၂၀၂၅ သြဂုတ်လ ၂၅ ရက်နေ့ မနက်ခင်း သတင်းလွှာ

 

၂၀၂၅ သြဂုတ်လ ၂၅ ရက်နေ့ မနက်ခင်း နောက်ဆုံးရပြည်တွင်းသတင်းများ

📌 ၁။ တရားမဝင် အတုအယောင် ရွေးကောက်ပွဲနှင့် ပတ်သက်သည့် NUG၏ ရပ်တည်ချက်နှင့် သဘောထားအား ထုတ်ပြန်ကြေညာ

📌 ၂။ ပြည်သူ့ကာကွယ်ရေးတပ်မတော်၊ တပ်ရင်း၊ တပ်ဖွဲ့များအတွက် ‘မကွေးဆီသို့’ ကမ်ပိန်းမှ အမေရိကန်ဒေါ်လာ (၂) သိန်းကျော် ထောက်ပို့ကူညီ

📌 ၃။ စစ်ကောင်စီရဲ့ အတုအယောင် ရွေးကောက်ပွဲကို လုံးဝ လက်ခံမှာ မဟုတ်ကြောင်း ကန့်ဘလူ ပအဖ ထုတ်ပြန်

📌 ၄။ စစ်ကော်မရှင်က စွပ်စွဲထားတဲ့ မူးယစ်ဆေးဝါးများနဲ့ ပတ်သက်မှု မရှိကြောင်း SSPP ထုတ်ပြန်

📌 ၅။ အသေးစား သက်မွေးလုပ်ငန်းများ ပျိုးထောင်ခြင်း အစီအစဉ်အတွက် CDM စစ်သား၊ ရဲ နှင့် မိသားစုဝင်များအား သင်တန်းသား ခေါ်ယူနေ

📌 ၆။ နွေဦးထီ Survey ဖြည့်သူများအား NOH Gift Card ၁၀,၀၀၀ ကျပ်တန် လက်ဆောင်ပေးအပ်မည်

========================

၂၀၂၅ ခုနှစ် သြဂုတ်လ ၂၅ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ

🚩 ၁။ MNDAA က တရားမဝင်လက်နက် ၄၇၆ လက်ဖျက်ဆီးပြီး ၂၀၀ လက်ကို တရုတ်ထံ လွှဲပြောင်း

🚩 ၂။ ဖားကန့်တွင် အကြမ်းဖက်စစ်တပ်နှင့် SNA ကားတစ်စီးကို KIA နှင့် KPDF က ကြားဖြတ်တိုက်ခိုက်၊ ဒရုန်း ၅ စီး သိမ်းဆည်းရရှိ

🚩 ၃။ ပေါက်ခေါင်းမြို့နယ်က စစ်ကောင်စီ အထိုင်ဂိတ်စခန်းကို ဝင်ရောက်စီးနင်း ပစ်ခတ်ခဲ့ရာ ၅ ဦး သေဆုံး

🚩 ၄။ ကလေးမှာ ၁၀ ရက်ကြာ တိုက်ပွဲအတွင်း စစ်ကောင်စီတပ်သား အလောင်း ၃ လောင်းနဲ့ လက်နက် ၁၀ လက်ကို သိမ်းဆည်းရမိ

🚩 ၅။ ကျိုက်ထို၊ ချမ်းမြေ့ရွာ ဘုန်းကြီးကျောင်းကို စစ်ကောင်စီ ဗုံးကြဲတိုက်ခိုက်ခဲ့ရာ သံဃာ ၃ ပါး ပျံလွန်တော်မူ

🚩 ၆။ ပေါ်တာဆွဲ အတင်းအဓမ္မ စစ်မှုထမ်းစေခိုင်းခံရသူ (၁)ဦး မှ အလင်းဝင်ရန် ချိတ်ဆက်လာခဲ့သဖြင့် သွားရောက်ကယ်ထုတ်ခဲ့

ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။

========================

📌📌 ၁။ တရားမဝင် အတုအယောင် ရွေးကောက်ပွဲနှင့် ပတ်သက်သည့် NUG၏ ရပ်တည်ချက်နှင့် သဘောထားအား ထုတ်ပြန်ကြေညာ

ဩဂုတ်လ ၂၄ရက် 

Radio NUG 

တရားမဝင် အတုအယောင် ရွေးကောက်ပွဲနှင့် ပတ်သက်သည့် အမျိုးသားညီညွတ်ရေးအစိုးရ၏ ရပ်တည်ချက်နှင့် သဘောထားအား ဩဂုတ်လ ၂၄ရက်နေ့တွင် ထုတ်ပြန်ကြေညာပါတယ်။

ထုတ်ပြန်ချက်တွင် ၂၀၂၁ ခုနှစ် ဖေဖော်ဝါရီလ (၁) ရက်နေ့တွင် နိုင်ငံတော် သမ္မတဦးဝင်းမြင့်၊ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် ပြည်သူ့အစိုးရခေါင်းဆောင်များကို မတရား ဖမ်းဆီးပြီး နိုင်ငံတော်ပုန်ကန်မှုကို ကျူးလွန်ခဲ့သည့် စစ်တပ်သည် ရွေးကောက်ပွဲကျင်းပပိုင်ခွင့် အခွင့်အာဏာ အလျဉ်းမရှိသော ပြည်ထောင်စုသမ္မတမြန်မာနိုင်ငံတော်နှင့် ပြည်သူလူထု၏ ရန်သူ (The Enemy of the State) အဖြစ် ၂၀၂၄ ခုနှစ် စက်တင်ဘာလ (၅) ရက်နေ့တွင် ကြေညာခြင်းခံထားရသည့် အဖွဲ့အစည်းတစ်ခုသာဖြစ်တယ်လို့ ဖော်ပြထားပါတယ်။

ထို့အပြင် ၂၀၂၁ ခုနှစ် မတ်လ (၃၀) ရက်နေ့တွင်  ပြည်ထောင်စုလွှတ်တော်ကိုယ်စားပြုကော်မတီ(CRPH) က ၂၀၀၈ ဖွဲ့စည်းပုံအခြေခံဥပဒေကို ပယ်ဖျက်ကြောင်း ကြေညာခဲ့ပြီးဖြစ်တာကြောင့် အဆိုပါ အခြေခံဥပဒေအတိုင်း လုပ်ဆောင်လျက်ရှိသော အကြမ်းဖက်စစ်တပ်၏ လုပ်ရပ်မှန်သမျှသည် တရားမဝင်သော၊ ဥပဒေမဲ့ လုပ်ရပ်များသာဖြစ်တယ်လို့ အသိပေးဆိုပါတယ်။

၂၀၂၀ ရွေးကောက်ပွဲရလဒ်သည် နိုင်ငံရေးအရ တရားဝင်မှုရှိနေဆဲဖြစ်ပြီး အဆိုပါ ရွေးကောက်ပွဲရလဒ်အရ ပေါ်ပေါက်လာသည့် ဥပဒေပြုရေးမဏ္ဍိုင်များ၊ အုပ်ချုပ်ရေးမဏ္ဍိုင်များ အခိုင်အမာ တည်ရှိနေပြီးဖြစ်တာကြောင့်  ပြည်သူလူထု၏ သဘောဆန္ဒနှင့် ဆန့်ကျင်ပြီး ၎င်းတို့၏ အာဏာ တည်မြဲရေးနှင့် ကျူးလွန်ခဲ့၊ ကျူးလွန်လျက်ရှိသော စစ်ရာဇဝတ်မှုများမှ ပြစ်ဒဏ်ကင်းလွတ်ခွင့် ရရှိရေးတို့အတွက် တရားမဝင် အတုအယောင်ရွေးကောက်ပွဲတစ်ခုကို ဇွတ်အတင်းဖန်တီးပြုလုပ်ခြင်းသည် ဒီမိုကရေစီကျင့်စဉ်ကို ချိုးဖောက်ခြင်းအပြင် ပြည်သူ့အချုပ်အချာ အာဏာကို မတရားရယူရန် ကြိုးစားခြင်း ဖြစ်တယ်လို့ ဖော်ပြထားပါတယ်။

အမျိုးသားညီညွတ်ရေးအစိုးရအနေဖြင့် စစ်တပ်က ကြိုးကိုင်ထားသော ဟန်ပြ နိုင်ငံရေးလှည့်စားမှု မဟုတ်ဘဲ ပြည်သူက တွန်းအားပေးသော၊ အားလုံးပါဝင်နိုင်မှုရှိသော၊ ဒီမိုကရေစီ နည်းကျသော လုပ်ငန်းစဉ်ကသာ မြန်မာနိုင်ငံ၏ အနာဂတ်ကို အမှန်တကယ် ဆုံးဖြတ်ပေးနိုင်မည်ဟု ယုံကြည်တာကြောင့် မဟာမိတ်တိုင်းရင်းသားအဖွဲ့များအပါအဝင်၊ တော်လှန်ရေးအင်အားစုများနှင့် လက်တွဲကာ မိမိတို့၏ ပင်မနိုင်ငံရေးလမ်းကြောင်းဖြစ်တဲ့ ဖက်ဒရယ်ဒီမိုကရေစီ ပဋိညာဉ် အခန်း(၃) နိုင်ငံရေးလမ်းပြမြေပုံ အဆင့် (၁၁) တွင် ပြဌာန်းထားသည့် "တိုင်းပြုပြည်ပြု ညီလာခံက ရေးဆွဲအတည်ပြုထားသည့် ဖက်ဒရယ်ဒီမိုကရေစီ ဖွဲ့စည်းပုံအခြေခံ ဥပဒေကို လူထုဆန္ဒခံယူပွဲ ကျင်းပပြီး အတည်ပြုပြဌာန်းခြင်းနှင့် ရွေးကောက်ပွဲကျင်းပခြင်း" မူဘောင်အတိုင်း ရပ်တည်ကာ စနစ်ပြောင်းတော်လှန်ရေးကို ဆက်လက်ဆောင်ရွက်သွားမှာ ဖြစ်တယ်လို့ အသိပေးထားပါတယ်။

ထို့အပြင် အမျိုးသားညီညွတ်ရေးအစိုးရ အကြမ်းဖက်မှုတိုက်ဖျက်ရေးဗဟိုအဖွဲ့က စစ်အုပ်စုနှင့် ၎င်း၏ လက်အောက်ခံဖြစ်သော ပြည်ထောင်စု ရွေးကောက်ပွဲကော်မရှင် အမည်ခံ အဖွဲ့အစည်းတို့ကို အကြမ်းဖက် အုပ်စုများအဖြစ်ကြေညာထားပြီးဖြစ်ရာ အမျိုးသားညီညွတ်ရေးအစိုးရ၏ စိုးမိုးထိန်းချုပ်နယ်မြေများအတွင်း တရားမဝင် အတုအယောင်ရွေးကောက်ပွဲကို ဇွတ်အတင်းပြုလုပ်ရန် ပြည်သူလူထုအား ဖိအားပေးဆောင်ရွက် လာမှုများရှိပါက ဥပဒေလုပ်ထုံးလုပ်နည်းများနှင့်အညီ ထိရောက်စွာ ဖမ်းဆီးအရေးယူဆောင်ရွက်သွားမယ်လို့ ဖော်ပြထားပါတယ်။

အကြမ်းဖက်စစ်အုပ်စုသည် ခေတ်အဆက်ဆက် တိုင်းရင်းသားပြည်သူများနှင့် မြန်မာနိုင်ငံသူ နိုင်ငံသားများအပေါ် နည်းလမ်းပေါင်းစုံဖြင့် ဖိစီးနှိပ်စက်မှုများ၊ လူမျိုးတုန်းသတ်ဖြတ်မှုများ၊ စစ်ရာဇဝတ်မှုများကို ကျူးလွန်ခဲ့သဖြင့် ကမ္ဘာကအလိုရှိနေသော စစ်ရာဇဝတ်သားများဖြစ်သလို  ပြည်သူ့အာဏာကို မတရားလုယူရန် ကြိုးစားခဲ့သည့် ၂၀၂၁ ခုနှစ် ဖေဖော်ဝါရီလ (၁) ရက်မှ စတင်သည့် ပြည်သူ့နွေဦးတော်လှန်ရေးတွင်လည်း ပြည်သူလူထုအပေါ် ကြီးမားသည့် စစ်ရာဇဝတ်မှုမြောက်များစွာ ဆက်လက်ကျူးလွန်ခဲ့သည့် အစုအဖွဲ့လည်းဖြစ်တယ်လို့ ဆိုထားပါတယ်။

၂၀၂၅ ခုနှစ် ဩဂုတ်လမှ စတင်၍ အကြမ်းဖက်စစ်အုပ်စုသည် အမည်နာမနှင့် ဖွဲ့စည်းပုံပြောင်းလဲကာ တရားမဝင် အတုအယောင် ရွေးကောက်ပွဲကို ဇွတ်အတင်း ပြုလုပ်နိုင်ရန်ရည်ရွယ်ပြီး ပြည်သူလူထုကို ပစ်မှတ်ထားသည့် ဗုံးကြဲတိုက်ခိုက်မှုများ၊ လက်နက်ကြီးဖြင့် တိုက်ခိုက်မှုများ၊ စစ်ကြောင်းထိုး တိုက်ခိုက်မှုများ၊ ကြီးမားသော စစ်ရာဇဝတ်မှုများကို ဆတိုးလုပ်ဆောင်လာလျက်ရှိသည်ကိုလည်း တွေ့ရတယ်လို့ ဖော်ပြပါတယ်။

ပြည်တွင်း၊ ပြည်ပ ကမ္ဘာအရပ်ရပ်တွင်ရှိကြသော မြန်မာပြည်သူလူထုသည် အကြမ်းဖက်စစ်တပ်၏ မတရားအာဏာလုယူရန်ကြိုးစားမှုကို လက်မခံကြောင်း ဖိနှိပ်မှုများစွာကြားထဲကပင် နည်းလမ်းမျိုးစုံဖြင့် ဆန္ဒ ဖော်ထုတ်ပြသခဲ့ကြပြီးဖြစ်သကဲ့သို့ ယခုကဲ့သို့ တရားမဝင်အတုအယောင် ရွေးကောက်ပွဲတစ်ခုကို သေနတ်ထောက်၊ ဓားမိုး၍ ဇွတ်အတင်းပြုလုပ်ရန် ကြိုးစားလာမှုကိုလည်း တတ်စွမ်းသည့်နည်းဖြင့် ဆန့်ကျင်တော်လှန် ကြဦးမှာကို အပြည့်အဝယုံကြည်တယ်လို့ ဆိုထားပါတယ်။

နိုင်ငံတကာ အစိုးရများ၊ နိုင်ငံတကာ အဖွဲ့အစည်းများနှင့် ဒီမိုကရေစီ မဟာမိတ်များအနေဖြင့် အကြမ်းဖက်စစ်အုပ်စုက ဇွတ်အတင်းပြုလုပ်မည့် တရားမဝင် အတုအယောင်ရွေးကောက်ပွဲသည် မြန်မာနိုင်ငံ၏ လက်ရှိအခြေအနေများကို ပြေလည်စေမည့် အဖြေမဟုတ်ကြောင်းနှင့် ၎င်းလုပ်ရပ်ကို ထောက်ခံအားပေးခြင်းသည် မြန်မာပြည်သူလူထုအပေါ် စစ်အုပ်စုက ကျူးလွန်ခဲ့၊ ကျူးလွန်လျက်ရှိသော စစ်ရာဇဝတ်မှုများအား ထောက်ခံအားပေးခြင်း၊ အဆိုပါ ပြစ်မှုများအတွက် ပြစ်ဒဏ်ကင်းလွတ်ခွင့်ကို အထောက်အကူပြုခြင်းတို့နှင့် အလားသဏ္ဍာန်တူသည်ကို သတိချပ်ကြလျက် မြန်မာပြည်သူများနှင့်အတူ ခိုင်မြဲစွာ ရပ်တည်ပြီး စစ်အုပ်စု၏ အတုအယောင် ရွေးကောက်ပွဲကို ဆန့်ကျင်ငြင်းပယ်ရန်၊ ကျွန်ုပ်တို့နိုင်ငံတွင် ဒီမိုကရေစီ၊ လူ့အခွင့်အရေးနှင့် ရေရှည် တည်တံ့ခိုင်မြဲသော ငြိမ်းချမ်းရေး ပြန်လည်ရရှိရေး ကြိုးပမ်းမှုအတွက် ပံ့ပိုးမှုကို အားဖြည့်ပေးရန် အမျိုးသားညီညွတ်ရေးအစိုးရက အလေးအနက် တိုက်တွန်းထားထားပါတယ်။

========================

📌📌 ၂။ ပြည်သူ့ကာကွယ်ရေးတပ်မတော်၊ တပ်ရင်း၊ တပ်ဖွဲ့များအတွက် ‘မကွေးဆီသို့’ ကမ်ပိန်းမှ အမေရိကန်ဒေါ်လာ (၂) သိန်းကျော် ထောက်ပို့ကူညီ

သြဂုတ်လ ၂၄ရက် 

Radio NUG 

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော်၊ တပ်ရင်း၊ တပ်ဖွဲ့များအတွက် ခန့်မှန်းအမေရိကန်ဒေါ်လာ (၂၂၉,၅၃၀.၆၈) (ခန့်မှန်း အမေရိကန်ဒေါ်လာ နှစ်သိန်း နှစ်သောင်း ကိုးထောင် ငါးရာ့သုံးဆယ် ဒဿမ ခြောက်ရှစ် ဒေါ်လာ) ကို ‘မကွေးဆီသို့ ကမ်ပိန်း’ မှ Forward Myanmar အဖွဲ့ နှင့် တော်လှန်ပြည်သူများက ထောက်ပို့ကူညီခဲ့ကြောင်း NUG ကာကွယ်ရေးဝန်ကြီးဌာနမှ သတင်းထုတ်ပြန်ပါတယ်။

ပြည်ထောင်စုမြန်မာနိုင်ငံတော်တွင် ဖက်ဒရယ်ဒီမိုကရေစီစနစ် ပေါ်ပေါက်လာစေရေး နှင့် ပြည်သူ့ကာကွယ်ရေးတပ်မတော်၊ မကွေးတိုင်းစစ်ဌာန ကွပ်ကဲမှုအောက်ရှိ တပ်ရင်း၊ တပ်ဖွဲ့များအတွက် ကျည်ကာများ ဖြည့်ဆည်းပေးနိုင်ရန် ရည်ရွယ်ကာ ထောက်ပို့ကူညီခဲ့ခြင်းဖြစ်တယ်လို့ ဖော်ပြထားပါတယ်။

ထိုသို့ ကူညီထောက်ပို့မှုအတွက် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနအနေဖြင့် ကျေးဇူး အထူးတင်ရှိကြောင်း၊ မှတ်တမ်းတင် ဂုဏ်ပြုကြောင်း ကာကွယ်ရေးဝန်ကြီး ဦးရည်မွန်က လက်မှတ်ရေးထိုး၍ မှတ်တမ်းတင်ဂုဏ်ပြုလွှာ ပေးပို့ခဲ့တယ်လို့ သိရပါတယ်။

========================

📌📌 ၃။ စစ်ကောင်စီရဲ့ အတုအယောင် ရွေးကောက်ပွဲကို လုံးဝ လက်ခံမှာ မဟုတ်ကြောင်း ကန့်ဘလူ ပအဖ ထုတ်ပြန်

ဩဂုတ်လ ၂၄ ရက်၊ 

Radio NUG

အကြမ်းဖက် စစ်အုပ်စုက ပြုလုပ်သွားမယ့် အတုအယောင် ရွေးကောက်ပွဲအား လုံးဝ လက်ခံမှာ မဟုတ်ကြောင်း ကန့်ဘလူမြို့နယ် ပြည်သူ့အုပ်ချုပ်ရေးအဖွဲ့ (ပကဖ) က ထုတ်ပြန်ထားပါတယ်။

မင်းအောင်လှိုင် ဦးဆောင်တဲ့ စစ်အုပ်စုက နိုင်ငံရေးထွက်ပေါက် အနေဖြင့် အတုအယောင် ရွေးကောက်ပွဲ တစ်ခုကို ကျင်းပဖို့ စီစဉ်နေရာ စစ်ကိုင်းဖက်ဒရယ် ယူနစ်အတွင်းရှိ ကန့်ဘလူမြို့နယ်ဟာလည်း ရွေးကောက်ပွဲ ကျင်းပသွားမယ့် မြို့နယ်များမှာ အပါအဝင်ဖြစ်တယ်လို့ ဆိုပါတယ်။

ကန့်ဘလူ မြို့နယ်မှာ မြို့ (၂) မြို့နဲ့ ကျေးရွာပေါင်း (၂၆၉) ရွာ ရှိတဲ့ထဲက တော်လှန်ရေး အင်အားစုများက ကျေးရွာ (၂၃၅) ရွာကို စိုးမိုးထိန်းချုပ်ထားကာ ပြည်သူ့အုပ်ချုပ်ရေး အဖွဲ့များ ဖွဲ့စည်းထားရှိတယ်လို့ သိရပါတယ်။

ထို့ကြောင့် မြို့ (၂) မြို့နဲ့ ကျေးရွာ (၃၄) ရွာကိုသာ ထိန်းချုပ်ထားနိုင်တဲ့ စစ်ကောင်စီအနေဖြင့် ကန့်ဘလူမြို့နယ်မှာ အတုအယောင် ရွေးကောက်ပွဲ ပြုလုပ်ရန် လုံးဝမဖြစ်နိုင်ဘူးလို့ ဆိုပါတယ်။

ကန့်ကလူမြို့နယ် ပအဖ အနေနဲ့ စစ်အုပ်စုရဲ့ အတုအယောင် ရွေးကောက်ပွဲအား လုံးဝလက်ခံမှာ မဟုတ်ကြောင်း ရွေးကောက်ပွဲမှာ ပါဝင်ရွေးချယ်ခံမယ့်သူများနှင့် ရွေးကောက်ပွဲကို ဖြစ်မြောက်အောင် ကူညီဆောင်ရွက်သူများရဲ့ လုံခြုံရေးကို လုံးဝအာမခံချက် ပေးမှာမဟုတ်ဘူးလို့ အသိပေးထားပါတယ်။

========================

📌📌 ၄။ စစ်ကော်မရှင်က စွပ်စွဲထားတဲ့ မူးယစ်ဆေးဝါးများနဲ့ ပတ်သက်မှု မရှိကြောင်း SSPP ထုတ်ပြန်

ဩဂုတ်လ ၂၄ ရက်၊ 

Radio NUG

စစ်ကော်မရှင် လက်အောက်ခံ မူးယစ်ရဲတပ်ဖွဲ့က စွပ်စွဲရေးသား ဖော်ပြထားတဲ့ SSPP/SSA အဖွဲ့ဝင် အရာရှိများ မူးယစ်ဆေးဝါးများနဲ့ ပတ်သက်နေကြောင်း ထုတ်ပြန်ချက်အပေါ် SSPP က ငြင်းဆိုချက် ထုတ်ပြန်ထားပါတယ်။

ရန်ကုန်တိုင်းမှာ ကျပ် ၂၅၇ ဘီလီယံကျော် တန်ဖိုးရှိ မူးယစ်ဆေးဝါးများ ဖမ်ဆီးရမိခဲ့တယ်လို့ ဩဂုတ်လ ၂၂ ရက် ရက်စွဲဖြင့် စစ်ကောင်စီက သတင်းထုတ်ပြန်ရာမှာ ရှမ်းပြည်တိုးတက်ရေးပါတီ (SSPP) မှ ဗိုလ်မှူးစိုင်းစု ဆိုသူက အဓိက စီမံဆောင်ရွက်တာ ဖြစ်တယ်လို့ စွပ်စွဲခဲ့တာပါ။

စစ်ကောင်စီ မူးယစ်/ရဲတပ်ဖွဲ့ က စွပ်စွဲရေးသားထားတဲ့ ဗိုလ်မှူးစိုင်းစု ဆိုသူဟာ အဖွဲ့အစည်းထဲမှာ မရှိကြောင်းနဲ့ ဗိုလ်မှူးကြီး စိုင်းဆု ဆိုသူသာရှိပြီး ၎င်းဟာလည်း SSPP မှာ အတွင်းရေးမှူး တာဝန်ကို ထမ်းဆောင်လျက်ရှိကာ နိုင်ငံရေး၊ စစ်ရေး၊ ငြိမ်းချမ်းရေးနှင့် အမျိုးသား ပြန်လည်ရင်ကြားစေ့ရေးဆိုင်ရာ ညှိနှိုင်းရေး အထူးတာဝန်များကိုသာ ထမ်းဆောင်လျက် ရှိတယ်လို့ SSPP က ဆိုပါတယ်။

အဆိုပါ စွပ်စွဲချက်ဟာ SSPP/SSA ကို နိုင်ငံရေးအရ ဂုဏ်သိက္ခာ ကျစေလိုခြင်း၊ အဖွဲ့အစည်းအတွင်း စည်းလုံးညီညွတ်မှုကို ထိခိုက်ပျက်ပြားစေလိုခြင်း နဲ့ မိမိတို့ ထိန်းသိမ်းဆောင်ရွက်နေတဲ့ ငြိမ်းချမ်းရေး လုပ်ငန်းစဉ်များကို ထိခိုက်ပျက်ပြားစေရန်အတွက် လိုရာဆွဲရေးသားတိုက်ခိုက်ခြင်းသာ ဖြစ်တယ်လို့ တုံ့ပြန်ပါတယ်။

SSPP/SSA အနေဖြင့် ထိန်းချုပ်ထားတဲ့ နယ်မြေအတွင်း မူးယစ်ဆေးဝါး ကင်းစင်စေရန် ကာကွယ်တားဆီးရေး လုပ်ငန်းများ၊ ပညာပေးခြင်း၊ ဖမ်းဆီးခြင်း၊ ဖျက်စီးခြင်း လုပ်ငန်းများကို စဉ်ဆက်မပြတ် ဆောင်ရွက်နေကြောင်းနဲ့ ပါတီဝင်၊ အဖွဲ့ဝင်များအား ပါဝင်ပတ်သက်ခြင်း၊ ရောင်းဝယ်ဖောက်ကားခြင်း၊ ထုတ်လုပ်ခြင်းများကို လုံးဝ(လုံးဝ) ပိတ်ပင်တားဆီးထားတယ်လို့ ဖော်ပြထားပါတယ်။

========================

📌📌 ၅။ အသေးစား သက်မွေးလုပ်ငန်းများ ပျိုးထောင်ခြင်း အစီအစဉ်အတွက် CDM စစ်သား၊ ရဲ နှင့် မိသားစုဝင်များအား သင်တန်းသား ခေါ်ယူနေ

ဩဂုတ်လ ၂၄ ရက်၊ 

Radio NUG

နွေဦးတော်လှန်ရေးမှာ ပြည်သူ့ဘက် ရပ်တည်ပြီး ဘက်ကူးပြောင်းလာခဲ့တဲ့ CDM စစ်သား၊ ရဲသား နဲ့ မိသားစုဝင်များအတွက် အသေးစား သက်မွေးလုပ်ငန်းများ ပျိုးထောင်ခြင်း အစီအစဉ် စီစဉ် ဆောင်ရွက်နေတယ်လို့ ပြည်သူ့ ပန်းတိုင်က ထုတ်ပြန်ထားပါတယ်။

နယ်မြေဒေသ၊ ဘဝအခြေအနေ အသစ်မှာ စွန့်ဦးစီးပွားရေးနဲ့ သက်မွေးလုပ်ငန်းများ အောင်မြင်အောင် လုပ်ကိုင် ဆောင်ရွက်နိုင်စေရန် အခွင့်အလမ်းနဲ့ လက်တွေ့ စီမံလုပ်ဆောင်ရမှုများကို လေ့လာသင်ယူခွင့် ရရှိမှာ ဖြစ်တယ်လို့ ဆိုပါတယ်။

အဆိုပါ အစီအစဉ်ကို ထိုင်း/အိန္ဒိယ နယ်စပ် အပါအဝင် ပြည်တွင်း လွတ်မြောက်ဒေသ အင်တာနက် ဆက်သွယ်မှု ကောင်းမွန်တဲ့ နေရာဒေသ အသီးသီးက CDM စစ်သား၊ ရဲသားနဲ့ မိသားစုဝင်များ ပါဝင်လျှောက်ထားနိုင်တယ်လို့ သိရပါတယ်။

နွေဦးတော်လှန်ရေးအတွင်း ကိုယ်အင်္ဂါ အစိတ်အပိုင်းများ စွန့်လွှတ်ပေးဆပ်ခဲ့ကြတဲ့ CDM စစ်သား၊ ရဲသားများ ပါဝင်လျှောက်ထားကြဖို့ အထူးအားပေးတယ်လို့ ပြည်သူ့ပန်းတိုင်က ဆိုပါတယ်။

သင်တန်းကာလ (၆) ပတ်အထိ ကြာမြင့်နိုင်ပြီး အွန်လိုင်းကနေ သင်ယူရမှာဖြစ်ကာ မိမိတို့ စွမ်းဆောင်ရည်အပေါ် မူတည်ပြီး လုပ်ငန်းစတင်နိုင်မယ့် အခွင့်အလမ်းများ ရရှိနိုင်မှာ ဖြစ်တယ်လို့ ဖော်ပြထားပါတယ်။

========================

📌📌 ၆။ နွေဦးထီ Survey ဖြည့်သူများအား NOH Gift Card ၁၀,၀၀၀ ကျပ်တန် လက်ဆောင်ပေးအပ်မည်

ဩဂုတ်လ ၂၄ရက် 

Radio NUG 

နွေဦးထီက ၎င်းတို့၏ ဝန်ဆောင်မှုများကို ပိုမိုကောင်းမွန်စေရန်အတွက် ဩဂုတ် ၂၄ ရက်မှ စက်တင်ဘာ ၂၁ ရက်အတွင်း Nway Oo Hti Survey Form ဖြည့်စွက်သူများအနက်မှ ကံထူးရှင် ၁၀၀ ဦးကို ၁၀,၀၀၀ ကျပ်တန်ဖိုးရှိ NOH Gift Card များ လက်ဆောင်အဖြစ် ပေးအပ်မည်ဖြစ်ကြောင်း သတင်းထုတ်ပြန်ထားပါတယ်။

နွေဦးထီ၏ အဆိုအရ ပြည်သူတစ်ဦးချင်းစီ၏ အမြင်နှင့် အကြံပြုချက်များသည် ၎င်းတို့၏ ဝန်ဆောင်မှုစနစ်များ ပိုမိုတိုးတက်ကောင်းမွန်လာစေရန်နှင့် အနာဂတ်အိပ်မက်များကို အကောင်အထည်ဖော်ရာတွင် အရေးပါတယ်လို့ ဆိုပါတယ်။

"မိမိအမြင်တိုင်း၊ အကြံဉာဏ်တိုင်းက နွေဦးထီရဲ့ အောင်မြင်တဲ့အနာဂတ် ကို အခြေခံတည်ဆောက်ပေးသလို သင့်အိပ်မက်တွေကို အမှန်တကယ် ကောင်းမွန်စွာနဲ့ အနီးဆုံးရောက်ရှိမယ့် လမ်းကြောင်းကို ဖန်တီးပေးနေတဲ့အတွက် ခုပဲဖောင်ဖြည့်ပြီး လက်ဆောင်ကဒ်တွေနဲ့ အတူဆုထူးတွေ ရယူလိုက်ပါ။" လို့ တိုက်တွန်းထားပါတယ်။

အခုတင်ပြခဲ့တဲ့ သတင်းတွေကို Radio NUG သတင်းထောက် ခါးရှဲလ်နဲ့ ပဒဲဖိုးက ပေးပို့ထားတာ ဖြစ်ပါတယ်။

========================

========================

🚩🚩 ၁။ MNDAA က တရားမဝင်လက်နက် ၄၇၆ လက်ဖျက်ဆီးပြီး ၂၀၀ လက်ကို တရုတ်ထံ လွှဲပြောင်း

ဩဂုတ်လ ၂၄ရက် 

Radio NUG 

မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) ၏ ထိန်းချုပ်နယ်မြေအတွင်း အထူးဒေသ ၁ ရဲတပ်ဖွဲ့က သိမ်းဆည်းရရှိထားသည့် တရားမဝင်သေနတ် ၄၇၆ လက်ကို မီးရှို့ဖျက်ဆီးခဲ့ပြီး ၂၀၀ လက်ကို တရုတ်ထံ လွှဲပြောင်းပေးအပ်ခဲ့ကြောင်း MNDAA က သတင်းထုတ်ပြန်ထားပါတယ်။

အဆိုပါ တရားမဝင်လက်နက်များ ဖျက်ဆီးခြင်း အခမ်းအနားကို ဩဂုတ် ၂၁ ရက်က ကျင်းပခဲ့ပြီး  ကိုးကန့်ဒေသအတွင်း လက်နက်ဆိုင်ရာ ရာဇဝတ်မှုများကို ပြင်းထန်စွာ နှိမ်နင်းရန်၊ လက်နက်စီမံခန့်ခွဲမှု အားကောင်းစေရန်နှင့် နယ်စပ်ဒေသ တည်ငြိမ်ရေးအတွက် ရည်ရွယ်ထားသည့် အထူးစစ်ဆင်ရေးတစ်ရပ်အတွင်း တရားမဝင်သေနတ် စုစုပေါင်း ၆၇၆ လက် သိမ်းဆည်းရရှိခဲ့တယ်လို့ သိရပါတယ်။

ထိုစစ်ဆင်ရေးသည် ဒေသတွင်း တရားမဝင်လက်နက်များ ပျံ့နှံ့မှုကို ထိန်းချုပ်ရန်နှင့် လုံခြုံရေးကို မြှင့်တင်ရန် ရည်မှန်းထားတယ်လို့ သိရပါတယ်။

========================

🚩🚩 ၂။ ဖားကန့်တွင် အကြမ်းဖက်စစ်တပ်နှင့် SNA ကားတစ်စီးကို KIA နှင့် KPDF က ကြားဖြတ်တိုက်ခိုက်၊ ဒရုန်း ၅ စီး သိမ်းဆည်းရရှိ

ဩဂုတ်လ ၂၄ရက် 

Radio NUG 

ဩဂုတ် ၂၃ ရက် ညနေပိုင်းတွင် ကချင်ပြည်နယ်၊ ဖားကန့်မြို့နယ်၊ နမ္မမြစ်အနီးတွင် စစ်ကြောင်းထိုးနေသည့် အကြမ်းဖက်စစ်တပ်နှင့် SNA အဖွဲ့ဝင်များပါဝင်သော ကားတစ်စီးကို ကချင်လွတ်လပ်ရေးတပ်မတော် (KIA) နှင့် ကချင်ပြည်သူ့ကာကွယ်ရေးတပ် (KPDF) ပူးပေါင်းအဖွဲ့က ကြားဖြတ်တိုက်ခိုက်ခဲ့ကြောင်း စစ်ရေးသတင်းများအရ သိရပါတယ်။

ထိုတိုက်ခိုက်မှုတွင် တိုက်ခိုက်ရေးဒရုန်း ၄ စီး၊ ကင်းထောက်ဒရုန်း ၁ စီးနှင့် ကားတစ်စီးကို သိမ်းဆည်းရရှိခဲ့ပြီး အကြမ်းဖက်စစ်တပ်နှင့် SNA အဖွဲ့ဝင်များ ထိခိုက်ဒဏ်ရာရရှိကာ ဆုတ်ခွာသွားခဲ့တယ်လို့ သိရပါတယ်။

ထို့ပြင်၊ လုံးခင်းကျေးရွာသို့ စစ်ကြောင်းထိုးဝင်ရောက်လာသည့် စစ်တပ်က အရပ်သား ၆ ဦးဖြစ်သည့် ကိုဇော်မင်းထွန်း၊ ကိုမျိုးဇင်ထွန်း၊ ကိုအောင်ရှိုင်းမင်း၊ ကိုကျော်ဇောဟိန်း၊ ကိုအောင်မြတ်ဦးနှင့် ကိုသူရထက်နိုင်တို့ကို ဖမ်းဆီးခဲ့ပြီး လက်ရှိအချိန်ထိ ပြန်လွှတ်ပေးခြင်းမရှိသေးဘူးလို့ သိရပါတယ်။

အကြမ်းဖက်စစ်တပ်သည် KPDF ဝတ်စုံများဝတ်ဆင်ကာ ဖားကန့်မြို့နယ်အတွင်း လှုပ်ရှားနေပြီး တော်လှန်ရေးတပ်ဖွဲ့များနှင့် ပြည်သူများအကြား အထင်အမြင်လွဲမှားမှုများ ဖြစ်ပေါ်စေရန် ရည်ရွယ်လုပ်ဆောင်နေတယ်လို့ တော်လှန်ရေးတပ်ဖွဲ့များက သတိပေးထားပြီး အကြမ်ဖက်စစ်တပ်နှင့် တော်လှန်ရေးတပ်ဖွဲ့များ၏ လက်နက်အမျိုးအစားများ ကွဲပြားမှုကို သတိပြုရန်လည်း ပြည်သူများကို တိုက်တွန်းထားပါတယ်။

========================

🚩🚩 ၃။ ပေါက်ခေါင်းမြို့နယ်က စစ်ကောင်စီ အထိုင်ဂိတ်စခန်းကို ဝင်ရောက်စီးနင်း ပစ်ခတ်ခဲ့ရာ ၅ ဦး သေဆုံး

ဩဂုတ်လ ၂၄ ရက်၊ 

Radio NUG

ပဲခူးတိုင်း၊ ပြည်ခရိုင်၊ ပေါက်ခေါင်းမြို့နယ်က စစ်ကောင်စီအထိုင် ဂိတ်စခန်းကို ဝင်ရောက်စီးနင်း ပစ်ခတ်ခဲ့ရာ ၅ ဦး သေဆုံးပြီး၊ ၃ ဦး အရှင်ဖမ်းဆီးရမိခဲ့တယ်လို့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ PPDF - 3601 က ထုတ်ပြန်ထားပါတယ်။

ဩဂုတ်လ ၁၅ ရက်၊ မနက် ၅ နာရီ ၂၀ မိနစ်မှာ စစ်ကောင်စီ တပ်အင်အား (၄၂) ဦးရှိ ဘော်ဒါကျေးရွာ ဂိတ်အထိုင်စခန်းအား ဝင်ရောက်စီးနင်း တိုက်ခိုက်ခဲ့တယ်လို့ ဆိုပါတယ်။

တိုက်ပွဲအတွင်း စစ်ကောင်စီ တပ်ဖွဲ့ဝင် ၅ ဦး သေဆုံးကာ၊ ၃ ဦး ဒဏ်ရာရခဲ့ပြီး ၃ ဦးကို အရှင်ဖမ်းဆီး ရမိခဲ့တယ်လို့ သိရပါတယ်။

ကျန်စစ်ကောင်စီ တပ်သား အများအပြား စခန်းစွန့်ခွာ ထွက်ပြေးသွားခဲ့ပြီး MA3 ၂ လက်၊ MA11 ၁ လက်၊ Uzi ၁ လက်၊ ပစ္စတို ၁ လက်၊ ကျည်မျိုးစုံ ၂,၇၆၅ တောင့်၊ ရှေ့ထွက်မိုင်း ၁ လုံး၊ ကျည်ဘောက် ၁၃ ဘောက်၊ ICom စက် ၁ လုံး၊ ဖုန်း ၄ လုံး၊ ဆက်သွယ်ရေး အထိုင်စက် ၁ လုံးနဲ့ စစ်အသုံးဆောင် ပစ္စည်းအမျိုးမျိုး သိမ်းဆည်းရရှိခဲ့တယ် လို့ ဆိုပါတယ်။

အဆိုပါတိုက်ခိုက်မှုကို PDF ဗျူဟာ (၂၁) ကွပ်ကဲမှုအောက်က ပြည်ခရိုင် အမှတ် (၁) ၃၆၀၁ တပ်ရင်း၊ ပြည်ခရိုင် အမှတ် (၂) ၃၆၀၂ တပ်ရင်းနဲ့ တောင်ငူခရိုင် အမှတ် (၁) ၃၅၀၁ တပ်ရင်းတို့က ဆောင်ရွက်ခဲ့တာပါ။

တိုက်ပွဲ ဖြစ်ပွားပြီးနောက် စစ်ကောင်စီတပ်က နေ့လယ် ၁၁ နာရီခန့်မှာ Gyrocopter ဖြင့် ပေါင် ၃၀၀ ဗုံး ၁ လုံး၊ ည ၇ နာရီမှာ Paramotor နှစ်စီးဖြင့် ပေါင် ၃၀၀ ဗုံး ၄ လုံး ကြဲချခဲ့ရာ အရပ်သားပြည်သူ ၆ ဦး သေဆုံးကာ ၅ ဦး ထိခိုက်ဒဏ်ရာ ရခဲ့တယ်လို့ သိရှိရပါတယ်။

========================

🚩🚩 ၄။ ကလေးမှာ ၁၀ ရက်ကြာ တိုက်ပွဲအတွင်း စစ်ကောင်စီတပ်သား အလောင်း ၃ လောင်းနဲ့ လက်နက် ၁၀ လက်ကို သိမ်းဆည်းရမိ

ဩဂုတ်လ ၂၄ ရက်၊ 

Radio NUG

စစ်ကိုင်းတိုင်း၊ ကလေးခရိုင်၊ ကလေးမြို့နယ်၊ နန်းစောင်းပု ကျေးရွာကို ထိုးစစ်ဆင်လာတဲ့ စစ်ကောင်စီတပ်ဖွဲ့ကို ၁၀ ရက်ကြာ တိုက်ခိုက်ခဲ့ပြီး စစ်ကောင်စီ တပ်သား အလောင်း ၃ လောင်းနဲ့ လက်နက် ၁၀ လက်ကို သိမ်းဆည်း ရရှိခဲ့တယ်လို့ အမှတ် (၁) စစ်ဒေသက ထုတ်ပြန်ထားပါတယ်။

ဩဂုတ်လ ၆ ရက်နေ့မှ ၁၅ ရက်နေ့အထိ ခန့်မှန်းအင်အား ၁၂၀ ကျော် ပါတဲ့ စစ်ကောင်စီ စစ်ကြောင်းကို ပြည်သူ့ ကာကွယ်ရေး တပ်ရင်း၊ တပ်ဖွဲ့များက ၁၀ ရက်ကြာ တိုက်ခိုက်ခဲ့တယ်လို့ ဆိုပါတယ်။

တိုက်ပွဲအတွင်း စစ်ကောင်စီတပ်သား အလောင်း ၃ လောင်း၊ စစ်သုံ့ပန်း ၁ ဦးကို ဖမ်းဆီးရမိခဲ့ပြီး စစ်ကောင်စီက အဓမ္မ စုဆောင်းထားတဲ့ ဟိန္ဒူ ဂေါ်ရခါးလူမျိုး စစ်မှုထမ်းစစ်သား အများအပြား သေဆုံးခဲ့တယ်လို့ သိရပါတယ်။

ထို့အပြင် MG-42 (၁) လက်၊ BA-100 (၁) လက်၊ MA-4 (၁) လက်၊ MA-E (၂) လက်၊ MA-1 (၂) လက်၊ MA-3 (၂) လက်၊ G-3 (၁) လက်၊ MG-42 ပြောင်းအပို (၂) ခု၊ RPG ဒုံးသီး (၅) ခု၊ ကျည်ဘောက်မျိုးစုံ (၂၄) ခု၊ ၅.၅၆ ကပစ ကျည် (၁,၃၈၉) တောင့်၊ ၇.၆၂ ကပစ ကျည် (၁,၉၀၃) တောင့်၊ ၄၀ မမ ဗုံးသီး (၁၂) လုံး၊ ၁၄ မိုင်း (၅) ခု၊ ၈၄ မမ မှန်ပြောင်း (၁) ခု၊ အီနာဂါ ဗုံးသီး (၁) ခုနဲ့ ကျည်ကာဦးထုပ် (၁) လုံး သိမ်းဆည်းရရှိခဲ့တယ်လို့ ဆိုပါတယ်။

၎င်းတိုက်ခိုက်မှုကို အမှတ် (၅) အထူးလှုပ်ရှားတပ်ရင်း၊ အမှတ် (၆) အထူးလှုပ်ရှားတပ်ရင်း၊ ကလေးခရိုင် အမှတ် (၄) တပ်ရင်း၊ ကလေးခရိုင် အထူးစစ်ကြောင်း (PDF + ပကဖ)၊ ကလေးမြို့နယ် ပကဖ၊ ကလေးဝ မြို့နယ် ပကဖ၊ မင်းကင်းမြို့နယ် ပကဖ နဲ့  PDF Zoland-Drone Team တို့က ပူးပေါင်းဆောင်ရွက်ခဲ့တာ ဖြစ်ပါတယ်။

========================

🚩🚩 ၅။ ကျိုက်ထို၊ ချမ်းမြေ့ရွာ ဘုန်းကြီးကျောင်းကို စစ်ကောင်စီ ဗုံးကြဲတိုက်ခိုက်ခဲ့ရာ သံဃာ ၃ ပါး ပျံလွန်တော်မူ

ဩဂုတ်လ ၂၄ ရက်၊ 

Radio NUG

မွန်ပြည်နယ်၊ ကျိုက်ထိုမြို့နယ်၊ ချမ်းမြေ့ကျေးရွာ ဘုန်းကြီးကျောင်းကို စစ်ကောင်စီက လေကြောင်းကနေ ဗုံးကြဲ တိုက်ခိုက်ခဲ့တာကြောင့် သံဃာ ၃ ပါး ပျံလွန်သွားခဲ့ပြီး ၅ ပါး ဒဏ်ရာရခဲ့တယ်လို့ သိရပါတယ်။

ဩဂုတ်လ ၂၄ ရက် မနက် ၁၀ နာရီခွဲခန့် သံဃာတော်များ ဆွမ်းစားနေချိန်မှာ စစ်ကောင်စီက ပေါင် ၃၀၀ ဗုံး တစ်လုံး ကြဲချခဲ့တာဖြစ်ပြီး ဆွမ်းစားကျောင်းပေါ် တည့်တည့် ကျရောက်ပေါက်ကွဲခဲ့တယ်လို့ ဆိုပါတယ်။

ဗုံးကြဲ တိုက်ခိုက်မှုအတွင်း သံဃာတော် ၂ ပါး နေရာမှာပဲ ပျံလွန်တော်မူခဲ့ပြီး ၅ ပါး အပြင်းအထန် ဒဏ်ရာရခဲ့ကာ ဆေးကုသဖို့ ပို့ဆောင်နေရင်း ၁ ပါး ထပ်မံပျံလွန်တော်မူခဲ့တယ်လို့ သိရပါတယ်။

ထို့အပြင် ဘုန်းကြီးကျောင်းဆောင်နဲ့ ဆွမ်းစားဆောင်တွေလည်း ပျက်စီးခဲ့ပါတယ်။

စစ်ကောင်စီက ဗုံးကြဲတိုက်ခိုက်ခဲ့တဲ့ ချမ်းမြေ့ကျေးရွာမှာ KNU နဲ့ PDF တွေ မရှိသလို တိုက်ပွဲဖြစ်ပွားတာလည်း မရှိဘူးလို့ သိရှိရပါတယ်။

========================

🚩🚩 ၆။ ပေါ်တာဆွဲ အတင်းအဓမ္မ စစ်မှုထမ်းစေခိုင်းခံရသူ (၁)ဦး မှ အလင်းဝင်ရန် ချိတ်ဆက်လာခဲ့သဖြင့် သွားရောက်ကယ်ထုတ်ခဲ့

ဩဂုတ်လ ၂၄ရက် 

Radio NUG 

ပြည်သူ့စစ်မှုထမ်းရန် အကြမ်းဖက်စစ်ကောင်စီမှ ပေါ်တာဆွဲ အတင်းအဓမ္မ စစ်မှုထမ်းစေခိုင်းခံရသူ ကိုအောင်ဆန်းမြင့် (ခမရ ၄၃၉) မှ အလင်းဝင်ရန် ဆန္ဒရှိကြောင်း SPRING WARRIORS COLUMN နွေဦးစစ်သည်‌‌တော်များစစ်‌‌ကြောင်းမှ စစ်ကြောင်းမှူး မိုက်ကြီးအား ဆက်သွယ်လာကြောင်း သတင်းထုတ်ပြန်ထားပါတယ်။

နွေဦးစစ်သည်‌‌တော်များ စစ်ကြောင်းမှူး မိုက်ကြီးနှင့်အဖွဲ့ သည် အဆိုပါ စစ်မှုထမ်းတပ်သားသစ်ကို ဩဂုတ်လ ၁၃ရက်တွင် သွားရောက်ကယ်ဆယ်ပေးခဲ့ပြီး လက်နက်နှင့်တကွ အလင်းဝင်လာတာကြောင့် ဆုကြေးငွေ တစ်ဆယ်သိန်းကျပ် ချီးမြှင့်ခဲ့ကာ ကောင်းမွန်စွာ စောင့်ရှောက်ပေးထားတယ်လို့ ဖော်ပြထားပါတယ်။

SPRING WARRIORS COLUMN နွေဦးစစ်သည်‌‌တော်များစစ်‌‌ကြောင်းထံ ပေါ်တာဆွဲ အတင်းအဓမ္မ စစ်မှုထမ်းစေခိုင်းခံရသူ (၄) ဦးတိတိ အလင်းဝင်ခဲ့ပြီးဖြစ်တယ်လို့ သိရပါတယ်။

အခုတင်ပြခဲ့တဲ့ စစ်ရေးသတင်းကောက်နုတ်ချက်တွေကိုတော့ Radio NUG သတင်းထောက် ခါးရှဲလ်နဲ့ ပဒဲဖိုးတို့က ပေးပို့ထားတာဖြစ်ပါတယ်။

#RadioNUGLocalNews

#SpringRevolution