10 AUG 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ သြဂုတ်လ ( ၁၀ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ထန်တလန်မြို့ စစ်ကောင်စီတပ်ကုန်းကို Chinland Council ပူးပေါင်းတပ်က တိုက်ခိုက် သိမ်းပိုက်။

 

ချင်းမြောက် ထန်တလန်အခြေစိုက် စစ်ကောင်စီ အမှတ် ၂၆၉ ခြေလျင်တပ်ရင်း စခန်းကုန်းကို Chinland Council ပူးပေါင်းတပ်က သိမ်းပိုက်ထားကြောင်း သိရပါတယ်။

CNF/A ပြောခွင့်ရ ဆလိုင်းထက်နီကလည်း ဒီဖြစ်စဉ် အတည်ပြုထားတယ်လို့ Chin World ရဲ့ သတင်းတပုဒ်မှာ ဖော်ပြပါတယ်။

အမှတ် ၂၆၉ ခြေလျင်တပ်ရင်းဟာ ထန်တလန်မြို့နဲ့ တီးတိန်မြို့တွေမှာ အခြေစိုက်ထားတဲ့ စစ်ကောင်စီ တပ်ရင်းတစ်ခုပါ။ ထန်တလန်ကနေ အနီးဆုံးဖြစ်တဲ့ ဟားခါးမှာတော့ ခလရ ၂၆၆ နဲ့ စစ်ဗျူဟာတည်ရှိပြီး ဖလမ်းမြို့မှာ ခလရ ၂၆၈ အခြေစိုက်ထားပါတယ်။

ဒီရက်ပိုင်း ဟားခါး - ထန်တလန်အကြား Chinland Council ပူးပေါင်းတပ်က စစ်ရေးအရှိန်မြှင့်နေပြီး ပြီးခဲ့တဲ့ ဇူလိုင်လကုန်ပိုင်းကလည်း စစ်ကောင်စီတပ်စွဲတဲ့ စခန်း ၆ ခုကို သိမ်းပိုက်ရရှိတယ်လို့ Chinland Information Center က သတင်းထုတ်ပြန်ခဲ့ပါတယ်။

 

========================

 

📌📌 ၂။ မတူပီလွတ်မြောက်ရေးမှသည် အဖိနှိပ်ခံပြည်သူလူထု လွတ်မြောက်ရေး မဟာမိတ်တွေနဲ့အတူ ပူးပေါင်း တိုက်ပွဲဝင်သွားမယ်လို့ Yaw Army ကြေညာ။

 

ချင်းပြည်၊ မတူပီမြို့ လွတ်မြောက်ရေးမှသည် ယောဒေသအပါအဝင် အဖိနှိပ်ခံပြည်သူလူထုတရပ်လုံး လွတ်မြောက်ရေးအတွက် မဟာမိတ်တွေနဲ့အတူ ပူးပေါင်းတိုက်ပွဲဝင်မယ်လို့ Yaw Army က ဩဂုတ် ၅ ရက်နေ့ သတင်းထုတ်ပြန်ပါတယ်။

Yaw Army ဟာ ယောဒေသအခြေစိုက် တော်လှန်ရေးအင်အားစုဖြစ်ပြီး ၂၀၂၄ ဇွန်လအတွင်း ဖော်ဆောင်တဲ့ ‘ချင်းညီနောင်’ စစ်ဆင်ရေး မတူပီမြို့သိမ်းတိုက်ပွဲမှာ အစအဆုံးပါဝင် တိုက်ပွဲဝင်ခဲ့ပါတယ်။

မကွေးတိုင်း၊ ယောဒေသမှာ ယောတပ်တော် (Yaw Army) အပြင် ယောကာကွယ်ရေးတပ် (YDF)၊ ယောဒေသ ပြည်သူ့ကာကွယ်ရေးတပ် (YPDF) နဲ့ NUG လက်အောက်ရှိ ဒေသခံ ပြည်သူ့ကာကွယ်ရေးတပ်မတော် (PDF) တချို့လည်း အခြေချလှုပ်ရှားနေကြပါတယ်။

 

========================

 

📌📌 ၃။ လားရှိုး (ရမခ) အပြီးသိမ်းပိုက်လိုက်ခြင်းဟာ ပြီးပြည့်စုံတဲ့အောင်ပွဲလို့ MNDAA ကြေညာ။

 

စစ်ခေါင်းဆောင် မင်းအောင်လှိုင်ရဲ့ လားရှိုးအခြေစိုက် အရှေ့မြောက်တိုင်းစစ်ဌာနချုပ်ကို ဩဂုတ် ၃ ရက်နေ့လယ် ၁၂ နာရီ မိနစ် ၂၀ မှာ အပြီးသတ်သိမ်းပိုက်ရရှိတယ်လို့ MNDAA ဘက်က ဓာတ်ပုံနဲ့တကွ ကြေညာလိုက်ပါတယ်။

လားရှိုးစစ်ဆင်ရေးဟာ ကိုးကန့်တပ်အတွက် ပြီးပြည့်စုံတဲ့ အောင်ပွဲလို့လည်း ဆိုပါတယ်။

လားရှိုးမှာ နှစ်ဖက်တိုက်ပွဲပြင်းထန်တာ ၁ လဝန်းကျင်အထိရှိခဲ့ပြီး စစ်ကောင်စီဘက်ကလည်း ကုန်းကြောင်း၊ လေကြောင်းကနေ အပြင်းအထန် ခုခံခဲ့တာပါ။

စစ်ကောင်စီဘက်ကတော့ လားရှိုး (ရမခ) နဲ့ ပတ်သက်လို့ သတင်းထုတ်ပြန်တာမျိုး မရှိသေးသလို မြန်မာ့စစ်တပ်သမိုင်းတလျှောက် တိုင်းစစ်ဌာနချုပ်ကြီးတခု ပထမဆုံးကျဆုံးမှု ဖြစ်တယ်လို့လည်း သိရပါတယ်။

 

========================

 

📌📌 ၄။ မြန်မာ့အရေး နိုင်ငံတကာနဲ့ တွေ့ဆုံနေတယ်လို့ NUG ဝန်ကြီး ဒေါက်တာဆာဆာ ပြော။

 

မြန်မာ့နိုင်ငံအရေးနဲ့ ပတ်သက်လို့ ဥရောပနိုင်ငံတွေနဲ့ တွေ့ဆုံနေတယ်လို့ NUG အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီး ဒေါက်တာဆာဆာ ပြောကြားလိုက်ပါတယ်။

BBC မြန်မာပိုင်းက အခုဩဂုတ်လဆန်း ထုတ်လွှတ်တဲ့ သီးသန့်တွေ့ဆုံမေးမြန်းခန်းမှာ အခုလို ပြောသွားတာပါ။

“မြန်မာနိုင်ငံအနေနဲ့ လာမယ့်နှစ် ၁၀၊ ၂၀ အတွင်း ကမ္ဘာ့နိုင်ငံရေးပြောတဲ့အခါမှာ အရေးပါတဲ့ အခန်းကနေပါဝင်ဖို့ ကျနော်တို့ စကားပြောနေပါတယ်။” လို့ ဆိုပါတယ်။

NUG အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီး ဒေါက်တာဆာဆာအနေနဲ့ ယူကေ၊ ပြင်သစ်၊ ဂျာမနီ၊ ဆွီဇလန်၊ ဘယ်လ်ဂျီယန်စတဲ့ နိုင်ငံခြားရေးဝန်ကြီးဌာနတွေနဲ့ တွေ့ဆုံနေတာလို့ ပြောပါတယ်။

ဥရောပတခုနဲ့မဟုတ်ဘဲ အာဆီယံဒေသအတွင်းမှာလည်း ပူးပေါင်းဆောင်ရွက်တာမျိုး လိုအပ်နေတယ်လို့လည်း ဆိုပါတယ်။

လက်ရှိ ပြည်တွင်းအခြေအနေတွေနဲ့ ပတ်သက်တဲ့ မေးခွန်းအပေါ်မှာတော့ တိုင်းရင်းသား လ၊က်နက်ကိုင်တွေရဲ့ ရည်မှန်းချက်နဲ့ NUG ရဲ့ ရည်မှန်းချက် တူညီတာကြောင့် ပေါင်းစည်းနိုင်ဖို့ တံခါးဖွင့်ထားကြောင်း NUG အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးက ပြောသွားပါတယ်။

#RadioNUGLocalNews

#SpringRevolution