14 Jul 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇူလိုင်လ ( ၁၄ ) ရက်နေ့ ရပြည်တွင်းသတင်းများ

📌📌 1/ ဟားခါး-မတူပီလမ်းပိုင်းတွင် ခွင့်ပြုထားသော မော်တော်ယာဉ်များသာ သွားလာခွင့်ပြုမည်ဟု CDF-Matupi သတင်းထုတ်ပြန်

 

The Matupi Times ၊ ဇူလိုင်လ ၆ ၊ ၂၀၂၅

ဟားခါး-မတူပီလမ်းပိုင်း ပြုပြင်စဉ်ကာလအတွင်း သွားလာခွင့်ပြုထားသော မော်တော်ယာဉ်များကိုသာ ဖြတ်သန်းသွားလာခွင့်ပြုမယ်လို့ Chinland Defense Force Matupi က ဒီကနေ့ညပိုင်းမှာ သတင်းထုတ်ပြန်ပါတယ်။

အဆိုပါလမ်းပိုင်းသည် ယခုရက်ပိုင်းတွင်း မိုးသည်းထန်စွာ ရွာသွန်းပြီး တောင်ကျချောင်းရေများကြောင့် ပျက်စီးလျက်ရှိပြီး လမ်းပြုပြင်ထိန်းသိမ်းမှု ဆောင်ရွက်နေသည့်ကာလအတွင်း မော်တော်ယာဉ် သွားလာမှုများကို ကန့်သတ်သွားမယ်လို့ ဆိုပါတယ်။

အဆိုပါလမ်းပိုင်းကို နေရပ်ပြန် စစ်ရှောင်များနှင့် ဒေသအတွင်း ဖွံ့ဖြိုးရေးလုပ်ငန်း ဆောင်ရွက်နေသည့် NGO/INGOs များနှင့် တော်လှန်ရေး မိတ်ဖက်အဖွဲ့အစည်းများ၏ မော်တော်ယာဉ်များကိုသာ ဆက်လက် သွားလာခွင့်ပြုမယ်လို့ ဆိုပါတယ်။

လမ်းပြုပြင်ထိန်းသိမ်းရေးကာလဖြစ်သည့် ဇူလိုင်လ ၈ ရက်နေ့မှ နောက်ထပ်တစုံတရာ မထုတ်ပြန်မချင်း ခွင့်ပြုထားသော မော်တော်ယာဉ်များမှအပ အခြားမော်တော်ယာဉ်များကို ဖြတ်သန်းသွားလာခွင့်ပြုတော့မည်မဟုတ်ကြောင်း CDF-Matupi ထုတ်ပြန်ချက်မှာ ရေးသားဖော်ပြထားပါတယ်။

Chinland Defense Force-Matupi တပ်မဟာ (၂) အမည်နာမကို Chinland Defense Force-Matupi အဖြစ် ပြီးခဲ့တဲ့ မေလ ၃၁ ရက်နေ့က ပြန်လည်ပြောင်းလဲလိုက်တာဖြစ်ပါတယ်။

 

========================

 

📌📌 2/ CDF-Kanpetlet ၏ (၄) လကြာ အပတ်စဉ်(၂) အခြေခံစစ်သင်တန်းကျင်းပပြီးစီး ၊အိမ်နီးချင်း မိတ်ဖက်မဟာမိတ်တပ်ဖွဲ့များနှင့်အတူ စစ်မှန်သောလွတ်မြောက်မှုရရှိသည်ထိတိုက်ပွဲဝင်သွားမည်ဟု CDF-Kanpetlet ထုတ်ပြန်

 

The Matupi Times ၊ ဇူလိုင် ၈ ၊ ၂၀၂၅

ချင်းပြည်တောင်ပိုင်း၊ ကန်ပက်လက်မြို့နယ်နှင့် ကျင်ဒွေးမြို့အား ကိုယ်စားပြုသော တော်လှန်ရေးတပ်ဖွဲ့တစ်ခုဖြစ်သည့် CDF-Kanpetlet ၏ အပတ်စဉ် (၂) အခြေခံစစ်သင်တန်း အောင်မြင်စွာ ကျင်းပပြီးစီးကြောင်း CDF-Kanpetlet က သတင်းထုတ်ပြန်ပါတယ်။

အဆိုပါစစ်သင်တန်းသည် (၄) လကြာ မြင့်ခဲ့ပြီး သင်တန်းဆင်းရဲဘော်/ရဲမေများ၏ ကျမ်းသစ္စာ ကျိန်ဆိုခြင်းအခမ်းအနားကိုလည်း ကျင်းပခဲ့တယ်လို့ သိရပါတယ်။

ချင်းပြည်နယ်တောင်ပိုင်း ကျင်ဒွေးမြို့နှင့် ကန်ပက်လက်မြို့နယ်အတွင်းရှိ အသက် (၁၈) နှစ်အထက် လူငယ်မောင်မယ်များအားလုံး အမျိုးသားရေးတာဝန်များကို ရှောင်လွှဲခြင်းမပြုရန်နှင့် Chin Defense Force - Kanpetlet တပ်ဖွဲ့၏ အခြေခံစစ်ပညာသင်တန်း အပတ်စဉ် (၃) တွင် အမျိုးသားရေးတာဝန်သိစိတ်ဖြင့် တက်ကြွစွာ ပူးပေါင်းပါဝင် တက်ရောက်ပေးကြရန်လည်း ဖိတ်ခေါ်ထားပါတယ်။

စစ်သင်တန်းပြီးမြောက်ရေးအတွက် ပံ့ပိုးကူညီပေးကြတဲ့ မဟာမိတ်အဖွဲ့အစည်းတစ်ခုဖြစ်သည့် ရက္ခိုင်အမျိုးသားအဖွဲ့ချုပ် / အာရက္ခတပ်‌တော် (ULA/AA) နှင့် ပြည်တွင်းပြည်ပ သို့ ရောက်ရှိနေကြသော Chin Defence Force - Kanpetlet ၏ ထောက်ပံ့ပြည်သူများအားလုံးကို အထူးကျေးဇူးတင်ရှိကြောင်း ထုတ်ပြန်ချက်မှာ ဖော်ပြပါတယ်။

========================

 

📌📌 3/ ရိဒ်ခေါဒါရ်မြို့မှ CNO/CNDF တပ်ဖွဲ့ဆုတ်ခွာ ၊ နယ်စပ်တံတားတွင် CNA/CNF အလံပြန်လည်စိုက်ထူ

 

The Matupi Times ၊ ဇူလိုင် ၁၁ ၊ ၂၀၂၅

အိန္ဒိယ-မြန်မာနယ်စပ်၊ ရိဒ်ခေါဒါရ်မြို့ကနေ ချင်းအမျိုးသားအဖွဲ့ချုပ် (CNO / CNDF) တပ်ဖွဲ့တွေ ယနေ့ ဇူလိုင်လ ၁၁ ရက်နေ့ မနက်ပိုင်းမှာ ပြန်လည်ဆုတ်ခွာသွားကြတယ်လို့ ဒေသခံသတင်းထံက သိရပါတယ်။

CDF-Hualngoram နဲ့ CNDF တို့ကြား ပြီးခဲ့တဲ့ ဇူလိုင်ပထမအပတ်ကစပြီး ဖလမ်းခရိုင်မှာ နှစ်ဖက်စစ်ရေး တင်းမာလာခဲ့တာဖြစ်ပြီး HPO/CDF–Hualngoram ထိန်းချုပ်ထားတဲ့ ရိဒ်ခေါဒါရ်မြို့ကို CNO / CNDF က ဇူလိုင်လ ၅ ရက်နေ့မှာ သိမ်းပိုက်ခဲ့ပါတယ်။

ရိဒ်ခေါဒါရ်မြို့ သိမ်းပိုက်ခံရပြီးနောက် CNO/CNDF တပ်ဖွဲ့ဌာနချုပ်ကို CNA က ဇူလိုင် ၆ ရက်ညတွင် တိုက်ခိုက်သိမ်းပိုက်ခဲ့တယ်လို့ CNO/CNDF ပြောရေးဆိုခွင့်ရှိသူ ဆလိုင်းတင်မီက People's Spring Media ကို ပြောပါတယ်။

နှစ်ဖက်တိုက်ပွဲတွေကြောင့် ဒေသခံပြည်သူ ၄၀၀၀ ခန့်ဟာ အိန္ဒိယနိုင်ငံဘက်သို့ ထွက်ပြေးတိမ်းရှောင်ခဲ့ရပါတယ်။

ရိဒ်ခေါဒါရ်မြို့မှ CNO/CNDF တပ်တွေ ပြန်လည်ဆုတ်ခွာသွားပြီးနောက် မြန်မာဘက်ခြမ်းနယ်စပ် (တီအိုချောင်း) တံတားပေါ်မှာ CNA/CNF အလံကို ဒီကနေ့ မနက်ပိုင်းမှာ ပြန်လည်စိုက်ထူလိုက်တယ်လို့ သိရပါတယ်။

 

========================

 

📌📌 4/ အိန္ဒိယနိုင်ငံ ၊ နယူးဒေလီမြို့ UNHCR ရုံးရှေ့ တွင် (CRC) ၏ ဦးဆောင်မှုဖြင့် ဆက်လက်ဆန္ဒဖော်ထုတ်မည်

 

The Matupi Times ၊ ဇူလိုင်လ ၁၁ ၊ ၂၀၂၅
အိန္ဒိယနိုင်ငံ၊ နယူးဒေလီမြို့ကုလသမဂ္ဂ (UNHCR) ရုံးရှေ့တွင် ချင်းဒုက္ခသည်ကော်မတီ (CRC) ၏ ဦးဆောင်မှုဖြင့် ပြီးခဲ့ဇူလိုင်လ ၁၁ ရက်နေ့မှာ (၅) ရက်နေ့မြောက်အဖြစ် ဆက်လက်ဆန္ဒထုတ်ဖော်ခဲ့ကြတယ်လို့ သိရပါတယ်။ မိုးသည်းထန်စွာ ရွာသွန်းနေတဲ့ကြားက ဆန္ဒဖော်ထုတ်မှုအစီအစဉ်ကို မရပ်နားဘဲ ဆက်လက်ပြုလုပ်နေကြတာဖြစ်ပါတယ်။

ပြီးခဲ့တဲ့ ဇူလိုင်လ ၇ ရက်နေ့ကစပြီး နယူးဒေလီ UNHCR ရုံးရှေ့မှာ ချင်းဒုက္ခသည်ကော်မတီ (CRC) ၏ ဦးဆောင်မှုဖြင့် မြန်မာစစ်ဘေးရှောင်များနှင့် Afghanistan စစ်ရှောင်များ ပူးပေါင်းပြီး ဒုက္ခသည်အခွင့်အရေးများ ရရှိရန် စတင်ဆန္ဒဖော်ကြတာဖြစ်ပြီး ၎င်းတို့၏ တောင်းဆိုချက်များ မရမချင်း ဆက်လက်ဆန္ဒပြသွားမယ်လို့ သိရပါတယ်။

ဆက်လက်ပြီး UNHCR ရုံးရှေ့မှာ အခုလာမဲ့ ဇူလိုင်လ ၁၄ ရက် တနင်္လာနေ့မှာ ဆန္ဒထုတ်ဖော်မှုအစီအစဉ်ကို ဆက်လက်ပြုလုပ်သွားမယ်လို့ သိရပြီး နယူးဒေလီရောက် မြန်မာဒုက္ခသည်များအားလုံး ပါဝင်ပေးကြဖို့လည်း Chin Refugee Committee - New Delhi က ဖိတ်ခေါ်ထားပါတယ်။

 

========================

 

📌📌 5/ ဟားခါးမြို့က ရဲတစ်ဦး CDF-Hakha ထံလက်နက်နဲ့အတူ အလင်းဝင်

 

The Matupi Times ၊ ဇူလိုင်လ ၁၃ ၊ ၂၀၂၅

ချင်းပြည်နယ်၊ စစ်ကောင်စီထိန်းချုပ်ထားတဲ့ ဟားခါးမြို့က စစ်ကောင်စီလက်အောက်ခံ ရဲတပ်ဖွဲ့ဝင်တစ်ဦးသည် CDF-Hakha ထံ အလင်းဝင်လာကြောင်း ယနေ့ ဇူလိုင်လ ၁၃ ရက်နေ့မှာ သတင်းထုတ်ပြန်ပါတယ်။

အဆိုပါ ရဲတပ်ဖွဲ့ဝင်ဟာ ပြီးခဲ့တဲ့ ၂၀၂၅ ခုနှစ်၊ ဇူလိုင်လ ၆ ရက်နေ့၌ လက်နက်ခဲယမ်းများနှင့်အတူ Chinland Defense Force - Hakha ထံသို့ အလင်းဝင်လာခဲ့တာဖြစ်ကြောင်း သိရပါတယ်။

အလင်းဝင်လာသူကို မိမိတို့ CDF-Hakha မှ ကြိုဆိုပြီး ငွေသားဆုကြေးများ ချီးမြှင့်သည့်အပြင် လုံခြုံသည့်နေရာရောက်သည်အထိ တာဝန်ယူ ဆောင်ရွက်ပေးမယ်လို့ ဆိုပါတယ်။

========================

 

📌📌 6/ မတူရိုးရာလိုဆာခ့်ခိုတူး Matu Losak Khotue ပွဲတော် ကိုရန်ကုန်မြို့နှင့်ပြည်ပနိုင်ငံတချို့တွင်ကျင်းပ

 

The Matupi Times                        ဇူလိုင် ၁၃ ၊ ၂၀၂၅
မတူပီ (ချင်း) လူမျိုးများ၏ နေ့ထူးနေ့မြတ်ဖြစ်သည့် မတူရိုးရာလိုဆာခ့်ခိုတူး ပွဲတော်ကို ရန်ကုန်အပါအဝင် မတူလူမျိုးများနေထိုင်ရာ ပြည်ပနိုင်ငံတချို့တွင် ယခုရက်ပိုင်းမှာ ကျင်းပပြုလုပ်ခဲ့ကြောင်း သိရသည်။

မတူရိုးရာလိုဆာခ့်ခိုတူး ပွဲတော်အစီအစဉ်ကို ရန်ကုန်မြို့၊ USA၊ Indianapolis နှင့် Australia Melbourne မြို့တို့မှာ တေးဂီတ၊ ဖက်ရှင်ရှိုး၊ မတူရိုးရာအက၊ ပျော်ပွဲရွှင်ပွဲအစီအစဉ်များနဲ့ ကျင်းပပြုလုပ်ခဲ့ကြပြီး ပွဲကြိုအနေဖြင့် အားကစားပြိုင်ပွဲများကိုလည်း တချို့နိုင်ငံတွေမှာ ကျင်းပပြုလုပ်ခဲ့ကြပါတယ်။

မတူပီ (ချင်း) ရိုးရာလိုဆာခ့်ခိုတူး ပွဲတော်ကို နှစ်စဉ် ဇူလိုင်လ ၁၅ ရက်နေ့တွင် ကျင်းပလေ့ရှိပြီး နိုင်ငံတကာရောက် မတူလူမျိုးများမှလည်း ၎င်းတို့နေထိုင်သည့် နိုင်ငံအသီးသီးတွင် နှစ်စဉ်ကျင်းပသော နေ့ထူးနေ့မြတ်တစ်ရက်ဖြစ်ပါသည်။ မတူရိုးရာလိုဆာခ့်ခိုတူး ပွဲတော်ကို ၁၉၇၄ ခုနှစ် နောက်ပိုင်းမှ စတင်၍ နေ့စွဲများ သတ်မှတ်ကာ ကျင်းပလာခဲ့ကြခြင်းဖြစ်သည်။

#RadioNUGLocalNews

#SpringRevolution