01 Feb 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဖေဖော်ဝါရီလ ( ၁ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ စစ်ရေးအရှိန်မြှင့်မယ်လို့ ယောကာကွယ်ရေးတပ် ကြေညာ။

 

မြို့သိမ်းတိုက်ပွဲ စစ်ရေးအရှိန်မြှင့်တင်သွားမယ်လို့ ယောကာကွယ်ရေးတပ် - YDF ဗဟိုစစ်ချုပ်ရုံးက ကြေညာချက် ထုတ်ပြန်လာပါတယ်။

မြို့သိမ်းစစ်ဆင်ရေးကာလမှာ ဖြစ်ပေါ်လာနိုင်တဲ့ စစ်ဘေးအန္တရာယ်အတွက် ပြည်သူတွေအနေနဲ့ ကြိုတင် ပြင်ဆင်ကြဖို့၊ မိမိတို့ အဖိုးတန်ပစ္စည်း၊ ရိက္ခာ၊ ဆေးဝါးတွေ ကြိုတင်ဆောင်ထားကြဖို့ဆိုတဲ့ အသိပေးပန်ကြားချက်တွေလည်း အဲဒီကြေညာချက်မှာ ပါဝင်ပါတယ်။

ဒါ့အပြင် ၄နှစ်ဝန်းကျင်ကာလအတွင်း စစ်ကောင်စီရဲ့ လူ့အခွင့်အရေး ချိုးဖောက်မှုတွေကြောင့် ပြည်သူ့အသက် အိုးအိမ်စည်းစိမ်တွေ ဆုံးရှုံးပျက်စီးခဲ့ရသလို ဒီလိုဖြစ်စဉ်အပေါ် ထပ်ဆင့်ပြီး အုပ်ချုပ်ရေးတာဝန်ယူထားသူ တာဝန်ရှိတွေအနေနဲ့ ပြည်သူလူထုအပေါ် အထောက်အထားမဲ့ ငွေကြေးကောက်ခံတာမျိုး မလုပ်ကြဖို့ တိုက်တွန်းထားပါတယ်။

ပြည်သူလူထု ရွေးချယ်တင်မြှောက်တဲ့ အုပ်ချုပ်ရေးယန္တရား ပြန်လည်ဖွဲ့စည်းချိန်ကျရောက်ပြီဆိုတဲ့ နှိုးဆော်ချက်လည်း ယောကာကွယ်ရေးတပ်ရဲ့ ထုတ်ပြန်ချက်မှာ တွေ့ရပါတယ်။

ပြည်သူလူထုက ထောက်ပံ့တဲ့ ငွေကြေးတွေဟာ အမှန်တကယ် မြို့သိမ်းတိုက်ပွဲဖော်ဆောင်မယ့် တော်လှန်ရေးအင်အားစုဆီ ရောက်ဖို့အထူးလိုအပ်နေတယ်လို့ ယောကာကွယ်ရေးတပ်ဖွဲ့ - YDF က အသိပေးပါတယ်။

ယောကာကွယ်ရေးတပ်ဖွဲ့ - YDF ဟာ မကွေးတိုင်း ဂန့်ဂေါ၊ ဆော၊ ထီးလင်း၊ ကျောက်ထုမြို့နယ်တွေမှာ အခြေချနေတဲ့ တော်လှန်ရေးအင်အားစုဖြစ်ပြီး မင်းတပ်၊ ကန်ပက်လက်မြို့နယ်မြို့သိမ်း စစ်ဆင်ရေးတွေမှာ ပါဝင်ခဲ့ပါတယ်။

 

========================

 

📌📌 ၂။ ဖလမ်းမှာ ရဲတပ်ဖွဲ့ဝင် ၄၀ ကျော် ဖမ်းဆီးမခံရမီ စစ်ကောင်စီက တောင့်ထားခိုင်း။

 

'ချင်းညီနောင်' စစ်ဆင်ရေးဖော်ဆောင်တဲ့ ဖလမ်းမြို့မှာ ရဲတပ်ဖွဲ့ဝင် ၄၀ ကျော် ဖမ်းဆီးမခံရမီ စစ်ကောင်စီက တောင့်ထားခိုင်း‌ကြောင်း ထွက်ပေါ်လာတဲ့ ရုပ်သံဖိုင်မှာ ဖလမ်းမြို့နယ် ရဲစခန်းမှူးတွေက ထုတ်ပြောပါတယ်။

“လက်နက်မချနဲ့၊ တောင့်ထားပေးပါ၊ တောင့်ထားပေးပါလို့ပဲ ပြောတယ်။”လို့ ဖလမ်းမြို့နယ် ရဲစခန်းမှူးက ပြောပါတယ်။

ဖလမ်းမြို့ ခရိုင်ရဲစခန်းမှူးအပါအဝင် ရဲတပ်ဖွဲ့ဝင် ၄၃ ဦး ဖမ်းဆီးခံရပြီးတဲ့နောက် ကောင်းကောင်းမွန်မွန် ထိန်းသိမ်းခံထားရပေမယ့် စစ်ကောင်စီလေတပ်ရဲ့ ပစ်မှတ်ထား လေကြောင်းတိုက်ခိုက်မှုကြောင့် ထိခိုက်သေဆုံးတာမျိုး ရှိတယ်လို့လည်း သူတို့က ဖွင့်ဟထားပါတယ်။

ဖလမ်းမြို့သိမ်းစစ်ဆင်ရေးကို ၂၀၂၄ နိုဝင်ဘာ ၉ ရက်နေ့က ကြေညာခဲ့ပြီး ၂ လကျော်အကြာမှာ နောက်ဆုံး ခလရ ၂၆၈ တပ်ကုန်းစခန်းတစ်ခုသာ သိမ်းပိုက်ဖို့ ကျန်ရှိနေတာလို့ သိရပါတယ်။

 

========================

 

📌📌 ၃။ Non – CDM နဲ့ အမျိုးသမီးတွေပါ စစ်မှုထမ်းဖို့ စစ်ကောင်စီ ထုတ်ပြန်။

 

စစ်ကောင်စီက အတည်ပြုတဲ့ ပြည်သူ့စစ်မှုထမ်းနည်းဥပဒေအရ စစ်ကောင်စီလက်အောက်မှာ တာဝန်ထမ်းဆောင်နေတဲ့ ဝန်ထမ်းတွေ စစ်မှုထမ်းရတော့မယ်လို့ ဇန်နဝါရီ ၂၃ရက်နေ့ကစစ်ကောင်စီကထုတ်ပြန်ကြောင်း Myanmar Nowက ဖော်ပြပါတယ်။

စစ်မှုထမ်းရန် ဆင့်ခေါ်ခံရတဲ့ Non-CDM ဝန်ထမ်းတွေဟာ စစ်ဘက်နဲ့ အရပ်ဘက် နှစ်နေရာစလုံးမှာ အမည်စာရင်းရှိမယ်လို့ ဆိုထားပြီး မူလရရှိသည့်ဝန်ထမ်းလစာနဲ့ တပ်သားသစ်အဖြစ်ရရှိတဲ့ လစာနှစ်ခုထဲက နှစ်သက်ရာတစ်ခုကိုသာ လက်ခံရရှိမယ်လို့ ဆိုပါတယ်။

စစ်ကောင်စီရဲ့ ဇန်နဝါရီ ၂၃ ရက်နေ့ ထုတ်ပြန်ချက်မှာ အမျိုးသားတွေသာမက အမျိုးသမီးငယ်တွေပါ စစ်မှုထမ်းရမယ့် နည်းဥပဒေပါဝင်ပါတယ်။ 

စစ်မှုထမ်းကာလဟာ သာမန်လူတွေအတွက် ၂ နှစ်ဖြစ်ပြီး၊ ပညာသည်တွေအတွက်ကတော့ ၃ နှစ် ဖြစ်ပါတယ်။ 

ဒါပေမယ့် အရေးပေါ်အခြေအနေတွေမှာ ဘယ်သူ့ကိုမဆို စစ်မှုထမ်းကာလ ၅ နှစ်အထိ တာ၀န်ထမ်းဆောင်ဖို့ သက်တမ်းတိုးမြှင့်နိုင်တယ်လို့လည်း ပြဋ္ဌာန်းထားပါတယ်။

စစ်မှုထမ်းဖို့ ငြင်းဆန်သူတွေနဲ့ စစ်မှုထမ်းခြင်းမှ ရှောင်လွဲဖို့ကြိုးစားသူတွေကို ထောင်ဒဏ်ကျခံစေမယ်လို့ စစ်ကောင်စီက ဆိုပါတယ်။

#RadioNUGLocalNews

#SpringRevolution