14 SEP 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ်  ဘာသာစကား) ထုတ်လွှင့်မှု အစီအစဥ် ၂၀၂၄ စက်တင်ဘာလ ( ၁၄ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ မင်းတပ်အပါအဝင် မြန်မာပြည်အနှံ့ လေကြောင်း ဗုံးကြဲခံနေရ၊ တစ်ရက်တည်း သေဆုံးသူ ၃၀ ဝန်းကျင်အထိရှိနေ။

 

တော်လှန်ရေးအင်အားစုတွေကို ထိုက်သင့်တဲ့ တုံ့ပြန်မှုလုပ်မယ်လို့ စစ်ခေါင်းဆောင် မင်းအောင်လှိုင်ရဲ့ ပြောဆိုမှုအပြီး မင်းတပ်မြို့နယ်အပါအဝင် မြန်မာပြည်အနှံ့မှာ လေကြောင်းဗုံးကြဲတိုက်ခိုက်မှု ဆက်တိုက် ခံနေရပါတယ်။

စက်တင်ဘာ ၆ ရက် မနက်အစောပိုင်း မင်းတပ်မြို့နယ်၊ တိုက်နယ် ၄ ဘက် လေကြောင်းတိုက်ခိုက်ခံရတာဖြစ်ပြီး အရပ်သားပြည်သူ ထိခိုက်တာမရှိပေမယ့်၊ အဆောက်အအုံတချို့ ထိတယ်လို့ မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ပြောပါတယ်။

မကွေးတိုင်း၊ မြိုင်မြို့နယ်မှာလည်း စက်တင်ဘာ ၆ ရက် နေ့လယ်ပိုင်းမှာ လေကြောင်း ဗုံးကြဲခံရလို့ မိသားစုတစ်ခုတည်းက လေးဦးသေဆုံးပြီး နောက်ထပ် အမျိုးသမီးတစ်ဦး သေဆုံးကြောင်း Mandalay Free Press – MFP က ဖော်ပြပါတယ်။

မြိုင်မြို့နယ် လက်ယက်မရွာ စာသင်ကျောင်းကို စစ်ကောင်စီလေတပ်က ပေါင် ၃၀၀ ဗုံးသီးကြဲချတာအပြင် စက်လက်နဲ့ပါ ပစ်ခတ်သွားတာလို့ ဆိုပါတယ်။ ဗုံးခိုကျင်းထဲ ဝင်ပုန်းနေတဲ့ ကလေးငယ်အပါအဝင် လူ ၅ ဦး နေရာတင် အသက်ဆုံးရှုံးရတာပါ။

နောက်ပြီး စက်တင်ဘာလ ၅ ရက်နေ့ ည ၉ နာရီအချိန်နဲ့ စက်တင်ဘာ ၆ ရက်မနက်အစောပိုင်းမှာ ကရင်နီ၊ ရှမ်းမြောက် နမ့်ခမ်းမြို့မှာ လေကြောင်း ဗုံးကြဲတိုက်ခိုက်ခံရလို့ ကလေးသူငယ်၊ အမျိုးသမီးစုစုပေါင်း လူ ၂၀ ဦးထက်မနည်း သေဆုံးပြီး အများအပြားထိခိုက်ဒဏ်ရာရတဲ့ ဖြစ်စဉ် ဖြစ်ပွားခဲ့ပါတယ်။

စစ်ခေါင်းဆောင် မင်းအောင်လှိုင်က တော်လှန်ရေးအင်အားစုတွေကို လိုအပ်သလို တုံ့ပြန်မယ်လို့ ပြောဆိုခဲ့ပြီးနောက်ပိုင်း အရပ်သားပြည်သူတွေ နေထိုင်ရာအနှံ့မှာ အခုလိုလေကြောင်းတိုက်ခိုက်ခံရမှု ဆက်တိုက်ဖြစ်ပွားနေတာ ဖြစ်ပါတယ်။

 

========================

 

📌📌 ၂။ စစ်ရှုံး စစ်ကောင်စီရဲ့ အကြမ်းဖက်လေကြောင်းတိုက်ခိုက်မှုသက်သေကို ယဉ်ကျေးတဲ့ နိုင်ငံတကာအဖွဲ့အစည်းထံ ပေးပို့မယ်လို့ မြောက်ပိုင်းညီနောင် ၃ ဖွဲ့ထုတ်ပြန်။

 

စစ်ရှုံးစစ်ကောင်စီရဲ့ မြန်မာပြည်အနှံ့လေကြောင်းတိုက်ခိုက်မှု သက်သေတွေကို ယဉ်ကျေးတဲ့ နိုင်ငံတကာအဖွဲ့အစည်းတွေထံ ပေးပို့သွားမယ်လို့ မြောက်ပိုင်းညီနောင် ၃ ဖွဲ့ (AA+MNDAA+TNLA) က ကြေညာချက် ထုတ်ပြန်ပါတယ်။

စစ်ခေါင်းဆောင် မင်းအောင်လှိုင်က ၂၀၂၄ စက်တင်ဘာပထမအပတ်ထဲ တောင်ကြီးမြို့ရောက်ရှိစဉ် တော်လှန်ရေးအင်အားစုတွေ သိမ်းပိုက်နေရာယူထားတဲ့ မြို့ရွာမှာ သတင်းရရှိမှုအပေါ် မူတည်ပြီး တုံ့ပြန်မယ်လို့ ပြောဆိုခဲ့ပြီး ရက်သတ္တပတ်အတွင်း မြန်မာပြည်အနှံ့လေကြောင်း ဗုံးကြဲတိုက်ခိုက်မှု ဆက်တိုက်ခံနေရတာပါ။

အထူးသဖြင့် ရှမ်းမြောက်၊ ရခိုင်၊ ကရင်နီ၊ ချင်းတောင်၊ မကွေး၊ စစ်ကိုင်းတို့ကို ပစ်မှတ်ထား ဗုံးကြဲတိုက်ခိုက်နေတာဖြစ်ပြီး မြို့ရွာတွေကို ဆက်လက်ဗုံးကြဲမယ်လို့လည်း စက်တင်ဘာ ၉ ရက်ထုတ် သတင်းစာကနေ ခြိမ်းခြောက်ထားပါသေးတယ်။

စစ်ကောင်စီ လေကြောင်းတိုက်ခိုက်မှုကြောင့် အခုရက်သတ္တပတ်အတွင်း အရပ်သား၊ ကလေးသူငယ်၊ အမျိုးသမီးအပါအဝင် ရဟန်းရှင် ၁၀၀ ထက်မနည်း အသက်ဆုံးရှုံးခဲ့ပါတယ်။

ဒီလို လူသားမျိုးနွယ်စုအပေါ် လက်ရဲဇက်ရဲကျူးလွန်နေတဲ့ စစ်ကောင်စီလေတပ်ရဲ့ လေကြောင်းတိုက်ခိုက်မှုကို မြန်မာတနိုင်ငံလုံးရှိ မိဘပြည်သူတွေအနေနဲ့ အထူးသတိပြုကြဖို့လည်း မြောက်ပိုင်းညီနောင် (၃)ဖွဲ့က တိုက်တွန်းထားပါတယ်။

 

========================

 

📌📌 ၃။ တိုင်ဖွန်းမုန်တိုင်းအရှိန်ကြောင့် မြန်မာပြည်အလယ်ပိုင်း မိုးများပြီး ရေလွှမ်းမှုဖြစ်နေ၊ ချင်းပြည်မှာ မိုး‌များနေ။

 

တိုင်ဖွန်းမုန်တိုင်း(YAGI)အရှိန်ကြောင့် မိုးများပြီး စစ်တောင်းမြစ်စိုးရိမ်ရေအမှတ်ထိရောက်နေသလို မြန်မာနိုင်ငံ အလယ်ပိုင်းဒေသ၊ ထိုင်း - မြန်မာနယ်စပ်တွေမှာ ရေကြီး၊ ရေလွှမ်းမှုတွေ ဖြစ်ပွားနေပါတယ်။

နေပြည်တော်၊ မန္တလေး၊ ပဲခူး၊ မွန်၊ ကရင်၊ ရှမ်းပြည်ရှိ မြို့နယ်တွေမှာ ရေကြီးမှုတွေ အကြီးအကျယ် ဖြစ်ပေါ်နေတာပါ။

တိုင်ဖွန်းမုန်တိုင်း (YAGI) အကြွင်းအကျန်ဟာ စက်တင်ဘာ ၁၁ ရက် ညပိုင်းမှာတော့ မြန်မာပြည် အနောက် - အနောက်မြောက်ဘက်ကို ဆက်ရွေ့ပြီး စစ်ကိုင်းတိုင်း၊ ကလေးမြို့ပေါ်ကိုရောက်လာနိုင်ကြောင်း မိုးလေဝသကျွမ်းကျင်သူ ဦးဝင်းနိုင်က ခန့်မှန်းထားပါတယ်။

နောက်တစ်ရက် စက်တင်ဘာ ၁၂ ရက် မနက်အစောပိုင်းမှာတော့ အဲဒီလေပွေလှိုင်းဟာ ရခိုင်မြောက်ပိုင်းနဲ့ ချင်းပြည်ရဲ့ အပေါ်ရောက်နိုင်ပြီး အနောက်ဘက်ကို ဆက်လက်ရွေ့လျားမယ်လို့ သူက ခန့်မှန်းပါတယ်။

တိုင်ဖွန်းမုန်တိုင်း (YAGI) အကြွင်းအကျန် ဖြတ်သွားတဲ့အရှိန်ကြောင့် အဲဒီဒေသတွေမှာ မိုးများမယ်လို့လည်း သိရပါတယ်။

#RadioNUGLocalNews

#SpringRevolution