23 Aug 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ သြဂုတ်လ ( ၂၃ ) ရက်နေ့နောက်ဆုံးရပြည်တွင်းသတင်းများ

📌📌 ၁။ စစ်ကော်မရှင်လုပ်မယ့် ရွေးကောက်ပွဲ အပိုင်း ၁ မှာ ဟားခါးနဲ့ တီးတိန်မြို့ ပါဝင်

 

ချင်းပြည် ဟားခါး၊ တီးတိန်မြို့နယ်မှာ ရွေးကောက်ပွဲ အပိုင်း ၁ ကို ပြုလုပ်မယ်လို့ စစ်ကော်မရှင်က ကြေညာပါတယ်။

 

တစ်နိုင်ငံလုံးရှိ မြို့နယ် ၁၀၂ မြို့နယ်မှာ ကျင်းပမှာဖြစ်တယ်လို့ ဆိုပါတယ်။

 

ရွေးကောက်ပွဲ အပိုင်း ၁ ကို ၂၀၂၅ ဒီဇင်ဘာ ၂၈ ရက်မှာ စတင်ကျင်းပမှာဖြစ်ပြီး အပိုင်းလိုက် ဆက်လက်ကျင်းပမယ့် နေ့ရက်တွေကို ထုတ်ပြန်ပေးသွားမယ်လို့လည်း စစ်ကော်မရှင်က ကြေညာပါတယ်။ 

 

တီးတိန်မြို့နယ် အခြေစိုက်တဲ့ PDF Zolandကတော့ စစ်ကော်မရှင် ကျင်းပမယ့် ၂၀၂၅ ရွေးကောက်ပွဲဟာ လူထုရဲ့ အကျိုးစီးပွားအတွက် မဟုတ်ဘဲ စစ်တပ်ရဲ့ အာဏာတည်မြဲရေးအတွက်သာဖြစ်တာကြောင့် လူထုနဲ့ လက်တွဲပြီး ဟန့်တားသွားမယ်လို့ PDF Zoland က ဩဂုတ် ၁၉ ရက်နေ့ ထုတ်ပြန်ထားပါတယ်။

 

========================

 

📌📌 ၂။ ယောဒေသကတဆင့် ချင်းပြည်တောင်ပိုင်းကို စစ်အင်အားအလုံးအရင်းဖြင့် ဦးတည်လာလို့ မကွေး-ကန်ပက်လက်လမ်းပိုင်းတွေ ယာယီပိတ်

 

ချင်းပြည်မှာ ရွေးကောက်ပွဲကျင်းပပြုလုပ်နိုင်ရေးအတွက် အကြမ်းဖက်စစ်တပ်က စစ်အင်အားအလုံးအရင်းဖြင့် ယောဒေသဘက်ကနေ ထိုးစစ်ဆင်တိုက်ခိုက်ရန် ဦးတည်လာနေတဲ့အတွက် မကွေး နဲ့ ကန်ပက်လက်မြို့နယ်ကြား လမ်းပိုင်း တွေကို ယာယီပိတ်ပင်လိုက်တယ်လို့ CDF-Kanpetlet က ထုတ်ပြန်လိုက်ပါတယ်။ 

 

ပြီးခဲ့တဲ့ ဩဂုတ်လ ၁၆ ရက်နေ့က စစ်ကော်မရှင်က NUG နဲ့ ချင်းတော်လှန်ရေးတပ်ဖွဲ့အပါအဝင် တိုင်းရင်းသား တော်လှန်ရေး တပ်ဖွဲ့တွေ ထိန်းချုပ်ထားတဲ့ မြို့နယ် ၆၃ မြို့နယ်မှာလည်း ရွေးကောက်ပွဲ ပြုလုပ်သွားမယ်လို့ ထုတ်ပြန်ကြေညာခဲ့ပြီးနောက်မှာ မကွေးတိုင်းဘက်ကနေ ချင်းပြည်တောင်ပိုင်းဘက်ကို စစ်ကြောင်းထိုးဦးတည်လာ တယ်လို့ သိရပါတယ်။ 

 

မကွေးတိုင်း၊ လောင်းရှည် ကပစ (၂၅) တပ်ရင်းက စစ်တပ်အင်အား ၈၀၀ ခန့်၊ ဆိပ်ဖြူဘက်ကနေ တက်လာတဲ့ အင်အား ၄၀၀ ခန့်၊ ပေါက်မြို့နယ်မှာ ရောက်နေတဲ့ တပ်မ (၁၀၁) က တင့်ကား ၂ စီးနဲ့ စစ်ကား ၁၃၆ စီးပါ ယာဉ်တန်းဟာ ချင်း ပြည်တောင်ပိုင်း မင်းတပ်၊ မတူပီ၊ ကန်ပက်လက် မြို့နယ်တွေကို ဦးတည်ချဉ်းကပ်လာတယ်လို့ CDF-Kanpetlet ကဆိုပါ တယ်။ 

 

ဒါကြောင့် မကွေးတိုင်းကနေ ကန်ပက်လက် မြို့နယ်အတွင်း ဝင်ရောက်နိုင်တဲ့ လမ်းပိုင်းတွေနဲ့ ကန်ပက်လက်မြို့နယ် အတွင်းက လမ်းပိုင်းတွေကို ထုတ်ပြန်ချက် တစ်စုံတရာ ပြန်လည်ထုတ်ပြန်မှုမရှိမခြင်း ယာယီပိတ်ထားမယ် လို့ CDF-Kanpetlet က အသိပေးထားပါတယ်။

 

ဒါ့အပြင် အကြမ်းဖက်စစ်တပ်က အချိန်မရွေး ထိုးစစ်ဆင်လာနိုင်တာကြောင့် ပြည်သူတွေအနေနဲ့ စစ်ရေးသတိရှိရှိ ကြိုတင်ပြင်ဆင် ထားကြဖို့နဲ့ လေကြောင်းတိုက်ခိုက်မှု အန္တရာယ် ကာကွယ်နိုင်ရေး ဗုံးခိုကျင်း၊ ကတုတ်ကျင်းတွေ တူးထားပြီး သတိရှိရှိ နေထိုင်ကြဖို့ တိုက်တွန်းနှိုးဆော် ထားပါတယ်။

 

========================

 

📌📌 ၃။ ပခုက္ကူကနေထွက်တဲ့ ရိက္ခာတင် စစ်ယာဉ်တန်း ၂ လကျော်အကြာမှာ ပေါက် (ကပစ ၂၄) ထဲဝင်ရောက်နိုင်ခဲ့တယ်လို့ဆို

 

မကွေးတိုင်း၊ ပခုက္ကူမြို့ကနေ ပေါက်မြို့နယ်ရှိ ကာကွယ်ရေးပစ္စည်းစက်ရုံ (ကပစ ၂၄) ကို ရိက္ခာပို့ဖို့သွားတဲ့ စစ်အုပ်စု စစ်ကြောင်းဟာ နှစ်လခွဲခန့်အကြာမှာ ပေါက်မြို့နယ် ရောက်ရှိတယ်လို့ သိရပါတယ်။

 

အဲဒီစစ်ကြောင်းဟာ ပြီးခဲ့တဲ့ ဇွန်လ ၁ ရက်နေ့ကစပြီး ပခုက္ကူတပ်မ - ၁၀၁ ကနေ ၄၇ မိုင်ခန့်အကွာမှာရှိတဲ့ ပေါက်မြို့ကို ရိက္ခာပို့စစ်ကြောင်းအဖြစ် ပို့ဆောင်နေတာဖြစ်ပြီး နှစ်လခွဲခန့်အကြာ (ဩဂုတ် တတိယအပတ်) မှာတော့ ကာကွယ်ရေးပစ္စည်းစက်ရုံ (ကပစ ၂၄) ကို ရောက်ရှိသွားတာ ဖြစ်ပါတယ်။

 

အဲဒီ ရိက္ခာတင် စစ်ကြောင်းကို Non CDM၊ ပျူစောထီးနဲ့ စစ်အုပ်စုထောက်ခံသူတွေ ဝိုင်းဝန်းကြိုဆိုကြတာလို့ ဒေသခံတစ်ဦးကို ကိုးကားပြီး Mandalay Free Press – MFP က ရေးသားပါတယ်။

 

အဲဒီစစ်ကြောင်းဟာ မကွေးတိုင်း ပေါက်မြို့နယ်နဲ့ ထီးလင်းနယ်တွေကို စစ်ကြောင်းထိုးလာနိုင်တာကြောင့် ဒေသခံပြည်သူတွေအနေနဲ့ လွတ်‌ကင်းရာနေရာကို ရှောင်တိမ်းနေကြဖို့ ဒေသခံတော်လှန်ရေးတပ်‌ဖွဲ့တွေက သတိပေး ထုတ်ပြန်နေတယ်လို့ ဆိုပါတယ်။ မကွေးတိုင်းဟာ ချင်းပြည်တောင်ပိုင်းနဲ့ ထိစပ်နေပြီး ပေါက်မြို့နယ်နဲ့ မင်းတပ်၊ ကန်ပက်လက်အကြား မိုင် ၆၀ ဝန်းကျင်သာ ကွာဝေးပါတယ်။

#RadioNUGLocalNews

#SpringRevolution