၂၀၂၅ ဧပြီလ ၄ ရက်နေ့ ညနေခင်း နောက်ဆုံးရပြည်တွင်းသတင်းများ
📌 ၁။ ငလျင်ကြောင့် ပြင်းထန်ဒဏ်ရာရသွားတဲ့ အိုးဘိုအကျဥ်းထောင်က အကျဉ်းသားတွေ ဆေးကုသခွင့် ကန့်သတ်ခံနေရ
📌 ၂။ မင်းတပ်မြို့နယ် ပြည်သူ့အုပ်ချုပ်ရေးရုံးက လစ်လပ်ရာထူးအတွက် CDM ဝန်ထမ်းများဦး ဦးစားပေးခေါ်ယူ
📌 ၃။ ဝရမ်းထုတ်ခံထားရတဲ့ စစ်ခေါင်းဆောင်မင်းအောင်လှိုင်ကို ဖမ်းဆီးဖို့ အင်တာပိုအဖွဲ့ဝင် ထိုင်းအစိုးရကို တောင်းဆို
📌 ၄။ ဘန်ကောက်မြို့မှာ "လူသတ်သမားမင်းအောင်လှိုင်ကို ငါတို့မကြိုဆိုဘူး"ဆိုတဲ့ စာတန်းချိတ်ဆွဲပြီး ဆန္ဒပြ
📌 ၅။ စစ်ခေါင်းဆောင်ကို အစည်းအဝေးတက်ခွင့်ပေးတဲ့ ဘင်းမ်စတက်အဖွဲ့ဝင်နိုင်ငံတွေကို ရှုတ်ချကြောင်း သပိတ်အင်အားစုပြော
📌 ၆။ အင်းလေးဒေသမှာ တောမီးကတဆင့် ဦးတေဇပိုင် ဟိုတယ် မီးလောင်ပျက်စီး
========================
၂၀၂၅ ခုနှစ် ဧပြီလ ၄ ရက် ညပိုင်းမှာတင်ပြပေးမယ့် Radio NUG စစ်ရေးနှင့် ငလျင်ဘေးဒဏ်သတင်းကောက်နုတ်ချက်များ
🚩 ၁။ စစ်ကောင်စီဘက်က အပစ်အခတ်ရပ်စဲထားမယ်လို့ ကြေငြာတဲ့နေ့ကစပြီး အရပ်သားပြည်သူနေထိုင်ရာ ရောတွေကို လက်နက်ကြီးတွေနဲ့ ပစ်ခတ်ခဲ့တယ်လို့ KNU ပြော
🚩 ၂။ ပဲခူးရိုးမပေါ် စစ်ကြောင်းထိုးဖို့ထွက်လာတဲ့ စစ်ကောင်စီတပ်ဖွဲ့ကို တိုက်ခိုက်ခဲ့ရာ စစ်သား ၄ ဦး သေဆုံး
🚩 ၃။ တီးတိန် ခလရ ၂၆၉ တပ်က စစ်သား၂ ဦး လက်နက်ခဲယမ်းတွေနဲ့အတူ PDF Zoland ထံ အလင်းဝင်
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ ငလျင်ကြောင့် ပြင်းထန်ဒဏ်ရာရသွားတဲ့ အိုးဘိုအကျဥ်းထောင်က အကျဉ်းသားတွေ ဆေးကုသခွင့် ကန့်သတ်ခံနေရ
ဧပြီလ ၄ရက် Radio NUG
အင်အားပြင်ငလျင်ကြောင့် ပြင်းထန်ဒဏ်ရာရသွားတဲ့ မန္တလေး အိုးဘိုအကျဥ်းထောင်က အကျဉ်းသားတွေ ဆေးကုသခွင့် ကန့်သတ်ခံနေရတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် - PPNM က ဒီနေ့ ဧပြီ ၄ ရက်မှာ ထုတ်ဖော်ပြာဆိုလိုက်ပါတယ်။
မတ်လ ၂၈ ရက်နေ့က လှုပ်ခတ်ခဲ့တဲ့ ငလျင်ကြောင့် အမျိုးသမီးအဆောင်တွေဖြစ်တဲ့ အဆောင် ၁ အဆောင် ၂ နဲ့ အမျိုးသမီး ဆေးရုံဆောင်တွေ ပြိုကျပျက်စီးခဲ့သလို အမျိုးသားအဆောင် အလုပ်ရုံ၊ အဆောင်တွေနဲ့ ကာရံထားတဲ့ အုတ်ရိုးတွေ ပြိုကျခဲ့ တယ်လို့ ဆိုပါတယ်။
PPNM အနေနဲ့ ငလျင်ကြောင့် အမျိုးသားတဦးနဲ့ အမျိုးသမီး ၂ ဦး သေဆုံးပြီး ကျား/မအတည်ပြုဖို့ လိုအပ်နေဆဲ တဦး အပါအဝင် စုစုပေါင်း ၄ ဦးသေဆုံးခဲ့တာကို အတည်ပြုထားနိုင်တယ်လို့ သိရပါတယ်။
ငလျင်ကြောင့် ပြင်းထန်တဲ့ ထိခိုက်ဒဏ်ရာရပြီး စိုးရိမ်ရသူ ၉ ဦးရှိကာ ဆေးရုံတက်ရန်လိုအပ်နေသူ ၄၀ ကျော်ရှိတယ်လို့ အသိပေးထားပါတယ်။
အချို့သောထိခိုက်ဒဏ်ရာတွေဟာ အကျဉ်းထောင်တွေမှာ ကုသဖို့မလွယ်တဲ့အတွက် ပြင်ပဆေးရုံတွေကိုပို့ပြီး ကုသရမှာ ဖြစ်ပေမယ့် ဆေးကုသခွင့်မရဘဲ ဒီနေ့အထိ ကန့်သတ်ခံထားရသူတွေ များစွာရှိနေတဲ့အပြင် ထိခိုက်ဒဏ်ရာရသူတွေဟာ မိသားစုဝင်တွေနဲ့လည်း ဆက်သွယ်တွေ့ဆုံခွင့်မရတဲ့ အခြေအနေတွေနဲ့ ရင်ဆိုင်ကြုံတွေ့နေရတယ်လို့ ထုတ်ပြန်ချက်မှာ ဖော်ပြထားပါတယ်။
လက်ရှိအချိန်မှာ အကျဉ်းထောင်ဟာ ဆေးဝါးလိုအပ်ချက်တွေများစွာရှိနေပြီး အရက်ပြန်၊ ဂွမ်း၊ အနာကျက်ဆေးရည်၊ ပတ်တီး စတဲ့ ဆေးဝါးပစ္စည်းတွေလိုအပ်နေတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် - PPNMက ထုတ်ပြန်ထားပါတယ်။
========================
📌📌 ၂။ မင်းတပ်မြို့နယ် ပြည်သူ့အုပ်ချုပ်ရေးရုံးက လစ်လပ်ရာထူးအတွက် CDM ဝန်ထမ်းများဦး ဦးစားပေးခေါ်ယူ
ဧပြီလ ၄ရက် Radio NUG
မင်းတပ်မြို့နယ်ပြည်သူ့အုပ်ချုပ်ရေးအဖွဲ့ရုံးမှာ လစ်လပ်နေတဲ့ ရာထူးနေရာတွေအတွက် သတ်မှတ်အရည်အချင်းနဲ့ ကိုက်ညီတဲ့ CDM ဝန်ထမ်းတွေကို ဦးစားပေးခေါ်ယူနေတယ်လို့ မြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။
မင်းတပ်မြို့နယ်ပြည်သူ့အုပ်ချုပ်ရေးအဖွဲ့ရုံးက အလုပ်ခေါ်စာကို ဧပြီလ ၃ ရက်နေ့မှာ အသိပေးထုတ်ပြန် လိုက်တာဖြစ် ပါတယ်။
လက်ရှိအချိန်ဟာ မိမိတို့ဒေသကို ဝိုင်းဝန်းတည်ဆောက်ကြရမယ့်အချိန်ဖြစ်ပြီး စစ်အာဏာရှင်စနစ် အမြစ်ပြုတ်စေဖို့ ဝိုင်းဝန်းလုပ်ဆောင်ကြရမယ့်အချိန်ဖြစ်ကာ အခြားညီနောင်တိုင်းရင်းတွေနဲ့ အပြန်အလှန် အကျိုးစီးပွားပြုပြီး ငြိမ်းချမ်းစွာ အတူယှဉ်တွဲနေထိုင်ကြဖို့ မိမိတို့ဒေသမှာ အကျင့်ပျက်ခြစား၊ ဘက်လိုက်မှု တွေ လုံးဝ ကင်းရှင်းပြီး ပြည်သူလူထု အမှန် တကယ် အားကိုးယုံကြည်ရတဲ့ အရပ်သားအုပ်ချုပ်ရေးယန္တရား တရပ် ဖော်ဆောင်နိုင်ဖို့ မိမိတို့ကိုယ်တိုင် တတပ်တအား ပါဝင်ကြရမယ့်အချိန်ဖြစ်တဲ့အတွက် သတ်မှတ်အရည်အချင်းနဲ့ ကိုက်ညီသူတွေအနေနဲ့ မင်းတပ်မြို့နယ်ပြည်သူ့အုပ်ချုပ်ရေး အဖွဲ့ရုံးနဲ့ သက်ဆိုင်ရာ မြို့၊ တိုက်နယ်အုပ်ချုပ်ရေးမှူးတွေကတဆင့် လျှောက်ထားနိုင်တယ်လို့ အသိပေးထားပါတယ်။
တော်လှန်ရေးကာလဖြစ်တဲ့အတွက် ရွေးချယ်ခန့်အပ်ခံရသူတွေအနေနဲ့ လစာနဲ့ အကျိုးစီးပွားတွေအပါအဝင် အထူးခံစားခွင့် တွေရှိမှာမဟုတ်ဘဲ တော်လှန်ရေးခံယူချက်ရှိသူတွေအနေနဲ့ ရခဲလှတဲ့ ဒီအခွင့်အရေးမှာ ကိုယ်တိုင်ကိုယ်ကျပါဝင်လိုသူတွေ လျှောက်ထားနိုင်တယ်လို့ သိရပါတယ်။
========================
📌📌 ၃။ ဝရမ်းထုတ်ခံထားရတဲ့ စစ်ခေါင်းဆောင်မင်းအောင်လှိုင်ကို ဖမ်းဆီးဖို့ အင်တာပိုအဖွဲ့ဝင် ထိုင်းအစိုးရကို တောင်းဆို
ဧပြီလ ၄ရက် Radio NUG
ဝရမ်းထုတ်ခံထားရတဲ့ စစ်ခေါင်းဆောင်မင်းအောင်လှိုင်ကို ဖမ်းဆီးဖို့ အင်တာပိုအဖွဲ့ဝင် ထိုင်းအစိုးရကိုတောင်းဆိုထားတယ် လို့ Burmese Rohingya Organisation UK က ဒီနေ့ ဧပြီ ၄ ရက်မှာ ထုတ်ပြန်ပါတယ်။
စစ်ခေါင်းဆောင် မင်းအောင်လှိုင်ကို ရိုဟင်ဂျာလူမျိုးတုံးသတ်ဖြတ်မှုနဲ့ ဖေဖော်ဝါရီ ၁၃ ရက်နေ့မှာ အာဂျင်တီးနားနိုင်ငံ တရားရုံးက ဖမ်းဝရမ်းထုတ်ခဲ့ပြီး ဧပြီ ၁ ရက်နေ့မှာ အပြည်ပြည်ဆိုင်ရာရဲတပ်ဖွဲ့ထံ အကြောင်းကြားခဲ့တာလို့ BROUK အဖွဲ့ က ပြောပါတယ်။
စစ်ခေါင်းဆောင် မင်အောင်လှိုင်ကိုဖမ်းဆီးဖို့ အာဂျင်တီးနားတရားရုံးက အခု ဧပြီ ၁ ရက်နေ့မှာပဲ နိုင်ငံတကာရဲတပ်ဖွဲ့ အင်တာပိုထံ ဖမ်းဝရမ်းပေးပို့လိုက်တာလို့ နားလည်ရပါတယ်။
ထိုင်းနိုင်ငံ ဘန်ကောက်မြို့မှာကျင်းပနေတဲ့ BIMSTEC ညီလာခံတက်ဖို့ စစ်ခေါင်းဆောင် မင်းအောင်လှိုင် ရောက်ရှိနေချိန်မှာပဲ စစ်ခေါင်းဆောင်ကိုဖမ်းဆီးပေးဖို့ အပြည်ပြည်ဆိုင်ရာရဲတပ်ဖွဲ့ INTERPOL အဖွဲ့ဝင်နိုင်ငံဖြစ်တဲ့ ထိုင်းကို Burmese Rohingya Organisation UK က ဒီနေ့ ဧပြီ ၄ ရက်မှာ တောင်းဆိုလိုက်တာ လည်း ဖြစ်ပါတယ်။ထိုင်းနိုင်ငံဟာ ၁၉၅၁ ခုနှစ်ကတည်းက အပြည်ပြည်ဆိုင်ရာရဲတပ်ဖွဲ့ INTERPOL အဖွဲ့ဝင်နိုင်ငံဖြစ်တယ်လို့ သိရပါတယ်။ဒါကြောင့်လည်း ဝရမ်းထုတ်ခံထားရသူကို INTERPOL အဖွဲ့ဝင်နိုင်ငံမှာတွေ့ရင် လုပ်ငန်းစဉ်အတိုင်း တရားရုံးကို တရားဝင်လွှဲပြောင်းပေးဖို့ BROUK က တိုက်တွန်းလိုက်တာလည်းဖြစ်ပါတယ်။
ထိုင်းရဲတပ်ဖွဲ့အနေနဲ့ အင်တာပိုရဲ့တောင်းဆိုချက်ကို လက်ခံခဲ့မယ်ဆိုရင် စစ်ခေါင်းဆောင်ဟာ ထိုင်းနိုင်ငံမှာ အဖမ်းခံရ နိုင်တယ်ဆိုတဲ့သတင်းတွေလည်း ဒီနေ့မှာ ကျယ်ကျယ်လောင်လောင်ထွက်ပေါ်နေပါတယ်။
အာဂျင်တီးနားနိုင်ငံ ဗျူနိုအေးရိစ်မြို့မှာရှိတဲ့တရားရုံးက စစ်ခေါင်းဆောင် မင်းအောင်လှိုင်အပါအဝင် ရိုဟင်ဂျာလူမျိုးတုံး သတ်ဖြတ်မှုမှာပါဝင်တဲ့ စစ်ကောင်စီအရာရှိ ၂၃ ဦးနဲ့ နိုင်ငံတော်ရရဲ့အတိုင် ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတ ဟောင်း ဦးထင်ကျော်တို့ကို ရိုဟင်ဂျာလူမျိုးတုံးသတ်ဖြတ်မှုနဲ့ ဖမ်းဝရမ်းထုတ်ထားပေမယ့် လက်ရှိမှာ အပြည်ပြည်ဆိုင်ရာ ရဲတပ်ဖွဲ့ အင်တာပိုထံ ဖမ်းဝရမ်းအပို့ခံရတာကတော့ စစ်ခေါင်းဆောင် မင်းအောင်လှိုင်တဦးထဲဖြစ်တယ်လို့ သိရပါတယ်။
========================
📌📌 ၄။ ဘန်ကောက်မြို့မှာ "လူသတ်သမားမင်းအောင်လှိုင်ကို ငါတို့မကြိုဆိုဘူး"ဆိုတဲ့ စာတန်းချိတ်ဆွဲပြီး ဆန္ဒပြ
ဧပြီလ ၄ရက် Radio NUG
ထိုင်းနိုင်ငံ ဘန်ကောက်မြို့ကို ဖြတ်သန်းစီးဆင်းသွားတဲ့ ကျောက်ဖရားမြစ်ပေါ်က တံတားတစင်းပေါ်မှာ အာဏာသိမ်းခေါင်းဆောင်ကို ရည်ညွှန်းတဲ့ " လူသတ်သမားမင်းအောင်လှိုင်ကို ငါတို့မကြိုဆိုဘူး" ဆိုတဲ့ စာတန်းချိတ်ဆွဲပြီး ဆန္ဒပြခဲ့တာရှိတယ် လို့ ထိုင်းဘက်ကလာတဲ့ သတင်းတွေက ဆိုပါတယ်။
အာဏာသိမ်းခေါင်းဆောင် မင်းအောင်လှိုင်ဟာ ဘင်္ဂလားပင်လယ်အော် ကဏ္ဍစုံနည်းပညာနှင့် စီးပွားရေး ပူးပေါင်းဆောင် ရွက်မှု BIMSTEC ထိပ်သီးညီလာခံ တက်ရောက်ဖို့ ထိုင်းနိုင်ငံ ဘန်ကောက်မြို့ကို ဧပြီ ၃ ရက်နေ့မှာ ရောက်ရှိခဲ့ပါတယ်။
အကြမ်းဖက် စစ်ခေါင်းဆောင် မင်းအောင်လှိုင်ဟာ ထိုင်းဝန်ကြီးချုပ်ရဲ့ ဖိတ်ကြားချက်အရ ဘန်ကောက်မြို့ကို ရောက်ရှိနေ တာဖြစ်ပြီး ဒီနေ့ ဧပြီ ၄ ရက်နေ့မှာ BIMSTEC အစည်းအဝေးတက်ရောက်မှာဖြစ်ပါတယ်။
အာဏာသိမ်းစစ်ခေါင်းဆောင် တည်းခိုနေတယ်လို့ဆိုတဲ့ ရှန်ဂရီလာဟိုတယ်နဲ့ မနီးမဝေးက Somdet Chao Phraya တံတား ပေါ်မှာ "We do not welcome Murderer Min Aung Hlaing "ဆိုတဲ့စာတမ်း ချိတ်ဆွဲထားတာ ဓာတ်ပုံမှတ်တမ်းတွေမှာ တွေ့ရပါတယ်။
အာဏာသိမ်းခေါင်းဆောင်ကို ဆန္ဒပြတဲ့အနေနဲ့ ထိုင်းရောက်မြန်မာလုပ်သားတွေ ဒီနေ့ ဧပြီ ၄ ရက်နေ့မှာ အလုပ်မဆင်းကြဖို့ နဲ့ အနက်ရောင်အဝတ်အစားတွေဝတ်ဆင်ကြဖို့ နွေဦးတော်လှန်ရေးရဲ့ လူထုသပိတ်အင်အားစုတွေက တိုက်တွန်းထား ပါတယ်။
အကြမ်းဖက်စစ်ခေါင်းဆောင် ထိုင်းနိုင်ငံကို ရောက်ရှိနေချိန်မှာ ထိုင်းပြည်သူတွေဟာ လွှတ်တော်ရှေ့သွားပြီး ဆန္ဒပြခဲ့တာ လည်းရှိတယ်လို့ သိရပါတယ်။
========================
📌📌 ၅။ စစ်ခေါင်းဆောင်ကို အစည်းအဝေးတက်ခွင့်ပေးတဲ့ ဘင်းမ်စတက်အဖွဲ့ဝင်နိုင်ငံတွေကို ရှုတ်ချကြောင်း သပိတ်အင်အားစုပြော
ဧပြီလ ၄ရက် Radio NUG
ထိုင်းနိုင်ငံ ဘန်ကောက်မြို့မှာကျင်းပတဲ့ ဘင်းမ်စတက် အစည်းအဝေးမှာ စစ်ကောင်စီခေါင်းဆောင် မင်းအောင်လှိုင်ကို တက်ရောက်ခွင့်ပြုတဲ့ သက်ဆိုင်ရာတာဝန်ရှိသူတွေကို မြန်မာ့နွေဦးတော်လှန်ရေး လူထုသပိတ်အင်အားစုက ရှုတ်ချလိုက် ပါတယ်။
ရိုဟင်ဂျာလူမျိုးတွေကို မျိုးတုန်းသတ်ဖြတ်ခဲ့တာကြောင့် အာဂျင်တီးနားနိုင်ငံ ဗြူနိုအေးရိစ်တရားရုံးက ရာဇဝတ်သားအဖြစ် ဝရမ်းထုတ်ခံထားရပြီး မြန်မာနိုင်ငံက အရပ်သားပြည်သူ ထောင်ပေါင်းများစွာကို သတ်ဖြတ်ခဲ့တာ လေကြောင်းတိုက်ခိုက်မှု တွေလုပ်နေတာ ငလျင်ဘေးဒဏ်သင့်နေချိန်မှာတောင် အရပ်သားပြည်သူတွေကို ဆက်လက်သတ်ဖြတ်နေတဲ့ မင်းအောင်လှိုင်ကို အစည်းအဝေး တက်ခွင့်ပြုတာဟာ မြန်မာပြည်သူတွေအပေါ် စာနာမှုမရှိဘူးဆိုတာ ပြသရာရောက်တဲ့ အတွက် ဘင်းမ်စတက် အစည်းအဝေးက သက်ဆိုင်ရာတာဝန်ရှိသူတွေကို ရှုတ်ချလိုက်တာဖြစ်ပါတယ်။
ဒီရှုတ်ချကြောင်း ထုတ်ပြန်ချက်ကို မြန်မာ ၊ ထိုင်း ၊ အင်္ဂလိပ် ၃ ဘာသာနဲ့ ဧပြီ ၃ ရက်ညပိုင်းမှာ ထုတ်ပြန်ခဲ့ တာလည်း ဖြစ်ပါတယ်။
စစ်ခေါင်းဆောင်ဟာ ဘင်းမ်စတက် အစည်းအဝေးတက်ဖို့ မနေ့ ဧပြီ၃ ရက်ကပဲ ထိုင်းနိုင်ငံ ဘန်ကောက်မြို့ ကို ရောက်ရှိ လာခဲ့ပြီး ဒီနေ့ ဧပြီ ၄ ရက်မှာ အစည်းအဝေး တက်ရောက်ခဲ့ပါတယ်။
စစ်ခေါင်းဆောင်မင်းအောင်လှိုင်ဟာ ဘင်းမ်စတက် အစည်းအဝေးကိုလာတဲ့ အဖွဲ့ဝင်နိုင်ငံတွေက ခေါင်းဆောင်တွေနဲ့ တွေ့ဆုံခွင့်ရခဲ့ပေမယ့် တဖက်မှာလည်း စစ်ခေါင်းဆောင်မင်းအောင်လှိုင်ကို ဖမ်းဆီးဖို့ အင်တာပိုအဖွဲ့ဝင် ထိုင်းအစိုးရကို Burmese Rohingya Organisation UK က ဒီနေ့ ဧပြီ ၄ ရက်မှာတောင်းဆိုထားတာလည်း ရှိနေပါတယ်။
========================
📌📌 ၆။ အင်းလေးဒေသမှာ တောမီးကတဆင့် ဦးတေဇပိုင် ဟိုတယ် မီးလောင်ပျက်စီး
ဧပြီလ ၄ရက် Radio NUG
ရှမ်းပြည်နယ်တောင်ပိုင်း အင်းလေးဒေသမှာ တောမီးလောင်ရာကနေ စီးပွားရေးလုပ်ငန်းရှင် ခရိုနီ ဦးတေဇ ပိုင်တဲ့ နာမည် ကျော် Myanmar Treasure Hotel မီးကူးစက်လောင်ကျွမ်းကာ ပျက်စီးသွားတယ်လို့ ဒေသသတင်းရင်းမြစ်တွေက ပြောပါတယ်။
မနေ့ ဧပြီလ ၃ ရက် နေ့လည်ပိုင်းကလောင်ကျွမ်းတဲ့တောမီးတဆင့် Myanmar Treasure Hotel ကိုပါ မီးကူးစက်လောင် ကျွမ်းခဲ့ပြီး အဆောက်အအုံတွေအားလုံး မီးလောင်ပျက်စီးသွားတယ်လို့ ဒေသနေပြည်သူတွေနဲ့ ခရီးသွားလုပ်ငန်းရှင် အသိုင်း အဝိုင်းက ဆိုပါတယ်။
ဒီဟိုတယ်ကို ဦးတေဇရဲ့ Htoo Group of Companies အုပ်စုက ပိုင်ဆိုင်တာဖြစ်ပြီး သစ်သားတွေနဲ့တည်ဆောက်ထားတဲ့ ဟိုတယ်လို့ သိရပါတယ်။
ဟိုတယ်မီးလောင်မှုကိုတော့ ညောင်ရွှေမြို့နယ်မီးသတ်၊ နမ့်ပန်နယ်မီးသတ်၊ အေးသာယာနယ်မြေမီးသတ်၊ ဟဲဟိုးနယ်မြေ မီးသတ်၊ရွှေညောင်မီးသတ်ဌာနတို့ ပူးပေါင်းငြိမ်းသတ်ခဲ့တာကြောင့် ည ၆ နာရီ ၄၅ မိနစ်မှာ မီးငြိမ်းသွားတယ်လို့ မြန်မာနိုင်ငံ မီးသတ်ဌာနက ထုတ်ပြန်ထားပေမယ့် ဆုံးရှုံးမှုတန်ဖိုးကို အသိပေးမထားပါဘူး။
စီးပွားရေးလုပ်ငန်းရှင် ခရိုနီ ဦးတေဇ ပိုင်တဲ့ ရန်ကုန်မြို့တော်က ကန်တော်ကြီးပဲလေ့ဟိုတယ်ဟာ ၂ဝ၁၇ မှာ မီးလောင် ပျက်စီးခဲ့သလို ကချင်ပြည်နယ် ပူတာအိုမြို့ မူလာရှီးဒီးရပ်ကွက်မှာရှိတဲ့ Malihka Lodge Hotel ဟာလည်း ၂၀၂၄ ခုနှစ် အခုလိုအချိန်မှာ မီးလောင်ပျက်စီးခဲ့တယ်လို့ မှတ်တမ်းတွေအရ သိရပါတယ်။
အင်းလေးဒေသမှာ ပြီးခဲ့တဲ့မိုးရာသီကဖြစ်ခဲ့တဲ့ ရာဂီမုန်တိုင်းအရှိန်ကြောင့် ထိခိုက်ပျက်စီးမှုများခဲ့သလို မတ်လ ၂၈ ရက်က မန္တလေးမြို့ကိုဗဟိုပြုလှုပ်ခတ်ခဲ့တဲ့ ငလျင်ကြောင့်လည်း နေအိမ်အများအပြားပျက်စီးကာ ၈၉ ဦးသေဆုံးခဲ့တယ်လို့ အင်းလေးဒေသ လူ့အခွင့်အရေးအဖွဲ့က မတ်လ ၃၀ ရက်မှာ ထုတ်ပြန်ခဲ့ပါတယ်။
၂၀၂၄ နိုဝင်ဘာ ၁၅ ရက်နေ့ကလည်း အင်းလေးဒေသက နာမည်ကျော်ဟိုတယ်တလုံးဖြစ်တဲ့ Inle Princess Hotel လည်း မီးပုံးပျံ ပျက်ကျရာက ဟိုတယ်တခုလုံး မီးလောင်ဆုံးရှုံးခဲ့တယ်လို့ မှတ်တမ်းတွေအရ သိရပါတယ်။
အခု တင်ပြခဲ့တဲ့ သတင်းအတွေကို Radio NUG သတင်းထောက် ကိုခန့်မှ ပေးပို့ထားတာ ဖြစ်ပါတယ်။
========================
========================
🚩🚩 ၁။ စစ်ကောင်စီဘက်က အပစ်အခတ်ရပ်စဲထားမယ်လို့ ကြေငြာတဲ့နေ့ကစပြီး အရပ်သားပြည်သူနေထိုင်ရာ ရောတွေကို လက်နက်ကြီးတွေနဲ့ ပစ်ခတ်ခဲ့တယ်လို့ KNU ပြော
ဧပြီလ ၄ရက် Radio NUG
စစ်ကောင်စီဘက်က အပစ်အခတ်ရပ်စဲထားမယ်လို့ ကြေငြာတဲ့နေ့ကစပြီး ကရင်အမျိုးသာအစည်းအရုံး ခလယ်လွီထူ ခရိုင်က အရပ်သားပြည်သူတွေနေထိုင်ရာဒေသတွေကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ KNU ဗဟိုက ဒီနေ့ ဧပြီ ၄ ရက်မှာ ထုတ်ဖော်ပြောဆိုလိုက်ပါတယ်။
အာဏာသိမ်းထားတဲ့ အကြမ်းဖက်စစ်ကောင်စီဟာ ငလျင်ဘေးကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေ အရှိန်အဟုန်နဲ့ ဆောင်ရွက်နိုင်စေဖို့နဲ့ တည်ငြိမ်အေးချမ်းရေးကို ရှေးရှုပြီး ဧပြီ ၂ ရက်ကနေ ၂၂ ရက်နေ့အထိ ယာယီပစ်ခတ် တိုက်ခိုက်မှု ရပ်စဲရေးကာလအဖြစ် ထုတ်ပြန်ကြေငြာထားတာနဲ့ ပတ်သက်လို့ အခုလို ထုတ်ဖော်ပြောဆိုလိုက်တာ ဖြစ်ပါတယ်။
ဒါပေမဲ့ ဒီထုတ်ပြန်ချက် ထုတ်ပြန်တဲ့နေ့ ဧပြီလ ၂ ရက်နေ့ ညနေ ၅ နာရီမှာ အာဏာသိမ်းအကြမ်းဖက် စစ်ကောင်စီရဲ့ ခမရ ၃၅၀ နဲ့ ခမရ ၄၄၀ တို့က ခလယ်လွီထူခရိုင် ရွှေကျင်မြို့နယ်၊ ညောင်ခြေထောက် ကျေးရွာအတွင်းကို ၈၁ မမ လက်နက်ကြီး တွေနဲ့ ပစ်ခတ်ခဲ့တာကြောင့် ပြည်သူပိုင်အိမ်တွေထိခိုက်ပျက်စီးခဲ့ တယ်လို့ ဆိုပါတယ်။
ဒါ့အပြင် အာဏာသိမ်းအကြမ်းဖက်စစ်ကောင်စီရဲ့ ခမရ ၃၅၁ ကလည်း ဧပြီလ ၃ ရက်နေ့ မနက် ၁၁ နာရီ ဝန်းကျင်မှာလည်း ခလယ်လွီထူခရိုင် မူးမြို့နယ် ငထွေစုပ်ကျေးရွာအတွင်းကို လက်နက်ကြီးနဲ့ ပစ်ခတ်ခဲ့ တာကြောင့် ငထွေစုပ်ကျေးရွာက အသက် ၂၄ နှစ်အရွယ် အမျိုးသမီးတဦးဒဏ်ရာရခဲ့ပြီး အိမ် ၂ လုံး ပျက်စီး ခဲ့တယ်လို့ အသိပေးထားပါတယ်။
အာဏာသိမ်းအကြမ်းဖက်စစ်ကောင်စီဟာ အရပ်သားပြည်သူတွေ အင်အားပြင်း ငလျင်ဒဏ်ခံစားနေရချိန်မှာ လေယာဉ်တွေ ဒရုန်းတွေသုံးပြီး ဗုံးကြဲနေခဲ့တာကြောင့် ယာယီပစ်ခတ်တိုက်ခိုက်မှုရပ်စဲကြောင်း ထုတ်ပြန်ချက်ဟာ ဟန်ပြထုတ်ပြန်ချက် သာဖြစ်ပြီး အရပ်သားပြည်သူတွေရှိရာနေရာတွေကို ရည်ရွယ်ချက်ရှိရှိ ပစ်ခတ်တိုက်ခိုက်တာတွေ ဆက်လက်ပြုလုပ်နေတဲ့ အတွက် ပြည်သူတွေ ငလျင်ဘေးသာမကာ လက်နက်ကြီးနဲ့ လေကြောင်းတိုက်ခိုက်မှုတွေကြား စိုးထိတ်စွာနေထိုင်နေရမြဲ ဖြစ်တယ်လို့ သိရပါတယ်။
စစ်ကောင်စီရဲ့ ယာယီအပစ်ခတ်တိုက်ခိုက်မှုရပ်စဲရေးထုတ်ပြန်ချက်ဟာ ဘန်ကောက်မှာကျင်းပနေတဲ့ ၆ ကြိမ်မြောက် ဘင်္ဂလားပင်လယ်အော် ဘက်စုံပူးပေါင်းဆောင်ရွက်ရေး BIMSTEC ထိပ်သီးအစည်းအဝေးကို တက်ရောက်ပြီး နိုင်ငံတကာ အသိအမှတ်ပြုမှုကို လက်ခံနိုင်ဖို့ ကြိုးစားချဉ်းကပ်နေတာနဲ့ သူတို့ အာဏာတည်မြဲရေးအတွက် ရှေးရှုနေခြင်းသာဖြစ် ကြောင်းနဲ့ နိုင်ငံတကာကို ခုတုံးလုပ်ကာ လူသားဆန်ခြင်းမရှိ၊ နိုင်ငံရေးစိတ်ဆန္ဒမရှိဘဲ အပြောနဲ့အလုပ် မညီတာကို ထင်ရှားစွာသိနိုင်တယ်လို့ KNU ဗဟိုက ထုတ်ပြန်ထားပါတယ်။
========================
🚩🚩 ၂။ ပဲခူးရိုးမပေါ် စစ်ကြောင်းထိုးဖို့ထွက်လာတဲ့ စစ်ကောင်စီတပ်ဖွဲ့ကို တိုက်ခိုက်ခဲ့ရာ စစ်သား ၄ ဦး သေဆုံး
ဧပြီလ ၄ရက် Radio NUG
ပဲခူးတိုင်း သာယာဝတီခရိုင် အုတ်ဖိုမြို့နယ်အပိုင် ပဲခူးရိုးမပေါ်ကို စစ်ကြောင်းထိုးဖို့ တက်လာတဲ့ စစ်ကောင်စီတပ်ဖွဲ့ကို မိုင်းဆွဲပြီး ပစ်ခတ်တိုက်ခိုက်ခဲ့ရာ စစ်သား ၄ ဦး သေဆုံးပြီး ၂ ဦး ပြင်းထန်ဒဏ်ရာ ရသွားတယ်လို့ မြေအောက်ပြောက်ကျား တပ်ဖွဲ့ အုတ်ဖိုက ပြောပါတယ်။
ပဲခူးရိုးမပေါ်ကို စစ်ကြောင်းထိုးဖို့ တက်လာပြီး စစ်ကောင်စီတပ်ဖွဲ့ဝင်တွေလိုက်ပါလာတဲ့ ကားတစီးကို ဧပြီလ ၂ ရက်နေ့ မနက်ပိုင်းက ပေါင်းတည်စုကျေးရွာအနီးမှာ သာယာဝတီခရိုင် တပ်ရင်း ၃၈၀၂ တပ်ခွဲ ၄ မြေအောက်ပြောက်ကျားတပ်ဖွဲ့ အုတ်ဖိုက ရဲဘော်တွေ မိုင်းဆွဲတိုက်ခိုက်ခဲ့တာဖြစ်ပါတယ်။
မိုင်းဆွဲတိုက်ခိုက်ခံလိုက်ရတဲ့ စစ်ကောင်စီတပ်ဖွဲ့ ဖရိုဖရဲဖြစ်နေချိန်မှာ တော်လှန်ရေးရဲဘော်တွေက ၁၅ မိနစ်ခန့် ပစ်ခတ် တိုက်ခိုက်နိုင်ခဲ့တာကြောင့် စစ်သားတွေ ခမရ - ၆ ဘက် ထွက်ပြေးသွားကြတယ်လို့ အသိပေးထားပါတယ်။
ပဲခူးရိုးမပေါ်ကို စစ်ကောင်စီတပ်ဖွဲ့တွေ ထပ်ပြီး စစ်ကြောင်းထိုးလာနိုင်ပြီး တိုက်ပွဲတွေထပ်ဖြစ်လာနိုင်တဲ့အတွက် ပြည်သူ လူထုအနေနဲ့ စစ်ကောင်စီတပ်ဖွဲ့ဝင်တွေအနီး သွားလာနေထိုင်တာတွေ လုံးဝ မလုပ်ကြဖို့ မြေအောက်ပြောက်ကျားတပ်ဖွဲ့ အုတ်ဖိုက သတိပေးနှိုးဆော်ထားပါတယ်။
========================
🚩🚩 ၃။ တီးတိန် ခလရ ၂၆၉ တပ်က စစ်သား၂ ဦး လက်နက်ခဲယမ်းတွေနဲ့အတူ PDF Zoland ထံ အလင်းဝင်
ဧပြီလ ၄ရက် Radio NUG
ချင်းပြည်နယ် တီးတိန်မြို့မှာရှိတဲ့ ခလရ ၂၆၉ တပ်က စစ်သား ၂ ဦး လက်နက်ခဲယမ်းတွေနဲ့အတူ အလင်းဝင်လာတယ်လို့ PDF Zoland က ပြောပါတယ်။
အသက် ၂၃ နှစ်အရွယ်ရှိတဲ့ ရဲဘော် ဖိုးခွားနဲ့ အသက် ၂၂ နှစ်အရွယ်ရှိတဲ့ ဒုတပ်ကြပ် မျိုးမင်းကျော်တို့ဟာ ဧပြီလ ၃ ရက် နေ့မှာ လက်နက်ခဲယမ်းတွေနဲ့အတူ PDF Zoland ဘက် အလင်းဝင်လာတာလို့ မိဘပြည်သူတွေကို အသိပေးထားပါတယ်။
လက်နက်ခဲယမ်းတွေနဲ့အတူ အလင်းဝင်လာတဲ့ ခလရ ၂၆၉ တပ်က စစ်သား ၂ ဦးကို ဆုကြေးငွေချီးမြင့်ခဲ့တယ်လို့လည်း PDF Zoland က ထုတ်ပြန်တဲ့ ဓာတ်ပုံ မှတ်တမ်းတွေအရ သိရပါတယ်။
ခလရ-၂၆၉ တပ်က တပ်ရင်းမှူးအနေနဲ့ ပြည်ထောင်စုနိုင်ငံသားဆိုတဲ့ စိတ်ထားပြီး PDF နဲ့ ပူးပေါင်းပေးဖို့လည်း တိုက်တွန်း ထားပါတယ်။
ဒီတော်လှန်ရေး တိုင်ရင်းသားတွေရဲ့ အနာဂတ်ဖြစ်တဲ့အတွက် အများအကျိုးကိုကြည့်ပြီး သေချာစဉ်စား သုံးသပ်ဖို့လည်း ဒေသတော်လှန်ရေးအင်အားစုတွေက အသိပေးထားပါတယ်။
အခုတင်ပြခဲ့တဲ့ သတင်းကိုတော့ Radio NUGသတင်းထောက် ကိုခန့်မှ ပေးပို့ထားတာဖြစ်ပါတယ်
No comments:
Post a Comment