှာ တွေ့ရပါတယ်။

လူဦးရေ ၁ သန်းခွဲနီးပါး နေထိုင်တဲ့ မီဇိုရမ်ပြည်နယ်မှာ မြန်မာစစ်ကောင်စီရဲ့ အကြမ်းဖက်မှုတွေကြောင့် ထွက်ပြေးတိမ်းရှောင်တဲ့ စစ်ဘေးဒဏ်သင့် ချင်းတိုင်းရင်းသား ၅ သောင်းဝန်းကျင်အထိ ရှိနေပါတယ်။

မီဇိုရမ်ပြည်နယ်ခရိုင်၊ ကော်မရှင်နာရုံးကတော့ စစ်ရှောင်တွေအနေနဲ့ ဒေသအစိုးရထံက အသိအမှတ်ပြုမှု မရှိဘဲ စီးပွားရေးလုပ်ငန်း မလုပ်ဖို့၊ ဥပဒေကို ဆန့်ကျင်တဲ့ ပစ္စည်းတွေ တင်သွင်းရောင်းချတာ မလုပ်ကိုင်ဖို့နဲ့ အစိုးရရဲ့ အသိအမှတ်ပြုမှု၊ ခွင့်ပြုချက် မပါဘဲ အိမ်ခြံမြေ၊ ဝယ်ယူခွင့် မရှိကြောင်း ထုတ်ပြန် ကြေညာထားပါတယ်။

========================

📌📌 ၃။ မတူပီမှာ နောက်ထပ် စစ်ကောင်စီတပ်ဖွဲ့ဝင် ၂ ဦး ကျည်တောင့် ၁၂၀ ကျော်နဲ့ ထွက်ပြေး ခိုလှုံလာ

စစ်ကောင်စီတပ်ဖွဲ့ဝင် ၂ ဦး ကျည်တောင့်၊ လက်ပစ်ဗုံးတွေနဲ့အတူ ထွက်ပြေးခိုလှုံလာတယ်လို့ ချင်းလဲန်ကာကွယ်ရေး တပ်ဖွဲ့ (မတူပီ) တပ်ရင်း ၂ က သတင်းထုတ်ပြန်ပါတယ်။

သူတို့ ၂ ဦးဟာ MA သေနတ်အမျိုးအစား ကျည်တောင့် ၁၂၂ တောင့်၊ လက်ပစ်ဗုံး ၂ လုံးနဲ့အတူ ရောက်လာတာလို့ ထုတ်ပြန်ချက်မှာ ဖော်ပြပါတယ်။

ပြီးခဲ့တဲ့ ရက်ပိုင်းကလည်း မတူပီမြို့အခြေစိုက် ဗျူဟာစခန်းက တပ်ကြပ်ကြီးအဆင့်ရှိသူနဲ့ ဒုတပ်ကြပ်အဆင့်ရှိသူ ၂ ဦး လက်နက် ၂ လက်၊ ကျည်အတောင့် ၅၀၀ ကျော်နဲ့ အလင်းဝင်လာလို့ သူတို့ကို ဆုငွေချီးမြှင့်ခဲ့တယ်လို့ သိရပါတယ်။

အာဏာသိမ်းကာလ ၂ နှစ်ကျော်အတွင်း စစ်ကောင်စီလက်အောက်ကနေ အာဏာဖီဆန်ပြီး ခိုလှုံလာတဲ့ စစ်ကောင်စီတပ်ဖွဲ့ ဝင် ဦးရေ ၁၄၀၀၀ ကျော် ရှိနေတယ်လို့ (NUG) က ၂၀၂၃ စက်တင်ဘာလဆန်းပိုင်းမှာ ထုတ်ပြန်ထားပါတယ်။

========================

📌📌 ၄။ စစ်‌‌ကောင်စီအဖွဲ့ဝင် ကြံ့/ဖွံ့ ဥက္ကဌဟောင်း ဒေါက်တာမှုထန် ယုံကြည်မှု ဆက်ရနေသေး

ဒုတိယ ဗိုလ်ချုပ်ကြီးအဆင့်ရှိသူတွေကို အုပ်ချုပ်ရေး ကောင်စီအဖွဲ့ဝင်ကနေ ထုတ်ပယ်လိုက်ပေမယ့် ‌ဒေါက်တာမှုထန် ကို‌တော့ အဖွဲ့ဝင်အဖြစ် ဆက်လက်ထားရှိတဲ့အကြောင်း စစ်ကောင်စီက ထုတ်ပြန်ပါတယ်။

စုံစမ်းစစ်ဆေးခံနေရတဲ့ ဒုတိယ ဗိုလ်ချုပ်ကြီးမိုးမြင့်ထွန်းနဲ့ ဒုတိယ ဗိုလ်ချုပ်ကြီးစိုးထွဋ်ကို စစ်ကောင်စီအဖွဲ့ဝင်ထဲကနေ ထုတ်ပယ်လိုက်တာ ဖြစ်ပါတယ်။

ယခင် ချင်းပြည်နယ်၊ ကြံ့ခိုင်ရေးနှင့် ဖွံ့ဖြိုးရေးပါတီ ဥက္ကဌ ဒေါက်တာမှုထန်ဟာ စီမံအုပ်ချုပ်ရေးအဖွဲ့ဝင်အဖြစ်ကနေ ၁၅ ရက်ခန့်အကြာမှာ ထုတ်ပယ်ခံရတဲ့ ပူဂင့်ကမ်းလျန်အစား ခန့်အပ်ခံရသူဖြစ်ပြီး ၇ လကျော်ကြာတဲ့အထိ အဖွဲ့ဝင်နေရာ ဆက်ရနေတာပါ။

၂၀၂၃ စက်တင်ဘာအတွင်းမှာ ဒေါက်တာမှုထန်ကို ချင်းပြည်မြောက်ပိုင်း ဖလမ်း၊ တီးတိန်၊ ကလေးမြို့စတဲ့နေရာတွေမှာ တွေ့ဆုံပွဲ ခပ်စိပ်စိပ် ပြုလုပ်လာနေတာလည်း တွေ့ရပါတယ်။

အာဏာသိမ်းကာလအစောပိုင်းက နိုင်ငံတော်စီမံအုပ်ချုပ်ရေးကောင်စီအဖွဲ့ဝင်အဖြစ် ခန့်အပ်ခံရတဲ့ ဦးမောင်းဟာကို လည်း ၂၀၂၃ ဖေဖော်ဝါရီလမှာ ဗဟိုအကြံပေးကောင်စီအဖွဲ့ဝင်အဖြစ် စစ်ကောင်စီက တိုးမြှင့်ခန့်အပ်ထားပါတယ်။