20h APR 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဧပြီလ ( ၂၀ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ချင်း - ယောဘက် ဦးတည်တဲ့ စစ်ကောင်စီရိက္ခာကား ၇ စီးကို PDF တိုျက်ခိုက်ဖျက်ဆီး

 

မကွေးတိုင်း၊ ပခုက္ကူမြို့ ကနေ ချင်းပြည်၊ ယောဒေသဘက် ဦးတည်ထွက်လာတဲ့ စစ်ကောင်စီကားတန်းကို ကြားဖြတ် တိုက်ခိုက်ပြီး ကား ၇ စီးကို သိမ်းယူ ဖျက်ဆီးခဲ့တယ်လို့ အနောက်လွင်ပြင် ပြည်သူ့ကာကွယ်ရေးတပ်ဖွဲ့ - WPF က ဧပြီ ၅ရက်က သတင်းထုတ်ပြန်ပါတယ်။

ပခုက္ကူမြို့၊ အမှတ် (၁၀၁) ခြေမြန်တပ်ဌာနချုပ်ကနေ မတ်လ ၂၃ ရက်နေ့ကတည်းက ထွက်လာတဲ့ ကားအစီးရေ ၁၀၀ ကျော်ပါ စစ်ကောင်စီယာဉ်တန်းကို တော်လှန်ရေးပူးပေါင်းအဖွဲ့က နေ့တိုင်း ပိတ်ဆို့တို၊က်ခိုက်ခဲ့ပြီး ဧပြီ ၂ ရက်နေ့ ကမ္မမြို့အနီး ရောက်လာတဲ့စစ်ကောင်စီယာဉ်တွေကို ဖျက်ဆီးနိုင်ခဲ့တာလို့ ထုတ်ပြန်ထားပါတယ်။

ထိတွေ့တိုက်ပွဲကြာချိန် မိနစ် (၄၀) ခန့် ကြာမြင့်တဲ့ ဒီစစ်ဆင်ရေးကို အနောက်လွင်ပြင် LPDF၊ ပခုက္ကူ ခရိုင် တပ်ရင်း ၁၃၊ BLY ပြောက်ကြားတပ်ဖွဲ့၊ ဧရာအနောက် ပြောက်ကျားတပ်ဖွဲ့ (ကမ္မတပ်ပေါင်းစု)၊ PDF Kamma (ကမ္မတပ်ပေါင်းစု)၊ PDO/PDA၊ PRF နဲ့ နယ်စီးမခြား ဖရီးဒမ်းဖက်ဒရယ် စစ်ကြောင်း (၁) တို့က ပူးပေါင်းတို၊က်ခိုက်ခဲ့တာလို့လည်း ဆိုပါတယ်။

ပြည်သူ့ကာကွယ်ရေးတပ်ဖွဲ့ တပ်ပေါင်းစုရဲ့ စည်းလုံးညီညွှတ်မှုနဲ့ ဗျူဟာပြောင်မြောက်တိုက်ခိုက်နိုင်ခဲ့ပြီး တော်လှန်ရေး ပူးပေါင်းတပ်ဘက်က အထိအခိုက်မရှိ ဆုတ်ခွာလာနိုင်ခဲ့တယ်လို့ အနောက်လွင်ပြင် ပြည်သူ့ကာကွယ်ရေး တပ်ဖွဲ့ - WPF က သတင်းထုတ်ပြန်ပါတယ်။

 

========================

 

📌📌 ၂။ မင်းတပ်မြို့မှာ နေအိမ် ၂၀ ကျော် မီးလောင်မှုဖြစ်ပွား

 

ချင်းပြည်နယ်၊ မင်းတပ်မြို့မှာ ဧပြီလ ၁၁ ရက်၊ နေ့လည် ၂ နာရီဝန်းကျင်က မီးလောင်မှုဖြစ်ပွားပြီး နေအိမ် ၂၀ ကျော် မီးလောင်ပြာကျသွားတယ်လို့ ဒေသခံဆီက သိရပါတယ်။

"မီးလောင်မှုဖြစ်တာက မင်းတပ်မြို့အဝင် အရှေ့ပြင်ရပ်ကွက်က နေအိမ်တွေဖြစ်ပါတယ်။ မီးငြိမ်းပေးမယ့်လူမရှိတော့ နေအိမ်တော်တော်လေး လောင်သွားပါတယ်။ မီးလောင်တဲ့ နေအိမ်တွေက စစ်ဘေးရှောင်တာ ကြာပြီ။ ဘယ်သူတွေက မီးရှို့တာလည်း မသိဘူး။"လို့ မင်းတပ်ဒေသခံ တစ်ဦးက ဆိုပါတယ်။

မီးလောင်မှု ဖြစ်ပွားတဲ့ နေရာဟာ မင်းတပ်မြို့အဝင် ဂိတ်ဟု သိရပြီး အဲ့ဒီ မြို့အဝင် ဂိတ်မှာ စစ်ကောင်စီ ဂိတ်ရှိသလို အနီးနား ဝန်းကျင်မှာလည်း စစ်ကောင်စီက မိုင်းတွေ ထောင်ထားတယ်လို့ သိရပါတယ်။

အဲ့ဒီ မီးလောင်မှုတွင် အရပ်သား နေအိမ် ၂၁ လုံး မီးလောင်ပြာကျသွားပြီး အိမ်ရှင်တွေဟာ ယခင်က ဖြစ်ပွားတဲ့ တိုက်ပွဲတွင်း ဘေးလွတ်ရာသို့ ထွက်ပြေးတိမ်းရှောင်နေကြတယ်လို့ သိရပါတယ်။

"အရင်က အဲ့ဒီ မင်းတပ်မြို့အဝင် ဂိတ်က စစ်တပ်တွေ ခဏခဏ တိုက်ခိုက်ခံရလို့ အနီးနားက အရပ်သားတွေက မနေရဲတော့ဘဲ ထွက်ပြေးကြတာလေ။ စစ်တပ်ကလည်း သူတို့ တိုက်ခိုက်ခံရတိုင်း အရပ်သား ဖမ်းဆီးမှုတွေ လုပ်တယ်။ အဲ့ဒီ အနီးတဝိုက်က အိမ်တွေလည်း တစ်အိမ်နဲ့ တစ်အိမ် ကပ်လျက်ဆိုတော့ မီးကူးဖို့က လွယ်တယ်။"လို့ အရှေ့ပြင်ရပ် ကွက်က အမျိုးသားတစ်ဦးက ဆိုပါတယ်။

အဆိုပါ မီးလောင်မှုဟာ ညနေ ၆ နာရီ ဝန်းကျင်မှာ မီးငြိမ်းသွားပြီလို့ သိရပါတယ်။ ပြီးခဲ့တဲ့ ဧပြီလ ၁ ရက်နေ့ကလည်း မင်းတပ်မြို့ ဘဝသစ်ရပ်ကွက်မှာ မီးလောင်မှုဖြစ်ပွားပြီး အရပ်သားနေအိမ် ၈ လုံး မီးလောင်ပြကျခဲ့ပါတယ်။

 

========================

 

📌📌 ၃။ မြန်မာစစ်တပ်ကို လေယာဉ်ဆီမရောင်းဖို့ ကုလလူ့အခွင့်အရေးကောင်စီ ဆုံးဖြတ်

 

မြန်မာစစ်တပ်ကို ကုလသမဂ္ဂအဖွဲ့ဝင်နိုင်ငံတွေက လေယာဉ်ဆီမရောင်းချအောင်တောင်းဆိုဖို့ ကုလသမဂ္ဂ လူ့အခွင့်အရေး ကောင်စီက ဆုံးဖြတ်လိုက်တယ်လို့ ဥပဒေရေးရာသတင်းတွေ ရေးသားဖော်ပြနေတဲ့ The Jurist က ဧပြီလ ၆ ရက်နေ့မှာ ဖော်ပြပါတယ်။

လူ့အခွင့်အရေးချိုးဖောက်ရာမှာ အသုံးပြုဖို့အတွက်လို့ သံသယရှိရင် မြန်မာစစ်တပ်ကို လေယာဉ်ဆီအပြင် ထောက်လှမ်းရေးသုံးပစ္စည်း၊ နည်းပညာနဲ့ စစ်လက်နက်တွေကိုပါ ကုလအဖွဲ့ဝင်နိုင်ငံတွေက တင်ပို့ရောင်းချတာ၊ လွှဲပြောင်း ပေးတာတွေမလုပ်အောင် တောင်းဆိုဖို့ ဆုံးဖြတ်လိုက်တာလို့ ဆိုပါတယ်။

အခုလိုတောင်းဆိုဖို့ တရုတ်နိုင်ငံ အပါအဝင် ကုလသမဂ္ဂလူ့အခွင့်အရေးကောင်စီအဖွဲ့ဝင်တွေအားလုံးက ဧပြီလ ၄ ရက်နေ့မှာ ဆုံးဖြတ်ချက် ချမှတ်လိုက်တာလို့ The Jurist က ဖော်ပြပါတယ်။

ဒီဆုံးဖြတ်ချက်ကို အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့ (Amnesty International) က ထောက်ခံကြိုဆိုခဲ့တယ် လို့လည်း ဖော်ပြထားပါတယ်။

ဧပြီလ ၄ ရက်နေ့ကလည်း ကုလသမဂ္ဂလုံခြုံရေးကောင်စီဟာ မြန်မာနိုင်ငံနဲ့ပတ်သက်ပြီး ပထမဆုံးအကြိမ် တံခါးဖွင့် အစည်းအဝေး ကျင်းပခဲ့ပါတယ်။

#RadioNUGLocalNews

#SpringRevolution