19 May 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ မေလ ( ၁၉ ) ရက်နေ့ ရပြည်တွင်းသတင်းများ

📌📌 1/ မတူပီမြို့နယ်၊ လှသန်းကျေးရွာမှ ပြည်သူများကို MTHD မှ အခမဲ့ ဆေးကုသပေး

The Matupi Times၊ မေလ ၁၅၊ ၂၀၂၅

Matupi Township Health Department (MTHD) မှ မတူပီမြို့နယ်၊ လှသန်း (Hla Tan) ကျေးရွာရှိ ဒေသခံ ပြည်သူများကို ပြီးခဲ့တဲ့ မေလ ၁၀၊ ၂၀၂၅ ရက်နေ့က အခမဲ့ ဆေးကုသမှု ပြုလုပ်ပေးခဲ့ကြောင်း သိရပါတယ်။

အဆိုပါ Mobile Clinic ဆေးကုသမှုအစီအစဉ်တွင် ကလေးအယောက် ၂၀ နဲ့ လူကြီး ၄၃ ယောက်၊ စုစုပေါင်း ၆၃ ယောက်ကို အခမဲ့ ဆေးကုသမှု ပေးနိုင်ခဲ့ပြီး မလေးရီးယား ရောဂါပိုး စစ်ပေးမှုတွေလည်း ပြုလုပ်ပေးခဲ့တယ်လို့ သိရပါတယ်။ ဒါ့အပြင် အလှူရထားတဲ့ ဆေးတွေကိုလည်း အခမဲ့ ထောက်ပံ့ပေးအပ်ခဲ့တယ်လို့ Matupi Township Health Department ထံက သိရပါတယ်။

========================

 

📌📌 2/ မင်းတပ်မြို့နယ်ရှိ ကျေးရွာတရွာကို စကစ ဗုံးကြဲ၊ ကျောင်းသား (၁) ဦးနှင့် အမျိုးသမီး (၁) ဦး သေဆုံးပြီး (၁၁) ဦး ဒဏ်ရာရရှိ၊ ကျေးရွာစာသင်ကျောင်းနှင့် အိမ်ခြေ (၄၀) ကျော် ထိခိုက်ပျက်စီး

The Matupi Times၊ မေလ ၁၅၊ ၂၀၂၅

လေကြောင်းတိုက်ခိုက်မှုတွေ ဆက်တိုက် ပြုလုပ်နေတဲ့ အကြမ်းဖက် စစ်ကောင်စီတပ်က ဒီကနေ့ ၂၀၂၅ ခုနှစ် မေလ ၁၅ ရက်နေ့မှာ မင်းတပ်မြို့နယ်ရှိ ကျေးရွာတရွာကို ဗုံးကြဲ တိုက်ခိုက်ခဲ့တယ်လို့ သိရပါတယ်။

စစ်ကောင်စီတပ်က ဒီကနေ့ နံနက် ၉:၃၀ ဝန်းကျင်၌ မင်းတပ်မြို့နယ်၊ တိုက်နယ်အမှတ် (၁) အတွင်းရှိ ကျေးရွာတစ်ရွာကို ဗုံးကြဲတိုက်ခိုက်မှုပြုလုပ်ခဲ့တာလို့ မင်းတပ်မြို့နယ် (ပအဖ) ထံက သိရပါတယ်။

အဆိုပါ လေကြောင်းတိုက်ခိုက်မှုကြောင့် (၁၃) နှစ်အရွယ် ကျောင်းသားတစ်ဦးနှင့် (၄၀) နှစ်အရွယ် အမျိုးသမီးတစ်ဦး သေဆုံးခဲ့ပြီး ပြည်သူ (၁၁) ဦး ထိခိုက်ဒဏ်ရာရရှိခဲ့တယ်လို့ သိရပါတယ်။ ဒါ့အပြင် ကျေးရွာစာသင်ကျောင်းလည်း အကြီးအကျယ် ထိခိုက်ပျက်စီးခဲ့ရပြီး ကျေးရွာအိမ်ခြေ (၄၀) ကျော် ထိခိုက်ပျက်စီးခဲ့ရတယ်လို့ ဆိုပါတယ်။

သေဆုံးသူ မိသားစုဝင်များ၊ ထိခိုက်ဒဏ်ရာရသူများကို မြို့နယ်ပြည်သူ့အုပ်ချုပ်ရေးအဖွဲ့အနေဖြင့် မြေပြင်တွင် သွားရောက် ထောက်ပံ့ကူညီမှုများ ပြုလုပ်ခဲ့တယ်လို့ သိရပါတယ်။

မင်းတပ်မြို့ကို ချင်းညီနောင် ပူးပေါင်းအဖွဲ့က သိမ်းပိုက်ပြီးနောက် (ယခုနှစ် ၂၀၂၅ ဖေဖော်ဝါရီမှ မေလအထိ) အကြမ်းဖက် စစ်ကောင်စီက (၁၃) ကြိမ် တိတိ ဗုံးကြဲတိုက်ခိုက်ခဲ့တာကြောင့် ဗုံးကြဲဒဏ်ခံရသော ပြည်သူများအနေဖြင့် လူသားချင်းစာနာ ထောက်ပံ့မှုများ လိုအပ်လျက်ရှိတယ်လို့ သိရပါတယ်။

========================

 

📌📌 3/ ချင်းဖိုက်တာ Joshua Van က ငလျင်ဘေး ပြန်လည်ထူထောင်ရေးအတွက် ကျပ်သိန်း ၅၀၀ ကျော် ထပ်မံလှူဒါန်း

The Matupi Times၊ မေလ ၁၆၊ ၂၀၂၅

မြန်မာငလျင်ဘေးဒဏ်သင့် ပြည်သူများ ပြန်လည်ထူထောင်ရေးအတွက် ကျပ်သိန်း ၅၀၀ ကျော် ထပ်မံ လှူဒါန်းလိုက်ကြောင်း UFC ချင်းဖိုက်တာ Joshua Van က သူ့ရဲ့ ဖေ့စ်ဘုတ်စာမျက်နှာမှ ဆင့် အသိပေး ဖော်ပြထားပါတယ်။

အဆိုပါ အလှူငွေများကို Chinland Foundation မှတဆင့် မေလ ၁၅ ရက်နေ့က လှူဒါန်းခဲ့ခြင်းဖြစ်ပြီး မြန်မာပြည်သူများ ငလျင်ဘေးဒဏ် စတင် ကြုံတွေ့ရချိန်မှာ ငလျင်ဘေးသင့်သူတွေအတွက် Chinland Foundation မှတဆင့် ကျပ်သိန်း ၁၀၀ လှူဒါန်းခဲ့ပြီးဖြစ်ပါတယ်။ ယခု ထပ်မံ လှူဒါန်းတဲ့ အလှူငွေများကို ငလျင်ဘေးဒဏ်သင့် နေရာများ ပြန်လည်ထူထောင်ရေး လုပ်ငန်းများအတွက် အသုံးပြုသွားမယ်လို့ သိရပါတယ်။

ငလျင်ဒဏ် ခံစားနေရသော ပြည်သူများ ပြန်လည်ထူထောင်နိုင်ရေးအတွက် Chinland Foundation မှတဆင့် လှူဒါန်းမှုအပေါ် အထူးပင် ဂုဏ်ယူလေးစားရပါကြောင်း Chinland Foundation ဥက္ကဋ္ဌ Saya Thawng Tha Thang က သူ့ရဲ့ လူမှုကွန်ယက် စာမျက်နှာမှာ ဖော်ပြထားပါတယ်။

Joshua Van အနေဖြင့် လာမည့် ဇွန်လ ၇ ရက်နေ့မှာ ဘရာဇီးဖိုက်တာ Bruno Silva နှင့် ထိုးသတ်သွားမှာ ဖြစ်ပြီး အဆိုပါပွဲအတွက် လေ့ကျင့် ပြင်ဆင်မှုများ ပြုလုပ်နေကြောင်း သိရပါတယ်။

========================

 

📌📌 4/ ချင်းညီနောင်အဖွဲ့ဝင် တပ်ဖွဲ့များ စုပေါင်းကာ တပ်မတော်တစ်ရပ်ကို မြှင့်ဖွဲ့စည်းမည်ဟု သတင်းထုတ်ပြန်

The Matupi Times၊ မေ ၁၁၊ ၂၀၂၅

ချင်းညီနောင်အဖွဲ့အနေဖြင့် ၂၀၂၅ ခုနှစ် ဧပြီ ၂၆ ရက်ကနေ ၂၉ ရက်နေ့အထိ ချင်းပြည်နယ်၊ လွတ်မြောက်တနေရာတွင် မြေပြင်အစည်းအဝေး ကျင်းပခဲ့တယ်လို့ သိရပါတယ်။

အစည်းအဝေးတွင် အချက် (၄) ချက်ကို သဘောတူချမှတ်နိုင်ခဲ့ပြီး၊ သဘောတူညီချက်များအနက်တွင် ချင်းပြည်သူ လူထုတရပ်လုံးကို ကိုယ်စားပြုနိုင်မည့် အစိုးရတစ်ရပ် ပေါ်ပေါက်လာရေးနှင့် ချင်းညီနောင်အဖွဲ့ဝင်အားလုံး ပေါင်းစည်းကာ ချင်းပြည်နှင့် ချင်းတမျိုးသားလုံးအတွက် အကာအကွယ်ပေးနိုင်မည့် တပ်မတော်တစ်ရပ် (Standard Army) အဖြစ် တိုးမြှင့်ဖွဲ့စည်းနိုင်ရေးအတွက် အခြေခံမူများကို ချမှတ်နိုင်ခဲ့တယ်လို့ ဆိုပါတယ်။

၂၀၂၃ ခုနှစ် ဒီဇင်ဘာ ၃၀ ရက်နေ့ ဖွဲ့စည်းတည်ထောင်ခဲ့သည့် ချင်းညီနောင်တွင် ချင်းအမျိုးသားအဖွဲ့ချုပ် (CNO/CNDF)၊ ချင်းကာကွယ်ရေးတပ်ဖွဲ့ - မင်းတပ်၊ ဇိုမီးဖက်ဒရယ်အစည်းအရုံး (ZFU/PDF-Zoland)၊ ချင်းကာကွယ်ရေးတပ်ဖွဲ့ - ကန်ပက်လက်၊ ချင်းလဲန်းကာကွယ်ရေးတပ်ဖွဲ့ - မတူပီ တပ်မဟာ (၁) နှင့် မရာနယ်မြေအုပ်ချုပ်ရေးကောင်စီ (MTC/MDF) တို့ ပါဝင်ကြသည်။

ဖွဲ့စည်းတည်ထောင်ပြီးနောက် ၁ နှစ်ကျော်အတွင်း ကျင်ဒွေး၊ မတူပီ၊ မင်းတပ်၊ ကန်ပက်လက်၊ ဖလမ်းမြို့များကို ချင်းညီနောင်အဖွဲ့မှ စစ်ဆင်ရေးဖော်ဆောင်ပြီး သိမ်းပိုက်ထိန်းချုပ်ထားနိုင်ခဲ့ကြောင်း သိရသည်။

========================

 

📌📌 5/ လောင်တလိုင်ခရိုင်ကနေ မည်သည့်ကုန်စည်ကိုမှ မြန်မာနိုင်ငံထဲ မသယ်ဆောင်ရန် ခရိုင်ကောင်စီအမိန့်ထုတ်ပြန်

၁၇ မေ၊ ၂၀၂၅

မီဇိုရမ်ပြည်နယ်၊ လောင်တလိုင်ခရိုင်ကနေ မည်သည့်ကုန်စည်မျိုးကိုမျှ မြန်မာနိုင်ငံအတွင်းသယ်ဆောင်ခြင်းမပြုရန် လိုင်ကိုယ်ပိုင်အုပ်ချုပ်ခွင့်ရ ခရိုင်ကောင်စီ (Lai Autonomous District Council – LADC) ၏ မြေအခွန်ဦးစီးဌာန (Land Revenue & Settlement Department) မှ မနေ့၊ မေလ ၁၆ ရက်နေ့တွင် အမိန့်ထုတ်ပြန်ခဲ့ပါသည်။

LADC မြေအခွန်ဦးစီးဌာနနှင့် လောင်တလိုင်ခရိုင် ဒုကော်မရှင်နာတို့သည် ပြီးခဲ့သည့် ဧပြီလ ၁၀ ရက်နေ့ နေ့လယ် ၁၂ နာရီအချိန်တွင် အရပ်သားကာကွယ်ရေးအစည်းအဝေးတစ်ရပ် ကျင်းပခဲ့ကြပြီး လက်ရှိဖြစ်ပွားနေသော နယ်စပ်အရေးအခင်းများနှင့် ပတ်သက်၍ ခရိုင်အတွင်း ပြည်သူများ အစားအသောက်အတွက် အခက်အခဲ မရှိစေရန် ပစ္စည်းများ သိုလှောင်ဖို့လိုကြောင်း ဆိုခဲ့သည်။

ထို့ကြောင့် မေလ ၁၆ ရက်နေ့မှစတင်ပြီး နောက်ထပ်အမိန့်အသစ်တစ်ရပ်ထုတ်မည့်အချိန်အထိ လောင်တလိုင်ခရိုင်အတွင်းရှိ ကုန်သွယ်မှုလိုင်စင်ရှိသူများအနေဖြင့် မည်သည့်ကုန်စည်မျိုးကိုမျှ မြန်မာနိုင်ငံသို့ သယ်ဆောင်ခြင်း မပြုရရန် ကြေညာထားပါသည်။

စျေးဆိုင်ပိုင်ရှင်များအနေဖြင့် စျေးကွက်စစ်ဆေးရေးမှူးများက စျေးဆိုင်များသို့ လာရောက်စုံစမ်းစစ်ဆေးမည်ဖြစ်ပြီး၊ မိမိတို့သိုလှောင်ထားသည့် ကုန်စည်စာရင်းများကို မှန်ကန်စွာ တင်ပြရမည်ဟု ဖော်ပြထားသည်။

ထုတ်ပြန်ထားသော အမိန့်စာအား မထီမဲ့မြင်၍ မလိုက်နာသူများအား ကုန်သွယ်ခွင့်လိုင်စင် ရုပ်သိမ်းနိုင်ကြောင်း LADC မြေအခွန်ဦးစီးဌာန အကြီးအကဲ Pu A Zaithang မှ အမိန့်ထုတ်ပြန်ထားခြင်းဖြစ်သည်။

#RadioNUGLocalNews

#SpringRevolution