31 May 2025 - (Ethnic language program-CHO_DAAI) by Radio NUG

 

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ မေလ ( ၃၁ ) ရက်နေ့နောက်ဆုံးရပြည်တွင်းသတင်းများ

📌📌 ၁။ ချင်းတောင်ကို‌စစ်ကြောင်းထိုးလာတဲ့အင်အားရာချီ စစ်တပ်စစ်ကြောင်းကို Chinland Council နဲ့ Chin Brotherhood တို့ ပူးပေါင်းပြီး ခုခံတိုက်ခိုက်နေ။

 

ချင်းတောင်ကို စစ်ကြောင်းထိုးလာတဲ့ အင်အား ၈၀၀ ဝန်းကျင်ရှိစစ်ကောင်စီစစ်ကြောင်းကို Chinland Council နဲ့ Chin Brotherhood တို့ ပူးပေါင်းပြီး ခုခံတိုက်ခိုက်နေတယ်လို့ သိရပါတယ်။

အဆိုပါစစ်ကောင်စီစစ်ကြောင်းဟာ တီးတိန်မြို့နယ်၊ သိုင်းငင်းဗျူဟာစခန်းကို ဦးတည်တယ်လို့ သိရပြီး သိုင်းငင်းရွာဟာ စစ်ကိုင်းတိုင်းထဲကနေ ချင်းပြည်နယ်ကို ဝင်ဖို့ ပြည်နယ်ဝင်ပေါက်ဖြစ်သလို ချင်းတောင်ပိုင်းနဲ့ မြောက်ပိုင်းလမ်းဆုံဖြစ်တာကြောင့် ချင်းပြည်ထဲကိုစိမ့်ဝင်ဖို့ ဗျူဟာ အကျဆုံးနေရာ တစ်ခုဖြစ်တယ်လို့သိရပါတယ်။

သိုင်းငင်းရွာမှာအခြေစိုက်ခဲ့တဲ့ စစ်ကောင်စီတပ်စခန်းကိုတော့ CNF/CAN နဲ့ ပူးပေါင်းတပ်တွေက ၂၀၂၄ ဇန်နဝါရီ ၁၆ ရက်မှာ သိမ်းယူခဲ့တာပါ။

ဒီကတဆင့် CNF/CAN ပူးပေါင်းတပ်တွေ သိမ်းထားတဲ့ တွန်းဇံနှင့် ချင်းညီနောင်အဖွဲ့သိမ်းထားတဲ့ ဖလမ်းဘက်ကိုလည်း ဝင်ရောက်နိုင်သလို ဟားခါးမြို့ကိုလည်းစစ်အင်အားထပ်မံဖြည့်တင်းမှုတွေပြုလုပ်နိုင်တာကြောင့် စစ်တပ်က နယ်မြေပြန်လည်စိုးမိုးနိုင်ဖို့ ကြိုးစားလာတာဖြစ်နိုင်တယ်လို့ဆိုပါတယ်။

အခု ကလေး-သိုင်းငင်းလမ်းပိုင်းတိုက်ပွဲမှာ ဒီနယ်မြေမှာရှိတဲ့ CCနဲ့ CB တပ်တွေ ပူးပေါင်းတိုက်ခိုက်နေတယ်လို့ ချင်းကာကွယ်ရေးတပ်- စီးယင်း (CDF CDM Siyin) ဥက္ကဋ္ဌ နှင့် ချင်းအမျိုးသားတပ်ဦး (CNF/CAN) ပြောရေးဆိုခွင့်ရှိသူ ဆလိုင်းထက်နီက ဘီဘီစီကို ပြောပါတယ်။ Chinland Council နဲ့ Chin Brotherhood တို့ ပထမဆုံးပူးပေါင်းတိုက်တဲ့ တိုက်ပွဲလို့ဆိုရမှာပါ။

ချင်းတောင်တက်လာတဲ့ စစ်ကောင်စီတပ်ကို ချင်းကာကွယ်ရေးတပ်ဖွဲ့တွေဖြစ်တဲ့ CDF-CDM-Siyin၊ PDF – Zoland နှင့် CDF – KKG တို့က မေလ ၂၁ ရက်မှစတင်၍ ၂၃ ရက်အထိ(၃)ရက်ကြာ  ခုခံတိုက်ခိုက်ခဲ့ကြပြီးနောက် အခုလိုချင်းတော်လှန်ရေးတပ်ဖွဲ့များစုပေါင်းကာ တိုက်ခိုက်နေခြင်းဖြစ်ကြောင်း သိရသည်။

(CNF/CAN) ပြောရေးဆိုခွင့်ရှိသူ ဆလိုင်းထက်နီက “ CC တွေ CB တွေ အဲဒီလို နိုင်ငံရေးတွေထက် စစ်ရေးအရ စစ်တပ်ကို အနိုင်ယူဖို့လိုတဲ့အချိန်မှာ စည်းရုံးစရာမလိုဘဲ ဖြစ်လာတာ။ CC၊CB မခွဲခြားဘဲ ပူးပေါင်းမှသာ စစ်တပ်ကို တိုက်နိုင်မှာ ဖြစ်တယ်။ တခြား လက်နက်ကိုင် မဟာမိတ်တွေကလည်း စစ်ရေးအရသော်လည်းကောင်း ပံ့ပိုးကူညီပေးဖို့ မေတ္တာရပ်ခံ လိုပါတယ်။” လို့ ဘီဘီစီမြန်မာပိုင်းကို ပြောပါတယ်။

တိုက်ပွဲတွေကြောင့် မေလ ၂ဝ ရက်နေ့ကစပြီး တွင် ကလေး-သိုင်းငင်းကားလမ်းအား အတက်အဆင်းအားလုံးကို CDF CDM SIYIN က ယာယီပိတ်ထားပြီး ၊ ကလေး-သိုင်းငင်းကားလမ်းပိုင်းရှိ ကျေးရွာများမှ  ပြည်သူ ၁၀၀၀ ကျော် စစ်ဘေးတိမ်းရှောင်နေကြရတယ်လို့ သိရပါတယ်။

========================

 

📌📌 ၂။ ထန်တလန်၊ မင်းတပ်၊ ကန်ပက်လက် မြို့နယ်အတွင်းရှိ စစ်ဘေးရှောင်တွေကိုစားနပ်ရိက္ခာ ကူညီပေးခဲ့တယ်လို့ NCCD ထုတ်ပြန်။

 

ချင်းပြည်နယ် ထန်တလန်မြို့နယ်၊ မင်းတပ်မြို့နယ်နဲ့ ကန်ပက်လက်မြို့နယ်အတွင်းရှိ ကျေးရွာပေါင်း ၉ ရွာမှာ ရောက်ရှိနေတဲ့ စစ်ဘေးရှောင်ပြည်သူတွေကို မေလ ၂၁ ရက်နေ့ကနေ ၂၆ ရက်နေ့အထိ  စားနပ်ရိက္ခာတွေကို ကူညီပေးနိုင်ခဲ့တယ်လို့ Network for Chin Community Development (NCCD)  က မေလ ၂၆ ရက်နေ့က ထုတ်ပြန်ပါတယ်။

NCCD အနေနဲ့ အခြေခံလူထုဖွံ့ဖြိုးရေးသင်တန်းကိုလည်း ပြီးခဲ့တဲ့ မေလ ၁၃ ရက်ကနေ ၁၇ ရက်အထိ တီးတိန်မြို့နယ်မှာ ပြုလုပ်ခဲ့ပြီး ဖလမ်း၊ မင်းတပ်၊ ထန်တလန်မြို့နယ်အတွင်းက ကျေးရွာ ၁၂ ရွာရှိ စစ်ဘေးရှောင်ပြည်သူတွေကိုလည်း ဖေဖော်ဝါရီလ ၆ ရက်ကနေ ၁၇ ရက်နေ့အထိ အခြေခံစားသောက်ကုန်တွေကို ထောက်ပံ့ပေးခဲ့တယ်လို့လည်း သိရပါတယ်။

Network For Chin Community Development (NCCD) ဟာ ၁၉၉၅ ခုနှစ်ကစပြီး ချင်းပြည်နယ်အတွင်း လူထုဖွံ့ဖြိုးရေးကို အဓိက လုပ်ဆောင်နေတဲ့ အဖွဲ့အစည်းဖြစ်တယ်လို့ သိရပါတယ်။

========================

 

📌📌 ၃။ အရပ်သားပြည်သူများ၊ အပြစ်မဲ့ကလေးများကို လေကြောင်းတိုက်ခိုက်ခြင်းဟာ စစ်ရာဇဝတ်မှုမြောက်ကြောင်းဆွီဒင်သံရုံးကထုတ်ပြန်။

ငလျင်ဘေးကြောင့် လူသားချင်းစာနာထောက် ထားရေးအနေနဲ့ အပစ်ရပ်ထားတဲ့စစ်‌ ကောင်စီတပ်ဖွဲ့‌ တွေက အရပ်သားပြည်သူများ၊ အပြစ်မဲ့ကလေးများကို လေကြောင်းတိုက်ခိုက်ပြီး စစ်ရာဇဝတ်မှု တွေ ဆက်လက်ကျူးလွန် နေတာကြောင့် မြန်မာနိုင်ငံဆိုင်ရာဆွီဒင်သံရုံးအနေနဲ့ အလွန်စိုးရိမ်ကြောင်း မေလ ၂၈ ရက်နေ့မှာထုတ်ပြန်ထားပါတယ်။

အဆိုပါထုတ်ပြန်ချက်မှာ စစ်‌ကောင်စီတပ်ဖွဲ့ တွေက သူတို့ကြေညာထားတဲ့ အပစ်အခတ်ရပ်စဲရေးကို ချိုးဖောက်ပြီး စာသင်ကျောင်းများ၊ ဆေးရုံများနှင့် ဘာသာရေး အဆောက် အအုံများ အပါအဝင် အရပ်သားပြည်သူများကိုပစ်မှတ်ထားပြီး လေကြောင်းက‌ နေနေ့စဉ်နီးပါး တိုက်ခိုက်မှု အစီရင်ခံစာများနှင့်ပတ်သက်ပြီး ဆွီဒင်သံရုံးအ‌နေနဲ့ အလွန်စိုးရိမ်ကြောင်းဖော်ပြထားပါတယ်။

ဒါ့အပြင် ဆွီဒင်သံရုံးအနေဖြင့် စစ်ကိုင်း၊မကွေး၊ မန္တလေး၊ ပဲခူး၊ ရခိုင်၊ ချင်းနှင့် မြန်မာနိုင်ငံရှိ အခြား တိုင်းဒေသကြီးများနှင့် ပြည်နယ်များတွင် စစ်တပ်၏ လေကြောင်းတိုက်ခိုက်မှုကြောင့် သေဆုံးသူများ၏ မိသားစုဝင်များအတွက် အထူးဝမ်းနည်းကြောင်းထုတ်ပြန်ချက်မှာပါရှိပါတယ်။

ဆက်လက်ပြီး အရပ်သားပြည်သူများ၊ အထူး သဖြင့် အပြစ်မဲ့ကလေးများကို တိုက်ခိုက်ခြင်းဟာ စစ်ရာဇဝတ်မှုဖြစ်ပြီးဆွီဒင်သံရုံးကနိုင်ငံ တကာ လူသားချင်းစာနာထောက်ထားမှုဆိုင်ရာ ဥပဒေကို အမြဲကာကွယ်ပေးမည်ဖြစ်တာကြောင့်  မြန်မာပြည်သူများနှင့်အတူ ရပ်တည်သွားမယ်လို့ဆိုပါတယ်။

ငလျင်ဘေးကြောင့် လူသားချင်းစာနာထောက် ထားရေးအနေနဲ့ အပစ်ရပ်ထားတဲ့စစ်‌ ကောင်စီတပ်က  ဧပြီလ ၃ ရက် နေ မေလ ၁၃ ရက်နေ့ အထိ ရက်ပေါင်း (၄၀) အတွင်း လေ ကြောင်းကနေ တိုက်ခိုက်မှု ၁၈၁ ကြိမ်အထိ ပြုလုပ်ခဲ့ပြီး  အရပ်သား ၁၈၂ ဦးသေဆုံးခဲ့တယ်လို့ အမျိုး သားဒီမိုကနေစီအဖွဲ့ချုပ် (NLD) က မေလ ၁၅ ရက်နေ့ကထုတ်ပြန်ခဲ့ပါတယ်။

၂၀၂၃ ခုနှစ်ကနေ ၂၀၂၅ ခုနှစ် မေလ ၁၂ ရက်နေ့အထိ စစ်ကောင်စီ၏လေကြောင်းတိုက်ခိုက်မှုကြောင့် အရပ်သားပြည်သူ ၃,၀၄၃ ဦး သေဆုံးခဲ့တယ်လို့ အမျိုးသားညီညွတ်ရေးအစိုးရ ( NUG) က မေလ ၁၆ ရက်နေ့ကထုတ်ပြန်ခဲ့ပါတယ်။

#RadioNUGLocalNews

#SpringRevolution