24 AUG 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ သြဂုတ်လ ( ၂၄ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မင်းတပ်မှာ အချိန်မရွေးတိုက်ပွဲဖြစ်နိုင်၊ တိုက်ပွဲသတင်း ဖြန့်ဝေတာမျိုးမလုပ်ဖို့ CDF မင်းတပ် အမိန့်ထုတ်။

 

မင်းတပ်မှာ စစ်ကောင်စီက လေကြောင်းတိုက်ခိုက်မှု၊ ဒရုန်းတိုက်ခိုက်မှု နေ့စဉ်ရက်ဆက်လုပ်နေတာကြောင့် စစ်ကောင်စီနဲ့ ကာကွယ်ရေးတပ်အကြား အချိန်မရွေးတိုက်ပွဲဖြစ်နိုင်ကြောင်း ချင်းကာကွယ်ရေးတပ်ဖွဲ့ (မင်းတပ်)က အမိန့်ကြေညာချက်တစ်စောင် ထုတ်ပြန်လိုက်ပါတယ်။

နှစ်ဖက်တိုက်ပွဲဖြစ်လာခဲ့ရင် မိဘပြည်သူတွေအနေနဲ့ တိုက်ပွဲသတင်း၊ ထိခိုက်ကျဆုံးမှု၊ တိကျခိုင်လုံမှုမရှိတဲ့ သတင်းတွေကို လူမှုကွန်ယက်ပေါ် ဖြန့်ဝေတာမျိုး လုံးဝ (လုံးဝ) မလုပ်ဖို့လည်း မေတ္တာရပ်ခံထားပါတယ်။

၂၀၂၄ ဩဂုတ်လအတွင်းမှာ ခလရ ၂၇၄ တပ်ရင်းကနေ လက်နက်ကြီးပစ်ခတ်တာကြောင့် စစ်ဘေးရှောင်အမျိုးသမီးတစ်ဦးသေဆုံးပြီး သမီးဖြစ်သူ အသက် ၆ နှစ်ဝန်းကျင်တစ်ဦး ပြင်းထန်ဒဏ်ရာရထားတဲ့အကြောင်း တိကျတဲ့ သတင်းရရှိခဲ့ပါတယ်။

ဒါ့အပြင် စစ်ကောင်စီလေကြောင်းတိုက်ခိုက်မှုနဲ့ ဒရုန်းတိုက်ခိုက်မှုတွေကြောင့်လည်း မင်းတပ်မြို့နယ်ကျေးရွာတချို့မှာ ထိခိုက်ဆုံးရှုံးမှုတွေ ရှိနေတာပါ။

စစ်ကောင်စီလေကြောင်းတိုက်ခိုက်မှု ဆက်တိုက်ပြုလုပ်နေတာကြောင့် ပြည်သူတွေအနေနဲ့ လေကြောင်းသတိရှိကြဖို့လည်း ချင်းကာကွယ်ရေးတပ်ဖွဲ့ (မင်းတပ်)က အခုရက်သတ္တပတ်အတွင်း ၂ ကြိမ်တိတိ ကြေညာထားပါတယ်။

 

========================

 

📌📌 ၂။ CMI နဲ့ ICNCC ကနဦးညှိနှိုင်းပြီးနောက်မှ ချင်းလဲန်းကောင်စီနဲ့ ချင်းညီနောင်အကြား တိုက်ရိုက်တွေ့ဆုံမှုမျိုး ရှိမည်ဟုဆို။

 

Crisis Management Initiative (CMI) နဲ့ ကြားကာလ ချင်းအမျိုးသားအတိုင်ပင်ခံကောင်စီ (ICNCC)တို့ ကနဦး တွေ့ဆုံပြီးမှသာ ချင်းလဲန်းကောင်စီနဲ့ ချင်းညီနောင်တို့အကြား တိုက်ရိုက်တွေ့ဆုံမှု ရှိလာမယ်လို့ သိရပါတယ်။

ချင်းပြည်ရှိ တော်လှန်ရေးအဖွဲ့တွေအကြား ဖြစ်ပွားနေတဲ့ ပဋိပက္ခတွေ အမြန်ဆုံးဖြေရှင်းဖို့ CMIက ဦးဆောင်တဲ့ တွေ့ဆုံညှိနှိုင်းမှုကို အခုလာမယ့်ရက်သတ္တပတ်အတွင်း အိန္ဒိယနိုင်ငံ၊ နယူးဒေလီမြို့မှာ ကျင်းပဖို့ ရှိနေတာပါ။

“ဒီလထဲ ICNCC ကိုယ်စားလှယ်အနေနဲ့ပဲ CMI ကို သီးသန့် တွေ့ဖို့ပါ။ လက်ရှိဖြစ်နေတဲ့ ပဋိပက္ခတွေ ဘယ်လိုအဖြေရှာကြမလဲဆိုတာ ပွင့်ပွင့်လင်းလင်း ညှိနှိုင်းကြမယ်။” လို့ ချင်းညီနောင် ပြောခွင့်ရ ဆလိုင်းယောမာန်က ပြောပါတယ်။

Crisis Management Initiative (CMI) နဲ့ ကြားကာလ ချင်းအမျိုးသားအတိုင်ပင်ခံကောင်စီ (ICNCC) တို့အကြား တွေ့ဆုံညှိနှိုင်းပြီးနောက်ပိုင်းမှသာ ချင်းလဲန်းကောင်စီနဲ့ ICNCC သော်လည်းကောင်း၊ ချင်းညီနောင်နဲ့သော်လည်းကောင်း တိုက်ရိုက် တွေ့ဆုံမှုမျိုးရှိလာမယ်လို့ ချင်းညီနောင် ပြောခွင့်ရက ဆလိုင်းယောမာန်က ဆိုပါတယ်။

ချင်းတော်လှန်ရေးအဖွဲ့နှစ်ခု ဘယ်ချိန်မှာ တရားဝင်တွေ့ဆုံညှိနှိုင်းမယ်ဆိုတာတော့ အတိအကျ မသိရသေးပါဘူး။

ချင်းပြည်အရေးကို ကြားဝင်ညှိနှိုင်းပေးမယ့် Crisis Management Initiative (CMI) ဟာ ဖင်လန်နိုင်ငံ အခြေစိုက် (NGO) အဖွဲ့အစည်းတစ်ခုဖြစ်ပြီး ၂၀၀၀ ခုနှစ် ဩဂုတ်လမှာ စတင်ဖွဲ့စည်းခဲ့တာလို့ သိရပါတယ်။

 

========================

 

📌📌 ၃။ ထန်တလန်မြို့ကို စစ်ကောင်စီက ဗုံးကြဲ၊ ဟားခါးဗျူဟာကုန်းမှ လက်နက်ကြီးဖြင့်ပစ်ကူပေး။

 

ချင်းပြည်ကောင်စီတပ်နှင့် စစ်ကောင်စီတပ်ဖွဲ့တို့အကြား တိုက်ပွဲပြင်းထန်နေသော ထန်တလန်မြို့ကို စစ်ကောင်စီက လေကြောင်းဖြင့် ဗုံးကြဲတိုက်ခိုက်ခဲ့သည့်အပြင် ဟားခါးမြို့စစ်ဗျူဟာကုန်းမှလည်း လက်နက်ကြီးများဖြင့် အကြိမ်ကြိမ်ပစ်ကူခဲ့သည်ဟု သိရသည်။

ထန်တလန်မြို့ထဲ တိုက်တာအဆောက်အအုံဟောင်းများတွင် ခြေကုပ်ယူထားကြသော စစ်ကောင်စီတပ်သားများကို  ချင်းပြည်ကောင်စီတပ်ဖွဲ့က ဩဂုတ်လ ၂၀ ရက်မနက်ပိုင်းမှာ ပြန်လည်ထိုးစစ်ဆင်တိုက်ခိုက်နေသည့် အတွက် စစ်ကောင်စီတပ်ဖွဲ့က လေကြောင်းနှင့် လက်နက်ကြီးများဖြင့် ပစ်ကူနေခြင်းဖြစ်သည်ဟု ချင်းအမျိုးသားတပ်ဦး CNF ပြောရေးဆိုခွင့်ရှိသူ ဆလိုင်းထက်နီကပြောသည်။

ဇူလိုင်လ ၂၂ ရက်နေ့ကစတင်ခဲ့ကြသော ထန်တလန်မြို့သိမ်းပိုက်နိုင်ရေး Tilim Operation-4 စစ်ဆင်ရေးသည် ယခုဆိုလျှင် တစ်လနီးပါးခန့်ရှိလာပြီဖြစ်ပြီး စစ်ကောင်စီတပ်သားများသည် ထန်တလန်မြို့ထဲက တိုက်တာ အဆောက်အအုံများတွင် ပုန်းခိုကာ မဆုတ်တမ်းခုခံနေကြောင်း ဆလိုင်းထက်နီကပြောသည်။

Tilim Operation-4 စစ်ဆင်ရေးကာလအတွင်းမှာ ထန်တလန်မြို့ပေါ်က စစ်ကောင်စီအမာခံ ခလရ ၂၆၉ တပ်ကုန်း နှင့် ဟားခါး-ထန်တလန် ကြားမှာ အခိုင်အမာတပ်စွဲထားကြသော စစ်ကောင်စီ စခန်းပေါင်းအနည်းဆုံး ၈ ခုကို ချင်းပြည်ကောင်စီက သိမ်းပိုက်နိုင်ခဲ့ကြပြီး စစ်ကောင်စီတပ်သား ၃၀ ထက်မနည်းသေဆုံးပြီဟုသိရသည်။

#RadioNUGLocalNews

#SpringRevolution