8th JUN 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဇွန်လ ( ၈ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မင်းတပ်မြို့နယ် လေကြောင်းတိုက်ခိုက်ခံရ၊ အရပ်သား တဦးပွဲချင်းပြီး သေဆုံး

 

မင်းတပ်မြို့နယ် တိုက်နယ် ၁ ဘက်ခြမ်းရှိ ကျေးရွာတစ်ရွာကို စစ်ကောင်စီလေတပ်က လေကြောင်းတိုက်ခိုက်တာကြောင့် အရပ်သား တစ်ဦးပွဲချင်းပြီးသေဆုံးပြီး သုံးဦးဝန်းကျင် ထိခိုက်ဒဏ်ရာရတယ်လို့ သိရပါတယ်။

 

ဇွန်လ ၅ ရက် ညသန်းခေါင် ၁၂ နာရီကျော်မှာ ၄ ကြိမ်ထက်မနည်း လေကြောင်းတိုက်ခိုက်ခံရတာပါ။

 

“ပေါင် ၂၅၀ လား၊ ၅၀၀ နဲ့ ပစ်တာလားမသိဘူး၊ တယောက်က ပွဲချင်းပြီးသေတယ်၊ ဒဏ်ရာရသူလည်း ရှိတယ်၊ အိမ်သုံးလုံးထိတာ၊ ငါ့အိမ်ဘေးမှာပဲ။” လို့ မျက်မြင်တစ်ဦးက ပြောပါတယ်။

 

စစ်ကောင်စီလေတပ်ရဲ့ ဗုံးကျဲတိုက်ခိုက်မှုကြောင့် သေဆုံးသူဟာ အသက် ၆၀ ဝန်းကျင်အရွယ်အမျိုးသား စီးပွားရေး လုပ်ငန်းရှင်တစ်ဦးဖြစ်ပြီး စစ်ဘေးရှောင်နေရသူလို့ သိရပါတယ်။

 

ထိခိုက်ဒဏ်ရာရသူတွေဟာ အမျိုးသမီးတွေဖြစ်ပြီး အသက်အန္တရာယ် မစိုးရိမ်ရလောက်ဘူးလို့ မျက်မြင်တွေက ဆိုပါတယ်။

 

မေ ၃၀ ညနက်ပိုင်းကလည်း မင်းတပ်မြို့နယ် တိုက်နယ် ၂ ဘက်မှာ ဗုံးကျဲ တိုက်ခိုက်ခံရလို့ ဒဏ်ရာအသေးစားရတဲ့လူ ၅ ဦးနဲ့ အိမ် ၇ လုံးဝန်းကျင် ပျက်စီးခဲ့ရပါတယ်။

 

========================

 

📌📌 ၂။ ဖလမ်းမှာ တပ်ကြပ်ကြီးတစ်ဦးအပါအဝင် ရဲ ၃ ဦး လက်နက်ခဲယမ်းနဲ့အတူ အလင်းဝင်

 

ချင်းပြည်၊ ဖလမ်းမြို့ စစ်ကောင်စီလက်အောက်ခံ ရဲတပ်ကြပ်ကြီး အပါအဝင် ရဲတပ်ဖွဲ့၀င် ၃ ဦး လက်နက်နဲ့အတူ CNO/CNDF ထံ အလင်းဝင်ရောက်လာတယ်လို့ Chin National Organizationက ထုတ်ပြန်ပါတယ်။

 

အလင်းဝင်လာသူတွေဟာ G3 သေနတ်တစ်လက်၊ H. Gernades လက်ပစ်ဗုံး ၄ လုံး၊ 7.62 ကျည်ဆန် ၁၈၅ တောင့်၊ ကျည်ဘောက် ၃ ခု ရဲတပ်သား ဟွာခန့်စိန် မှ လက်ပစ်ဗုံး ၂ လုံး၊ 7.62 ကျည်ဆံ ၁၀၅ တောင့်နဲ့အတူ အလင်းဝင်ရောက်လာကြတာလို့ ပြောပါတယ်။

 

သူတို့ သုံးဦးကို လွတ်မြောက်နယ်မြေသို့ ပို့ဆောင်ထားတယ်လို့လည်း Chin National Organizationက ထုတ်ပြန်ထားပါတယ်။

 

========================

 

📌📌 ၃။ မရာအချင်းချင်း ပြန်လည်ပေါင်းစည်းရေး အားစိုက်လုပ်ဆောင်မယ်လို့ MTC ကြေညာ

 

ချင်းပြည်၊ မရာဒေသအခြေစိုက် Maraland Territorial Council/ Maraland Defense Force (MTC/MDF) နဲ့ Interim Maraland Council/Chinland Defense Force-Mara (IMC/CDF-Mara) တို့ ပြန်လည် ပေါင်းစည်းဖို့ အားသွန်ခွန်စိုက်လုပ်ဆောင်မယ်လို့ MTC က ကြေညာချက်တစောင် ထုတ်ပြန်ပါတယ်။

 

Maraland Territorial Council ရဲ့ ဒုတိယအကြိမ် မရာပြည်သူ့ညီလာခံ အရေးပေါ် ကောင်စီအစည်းအဝေးအပြီးမှာ အခုလိုကြေညာချက် ထွက်လာတာပါ။

 

ပြီးခဲ့တဲ့လက Mara Evangelical Church ရဲ့ ကြားဝင်ညှိနှိုင်းပေးမှုနဲ့ မရာတော်လှန်ရေးနှစ်ဖွဲ့ ပြန်လည်ပေါင်းစည်းနိုင်ဖို့ အလားအလာကောင်းတွေ ထွက်ပေါ်လာတာလို့ ဆိုနိုင်ပါတယ်။

 

အချင်းချင်းအကြား ထိတွေ့ပစ်ခတ်မှုမရှိစေရေး၊ မရာပြည်သူလူထု ဘေးကင်းလုံခြုံစွာနေနိုင်ရေးတွေ ဦးထိပ်ထားပြီး မရာအချင်းချင်းငြိမ်းချမ်းရေးနဲ့ ပြန်လည်ပေါင်းစည်းရေး အားစိုက်လုပ်ဆောင်သွားမယ့်အကြောင်း Maraland Territorial Councilရဲ့ ကြေညာချက်မှာ ဖော်ပြထားပါတယ်။

#RadioNUGLocalNews

#SpringRevolution