17 May 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ မေလ ( ၁၇ ) ရက်နေ့နောက်ဆုံးရပြည်တွင်းသတင်းများ

📌📌 ၁။ မင်းတပ်မြို့နယ်မှာ စစ်ကောင်စီကဗုံးကြဲတိုက်ခိုက်၊ အရပ်သား ၃ ဦးသေဆုံး။

 

မင်းတပ်မြို့နယ်၊ တိုက်နယ် အမှတ် -၁ ထဲက ကျေးရွာတစ်ရွာကို မေလ ၁၅ရက်နေ့၊ မနက် ၉နာရီ မိနစ် ၄၀ခန့်မှာ

စစ်ကောင်စီက ဗုံးကြဲတိုက်ခိုက်ခဲ့တာကြောင့် ကလေးငယ် အပါအဝင် အရပ်သား ၃ဦးသေဆုံးတယ်လို့ ဒေသခံတချို့ကို ကိုးကားပြီး Khonumthung သတင်းဌာနကဖော် ပြပါတယ်။ 

ဗုံးကြဲတိုက်ခိုက်မှုကြောင့်  ၆ တန်းအရွယ် ကလေးငယ် ၁ ဦး၊ အသက် ၃၀ ကျော်အရွယ် အမျိုးသမီး ၁ ဦးနဲ့  လူငယ်အမျိုးသား ၁ ဦးတို့ သေဆုံးခဲ့ရတယ်လို့ ဆိုပါတယ်။ ဒါ့အပြင် နေအိမ် ၁၀ လုံးကျော်လည်း ထိခိုက်ပျက်စီးခဲ့ပြီး တချို့အိမ်မှာ မီးလောင်မှု ဖြစ်ပွားခဲ့တယ်လို့သိရပါတယ်။ 

စစ်ကောင်စီကင်းစင်ပြီဖြစ်တဲ့ မင်းတပ်မြို့နယ်မှာ စစ်ကောင်စီက မကြာခဏဗုံးကြဲတိုက်ခိုက်လေ့ရှိပြီး မေလ ၉ ရက်နေ့ကလည်း မင်းတပ်မြို့ပေါ်တစ်နေရာကို စစ်ကောင်စီက လေကြောင်းတိုက်ခိုက်မှု ၂ ကြိမ်ပြုလုပ်ကာ အစိုးရဌာနအဆောက်အဦး နဲ့ ပြည်သူ နေအိမ် ၁၅ လုံးလောက် ပျက်စီးခဲ့ရတယ်လို့ မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ထားပါတယ်။ 

 

========================

 

📌📌 ၂။ ချင်းညီနောင်အဖွဲ့ဝင်အားလုံးကို တပ်အင်အားတခုအဖြစ် တိုးမြှင့်ဖွဲ့စည်းမယ်လို့ ကြေညာ။

 

ချင်းပြည်သူလူထုတစ်ရပ်လုံး ကိုယ်စားပြုတဲ့ အစိုးရပေါ်ပေါက်ရေးနဲ့ ချင်းညီနောင်အဖွဲ့ဝင်အားလုံးကို ပေါင်းစည်းပြီး ချင်းအမျိုးသားတစ်ရပ်လုံး အကာအကွယ်ပေးမယ့် ကျစ်လစ်ခိုင်မာတဲ့ တပ်အင်အားတစ်ခုအဖြစ် တိုးမြှင့်ဖွဲ့စည်းနိုင်ရေး အခြေခံမူတွေချမှတ်ပြီလို့ ချင်းညီနောင်က ကြေညာချက် ထုတ်ပြန်ပါတယ်။

၂၀၂၅ ဧပြီ ၂၆ ရက်ကနေ ၂၉ ရက်နေ့အထိ ပြုလုပ်တဲ့ ချင်းညီနောင်အဖွဲ့ဝင် ကိုယ်စားလှယ်တွေ မြေပြင် တွေ့ဆုံမှုအတွင်း အခုလို သဘောတူ ဆုံးဖြတ်ခဲ့ကြတာလို့ ဆိုပါတယ်။

ပြည်တွင်း၊ ပြည်ပ မဟာမိတ်ဆက်ဆံရေးအတွက် အခြေခံမူရေးဆွဲနိုင်ဖို့ သဘောတူညီချက်ချမှတ်နိုင်ခဲ့ကြတယ်လို့လည်း ထုတ်ပြန်ထားပါတယ်။

၂၀၂၃ ခုနှစ် ဒီဇင်ဘာ ၃၀ ရက်နေ့ ဖွဲ့စည်းတည်ထောင်ခဲ့တဲ့ ချင်းညီနောင်မှာ ချင်းအမျိုးသားအဖွဲ့ချုပ် (CNO/ CNDF)၊ ချင်းကာကွယ်ရေးတပ်ဖွဲ့ - မင်းတပ်၊ ဇိုမီးဖက်ဒရယ်အစည်းအရုံး (ZFU/PDF - Zoland)၊ ချင်းကာကွယ်ရေးတပ်ဖွဲ့ - ကန်ပက်လက်၊ ချင်းလဲန်းကာကွယ်ရေးတပ်ဖွဲ့ - မတူပီ တပ်မဟာ (၁) နဲ့ မရာနယ်မြေအုပ်ချုပ်ရေးကောင်စီ (MTC/MDF) တို့ ပါဝင်ပါတယ်။

ဖွဲ့စည်းတည်ထောင်တဲ့ ၁ နှစ်ကျော်အတွင်း ကျင်ဒွေး၊ မတူပီ၊ မင်းတပ်၊ ကန်ပက်လက်နဲ့ ဖလမ်းမြို့တွေကို ချင်းညီနောင်စစ်ဆင်ရေး ဖော်ဆောင်ပြီး သိမ်းပိုက်ထိန်းချုပ်ထားပါတယ်။

 

========================

 

📌📌 ၃။ စစ်ကောင်စီ၏ အကြမ်းဖက်တိုက်ခိုက်မှုကြောင့် စစ်ကိုင်း၊ မကွေးနဲ့ ရခိုင်မှာ ၂ ရက်အတွင်း ကလေးအပါအဝင် လူ ၅၀ ခန့် သေဆုံး၊ ၁၂၀ ကျော် ဒဏ်ရာရ။

 

စစ်ကောင်စီလေကြောင်းနဲ့ စစ်ကြောင်းကြောင့် စစ်ကိုင်း၊ မကွေးနဲ့ ရခိုင်မှာ မေလ ၁၂၊ ၁၃ စတဲ့ ၂ ရက်အတွင်း ကလေးအပါအဝင် လူ ၅၀ ခန့် သေဆုံးပြီး နောက်ထပ် ၁၂၀ ကျော် ဒဏ်ရာရခဲ့ပါတယ်။

စစ်ကိုင်းတိုင်း၊ ဒီပဲယင်းမြို့နယ် အိုးထိန်းတွင်းကျေးရွာမှာ စစ်ကောင်စီလေတပ်က မေလ ၁၂ရက် မနက်ပိုင်းက ဗုံးကြဲလို့ ကျောင်းသူ၊ ကျောင်းသား ကလေးငယ် ၂၂ ဦးနဲ့ ဆရာမ ၂ ဦး အသက်ဆုံးရှုံးပြီး ပြင်းထန်ဒဏ်ရာကြောင့် ဆေးကုသမှုခံယူနေတယ်လို့ ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။

ဗုံးကြဲခံရအပြီး ဒဏ်ရာရသူတွေထဲက ကျောင်းသားတဦး မေ ၁၃ရက်က ထပ်မံသေဆုံးတာကြောင့် အသက်ဆုံးရှုံးသူ ၂၃ ဦးနဲ့ နောက်ထပ် လူဦးရေ ၁၀၀ ကျော် ဒဏ်ရာရတယ်လို့ အတည်ပြု ထုတ်ပြန်ထားတာပါ။

မေလ ၁၂ ရက် အိုးထိန်းတွင်းကျေးရွာ ဗုံးကြဲခံရမှုအတွင်း အသက်ဆုံးရှုံးသူတွေဟာ Grade 2 ကနေ Grade 11 ကြား ကျောင်းသူ၊ ကျောင်းသားတွေနဲ့ ကျောင်းဆရာမ ၂ ဦး ဖြစ်ပါတယ်။

ဒါ့အပြင် မေလ ၁၂ ရက်မနက်အစောပိုင်း မကွေးတိုင်း၊ ဂန့်ဂေါမြို့နယ် လယ်မကျေးရွာကို စစ်ကောင်စီစစ်ကြောင်းက ဝင်ရောက်စီးနင်းပြီး ဒေသခံအမျိုးသား ၁၁ ဦးကို နှိပ်စက်သတ်ဖြတ်သလို နောက်ထပ် ဒေသခံပြည်သူ ၂၀ ကျော်ကိုလည်း ဖမ်းဆီးသွားကြောင်း ယောအလင်းတန်းက ဖော်ပြထားပါတယ်။

ရခိုင်ပြည်၊ ကျောက်ဖြူမြို့နယ်နဲ့ ရသေ့တောင်မြို့နယ် ထွန်းရဝေကျေးရွာ (ဟောင်း)မှာလည်း မေ ၁၃ရက် မနက်ပိုင်း ၁၀ နာရီဝန်းကျင်က ပေါင် ၅၀၀နဲ့ ဗုံးကြဲခံရလို့ ကလေး၊ အမျိုးသမီး ၁၃ ဦး ပွဲချင်းပြီး သေဆုံးပြီး ၂၀ ကျော် ပြင်းထန် ဒဏ်ရာရတယ်လို့ Western News မှာ ဖော်ပြပါတယ်။ အသက်ဆုံးရှုံးသူတွေထဲ အသက် ၁၀ နှစ်အောက် ကလေးငယ်တွေ ပါဝင်တယ်လို့လည်း ဆိုပါတယ်။

ဒါ့အပြင် စစ်ကိုင်းတိုင်း၊ ဝက်လက်နဲ့ ရွှေဘိုမြို့နယ်ကို စစ်ကောင်စီက မေ ၁၃ရက် ညနေပိုင်း လေကြောင်းဗုံးကြဲလို့ ဒေသခံ ၂ ဦးသေဆုံးပြီး ၇ ဦးခန့် ဒဏ်ရာရတယ်လို့ People’s Spring က ဖော်ပြပါတယ်။

၂၀၂၅ ဧပြီနှောင်းပိုင်းလှုပ်ခတ်တဲ့ စစ်ကိုင်းငလျင်ကို အကြောင်းပြပြီး စစ်ကောင်စီက ၂၀၂၅ မေလ ၃၁ ရက်နေ့အထိ အပစ်အခတ်ရပ်စဲတယ်လို့ ကြေညာထားပေမယ့် စစ်ကိုင်း၊ မကွေးနဲ့ ရခိုင်တွေမှာ ၂ ရက်အတွင်း စစ်ကြောင်းထိုး၊ ဗုံးကြဲခံရလို့ လူ ၅၀ ဝန်းကျင် သေဆုံးပြီး အနည်းဆုံး ၁၂၀ ကျော် ထိခိုက်ဒဏ်ရာရထားတာပါ။

ဒီအချက်အလက်တွေဟာ သက်ဆိုင်ရာအဖွဲ့အစည်း၊ သတင်းဌာနတွေရဲ့ ရေးသားချက်ကို ကိုးကားဖော်ပြခြင်းသာဖြစ်ပြီး အရပ်သားပြည်သူ ထိခိုက်မှုအရေအတွက်ဟာ အခုထက် ပိုမိုများပြားနိုင်ပါတယ်။

#RadioNUGLocalNews

#SpringRevolution