07 Jan 2025 - (Ethnic language program-Matupi) by The Matupi Times

 

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇန်နဝါရီလ ( ၇ ) ရက်နေ့ ရပြည်တွင်းသတင်းများ

📌📌 ၁. ဖလမ်းမြို့နယ်က ခွန်းလုံရွာကို စစ်ကောင်စီဗုံးကျဲတိုက်ခိုက်မှုကြောင့် စစ်သုံ့ပန်း ရဲ ၈ ဦးသေဆုံး

The Matupi Times ဇန်နဝါရီလ ၅ ရက်။

ဖလမ်းမြို့နယ် Khuanglung Khua (ခွန်းလုံကျေးရွာ)ကို ဒလန်သတင်းပေးကြောင့် စစ်ကောင်စီက ယမန်နေ့ ဇန်နဝါရီလ ၄ ရက်ညမှာ လေကြောင်းကနေ ဗုံးကြဲတိုက်ခိုက်ခဲ့လို့ ချင်းအမျိုးသားအဖွဲ့ချုပ်(CNO/CNDF) က ဖလမ်းမြို့တိုက်ပွဲမှာ ဖမ်းဆီးရမိတဲ့ စစ်သုံ့ပန်း ရဲတပ်ဖွဲ့ဝင် ၈ ဦးနဲ့ CNO/CNDF ဘက်က ၁ ဦး ကျဆုံးပြီး ၂ ဦး ဒဏ်ရာရခဲ့တယ်လို့ Chinworld media ကနေ သိရပါတယ်။

ဖလမ်းမြို့ အနောက်မြောက်ခြမ်းမှာ ရှိတဲ့ ခွန်းလုံကျေးရွာကို ဇန်နဝါရီလ ၄ ရက်နေ့ည ၁၁ နာရီဝန်းကျင်လောက်မှာ စစ်ကောင်စီက လေကြောင်းကနေ ဗုံး ၂ ကြိမ်ကြဲပြီး တိုက်ခိုက်ခဲ့တာဖြစ်ပြီး အခုလို စစ်သုံ့ပန်းထားတဲ့နေရာကို လေကြောင်းကနေ ဗုံးကြဲတာဟာ သတင်းပေးဒလန်ကြောင့်လို့ ဆိုပါတယ်။

“ဇန်နဝါရီလ ၄ ရက်နေ့ ည ၁၁ နာရီလောက်မှာ တံတားဦးလေဆိပ်ကနေ စစ်ကောင်စီက လေကြောင်း MIG – 29 Fighter Jet နဲ့ ၂ ကြိမ်ဗုံးကြဲတိုက်ခဲ့တယ် အဲဒီမှာ ဖလမ်းရဲတပ်ဖွဲ့က လက်နက်ချ အညံ့ခံစစ်သုံ့ပန်း ရဲ ၈ ယောက် သေဆုံးတယ် CNO/CNDF ဘက်က အစောင့်ရဲ ၁ ဦး ကျဆုံးတယ်၊ ပြင်းထန်ဒဏ်ရာရ ၁ ဦးနဲ့ မစိုးရိမ်ရ ဒဏ်ရာရ ၁ ဦး ရှိခဲ့တယ်၊ အဓိကတော့ ဒလန်သတင်းပေးချက်ပါ အဲဒီနေရာမှာ စစ်သုံ့ပန်း ရှိမရှိ စစ်ကောင်စီတွေက မသိနိုင်ဘူးလေ” လို့ပြောပါတယ်။

ဖလမ်းမြို့ကို CNO/CNDF ပါဝင်တဲ့ ချင်းညီနောင်တပ်ဖွဲ့နဲ့ မဟာမိတ်ပူးပေါင်းအဖွဲ့က ပြီးခဲ့တဲ့ နိုဝင်ဘာလ ၉ ရက်နေ့ကစလို့ ထိုးစစ်ဆင်တိုက်ခိုက်နေသလို လက်ရှိမှာ ဖလမ်းမြို့ထဲက စစ်ကောင်စီအထိုင်ချစခန်း၊ ရဲစခန်းတွေ အားလုံးကို သိမ်းပိုက်ထားပြီး နောက်ဆုံးကျန်နေသေးတဲ့ ခလရ - ၂၆၈ တပ်ကုန်းကို ချင်းညီ နောင်က အပြီးသတ် သိမ်းပိုက် နိုင်ရေး ကြိုးစားခဲ့ရကြောင်း သိရပါတယ်။

 

========================

 

📌📌 ၂. UFC 2025 ပြိုင်ပွဲအမည်စာရင်းတွင် ဂျော့ရှုအာဗန် လည်း ပါဝင်လာပြီး မတ်လတွင် ထိုးခွင့်ရ

 

The Matupi Times ဇန်နဝါရီ ၃ ရက်။

ကမ္ဘာကျော် ပရိုမိုးရှင်းကြီး UFC က 2025 ခုနှစ် အတွက် တောက်ပလာမယ့် ဖိုက်တာစာရင်းတွေကို ဆန်ကာတင်ရွေးပြီး ထုတ်ပြန်လိုက်ပါတယ်။ အဲဒီစာရင်းမှာ ပါဝင်ခဲ့တဲ့ ဖိုက်တာပေါင်းကစုစုပေါင်း အယောက် 20 ရှိပါတယ်။ ဒီအထဲကမှ ထူးထူးခြားခြား ဂျော့ရှုအာဗန် လဲ ပါဝင်ခဲ့တာပါ။

UFC အဖွဲ့အစည်းက Joshua Van နဲ့ Bruno Silva တို့ကို ပွဲတည်ပေးထားပါတယ်။ မတ်လ (၈) ရက်နေ့မှာ ကျင်းပမယ့် UFC 313 ပြိုင်ပွဲမှာ ကစားရမှာပါ။ Joshua Van ကိုယ်တိုင် အတည်ပြုတာမို့ ပွဲသတင်းက တရားဝင်ဖြစ်ပါတယ်။ UFC 313 ပြိုင်ပွဲကို နီဗားဒါးပြည်နယ်မှာရှိတဲ့ နာမည်ကျော် T-Mobile Arena အားကစားရုံမှာ ကျင်းပပါမယ်။

ဘရာဇီးသား Bruno Silva က အသက် (၃၄) နှစ်ဖြစ်ပြီး (၁၄) ပွဲနိုင် (၆) ပွဲရှုံးထားပါတယ်။ (၂) ပွဲသရေကျထားပြီး (၁) ပွဲပျက်ထားတာမို့ ကြေးစား (၂၃) ပွဲကစားထားပြီလို့ ဆိုနိုင်ပါတယ်။ နောက်ဆုံးပွဲမှာ Bruno Silva က Manel Kape ကို အလဲထိုးရှုံးထားပြီး UFC Flyweight Ranking မှာ အဆင့် (၁၃) ဖြစ်နေပါတယ်။ Ranking အရ အဆင့် (၁၅) Joshua Van ထက် (၂) ဆင့်မြင့်တယ်လို့ ဆိုနိုင်ပါတယ်။ 

Bruno Silva က ဖလော်ရီဒါပြည်နယ် အခြေစိုက် American Top Team ကလပ်မှာ လေ့ကျင့်နေပြီး ဘရာဇီးသားပီပီ BJJ Black Belt ဖြစ်ပါတယ်။ ပရိသတ်အကြိုက် ကစားထားပြီး အပိုဆုကြေး (၄) ပွဲဆက်တောင် သိမ်းပိုက်ဖူးတဲ့ မှတ်တမ်းကောင်းရှိသလို စွယ်စုံကစားတတ်တဲ့ Well Rounded ဖိုက်တာလို့လည်း ဆိုနိုင်ပါတယ်။

Bruno Silva က Joshua Van ထက် တအားကြီးမထွားပါဘူး။ ခန္ဓာကိုယ်အချိုးအစားက မတိမ်းမယိမ်းပါပဲ။ UFC 313 ပြိုင်ပွဲမှာ အနိုင်ရရှိသူက နောက်အဆင့်တက်မှာ ဖြစ်ကြောင်း သိရပါတယ်။

 

========================

 

📌📌 ၃. ရန်ကုန်မှာ ပလက်ဝမြို့နယ် ခရစ်ယာန်သာသနာပြု နှစ် (၁၀၀)ပြည့်ပွဲ ကျင်းပ

 

The Matupi Times ဇန်နဝါရီ ၄ ရက်။

ရန်ကုန်တိုင်း၊ ရွှေပြည်သူမြို့မှာ ချင်းပြည်နယ်၊ ပလက်ဝမြို့နယ် ခရစ်ယာန်သာသနာပြု နှစ် (၁၀၀)ပြည့်ပွဲ ကျင်းပပြုလုပ်ခဲ့တယ်လို့ ပွဲတက်ရောက်သူတွေဆီက သိရပါတယ်။ နှစ် (၁၀၀) ပြည့်ပွဲကို ဒီနေ့ ဇန်နဝါရီလ ၄ရက်နေ့၊ မနက် ၈နာရီမှ ညနေ ၄ နာရီထိ ရွှေပြည်သာမြို့၊ အမှတ် (၃)ရပ်ကွက်ရှိ မျိုးဆက်သစ်ဂေဟာ မှာကျင်းပခဲ့တာဖြစ်ပါတယ်။

 

"ပွဲတက်ရောက်တဲ့သူတွေ အယောက်၂၀၀၀ ကျော်မယ်။ လူတွေအများအပြား တက်ရောက်ကြတယ်။ ရန်ကုန်ရောက်တဲ့ ပလက်ဝဒေသခံတွေလည်း စုံတယ်။"လို့ ပွဲတက်ရောက်သူတစ်ဦးက ပြောပါတယ်။အဲဒီပွဲကို ပလက်ဝမြို့နယ်၊ ခရစ်ယာန်သာသနာပြု ရာပြည့်ပွဲကော်မတီက ဦးဆောင်ကျင်းပခဲ့ခြင်းဖြစ်ပြီး ပလက်ဝမြို့နယ်က ခရစ်ယာန်အသင်းတော်ပေါင်းစုံက တက်ရောက်ကြတယ်လို့ သိရပါတယ်။ဒါ့အပြင် ခူမီးရိုးရာအက၊ ရိုင်စားရိုးရာအက၊ ကနီဆေရိုးရာအက၊ အနူးရိုးရာအကနဲ့ ခေါင်စိုရိုးရာအကတို့ ဖျော်ဖြေတင်ဆက်ကြတယ်လို့ သိရပါတယ်။ ၁၉၂၅ခုနှစ်မှာ Rev Edwin Rowlands က ချင်းပြည်နယ်၊ ပလက်ဝမြို့နယ်မှာ စတင်ပြီး သာသနာပြုခဲ့တာ အခုနှစ် ၂၀၂၅၊ ဇန်နဝါရီလမှာ နှစ်၁၀၀ ပြည့်ပြီဖြစ်ကြောင်း သိရသည်။

========================

📌📌 ၄. တောင်ကိုရီးယားသမ္မတ ဖမ်းဆီးရေး မအောင်မြင်

 

The Matupi Times ဇန်နဝါရီ ၃ ရက်။

 

 

တောင်ကိုရီးယားမှာ ပြီးခဲ့တဲ့ လက မအောင်မြင်တဲ့ စစ်အုပ်ချုပ်ရေး ကြေညာခဲ့တဲ့ သမ္မတ ယွန်း ဆက် ယိုကို ဖမ်းဆီးဖို့ ကြိုးပမ်းမှုကို သမ္မတ ကိုယ်ရံတော်တွေက ငြင်းဆန်နေတဲ့ အတွက် အကျင့်ပျက်ခြစားမှု တိုက်ဖျက်ရေး အဖွဲ့တွေက ဖမ်းဆီးမှုကို ဆိုင်းငံ့လိုက်ပါတယ်။ အခုချိန် အထိ သမ္မတဟာ စုံစမ်း စစ်ဆေးမှုတွေကို ပူးပေါင်း ဆောင်ရွက်ဖို့ ငြင်းဆန်နေပါတယ်။စစ်ဆေးမေးမြန်းဖို့ ဆင့်ခေါ်စာ ၃စောင်ကို သမ္မတယွန်းက လျစ်လျူရူခဲ့တဲ့နောက် ဆိုလ်းတရားရုံးက ဇန်နဝါရီပထမပတ်မှာပဲ ယွန်းကို ဖမ်းဝရမ်းထုတ်ခဲ့ပါတယ်။

စုံစမ်း စစ်ဆေးရေးမှူးတွေဟာ သမ္မတ အိမ်တော်ဝန်းထဲ အထိ ဝင်ရောက် နိုင်ခဲ့ပေမဲ့ သမ္မတ လုံခြုံရေး အဖွဲ့ဝင် ၂၀၀ လောက်က အိမ်တော်ထဲ မဝင်နိုင်အောင် တားဆီး ပိတ်ပင်မှုတွေ လုပ်ခဲ့ကြပါတယ်။ သမ္မတကို ဖမ်းဆီးဖို့ ဝရမ်း အမိန့်ကို မလိုက်နာဘဲ ငြင်းဆန်တဲ့ လုပ်ရပ်ဟာ ဝမ်းနည်းဖွယ် ကောင်းပြီး သူတို့ အနေနဲ့ နောက်တဆင့် ဘာလုပ်မလဲ ဆိုတာကို စဉ်းစားနေတယ်လို့ စုံစမ်းစစ်ဆေးရေး အဖွဲ့က ပြောပါတယ်။

ဒီဇင်ဘာလ ၃ ရက်နေ့က အရေးပေါ် စစ်အုပ်ချုပ်ရေးကြေညာခဲ့သူ သမ္မတ Yoon ဟာ တောင်ကိုရီးယားသမိုင်းမှာ သမ္မတတာဝန်ယူထားစဉ်ပထမဆုံးဖမ်းဝရမ်းထုတ်ခံရသူလည် ဖြစ်ပါတယ်။

 

#RadioNUGLocalNews

#SpringRevolution