28th OCT 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ အောက်တိုဘာလ ( ၂၈ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မင်းတပ်မြို့တွင်းပစ်၊ခတ်မှု ၁ လဝန်းကျင်အကြာ၊ နောက်ထပ် ၂ ဖက်ပစ်ခတ်မှု ထပ်ဖြစ်

 

မင်းတပ်မှာ စစ်ကောင်စီတပ်ဖွဲ့ဝင်တွေနဲ့ ချင်းကာကွယ်ရေးတပ်ဖွဲ့ (မင်းတပ်) တို့အကြား ပစ်၊ခတ်မှု ထပ်ဖြစ်ခဲ့တယ်လို့ သိရပါတယ်။

 

အောက်တိုဘာ ၂၄ ရက်နေ့ ညသန်းခေါင်ကျော်မှာ ဘဝသစ်ရပ်ကွက်နဲ့ စံပြရပ်ကွက်တွေမှာ ၂ ဖက် ပစ်ခတ်မှု မိနစ်ပိုင်းဖြစ်ပွားခဲ့တာလို့ ကာကွယ်ရေးတပ်ဖွဲ့နဲ့ နီးစပ်သူတွေက ပြောပါတယ်။

 

ဒီဖြစ်စဉ်အပေါ် ချင်းကာကွယ်ရေးတပ်ဖွဲ့ (မင်းတပ်)က တစုံတရာထုတ်ပြန်တာမရှိသေးသလို ထိခိုက်မှုအခြေအနေ ကိုလည်း အတည်မပြုနိုင်သေးပါဘူး။

 

မင်းတပ်မြို့၊ အရှေ့ပြင်ရပ်ကွက်မှာ နေထိုင်သူတဦးကတော့ “ပစ်ကြ ခတ်ကြတာက ရိုးနေပြီ၊ ဘယ်သွားလို့ သွားရမှန်း မသိတော့ နေ,နေရတာပဲ။ ဒီရက်ပိုင်း အရင်လိုတော့မဟုတ်ဘူး၊ အစစ်ဆေး ပိုတင်းကျပ်နေတယ်။” လို့ ပြောပါတယ်။

 

စက်တင်ဘာ စတုတ္ထအပတ်က မင်းတပ်မြို့ အရှေ့ပြင်၊ မြို့အဝင်ဂိတ်စောင့်တွေကို ချင်းကာကွယ်ရေးတပ်ဖွဲ့ (မင်းတပ်) တပ်ရင်း ၁ က စနိုက်ပါနဲ့ တို၊က်ခိုက်တုန်းက ၂ ဖက် ပစ်၊ခတ်မှု နောက်ဆုံးအကြိမ်ဖြစ်ခဲ့တာပါ။

 

ရေ၊ မီးပြတ်တောက်တာ နှစ်ဝက်ခန့်ရှိလာတဲ့ မင်းတပ်မြို့ပေါ်မှာ ဆန်၊ ရိက္ခာဝယ်ခြမ်းဖို့ကိုပါ စစ်ကောင်စီက ကန့်သတ် ထားတယ်လို့ သိရပါတယ်။

 

ကာကွယ်ရေးတပ်နဲ့ စစ်ကောင်စီကြား ပြင်းပြင်းထန်ထန် ထိပ်တိုက်ပစ်၊ခတ်မှုမရှိသေးပေမယ့် ချင်း - မကွေးနယ်စပ်မှာ စစ်ကောင်စီတပ်ဖွဲ့ဝင်တွေ စစ်ကြောင်းထိုးဝင်တာမျိုး ဒီလထဲ ခပ်စိပ်စိပ်ရှိနေပါတယ်။

 

ချင်းကာကွယ်ရေးတပ်ဖွဲ့ (မင်းတပ်) ရဲ့ အောက်တိုဘာ ၁၅ ရက်နေ့ ထုတ်ပြန်ချက်မှာတော့ အရပ်သားပြည်သူအပေါ် စွပ်စွဲဖမ်းဆီးတာများလာလို့ ပြည်သူတွေ သတိနဲ့နေဖို့၊ စစ်ကောင်စီဂိတ်နဲ့ နီးနီးကပ်ကပ်မနေဖို့၊ လက်နက်ကြီး ကျည်ကျကွဲတဲ့ဒဏ်ကနေ အကာအကွယ်ပေးနိုင်တဲ့ ကျင်းတွေထားရှိကြဖို့ စတဲ့အချက်တွေ ပါဝင်ပါတယ်။

 

========================

 

📌📌 ၂။ စစ်ကောင်စီအထိုင် ၄ နေရာကို CDF ကန်ပက်လက်က ထပ်မံ စီးနင်း၊ ထိခိုက်သေ၊ဆုံးမှုရှိဟုဆို

 

ချင်းပြည် တောင်ပိုင်း၊ ကန်ပက်လက်မြို့ပေါ်မှာ စစ်ကောင်စီအထိုင်ချနေတဲ့ နေရာ ၄ ခုကို တပြိုင်တည်း စီးနင်းတိုက် ခိုက်ခဲ့တယ်လို့ ချင်းကာကွယ်ရေးတပ်ဖွဲ့ (ကန်ပက်လက်) က သတင်းထုတ်ပြန်လာပါတယ်။

 

အောက်တိုဘာ ၂၀ ရက်နေ့ မနက်အစော ၆ နာရီမှာ မြို့ပေါ်ထွေအုပ်၊ အထကကျောင်း၊ ရန်အောင်စေတီနဲ့ မြို့နယ်ပညာ ရေးရုံးတွေကို တပြိုင်တည်းတိုက်ခိုက်ခဲ့တာလို့ ပြောပါတယ်။

 

၅ နာရီဝန်းကျင်ကြာနိုင်တဲ့ ၂ ဖက် ပစ်၊ခတ်မှုမှာ စစ်ကောင်စီတပ်ဖွဲ့ဝင် ထိခိုက်သေ၊ဆုံးတာရှိပြီး ကာကွယ်ရေး တပ်ဖွဲ့ဝင် တွေ ထိခိုက်မှုမရှိဆုတ်ခွာနိုင်ခဲ့တယ်လို့ ဆိုပါတယ်။ 

 

ပြီးခဲ့တဲ့ စက်တင်ဘာလနှောင်းပိုင်းကလည်း ကန်ပက်လက်မြို့တွင်း စစ်ကောင်စီတပ်အထိုင် ၂ နေရာကို စီးနင်းပစ်ခတ်ခဲ့လို့ စစ်ကောင်စီတပ်ဖွဲ့ဝင်တချို့ ထိခိုက်၊ သေဆုံးမှု ရှိခဲ့ပါတယ်။

 

စစ်ရေးတင်းမာနေတဲ့ ကန်ပက်လက်မှာ မြို့ပေါ်စစ်ကောင်စီတပ်စွဲတဲ့နေရာ အနီးအနား ပြည်သူတွေ သွားလာတာမလုပ်ဖို့ ကာကွယ်ရေးတပ်ဖွဲ့က အသိပေး ကြေညာထားပါတယ်။

 

========================

 

📌📌 ၃။ ဖမ်းဆီးခံ မင်းတပ်လူငယ် ၂ ဦးအတွက် စစ်ကောင်စီကို ကျပ်သိန်း ၂၀၀ ကျော်ပေးထားပေမယ့် ပြန်လွတ်မလာ

 

မကွေးတိုင်း၊ ဂိတ်တခုမှာ စွပ်စွဲဖမ်းဆီးခံရတဲ့ မင်းတပ်ဒေသခံ ၂ ဦးအတွက် စစ်ကောင်စီက တယောက်ကို ကျပ်သိန်း ၁၀၀ ကျော်စီတောင်းလို့ ငွေသားပေးပို့ခဲ့ပေမယ့် သူတို့ကို ပြန်မလွှတ်ပေးဘူးလို့ သိရပါတယ်။ အသက် ၂၀ ဝန်းကျင်အရွယ် သူတို့ ၂ ဦးဟာ ၂၀၂၃ မေလနှောင်းပိုင်းက မင်းတပ်ကနေ ကျမ်းစာကျောင်းတက်ဖို့ အသွား လမ်းမှာ ဖမ်းဆီးခံရတာပါ။

 

မင်းတပ်မြို့နယ်၊ တိုက်နယ် ၁၁၊ ၁၂ ဒေသခံတွေလို့သာ သိရပြီး သူတို့ကိုယ်ရေး အချက်အလက်အပါအဝင် ဘာကြောင့် ဖမ်းဆီးခံရတယ်ဆိုတာကိုတော့ အတည်မပြုနိုင်သေးပါဘူး။

 

“သိန်း ၁၀၀ ပေးရင် ပြန်လွှတ်မယ်ပြောလို့ ၁ ယောက်အတွက် သူ့အမျိုးထဲကစုပြီး လွှဲကြတယ်၊ ကျန်တယောက်တော့ ဘယ်သူတွေလွှဲပေးလည်း မပြောတတ်ဘူး။” လို့ ဖမ်းဆီးခံရသူတွေနဲ့ နီးစပ်သူက အောက်တိုဘာ ၂၂ က ပြောပါတယ်။

 

စစ်ကောင်စီတပ်ဖွဲ့ဝင်တွေကို ငွေပေးပို့အပြီး ၄ လကျော်ကြာအထိ ဖမ်းဆီးခံထားရသူတွေ ပြန်မလွတ်သေးသလို ထောင်ဒဏ်ချမှတ်ခံရပြီဆိုတဲ့ သတင်းထွက်နေတယ်လို့လည်း သူက ဆက်ပြောပါတယ်။

 

ချင်းကာကွယ်ရေးတပ်ဖွဲ့ (မင်းတပ်) ကတော့ စစ်တပ်အာဏာသိမ်းကာလ ဖမ်းဆီးခံ မင်းတပ်ဒေသခံပြည်သူ ၅၄ ဦးရှိတယ်လို့ ၂၀၂၃ ဧပြီလတုန်းက ထုတ်ပြန်ပါတယ်။

 

ဒါပေမယ့် လက်တွေ့မှာ စွပ်စွဲဖမ်းဆီးခံထားရသူတွေ ဒီအရေအတွက်ထက်ပိုများနိုင်ပါတယ်။

 

========================

 

📌📌 ၄။ စစ်ခေါင်းဆောင် မင်းအောင်လှိုင်အပါအဝင် ၁၀ ဦးကို ဖိလစ်ပိုင်တရားရုံးမှာ အမှုဖွင့်

 

အာဏာသိမ်းစစ်ခေါင်းဆောင် မင်းအောင်လှိုင်အပါအဝင် စစ်တပ်ထိပ်ပိုင်းအရာရှိ ၁၀ ဦးကို စစ်ရာဇဝတ်မှုအတွက် အရေးယူဖို့ ဖိလစ်ပိုင်နိုင်ငံ မနီလာမြို့ တရားရေးဌာနကို တင်သွင်းထားတယ်လို့ ချင်းလူ့အခွင့်အရေးအဖွဲ့ (CHRO) က  အောက်တိုဘာ ၂၅ ရက်နေ့ ထုတ်ပြန်ပါတယ်။

 

အာဏာသိမ်းကာလ ချင်းပြည်၊ ထန်တလန်မြို့မှာ အရပ်သားပြည်သူတွေကို သ၊တ်ဖြတ်တာ၊ ရုပ်အလောင်းတွေကို ဖျက်ဆီးတာ၊ နေအိမ်ရာပေါင်းများစွာနဲ့ ဘုရားကျောင်းတွေကို မီးရှို့ဖျက်ဆီးတာတွေကြောင့် အခုလိုတိုင်ကြားရတာလို့ ဆိုပါတယ်။

 

ဖိလစ်ပိုင်နိုင်ငံရဲ့ ၂၀၀၉ ခုနှစ် နိုင်ငံတကာ လူသားချင်း စာနာမှု အက်ဥပဒေ အရ တိုင်ကြားလိုက်တာလို့လည်း သိရပါတယ်။

 

ဒီဥပဒေအရ ကမ္ဘာ့ဘယ်နိုင်ငံမှာမဆို ဖြစ်ပွားတဲ့ စစ်ရာဇဝတ်မှုတွေကို ကျူးလွန်သူနဲ့ ကျူးလွန်ခံရသူတွေဟာ ဖိလစ်ပိုင် နိုင်ငံသားတွေ ဖြစ်သည်ဖြစ်စေ၊ မဖြစ်သည်ဖြစ်စေ၊ တိုင်ကြားမှု ရှိလာရင် ဖိလစ်ပိုင်အစိုးရက ချက်ချင်း အရေးယူဆောင်ရွက်ပေးဖို့ တာဝန်ရှိတယ်လို့ ပြဌာန်းထားတဲ့အကြောင်း RFA Burmese သတင်းဌာနက ရှေ့နေတွေကို ကိုးကားပြီး ဖော်ပြပါတယ်။

 

စစ်တပ်အာဏာသိမ်း ၂ နှစ်ခွဲကျော်အတွင်း ထန်တလန်နယ်မှာ လူအနည်းဆုံး ၂၅၀ သ၊တ်ဖြတ်ခံခဲ့ရပြီး၊ နေအိမ် ၂၀၀၀ ကျော် မီးရှို့ဖျက်ဆီးခံခဲ့ရသလို ချင်းတိုင်းရင်းသား ၆ သောင်းကျော် အိန္ဒိယနိုင်ငံဘက်ကို ထွက်ပြေးခိုလှုံခဲ့ရတယ်လို့ ချင်းလူ့ အခွင့်အရေးအဖွဲ့ (CHRO)က ထုတ်ပြန်ချက်မှာ ဖော်ပြပါတယ်။

#RadioNUGLocalNews

#SpringRevolution