25th OCT 2024 - Evening Daily News by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ အောက်တိုဘာလ ( ၂၆ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ မင်းတပ်မြို့နယ် - Daai(ဒိုင်ရ်)ဒေသတွင် တောင်ယာစပါးများ ပျက်စီး၊ တောင်သူများ အကူအညီလိုအပ်နေ။

 

မင်းတပ်မြို့နယ် တိုက်နယ်အမှတ် ၁၀/၁၃ Daai(ဒိုင်ရ်)ဒေသမှာ တောင်ယာစပါး ပျက်စီးမှုကြောင့် တောင်သူတွေ စားဝတ်နေရေး အခက်အခဲ ရင်ဆိုင်နေကြရတယ်လို့ သိရပါတယ်။ တောင်ယာစပါးတွေ အခုလို ပျက်စီးတာဟာ တိုင်ဖွန်း မုန်တိုင်း ရာဂီ (Yagi) ရဲ့ သက်ရောက်မှုကြောင့် တောင်ယာကမ်းပါးတွေ ပြိုကျတာ၊ မုန်တိုင်းနောက်ဆက်တွဲ လေပြင်းတိုက်ခတ်မှုတွေကြောင့် တောင်ယာစပါးတွေ ပျက်စီးတာ၊ စပါးပိုးတွေ ဖျက်ဆီးတာစတဲ့ အခြေအနေရှိနေတယ်လို့ ဒေသခံတွေက ပြောဆိုကြကြောင်း The Mindat Postမှာ ရေးသားထားပါတယ်။

“ဒီဟာက မုန်တိုင်းနောက်ဆက်တွဲ မိုးကြီးရေလျှံမှုတွေကြောင့် တောင်ယာ ကမ်းပါးတွေ ပြိုတယ်၊ လေပြင်းတိုက်ခတ်မှုတွေကြောင့် စပါးနှံတွေ ပျက်စီးကုန်တယ်၊ နောက်ပြီး စပါးပိုးတွေ ဖျက်ဆီးလို့လည်း ပါမယ်ပေါ့။ တောင်ယာခင်းတွေ မြေပြိုပြီး စပါးခင်းမရှိတော့တဲ့ တောင်သူတွေလည်းရှိတယ်။” လို့ ဒေသခံတစ်ဦးဖြစ်တဲ့ ဆလိုင်းယိမ်းပီးဟုန်းက ပြောဆိုကြောင်း The Mindat Postက ဖော်ပြပါတယ်။

 

အခုလို တောင်ယာ စပါးခင်းတွေပျက်စီးတာကြောင့် တစ်နှစ်ပတ်လုံး လုပ်အားစိုက်ထုတ်ပြီး အချိန်ပေးကြိုးစားလုပ်ဆောင်ခဲ့သမျှ အလုံးစုံဆုံးရှုံးသွားသူတွေလည်း ရှိနေပါတယ်။ “တစ်နှစ်လုံးလုံး ကြိုးစားပြီးလုပ်အားနဲ့ အချိန်ပေး တောင်ယာလုပ်လာကြတာ အခုလိုပျက်စီးသွားတော့ စားနပ်ရိက္ခာအတွက် တောင်သူတွေ တော်တော်ကို အခက်အခဲကြုံရပါတယ်၊ အဲဒါနဲ့ ပတ်သက်ပြီး လူသားချင်းစာနာမှု အကူအညီအထောက်အပံ့တွေလည်း တော်တော်ကို လိုအပ်တယ်လို့ ပြောလို့ ရတယ်။” လို့ ဆလိုင်းယိမ်းပီးဟုန်းက ဆက်ပြီးပြောပြပါတယ်။

 

ရပ်ဝေး/နိုင်ငံခြား ရောက်ဒေသခံတွေအပါအဝင် နိုင်ငံတကာနဲ့ ပြည်တွင်းက လူသားချင်း စာနာထောက်ထားရေး အဖွဲ့အစည်း NGO/INGO တွေ အနေနဲ့ တောင်သူတွေကို အကူအညီပေးစေချင်ကြောင်းလည်း ဒေသခံတွေက ပြောပါတယ်။ အကယ်၍ အကူအညီပေးမယ်ဆိုရင်လည်း သတင်းအချက်အလက်အတိကျ ကောက်ယူပြီး မြေပြင်မှာရှိနေတဲ့ အဖွဲ့အစည်းတွေကို တိုက်ရိုက်ချိတ်ဆက်ပြီးပံ့ပိုးပေးဖို့လည်း ဒေသခံတွေက ပြောပါတယ်။

 

========================

 

📌📌 ၂။ ယောဗျူဟာအတွက် NUGက လက်နက်တပ်ဆင်။

 

မကွေးတိုင်း၊ ဂန့်ဂေါခရိုင်၊ ယောဗျူဟာတပ်ရင်းကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက အောက်တိုဘာ ၂၀ ရက်နေ့မှာ လက်နက်တပ်ဆင်ပေးခဲ့ပါတယ်။

 

မကွေးတိုင်း၊ ယောဒေမှာ ဂန့်ဂေါခရိုင်အမှတ် (၁၃၊ ၁၅၊ ၁၆၊ ၁၇၊ ၁၈) တပ်ရင်း ၅ ရင်းပါဝင်တဲ့ ဗျူဟာဖွဲ့စည်းလေ့ကျင့်ခဲ့ကြတာ ၂ လနီးပါးရှိခဲ့ပြီး ယောဗျူဟာအတွက် လိုအပ်တဲ့ လက်နက်တွေကို NUG က တပ်ဆင်ပေးခဲ့တာလို့ ထုတ်ပြန်ထားကြပါတယ်။

 

ဂန့်ဂေါခရိုင်အမှတ် (၁၃၊ ၁၅၊ ၁၆၊ ၁၇၊ ၁၈) တပ်ရင်းဟာ အမှတ် ၁ စစ်ဒေသမှာပါဝင်ပြီး ဆောမြို့နယ်၊ ကျောက်ထုမြို့နယ်နဲ့ ထီးလင်းမြို့နယ်အခြေစိုက် PDF တွေ ဖြစ်ပါတယ်။

 

========================

 

📌📌 ၃။ စစ်သုံ့ပန်းအဖြစ် ထိန်းသိမ်းခံရတဲ့ ဝေယံမိုးသက်က အသက်တာပြောင်းလဲနေပြီလို့ပြော။

 

စစ်သုံ့ပန်းအဖြစ် ဖမ်းဆီးထိန်းသိမ်းခံရတဲ့ အတောအတွင်း သူ့အသက်တာပြောင်းလဲနေပြီလို့ Tiktok ဆယ်လီ ဝေယံမိုးသက်က ပြောပါတယ်။

 

“လူချင်းခွဲခြားဆက်ဆံမှု မလုပ်ရဘူး၊ စည်းလုံးညီညွတ်ရမယ်၊ ကဲ့ရဲ့ရှုတ်ချတာမျိုးမလုပ်ရဘူး။ အကျပ်အတည်းကာလမှာ တပါးသူကို ဖေးမရမယ်ဆိုတာ ခရစ်ယာန်သမ္မာ ကျမ်းစာထဲမှာ ပုံမှန်ဖတ်ဖြစ်တယ်။” လို့ PDF – Zoland ရဲ့ လူမှုကွန်ရက်မှာ ဖော်ပြတဲ့ ရုပ်သံဖိုင်တခုမှာ သူကဆိုပါတယ်။

 

ဝေယံမိုးသက်ကို ၂၀၂၃ နိုဝင်ဘာနှောင်းပိုင်းက တီးတိန်မြို့နယ် ကနေဒီတောင်စစ်ကောင်စီ စခန်းသိမ်းပိုက်မှုအတွင်း စစ်သုံ့ပန်း ၁၁ ဦးနဲ့အတူ PDF – Zoland က ဖမ်းဆီးခဲ့တာပါ။

 

‘မှတ်မိသေးလားဗျ ကျနော့်နာမည် ဝေယံမိုးသက်ပါ။’ ဆိုတဲ့အသုံးအနှုန်းနဲ့ လူသိများသူ ဝေယံမိုးသက်ဟာ Tiktok လူမှုကွန်ရက်မှာ ဖော်လိုဝါ ၆ သိန်းခွဲကျော် ရှိပါတယ်။

#RadioNUGLocalNews

#SpringRevolution