၂၀၂၅ သြဂုတ်လ ၂၇ ရက်နေ့ ညပိုင်း နောက်ဆုံးရပြည်တွင်းသတင်းများ
📌 ၁။ သိန္နီနဲ့ လားရှိုးကိုဆက်သွယ်သွားလာနိုင်မယ့် တံတားသစ် အခုရက်ပိုင်းအတွင်း အသုံးပြုနိုင်မယ့်လို့ ဆို
📌 ၂။ စစ်အုပ်စုကလုပ်မယ့်ရွေးကောက်ပွဲမှာ ပါဝင်သူတွေနဲ့ အားပေးအားမြှောက်လုပ်သူတွေကို ထိထိရောက်ရောက် အရေးယူမယ်လို့ သာယာဝတီ PDF ပြော
📌 ၃။ ကရင်နီပြည်ရဲဌာန KSP က ၄ နှစ်အတွင်း အမှုပေါင်း ၆၀၀ ကျော် အရေးယူဆောင်ရွက်နိုင်ခဲ့
📌 ၄။ တလနီးပါး ပိတ်ထားတဲ့ မတူပီ - မင်းတပ်လမ်း မနက်ဖြန် ပြန်ဖွင့်မည်
========================
၂၀၂၅ ခုနှစ် သြဂုတ်လ ၂၇ ရက် ညပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ
🚩 ၁။ နတ်မောက်မြို့နယ် လဲဘူးရွာကို စစ်တပ်က လေယာဉ်နဲ့ ဗုံးတာကြောင့် ကလေးငယ် ၂ ဦး အပါအဝင် ၅ ဦးသေဆုံး
🚩 ၂။ ရေစကြိုမြို့မှာ စစ်တပ်က ဆိုင်ကယ်ဦးထုပ်မဆောင်းတဲ့သူကို လိုက်ပစ်ရာက အဝတ်လှန်းနေတဲ့ အမျိုးသားတဦး ကျည်ထိမှန်သေဆုံး
🚩 ၃။ နည်းဗျူဟာ ၃၃ နဲ့ မွန်ပြည်တော်လှန်ရေးတပ် - MSRF တို့ ညီနောင်တပ်ဖွဲ့အဖြစ် ဖွဲ့စည်း
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ သိန္နီနဲ့ လားရှိုးကိုဆက်သွယ်သွားလာနိုင်မယ့် တံတားသစ် အခုရက်ပိုင်းအတွင်း အသုံးပြုနိုင်မယ့်လို့ ဆို
သြဂုတ်လ (၂၇)ရက်
သိန္နီနဲ့ လားရှိုးကိုဆက်သွယ်သွားလာနိုင်မယ့် တံတားသစ်တည်ဆောက်နေတာ ပြီးစီးသွားပြီဖြစ်တာကြောင့် လာမယ့်ရက်ပိုင်းမှာပဲ အသုံးပြုနိုင်မယ်လို့ ကိုးကန့်တပ် MNDAA သတင်းဌာနတခုဖြစ်တဲ့ The Kokang က ဒီနေ့ ဩဂုတ် ၂၇ မှာ ဖော်ပြလာပါတယ်။
အထူးဒေသ - ၁ မှာပါဝင်တဲ့ သိန္နီခရိုင်အပြင်ဘက်နဲ့ လားရှိုးမြို့ ပတ်လမ်းပေါ်မှာရှိတဲ့ ယာယီတံတားတစင်း ဟာ တံတားခံနိုင်ဝန်အားထက် ဝန်ပိုဖြတ်သန်းသွားလာမှုတွေနဲ့ မိုးသည်းထန်စွာ ရွာသွန်းမှုဒဏ်ကြောင့် အခု လ ၁၈ ရက်နေ့ညက ကျိုးကျသွားခဲ့ကို ကိုးကန့်တပ်ဖွဲ့နဲ့ အုပ်ချုပ်ရေးကော်မတီတို့ ပူးပေါင်းပြီး တံတားအသစ်တစင်း တည်ဆောက်နေတာနဲ့ပတ်သက်လို့ အသိပေးလာတာဖြစ်ပါတယ်။
သိန္နီခရိုင်အပြင်ဘက်နဲ့ လားရှိုးမြို့ ပတ်လမ်းပေါ်မှာရှိတဲ့ ယာယီတံတားကျိုးသွားတဲ့အတွက် တံတားကို အသုံးပြု သွားလာနေရတဲ့ ဒေသနေပြည်သူတွေ သွားလာရေးခက်ခဲသွားခဲ့တယ်လို့ ဆိုပါတယ်။
တံတားမကျိုးခင်ကတည်းက သိန္နီခရိုင် တံတားအင်ဂျင်နီယာအဖွဲ့ရဲ့ ပံ့ပိုးကူညီမှုနဲ့ မဟာမိတ်တပ်ဖွဲ့ဝင်တွေ ဟာ ယာယီတံတားအနီးမှာ နေရာသစ်ရွေးချယ်ပြီး တံတားအသစ်တည်ဆောက်ဖို့ စီစဉ်ခဲ့ပြီးဖြစ်တယ်လို့ သိရပါတယ်။
အခုလိုစီစဉ်ထားချိန်မှာ တံတားကျိုးသွားတဲ့အတွက် အင်ဂျင်နီယာအဖွဲ့ဟာ တံတားအသစ်တည်ဆောက် ရေးလုပ်ငန်းကို ချက်ခြင်းစတင်ခဲ့တဲ့အတွက် သြဂုတ်လ ၂ဝ ကနေ ၂၅ အထိ ၆ ရက်အတွင်း တံတားအသစ်ရဲ့ အဓိကကိုယ်ထည်ဖြစ်တဲ့ သံမဏိဘောင်တွေတပ်ဆင်တဲ့လုပ်ငန်း အောင်မြင်စွာပြီးစီးခဲ့တယ်လို့ အသိပေး ပါတယ်။
တံတားတည်ဆောက်ရေးလုပ်ငန်းမှာ MNDAA တပ်ဖွဲ့ဝင်တွေပါ ပါဝင်အားဖြည့်ခဲ့တာကြောင့် လက်ရှိမှာ အပြီးသတ်အဆင့်ကိုရောက်ရှိနေပြီး နောက် ၂ ရက်အတွင်း ယာဉ်သွားလာမှုတွေ စတင်နိုင်မယ်လို့ အထူးဒေသ - ၁ ဘက်က ခန့်မှန်းထားပါတယ်။
အခုတံတားအသစ်ရဲ့ ခံနိုင်ဝန်အားနဲ့ အသုံးပြုနိုင်မယ့်သက်တမ်းဟာ မူလတံတားထက် သာလွန်ကောင်းမွန် တဲ့အတွက် အနာဂတ်မှာ ဒေသနေပြည်သူတွေ သွားလာရေးအတွက် ပိုမိုကောင်းမွန်စွာ ဖြည့်ဆည်းပေးနိုင် မယ်လို့ သိရပါတယ်။
========================
📌📌 ၂။ စစ်အုပ်စုကလုပ်မယ့်ရွေးကောက်ပွဲမှာ ပါဝင်သူတွေနဲ့ အားပေးအားမြှောက်လုပ်သူတွေကို ထိထိရောက်ရောက် အရေးယူမယ်လို့ သာယာဝတီ PDF ပြော
သြဂုတ်လ (၂၇)ရက်
အကြမ်းဖက်စစ်အုပ်စုကလုပ်မယ့် အတုအယောင်ရွေးကောက်ပွဲမှာ ပါဝင်သူတွေနဲ့ ရွေးကောက်ပွဲဖြစ်မြောက် ရေး အားပေးအားမြှောက်လုပ်နေသူတွေကို ထိထိရောက်ရောက် အရေးယူသွားမယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ က ထုတ်ပြန်ထားပါတယ်။
အကြမ်းဖက်စစ်တပ်ဟာ နိုင်ငံတော်သမ္မတ ဦးဝင်းမြင့်နဲ့ နိုင်ငံတော်ရဲ့အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် အပါအဝင် ပြည်သူ့အစိုးရခေါင်းဆောင်တွေကို ၂ဝ၂၁ ခုနှစ် ဖော်ဖော်ဝါရီ ၁ ရက်နေ့က မတရားဖမ်းဆီးပြီး ထောင်ချထားတာ၊ သတ်ဖြတ် တာတွေလုပ်ခဲ့သလို အရပ်သားပြည်သူတွေကို သတ်ဖြတ်တာ၊ ပြည်သူပိုင် ပစ္စည်းတွေကို လုယူတာ ဖျက်ဆီးတာတွေ ဒီနေ့အထိ လုပ်နေဆဲလို့ ဆိုပါတယ်။
ဒါကြောင့် သာယာဝတီခရိုင်အတွင်းမှာရှိတဲ့ ပြည်သူလူထုအနေနဲ့ ဌာနဆိုင်ရာဝန်ထမ်းများအနေနဲ့ စစ်အုပ်စုထွက်ပေါက် အဖြစ်လုပ်မယ့် အတုအယောင်ရွေးကောက်ပွဲမှာ ပါဝင်ပတ်သက်တာ၊ အားပေးအားမြှောက်လုပ်တာတွေ မလုပ်ကြဖို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ က တိုက်တွန်းထားပါတယ်။
========================
📌📌 ၃။ ကရင်နီပြည်ရဲဌာန KSP က ၄ နှစ်အတွင်း အမှုပေါင်း ၆၀၀ ကျော် အရေးယူဆောင်ရွက်နိုင်ခဲ့
သြဂုတ်လ (၂၇)ရက်
ကရင်နီပြည်ကြားကာလအုပ်ချုပ်ရေးကောင်စီ - IEC၊ ပြည်ထဲရေးဌာန လက်အောက်မှာရှိတဲ့ ကရင်နီပြည် ရဲဌာန - KSP အနေနဲ့ ၄ နှစ်တာကာလအတွင်း အမှုပေါင်း ၆၄၁ မှုကို အရေးယူဆောင်ရွက်နိုင်ခဲ့တယ်လို့ ထုတ်ဖော်ပြောဆိုလိုက်ပါတယ်။
ကရင်နီပြည်ရဲဌာန KSP ရဲ့ ၄ နှစ်ပြည့် အစီရင်ခံစာကို ဒီနေ့ ဩဂုတ် ၂၇ မှာ ထုတ်ပြန်ရာမှာ အခုလို ထည့်သွင်း ပြောဆိုလိုက်တာဖြစ်ပါတယ်။
ဒီ ၄ နှစ်တာကာလအတွင်းမှာ အကြမ်းဖက်စစ်တပ်နဲ့ သက်ဆိုင်တဲ့အမှုတွေအပြင် လူသတ်မှု၊ မုဒိန်းမှု၊ လုယက်မှု၊ ခိုးမှု၊ မူးယစ်ဆေးဝါးမှု၊ မူးရစ်ရမ်းကားမှု၊ လူကို ထိခိုက်နာကျင်စေမှု၊ ပစ္စည်းထိခိုက်ပျက်စီးမှု ၊ အိမ်တွင်းအကြမ်းဖက်မှုတွေလည်း ပါဝင်တယ်လို့ အစီရင်ခံစာက ဆိုပါတယ်။
ဒါ့အပြင် ရဲလုပ်ငန်းကိုစိတ်ဝင်စားတဲ့ လူငယ်တွေကို စိစစ်ရွေးချယ်ပြီး ၄ နှစ်တာအတွင်းမှာ အခြေခံ ရဲသားသစ်သင်တန်း အမှတ်စဥ် ၁ ကနေ အမှတ်စဥ် ၈ အထိ၊ အခြေခံမွမ်းမံသင်တန်းတကြိမ်၊ ရဲအရာရှိ သင်တန်း အမှတ်စဥ် ၁ ကနေ အမှတ်စဥ် ၄ တို့အပြင် ရဲအရာရှိမွမ်းမံသင်တန်း အမှတ်စဥ် ၁ နဲ့ ၂ တို့ကို အောင်မြင်စွာသင်ကြားပေးနိုင်ခဲ့တယ်လို့လည်း ဖော်ပြထားပါတယ်။
ကရင်နီပြည်ရဲဌာနမှာ အမျိုးသား ၄၄၉ ဦး၊ အမျိုးသမီး ၁၇၄ ဦးနဲ့ လိင်စိတ်ခံယူမှုကွဲပြားသူ ၃ ဦး စုစုပေါင်း ၆၂၆ ဦးရှိနေပြီး မြို့နယ်ရဲဌာနရုံး ၆ ခု၊ နယ်မြေရဲစခန်း ၁၆ ခု၊ နယ်မြေလုံခြုံရေး ရဲကင်း ၁၂ ခု၊ ရဲဂိတ် ၁၀ ခုနဲ့ ယာဥ်ထိန်းရုံး တရုံးတို့နဲ့ လည်ပတ်နေတယ်လို့ သိရပါတယ်။
ဒီ ၄ နှစ်တာကာလအတွင်း ကရင်နီပြည်အတိုင်ပင်ခံကောင်စီ - KSCC နဲ့ ကရင်နီပြည်ကြားကာလ အုပ်ချုပ်ရေးကောင်စီ - IEC တို့ရဲ့ လမ်းညွှန်မှုနဲ့ ပြစ်မှု ပြစ်ဒဏ်ခံယူပြီးတဲ့ အကျဥ်းသူ အကျဥ်းသား ၁၁၄ ဦး ကို လွတ်ငြိမ်းချမ်းသာခွင့်ပေးခဲ့ပြီး ၁၃၇ ဦးကို ပြစ်ဒဏ်လျော့ပေါ့ သက်သာခွင့်ပေးခဲ့တယ်လို့ အစီရင်ခံစာ ကနေ အသိပေးထားပါတယ်။
ကရင်နီပြည်ရဲဌာန - KSP ကို ၂၀၂၁ ခုနှစ် သြဂုတ်လ ၂၅ ရက်နေ့မှာ စတင်ဖွဲ့စည်းခဲ့တာကြောင့် အခုနှစ် သြဂုတ်လ ၂၅ ရက်နေ့မှာ ၄ နှစ်ပြည့်မြောက်ခဲ့တာလို့ သိရပါတယ်။
ကရင်နီပြည်ရဲဌာန - KSP အနေနဲ့ ရဲသိပ္ပံကျောင်းဖွင့်နိုင်ဖို့ ကြိုးစားနေပြီး ရဲဥပဒေ၊ နည်းဥပဒေနဲ့ လမ်းညွှန် တွေကို ပြန်လည်ပြုပြင်ကာ အခြေခံလိုအပ်ချက်တွေကို ဖြည့်စွက်ပံ့ပိုးပြီး ခိုင်မာအားကောင်းတဲ့ ရဲဌာနတခု အဖြစ် ရပ်တည်သွားမယ်လို့လည်း အစီရင်ခံစာမှာ ဖော်ပြထားပါတယ်။
ကရင်နီပြည်ရဲဌာနဖွဲ့စည်းခဲ့တဲ့ ၄ နှစ်တာကာလအတွင်း ကရင်နီပြည်သူလူထုကို ဝန်ဆောင်မှုပေးနိုင်ရေး ကူညီပေးခဲ့ကြတဲ့ KSCC ၊ IEC နဲ့ ပူးပေါင်းပါဝင်ဆောင်ရွက်ခဲ့ကြတဲ့ ဒေသတွင်း လက်နက်ကိုင်အဖွဲ့အစည်း တွေ လူမှုရေးအသင်းအဖွဲ့တွေနဲ့ ဒေသနေပြည်သူလူထုကို ကျေးဇူးတင်တဲ့အကြောင်း KSP က အသိပေး ထားပါတယ်။
========================
📌📌 ၄။ တလနီးပါး ပိတ်ထားတဲ့ မတူပီ - မင်းတပ်လမ်း မနက်ဖြန် ပြန်ဖွင့်မည်
သြဂုတ်လ (၂၇)ရက်
ချင်းပြည်နယ်အတွင်းက မတူပီမြို့နယ်ရဲ့ လုံခြုံရေးအခြေအနေအရ တလနီးပါးပတ်ထားခဲ့တဲ့ မတူပီ - မင်းတပ်လမ်းပိုင်း မနက်ဖြန် ဩဂုတ်လ ၂၈ မှာ ပြန်ဖွင့်ပေးမယ်လို့ ချင်းကာကွယ်ရေးတပ်ဖွဲ့ CDF - မတူပီက ထုတ်ပြန်ပါတယ်။
မတူပီတော်လှန်ရေးအဖွဲ့ချုပ် - MRO/ချင်းကာကွယ်ရေးတပ်ဖွဲ့ CDF - မတူပီအနေနဲ့ လုံခြုံရေးအခြေ အနေအရ ဩဂုတ်လ ၆ ရက်ကစပြီး ကုန်သွယ်ရေးလမ်းတွေ ပိတ်ထားခဲ့ရတာနဲ့ပတ်သက်လို့ ဒီနေ့ ဩဂုတ် ၂၇ မှာ အသိပေးထုတ်ပြန်လာတာဖြစ်ပါတယ်။
မနက်ဖြန် ဩဂုတ်လ ၂၈ ရက်ကစပြီး ပိတ်ထားတဲ့ ကုန်သွယ်ရေးလမ်းတွေကို စည်းကမ်းသတ်မှတ်ချက်တွေနဲ့ ပြန်ဖွင့် ပေးမယ်လို့ မတူပီတော်လှန်ရေးအဖွဲ့ချုပ်- ကုန်သွယ်ရေးဌာနကလည်း အသိပေးပါတယ်။
မိုးရာသီဖြစ်တဲ့အတွက် ကားလမ်းအခြေအနေအရ အိမ်စီးကားနဲ့ ကားအသေးတွေသာ ဖြတ်သန်းသွာလာခွင့် ပေးမှာဖြစ်ပြီး ယာဉ်ကြီးတွေတော့ ဝင်ထွက်သွားလာခွင့် မပြုဘူးလို့ သိရပါတယ်။
မတူပီဒေသအတွင်း ရောင်းချမယ့် ကုန်စည်တွေကိုတော့ Forland လို ယာဉ်ကြီးတွေနဲ့ သယ်ဆောင်နိုင်မှာဖြစ်ပြီး ရောင်းချမယ့်ကုန်စည်တွေအတွက် ကုန်စည်ခွန်ပေးဆောင်ရမယ်လို့ မတူပီတော်လှန်ရေးအဖွဲ့ချုပ်- ကုန်သွယ်ရေးဌာန က ကြေညာထားပါတယ်။
ဒါ့အပြင် မတူပီတော်လှန်ရေးအဖွဲ့ချုပ်- ကုန်သွယ်ရေးဌာနက ထုတ်ပြန်ထားပြီးဖြစ်တဲ့ ကုန်သွယ်ရေးစည်းမျဉ်းတွေကို လိုက်နာရမှာဖြစ်ပြီး စည်းကမ်းဖောက်ဖျက်ရင် အရေးယူခံရမယ်လို့ မတူပီတော်လှန်ရေးအဖွဲ့ချုပ် - MRO ရဲ့ ထုတ်ပြန် ကြေညာချက်မှာ ဖော်ပြထားပါတယ်။
အခုတင်ပြခဲ့တဲ့ သတင်းကိုတော့ Radio NUGသတင်းထောက် ကိုခန့်မှ ပေးပို့ထားတာဖြစ်ပါတယ်။
========================
========================
🚩🚩 ၁။ နတ်မောက်မြို့နယ် လဲဘူးရွာကို စစ်တပ်က လေယာဉ်နဲ့ ဗုံးတာကြောင့် ကလေးငယ် ၂ ဦး အပါအဝင် ၅ ဦးသေဆုံး
သြဂုတ်လ (၂၇)ရက်
မကွေးတိုင်း နတ်မောက်မြို့နယ် လဲဘူးရွာကို အကြမ်းဖက်စစ်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေးငယ် ၂ ဦး အပါအဝင် အရပ်သားပြည်သူ ၅ ဦးသေဆုံးပြီး ၉ ဦးဒဏ်ရာရရှိကာ နေအိမ် ၇ လုံး ပျက်စီးသွားတယ်လို့ ဒေသတွင်း သတင်းရင်းမြစ်တွေက ပြောပါတယ်။
အကြမ်းဖက်စစ်တပ်ဟာ တိုက်ပွဲဖြစ်ပွားတာမရှိဘဲ ဩဂုတ်လ ၂၄ ရက်နေ့ ည ၈ နာရီခွဲအချိန်မှာ နတ်မောက်မြို့နယ် လဲဘူးကျေးရွာကို ပေါင် ၅ဝဝ ဗုံး ၂ လုံး ကြဲချခဲ့တာလို့ ဆိုပါတယ်။
နေပြည်တော်လေတပ်ကတက်လာတဲ့ တိုက်လေယာဉ်တစင်းက ပေါင် ၅၀၀ ဗုံး ၂ လုံးကြဲချတိုက်ခိုက်ခဲ့တဲ့အတွက် အရပ်သားပြည်သူတွေ ထိခိုက်သေဆုံးရသလို အိမ် ၇ လုံးလည်း ပျက်စီးခဲ့တယ်လို့ နတ်မောက်မြို့နယ် ပကဖ တာဝန်ခံက အတည်ပြုထားပါတယ်။
အကြမ်းဖက်စစ်တပ်ရဲ့ လေကြောင်းတိုက်ခိုက်မှုကြောင့် အသက် ၃ နှစ်အရွယ် မသဲတုန်၊ အသက် ၁၂ နှစ်အရွယ် မချိုဇင်ကျော်ကျော်၊ အသက် ၃၇ နှစ်အရွယ် ဒေါ်လွမ်းပို၊ အသက် ၆၅ နှစ်အရွယ် ဦးကြည့်မြင့်နဲ့ အသက် ၆၇ နှစ်အရွယ် ဦးဝင်းဆောင်တို့သေဆုံးခဲ့ရပြီး ဒဏ်ရာရသူ ၉ ဦးထဲက အသက် ၉ နှစ်နဲ့ ၁၂ နှစ်အရွယ်ကလေးငယ် ၂ ဦးတို့ဟာ ပြင်းထန် ဒဏ်ရာရခဲ့ပြီး မျက်စိကွယ်သွားတယ်လို့ သိရပါတယ်။
အကြမ်းဖက်စစ်တပ်ဟာ ကိုယ်ချင်းစာစိတ်မရှိတဲ့အတွက် ဒေသနေပြည်သူတွေအနေနဲ့ ဗုံးခိုကျင်းတွေတူးထားကြဖို့ နတ်မောက်မြို့နယ် ပကဖ တာဝန်ခံက တိုက်တွန်းထားပါတယ်။
========================
🚩🚩 ၂။ ရေစကြိုမြို့မှာ စစ်တပ်က ဆိုင်ကယ်ဦးထုပ်မဆောင်းတဲ့သူကို လိုက်ပစ်ရာက အဝတ်လှန်းနေတဲ့ အမျိုးသားတဦး ကျည်ထိမှန်သေဆုံး
သြဂုတ်လ (၂၇)ရက်
မကွေးတိုင်း ရေစကြိုမြို့ပေါ်မှာ စစ်တပ်က ဆိုင်ကယ်ဦးထုပ်မဆောင်းတဲ့သူကို သေနတ်နဲ့လိုက်ပစ်ရာက နေအိမ်ခြံဝင်းထဲမှာ အဝတ်လှန်းနေတဲ့ အမျိုးသားတဦး ကျည်ထိမှန်သေဆုံးသွားတယ်လို့ ရေစကြိုသတင်းအချက်အလက်ကော်မတီက ပြောပါတယ်။
ရေစကြိုမြို့ အမှတ် ၇ နှစ်ထောင်ပြည့်ရပ် တိလောက ဘုန်းကြီးကျောင်းအနီးမှာ ကင်းပတ်လာတဲ့ စစ်သားတွေက ဆိုင်ကယ် ဦးထုပ်မဆောင်းတဲ့ ဆိုင်ကယ်စီးသူတစ်ယောက်ကို မနေ့ သြဂုတ် ၂၆ ရက်နေ့ နေ့လယ် ၂ နာရီခန့်မှာ လိုက်လံပစ်ခတ်ခဲ့ တယ်လို့ ဆိုပါတယ်။
စစ်သားတွေ သေနတ်နဲ့လိုက်လံပစ်ခတ်ရာမှာ ဆိုင်ကယ်စီးသူ လွတ်မြောက်သွားခဲ့ပေမဲ့ ဘုန်းကြီးကျောင်းအနောက်ဘက်က နေအိမ်ဝင်းထဲမှာ အယတ်လှန်းနေတဲ့ အသက် ၃၉ နှစ်အရွယ် ကိုဇော်ဝင်းဆိုသူ ကျည်ထိမှန်ပြီး သေဆုံးခဲ့ရတာလို့ ရေစကြို သတင်းအချက်အလက်ကော်မတီက အသိပေးပါတယ်။
အရင်ကလည်း စစ်သားတွေ ယုတ်မာရမ်းကားစွာပစ်ခတ်မှုတွေကြောင့် အပြစ်မဲ့အရပ်သားပြည်သူတွေ ထိမှန်သေဆုံးခဲ့ရတဲ့ ဖြစ်စဉ်တွေရှိခဲ့တယ်လို့ ဆိုပါတယ်။
သြဂုတ် ၂၄ ရက်ကဆိုရင် ရေစကြိုမြို့ပေါ်မှာရှိတဲ့ စစ်အုပ်စုက လက်နက်ကြီး ၃ လုံး ရမ်းသမ်းပစ်ခတ်ခဲ့တာကြောင့် မြစ်တဖက်ကမ်းမှာရှိတဲ့ စစ်ကိုင်းတိုင်း မြောင်မြို့နယ်က အောင်ချမ်းသာရွာမှာ ကျည်တွေကျရောက်ပေါက်ကွဲပြီး ထိခိုက် သေဆုံးမှုတွေရှိခဲ့တယ်လို့ ရေစကြို သတင်းအချက်အလက်ကော်မတီ မှတ်တမ်းတွေအရ သိရပါတယ်။
========================
🚩🚩 ၃။ နည်းဗျူဟာ ၃၃ နဲ့ မွန်ပြည်တော်လှန်ရေးတပ် - MSRF တို့ ညီနောင်တပ်ဖွဲ့အဖြစ် ဖွဲ့စည်း
သြဂုတ်လ (၂၇)ရက်
ပြည်သူ့ကာကွယ်ရေးတပ်မတော် အမှတ် - ၁ စစ်ဆင်ရေးနယ်မြေ နည်းဗျူဟာ ၃၃ နဲ့ မွန်ပြည်တော်လှန်ရေးတပ် - MSRF တို့ ညီနောင်တပ်ဖွဲ့အဖြစ် ဖွဲ့စည်းလိုက်တယ်လို့ ဒီနေ့ ဩဂုတ် ၂၇ မှာ ထုတ်ပြန်ကြေညာ လိုက်ပါတယ်။
ပြည်သူ့ကာကွယ်ရေးတပ်မတော် အမှတ် - ၁ စစ်ဆင်ရေးနယ်မြေ နည်းဗျူဟာ ၃၃ နဲ့ မွန်ပြည်တော်လှန်ရေးတပ် - MSRF တို့ဟာ ၂ဝ၂၃ ခုနှစ် ဇူလိုင် ၁၄ မှာဖော်ဆောင်ခဲ့တဲ့ စကခ - ၁၉ ဒရုန်းစစ်ဆင်ရေးကစလို့ မဟာမိတ်အဖြစ် ပူးပေါင်းတိုက်ပွဲ ဝင်ခဲ့ရာကနေ အခု ညီနောင်တပ်ဖွဲ့အဖြစ် ဖွဲ့စည်းလိုက်တာလို့ သိရပါတယ်။
မဟာမိတ်အဖြစ်နဲ့ ပူးပေါင်းဆောင်ဆောင်ရွက်ချိန်ကစလို့ ၂ နှစ်ကျော်ကာလအတွင်းမှာ စစ်ရေးဖော်ဆောင်မှုပေါင်း ၄ဝ ခန့်နဲ့ ရန်သူစစ်တပ်ရဲ့ တပ်စခန်းတွေကို တိုက်ခိုက်သိမ်းပိုက်ခဲ့တဲ့ စခန်းသိမ်းတိုက်ပွဲပေါင်း ၆ ကြိမ်ထက်မနည်း ဖော်ဆောင်နိုင်ခဲ့ တယ်လို့ MSRF ဘက်က ပြောပါတယ်။
ဒီ ၂ နှစ်ကျော်ကာလအတွင်း စစ်ရေးဖော်ဆောင်ခဲ့မှုတွေလုပ်ခဲ့ရာက အခုအခါ ရဲဘော်ရဲဘက်တွေကြား သွေးစည်းညီညွတ်မှု၊ အနစ်နာခံမှုနဲ့ ယုံကြည်မှုတွေဟာ ပိုပြီးခိုင်မာလာပြီဖြစ်တဲ့အတွက် နည်းဗျူဟာ ၃၃ နဲ့ မွန်ပြည်တော်လှန်ရေးတပ် - MSRF တို့ကြား ညီနောင်တပ်ဖွဲ့အဖြစ် ဖွဲ့စည်းလိုက်တာလို့လည်းဆိုပါတယ်။
ညီနောင်တပ်ဖွဲ့ဖြစ်လာတာနဲ့အညီ MSRF အနေနဲ့ တော်လှန်ရေးခရီးတလျောက် တူညီတဲ့ရည်မှန်းချက်တွေနဲ့ စစ်ရေး ဖော်ဆောင်မှုတွေ ဆက်လုပ်သွားမှာဖြစ်ပြီး ရင်ဆိုင်ကြုံတွေလာမယ့် ဘယ်အခြေအနေမျိုးမှာမဆို အချင်းချင်း အသက်ပေး ကာကွယ်သွားမယ်လို့ အသိပေးထားပါတယ်။
ဒါ့အပြင် ညီနောင်တပ်ဖွဲ့အနေနဲ့ စစ်အာဏာရှင်တင်မဟုတ်ဘဲ ဘယ်အာဏာရှင်စနစ်မဆို အဆုံးတိုင် တိုက်ခိုက်ချေမှုန်းသွား မှာဖြစ်ပြီး စစ်မှန်တဲ့ဖက်ဒရယ်ပြည်ထောင်စုဖွဲ့စည်းနိုင်တဲ့အထိ လက်တွဲပြီး တိုက်ပွဲဝင်သွားမယ်လို့ နည်းဗျူဟာ ၃၃ နဲ့ မွန်ပြည်တော်လှန်ရေးတပ် - MSRF တို့က ထုတ်ပြန်ထားပါတယ်။
အခုတင်ပြခဲ့တဲ့ သတင်းကိုတော့ Radio NUGသတင်းထောက် ကိုခန့်မှ ပေးပို့ထားတာဖြစ်ပါတယ်။
No comments:
Post a Comment