၂၀၂၅ သြဂုတ်လ ၂၈ ရက်နေ့ မနက်ခင်း သတင်းလွှာ

 

၂၀၂၅ သြဂုတ်လ ၂၈ ရက်နေ့ မနက်ခင်း နောက်ဆုံးရပြည်တွင်းသတင်းများ

📌 ၁။ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီနှင့် မ‌ကွေးတိုင်း ပြည်သူ့အုပ်ချုပ်ရေးအဖွဲ့များ အစည်းအဝေးပြုလုပ်

📌 ၂။ နော်ဝေနိုင်ငံ၊ လီလီစထရွန်းမြို့ (Lillestrom) တွင် ကျင်းပသည့် အာရှပွဲတော်သို့ NUG နော်ဝေနိုင်ငံဆိုင်ရာကိုယ်စားလှယ်  တက်ရောက်

📌 ၃။ မင်းဘူးခရိုင် အမှတ် (၂) တပ်ရင်းနဲ့ နဂ ဒေသ ပ.က.ဖ တို့က တရားမဝင် ရွေးကောက်ပွဲမှာ ပါဝင်သူ၊ ကူညီသူများကို အရေးယူမယ်ဟုဆို

📌 ၄။ လေပြင်းတိုက်ခတ်မှုကြောင့် အင်းလေးဒေသရှိ နေအိမ် ၁၀၀ ကျော် ပျက်စီး

📌 ၅။ ဩဂုတ်လအတွင်း ရခိုင်ပြည်နယ်တွင် အကြမ်းဖက်စစ်အုပ်စုကြောင့် (၁၆) ဦး သေဆုံး

========================

၂၀၂၅ ခုနှစ် သြဂုတ်လ ၂၈ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ

🚩 ၁။ မဟာမိတ်များနဲ့ လက်တွဲပြီး စစ်ရေး အရှိန်မြှင့်မယ်လို့ PDF အထူးတိုင်း စစ်ဌာန အသိပေး

🚩 ၂။ ဝက်လက်မြို့နယ်မှာ စစ်တပ်က လေကြောင်းတိုက်ခိုက်မှု ၄ ကြိမ် ပြုလုပ်ခဲ့၊ အရပ်သား ပြည်သူ ၄ ဦး သေဆုံး

🚩 ၃။ ဖားကန့်တွင် အကြမ်းဖက်စစ်တပ် လက်နက်ကြီးပစ်ခတ်မှုကြောင့် အရပ်သား ၄ ဦး ဒဏ်ရာရရှိ

🚩 ၄။ ရေဖြူမြို့နယ်မှာ စစ်ကောင်စီ စစ်ကြောင်းကို ကြားဖြတ်တိုက်ခိုက်ခဲ့ရာ ၁၀ ဦး ထက်မနည်း သေဆုံး

🚩 ၅။ ဘုတလင်မှာ စစ်ကော်မရှင် စစ်ကြောင်းနဲ့ တိုက်ပွဲဖြစ်ပွားခဲ့ပြီး စစ်သား ၇ ဦး သေဆုံး

🚩 ၆။ ကမ္မမြို့နယ်တွင် မူးယစ်ဆေးသုံးစွဲသူများကို ဝင်ရောက်ဖမ်းဆီးခဲ့ရာ အရပ်သား ( ၃ )ဦးနှင့် အဖွဲ့အစည်းမှ ( ၃ )ဦး ဖမ်းမိ

🚩 ၇။ ပခုက္ကူ တပ်မ ၁၀၁ တပ်ရင်းမှ ပေါ်တာဆွဲဖမ်းဆီးခံရသည့် စစ်မှုထမ်းတပ်သားသစ် တစ်ဦး အလင်းဝင်

ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။

========================

📌📌 ၁။ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီနှင့် မ‌ကွေးတိုင်း ပြည်သူ့အုပ်ချုပ်ရေးအဖွဲ့များ အစည်းအဝေးပြုလုပ်

အမျိုးသားညီညွတ်ရေးအစိုးရ၊ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီနှင့်‌မကွေးတိုင်းမှ ပြည်သူ့အုပ်ချုပ်ရေးအဖွဲ့များ တွေ့ဆုံ ဆွေးနွေးပွဲအစည်းအဝေး (၁‌၇/၂၀၂၅) ကို ဩဂုတ်လ (၂၇) ရက်နေ့က ကျင်းပပြုလုပ်ခဲ့ကြောင်း သတင်းရရှိပါတယ်။

အဆိုပါအစည်းအဝေးတွင် မြို့နယ်များ၏ အာဂျင်တာ တင်သွင်း ဆွေးနွေးမှုအပေါ် သက်ဆိုင်ရာဝန်ကြီးဌာနများမှ ပြန်လည်ဆွေးနွေးဆောင်ရွက်ခဲ့ကြတယ်လို့ သိရပါတယ်။

အဆိုပါအစည်းအ‌ဝေးသို့  အမြဲတမ်းအတွင်းဝန်များ၊ ဒုတိယအတွင်းဝန်များ၊ တွဲဖက်အတွင်းဝန်များ၊ ဌာနဆိုင်ရာများမှ တာဝန်ရှိသူများနှင့် မကွေးတိုင်းမှ မြို့နယ်ပြည်သူ့အုပ်ချုပ်ရေးအဖွဲ့ဝင်များ တက်ရောက်ခဲ့ကြပြီး အစည်းအဝေးကို နေ့လယ် (၃:၃၀) နာရီအချိန်တွင် ရပ်နားခဲ့တယ်လို့ သိရှိရပါတယ်။

========================

📌📌 ၂။ နော်ဝေနိုင်ငံ၊ လီလီစထရွန်းမြို့ (Lillestrom) တွင် ကျင်းပသည့် အာရှပွဲတော်သို့ NUG နော်ဝေနိုင်ငံဆိုင်ရာကိုယ်စားလှယ်  တက်ရောက်

၂၀၂၅ခုနှစ်၊ သြဂုတ်လ (၂၃) ရက်နေ့၊ နော်ဝေနိုင်ငံ လီလီစထရွန်းမြို့တွင် နော်ဝေ-အာရှ ယဉ်ကျေးမှုအသင်းက စီစဉ်ကျင်းပခဲ့သည့်  မြန်မာ၊ ထိုင်း၊ ဗီယက်နမ်၊ စင်္ကာပူ၊ ဖိလစ်ပိုင်၊ အင်ဒိုနီးရှား၊ မလေးရှား၊ တောင်ကိုရီးယားနှင့် ဂျပန်နိုင်ငံ ကိုယ်စားပြုအဖွဲ့များက မိမိတို့၏ ရိုးရာယဉ်ကျေးမှုအကများ၊ Fashion Talent show များနှင့် ရိုးရာအစားအစာများ တည်ခင်းရောင်းချသော အာရှပွဲတော်သို့ လီလီစထရွန်း မြို့တော်ဝန် Mr. Kjartan Berland၊  အလုပ်သမားဝန်ကြီး H.E. Tonje Brenna၊ နော်ဝေနိုင်ငံဆိုင်ရာ ထိုင်းသံအမတ်ကြီး Nitivadee Manitkul၊ တောင်ကိုရီးယားသံအမတ်ကြီး Seo Min-jeong၊ ဂျပန်သံအမတ်ကြီး Akira Sugiyama တို့နှင့်အတူ အမျိုးသားညီညွတ်ရေးအစိုးရ နော်ဝေနိုင်ငံဆိုင်ရာ ကိုယ်စားလှယ် ဦးမောင်မောင်မြင့်တက်ရောက်ခဲ့ကြောင်း အမျိုးသားညီညွတ်ရေးအစိုးရ နိုင်ငံခြားရေးဝန်ကြီးဌာနမှ သတင်းထုတ်ပြန်ပါတယ်။

ထို့အပြင် အာရှပွဲတော်တွင် နော်ဝေ-အာရှ ယဉ်ကျေးမှုအသင်းအဖွဲ့ဝင်ဖြစ်သည့် CRPH Support Group, Norway က မြန်မာအဖွဲ့ကို ဦးဆောင်ကာ မြန်မာ့ရိုးရာအကနှင့် ဝတ်စားဆင်ယင်မှုလမ်းလျှောက်ပြပွဲများကို တင်ဆက်ခဲ့ပြီး မြန်မာအစားအစာများ ရောင်းချ၍ မြန်မာစစ်ဘေးရှောင် ပြည်သူများအတွက် ရန်ပုံငွေ ရှာဖွေခဲ့တယ်လို့ ဖော်ပြထားပါတယ်။

CRPH Support Group, Norway ၏ အထွေထွေအတွင်းရေးမှူး ဒေါ်ဝတ်မှုန်ဝင်းက မြန်မာယဉ်ကျေးမှုအဖွဲ့အား ပရိသတ်နှင့် မိတ်ဆက်ပေးရာတွင် စစ်အာဏာသိမ်းမှု၏ နောက်ဆက်တွဲ ဆိုးကျိုးများအကြောင်း ထည့်သွင်းပြောဆိုခဲ့သည့် အပြင်၊ နော်ဝေအစိုးရအနေဖြင့် အကြမ်းဖက်စစ်အုပ်စုက ပြုလုပ်မည့် တရားမဝင် အတုအယောင် ရွေးကောက်ပွဲကို မည့်သည့်အကြောင်းပြချက်နှင့်မျှ ထောက်ခံအားပေးခြင်း မပြုရန်နှင့် ဒုက္ခရောက်နေကြသည့် မြန်မာပြည်သူများအား နော်ဝေအစိုးရနှင့်ပြည်သူများက ကူညီထောက်ပံ့ပေးကြပါရန် မေတ္တာရပ်ခံခဲ့တယ်လို့ သိရပါတယ်။

========================

📌📌 ၃။ မင်းဘူးခရိုင် အမှတ် (၂) တပ်ရင်းနဲ့ နဂ ဒေသ ပ.က.ဖ တို့က တရားမဝင် ရွေးကောက်ပွဲမှာ ပါဝင်သူ၊ ကူညီသူများကို အရေးယူမယ်ဟုဆို

မကွေးတိုင်း၊ မင်းဘူးခရိုင်နဲ့ စစ်ကိုင်းတိုင်း၊ နာဂဒေသတို့မှာ စစ်တပ်က ပြုလုပ်မယ့် တရားမဝင် ရွေးကောက်ပွဲကို လက်မခံဘဲ ရွေးကောက်ပွဲမှာ ပါဝင်သူ၊ ကူညီသူ များကို ထိရောက်စွာ အပြစ်ပေး အရေးယူမယ်လို့ မင်းဘူးခရိုင်၊ အမှတ် (၂) တပ်ရင်းနဲ့ နဂဒေသ ပ.က.ဖ တို့က ထုတ်ပြန်ထားပါတယ်။

မင်းဘူးခရိုင် အမှတ် (၂) တပ်ရင်းက ဖက်စစ်တပ်က ကျင်းပပြုလုပ်ဖို့ ရည်ရွယ်နေတဲ့ တရားမဝင် အတုအယောင် ရွေးကောက်ပွဲကို ပြတ်ပြတ်သားသား ဆန့်ကျင်ကြာင်း၊ ပြည်သူ့အစိုးရ ခေါင်းဆောင်များကို မတရား ဖမ်းဆီးပြီး နိုင်ငံတော်ပုန်ကန်မှုကို ကျူးလွန်ခဲ့တဲ့ စစ်တပ်က ရွေးကောက်ပွဲ ကျင်းပပိုင်ခွင့် မရှိကြောင်း၊ စစ်အုပ်စုက အာဏာ တည်မြဲရေးနှင့် ကျူးလွန်ခဲ့တဲ့၊ ကျုးလွန်နေတဲ့ စစ်ရာဇဝတ်မှုများမှ ပြစ်ဒဏ်ကင်းလွတ်ခွင့် ရရှိအောင် တရားမဝင် ရွေးကောက်ပွဲ တစ်ခုကို ဇွတ်အတင်း ဖန်တီးခြင်းဟာ ဒီမိုကရေစီ ကျင့်စဉ်ကို ချိုးဖောက်ပြီး ပြည်သူ့အာဏာကို လုယူဖို့ ကြိုးစားနေတာ ဖြစ်တယ်လို့ ဆိုပါတယ်။

ထို့ကြောင့် ပြည်သူလူထုတရပ်လုံး အနေဖြင့် အတုအယောင် ရွေးကောက်ပွဲကို ကျင်းပခွင့်မပြုဘဲ ဆန့်ကျင်ကြဖို့ တိုက်တွန်းထားပြီး ရွေးကောက်ပွဲနဲ့ ပတ်သက်ဆက်နွှယ်နေတဲ့ အစုအဖွဲ့များ၊ ပါဝင်နေသူများကို စုံစမ်းဖော်ထုတ် အရေးယူ အပြစ်ပေးသွားမယ်လို့ အသိပေးထားပါတယ်။

အလားတူ နာဂဒေသမှာလည်း ပဋိပက္ခများကိုသာ တိုးပွားလာနိုင်စေတဲ့အပြင် မတည်ငြိမ်မှုများကို ပိုမိုပေါ်ပေါက် စေနိုင်တဲ့ စစ်အုပ်စုရဲ့ အတုအယောင် ရွေးကောက်ပွဲကို လုံးဝ လက်ခံမှာ မဟုတ်ကြောင်း အမျိုးသားညီညွတ်ရေး အစိုးရ၊ ကာကွယ်ရေး ဝန်ကြီးဌာန၊ နာဂဒေသ (ပ.က.ဖ) အထူးတိုက်ခိုက်ရေး တပ်ဖွဲ့က ထုတ်ပြန်ထားပါတယ်။

ဖြစ်ပေါ်လာနိုင်တဲ့ အသက်အန္တရာယ်၊ အိုးအိမ်ပစ္စည်း ဆုံးရှုံးမှုများကို ရွေးကောက်ပွဲမှာ တိုက်ရိုက် ပါဝင်သူများနဲ့ ပူးပေါင်းဆောင်ရွက်သူများသာ တာဝန်ခံရမှာ ဖြစ်ကြောင်းနဲ့ နောက်ဆက်တွဲ ပြဿနာများကို လုံးဝ တာဝန်ယူမှာ မဟုတ်ကြောင်း အသိပေးထားပါတယ်။

ထို့အပြင် ပြည်သူလူထု အနေဖြင့် စစ်ကော်မရှင် တပ်ရင်း၊ တပ်ဖွဲ့ ဌာနများ၊ လက်အောက်ခံ ရဲဌာနများ၊ ၎င်းတို့နဲ့ ဆက်စပ်နေတဲ့ပတ်ဝန်းကျင်များကို ရှောင်ကွင်းသွားလာကြဖို့၊ နီးနီးကပ်ကပ် နေထိုင်ခြင်းမပြုကြဖို့ တော်လှန်ရေး တပ်ဖွဲ့များက သတိပေးထားပါတယ်။

========================

📌📌 ၄။ လေပြင်းတိုက်ခတ်မှုကြောင့် အင်းလေးဒေသရှိ နေအိမ် ၁၀၀ ကျော် ပျက်စီး

ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးဒေသရှိ ကံခေါင်းနှင့် ဟတ်ပုံးကျေးရွာများတွင် လေပြင်းတိုက်ခတ်မှုကြောင့် နေအိမ် ၁၀၀ ကျော် ထိခိုက်ပျက်စီးခဲ့ကြောင်း ဒေသခံများနှင့် ကူညီရေးအဖွဲ့များထံမှ သိရပါတယ်။

ဩဂုတ်လ ၂၆ရက် နေ့လယ် ၂ နာရီ ၃၀ ခန့်တွင် လေပြင်းစတင်တိုက်ခတ်ခဲ့ပြီး ကံခေါင်းရွာတွင် နေအိမ် ၁၈၅ လုံးအနက် ၆၅ လုံးမှာ ဆိုးရွားစွာ ပျက်စီးခဲ့ကာ ဟတ်ပုံးရွာတွင်လည်း နေအိမ် ၅၆ လုံးခန့် ပျက်စီးခဲ့တယ်လို့ သိရပါတယ်။

လေဘေးသင့် လူဦးရေ ၅၀၀ ခန့်မှာ ကျေးရွာအတွင်းရှိ ဓမ္မာရုံများသို့ ရွှေ့ပြောင်းနေထိုင်နေရပြီး အကူအညီများ လိုအပ်နေတယ်လို့ သိရပါတယ်။

========================

📌📌 ၅။ ဩဂုတ်လအတွင်း ရခိုင်ပြည်နယ်တွင် အကြမ်းဖက်စစ်အုပ်စုကြောင့် (၁၆) ဦး သေဆုံး

နိုင်ငံရေးအကျဉ်းသားများ ကူညီစောင့်ရှောက်ရေးအသင်းမှ ကောက်ယူထားသော သတင်းအချက်အလက်များအရ ၂၀၂၅ ခုနှစ်၊ ဩဂုတ်လ ၁ ရက်နေ့မှ ၂၇ ရက်နေ့အထိ ရခိုင်ပြည်နယ်၌ အကြမ်းဖက်စစ်အုပ်စုကြောင့် အမျိုးသမီး (၅) ဦးနှင့် အမျိုးသား (၁၁)ဦး စုစုပေါင်း (၁၆) ဦး သေဆုံးခဲ့သည်ကို အမည်နှင့်တကွ အတည်ပြုနိုင်ခဲ့ပြီး ထိုအရေအတွက်တွင် အသက် ၁၈ နှစ်အောက် ကလေးငယ် (၅) ဦး ပါဝင်ကြောင်း AAPPမှ သတင်းထုတ်ပြန်ပါတယ်။

အဆိုပါအရေအတွက်များထဲမှ (၁၄) ဦးမှာ စစ်အုပ်စု၏ လေကြောင်းဖြင့် တိုက်ခိုက်မှုကြောင့် အများဆုံးသေဆုံးခဲ့ရတယ်လို့ ဖော်ပြထားပါတယ်။

ဩဂုတ်လ ၂၅ ရက်နေ့တွင် ရခိုင်ပြည်နယ်၊ မြောက်ဦးမြို့နယ်၊ ဒိုင်းကျီရပ်ကွက်ကို အကြမ်းဖက်စစ်အုပ်စုက လေကြောင်းမှ ဂျက်ဖိုက်တာဖြင့် ဗုံးကြဲတိုက်ခိုက်ခဲ့သောကြောင့် ကျေးရွာအတွင်းသို့ ကျရောက်ပေါက်ကွဲခဲ့သဖြင့် အလှူပြုလုပ်ရန်အတွက် ပြင်ဆင်နေသော မိသားစုဝင်များအပါအဝင် ဒေသခံပြည်သူ (၁၂)ဦးကို ဗုံးစထိမှန်၍ နေရာတွင် သေဆုံးခဲ့ရပါတယ်။

အခုတင်ပြခဲ့တဲ့သတင်းတွေကို Radio NUG သတင်းထောက် ခါးရှဲလ်နဲ့ ပဒဲဖိုးတို့က ပေးပို့ထားတာ ဖြစ်ပါတယ်။

========================

========================

🚩🚩 ၁။ မဟာမိတ်များနဲ့ လက်တွဲပြီး စစ်ရေး အရှိန်မြှင့်မယ်လို့ PDF အထူးတိုင်း စစ်ဌာန အသိပေး

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေး တပ်မတော် (PDF)၊ အထူးတိုင်း စစ်ဌာနက မဟာမိတ် EROs တပ်ဖွဲ့များ၊ LPDF တပ်ဖွဲ့များ နဲ့ လက်တွဲပြီး စစ်ရေး အရှိန်အဟုန် မြှင့်သွားမယ်လို့ ထုတ်ပြန်ထားပါတယ်။

အထူးတိုင်းစစ်ဌာနဟာ အမှတ် (၁) စစ်ဆင်ရေးနယ်မြေ အတွင်းရှိ တပ်ရင်းများ၊ ဗျူဟာများကို စနစ်တကျ စုဖွဲ့မှု ပြုလုပ်ပြီး PDF စစ်ရုံးချုပ်ရဲ့ တိုက်ရိုက်ကွပ်ကဲမှုဖြင့် အမှတ် (၁) စစ်ဒေသ စစ်ဆင်ရေးကွပ်ကဲမှု အောက်မှာရှိတဲ့ တိုင်းစစ်ဌာန ဖြစ်တယ်လို့ သိရပါတယ်။

“ကရင်ပြည်နယ်၊ မွန်ပြည်နယ် အတွင်းမှာရှိတဲ့ MOD ကွပ်ကဲမှု အောက်က တပ်ရင်း၊ ဗျူဟာတွေ နဲ့ စုဖွဲ့ထားတဲ့ တိုင်းစစ်ဌာနတစ်ခု ဖြစ်ပါတယ်။ တိုင်းရင်းသား တော်လှန်ရေး အင်အားစု နယ်မြေတွေ လွတ်မြောက်ရေးမှသည် ပဲခူး၊ ရန်ကုန် စစ်ဆင်ရေးတွေအတွက် အဓိက စုဖွဲ့ထားတာ၊ လက်ရှိ ကရင်ပြည်နယ်၊ မွန်ပြည်နယ်နဲ့ ပဲခူးဘက်မှာ စစ်ရေးလှုပ်ရှားမှုတွေ ရှိနေပါတယ်။” လို့ ဆိုပါတယ်။

အထူးတိုင်းစစ်ဌာန အနေဖြင့် ကွပ်ကဲမှုအောက်က နည်းဗျူဟာများ၊ တပ်ရင်းများ၊ (ပ.က.ဖ) များ၊ ဒရုန်းလက်ရုံး တပ်ဖွဲ့များကို ဦးစီးကွပ်ကဲပြီး မဟာမိတ် EROs များ၊ LPDF များနဲ့အတူ စစ်ဆင်ရေးများ အရှိန်မြှင့် ဖော်ဆောင် သွားမယ်လို့ ဖော်ပြထားပါတယ်။

အထူးတိုင်း စစ်ဌာန Facebook Page ကို ဩဂုတ်လ ၂၇ ရက်က စတင်မိတ်ဆက်ခဲ့ပြီး ထုတ်ပြန်ချက်များ၊ စစ်ရေးဆောင်ရွက်ချက်များနဲ့ တပ်ပိုင်းဆိုင်ရာ ကိစ္စရပ်များကို အချိန်နဲ့ တပြေးညီ တရားဝင် ထုတ်ပြန်သွားမယ်လို့ အသိပေးထားပါတယ်။

========================

🚩🚩 ၂။ ဝက်လက်မြို့နယ်မှာ စစ်တပ်က လေကြောင်းတိုက်ခိုက်မှု ၄ ကြိမ် ပြုလုပ်ခဲ့၊ အရပ်သား ပြည်သူ ၄ ဦး သေဆုံး

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်၊ အရှေ့တောင် ဘက်ခြမ်းက ရုံပင်ကုန်းရွာကို စစ်ကော်မရှင် တပ်က လေကြောင်းတိုက်ခိုက်မှု ၄ ကြိမ် ပြုလုပ်ခဲ့တယ်လို့ Wetlet Information Network က ထုတ်ပြန်ထားပါတယ်။

ဩဂုတ်လ ၂၇ ရက်နေ့ မနက် ၅ နာရီ ၁၆ မိနစ်၊ ၁၇ မိနစ်၊ ၁၈ မိနစ် နဲ့ ၁၉ မိနစ်တို့မှာ စစ်ကော်မရှင်ရဲ့ တံတားဦး လေတပ်တက် Jet Fighter တစ်စီးဖြင့် လေကြောင်းတိုက်ခိုက်မှု ၄ ကြိမ်တိုင် ပြုလုပ်ခဲ့တယ်လို့ ဆိုပါတယ်။

လေကြောင်းတိုက်ခိုက်မှုအတွင်း အသက် ၄၀ ဝန်းကျင် အမျိုးသား ၃ ဦးနဲ့ အသက် ၅၀ အရွယ် အမျိုးသမီး ၁ ဦး သေဆုံးခဲ့ကာ အရပ်သားပြည်သူ ၆ ဦးခန့် ထိခိုက်ဒဏ်ရာ ရခဲ့တယ်လို့ သိရပါတယ်။

လေကြောင်းတိုက်ခိုက်မှု ပြီးနောက် မတ္တရာ မြို့ပေါ်က စစ်ကော်မရှင် တပ်ဖွဲ့က ဟောင်ဝှစ်ဇာ လက်နက်ကြီးများ ဖြင့် အဆက်မပြတ် ရမ်းသမ်းပစ်ခတ် ခဲ့သေးတယ်လို့ ဖော်ပြထားပါတယ်။

========================

🚩🚩 ၃။ ဖားကန့်တွင် အကြမ်းဖက်စစ်တပ် လက်နက်ကြီးပစ်ခတ်မှုကြောင့် အရပ်သား ၄ ဦး ဒဏ်ရာရရှိ

ဩဂုတ်လ (၂၆) ရက်နေ့၊ ည ၁၂ နာရီခွဲခန့်တွင် ကချင်ပြည်နယ်၊ ဖားကန့်မြို့နယ်ရှိ ဖားကန့်ဗျူဟာကုန်းမှ ၁၂၀ မမ လက်နက်ကြီးကျည်များ ပစ်ခတ်ခဲ့ရာ ဆွတ်အိန်ယာန်ကျေးရွာသို့ ကျရောက်ပေါက်ကွဲခဲ့ပြီး အရပ်သား ၄ ဦး ပြင်းထန်ဒဏ်ရာရရှိခဲ့ကြောင်း ဒေသသတင်းများအရ သိရပါတယ်။

ဒဏ်ရာရရှိသူများမှာ ဒေါ်ခေါင်နော (ညာဘက်ပုခုံးတွင် ကျည်စထိမှန်)၊ မငယ် (မျက်စိတစ်ဖက်ထိမှန်)၊ ဒေါ်သီတာဝင်း (ခြေထောက်နှစ်ဖက်နှင့် လက်တစ်ဖက်တွင် အရိုးကြေဒဏ်ရာ)၊ ဦးတာကော (ခါး၊ ဝမ်းဗိုက်တွင် ကျည်စထိမှန်ပြီး သတိလစ်နေ) တို့ ဖြစ်တယ်လို့ သိရပါတယ်။

အဆိုပါ ၄ ဦးထဲမှ ဦးတာကောမှာ အခြေအနေ စိုးရိမ်ရပြီး ဒေါ်သီတာဝင်းအတွက် ခြေလက်ဖြတ်တောက်ရန် လိုအပ်နိုင်ကာ သွေးအလှူရှင် ရှာဖွေနေတယ်လို့ သိရပါတယ်။

========================

🚩🚩 ၄။ ရေဖြူမြို့နယ်မှာ စစ်ကောင်စီ စစ်ကြောင်းကို ကြားဖြတ်တိုက်ခိုက်ခဲ့ရာ ၁၀ ဦး ထက်မနည်း သေဆုံး

တနင်္သာရီတိုင်း၊ ရေဖြူမြို့နယ်၊ ၅၉ တိုင် နေရာမှာ စစ်ကော်မရှင် စစ်ကြောင်းကို ကြားဖြတ်တိုက်ခိုက်ခဲ့ရာ ၁၀ ဦး ထက်မနည်း သေဆုံးခဲ့တယ်လို့ ရာမည မွန်တပ်တော် (RMA) က ထုတ်ပြန်ထားပါတယ်။

ဩဂုတ်လ ၂၇ ရက်နေ့ ညနေ ၂ နာရီခွဲခန့်မှာ ထပ်တိုးအင်အား ၁၀၀ ခန့်ဖြင့် စစ်ကြောင်းထိုးလာတဲ့ စစ်ကော်မရှင်တပ်ဖွဲ့ကို ကြားဖြတ်ဝင်ရောက် တိုက်ခိုက်ခဲ့ရာ ၁ နာရီခန့် ထိတွေ့တိုက်ပွဲ ဖြစ်ပွားခဲ့တယ်လို့ ဆိုပါတယ်။

တိုက်ပွဲအတွင်း စစ်ကော်မရှင် တပ်ဘက်မှ ၁၀ ဦး ထပ်မနည်း ထိခိုက်သေဆုံးခဲ့တယ်လို့ ကနဦး သတင်းရရှိပြီး တော်လှန်ရေး မဟာမိတ် ပူးပေါင်းတပ်ဖွဲ့အားလုံး အထိခိုက်မရှိ ဆုတ်ခွာနိုင်ခဲ့တယ်လို့ ဖော်ပြထားပါတယ်။

အဆိုပါ တိုက်ခိုက်မှုကို ရာမည မွန်တပ်တော် (RMA) ရဲ့ ရေဖြူမြို့နယ်ရှိ တပ်ဖွဲ့ဝင်များနဲ့ မဟာမိတ် ပူးပေါင်းအဖွဲ့ တို့က ဆောင်ရွက်ခဲ့တာလို့ သိရှိရပါတယ်။

========================

🚩🚩 ၅။ ဘုတလင်မှာ စစ်ကော်မရှင် စစ်ကြောင်းနဲ့ တိုက်ပွဲဖြစ်ပွားခဲ့ပြီး စစ်သား ၇ ဦး သေဆုံး

စစ်ကိုင်းတိုင်း၊ မုံရွာခရိုင်၊ ဘုတလင်မြို့မှ ထွက်လာတဲ့ စစ်ကော်မရှင် စစ်ကြောင်း နဲ့ ထိတွေ့တိုက်ပွဲ ဖြစ်ပွားခဲ့ပြီး စစ်သား ၇ ဦး သေဆုံးခဲ့တယ်လို့ ဘုတလင်နယ် တပ်ပေါင်းစု စစ်ကြောင်းက သတင်းထုတ်ပြန်ထားပါတယ်။

ဩဂုတ်လ ၂၆ ရက်နေ့ ညနေ ၇ နာရီခန့်က ဘုတလင်နယ် ပဲပြစ်တော (အရှေ့)ရွာမှာ ထိတွေ့တိုက်ပွဲ ဖြစ်ပွားခဲ့တာ ဖြစ်ပြီး စစ်ကော်မရှင် တပ်သား ၇ ဦး သေဆုံးခဲ့ကာ အများအပြား ဒဏ်ရာရခဲ့တယ်လို့ ဆိုပါတယ်။

ထို့အပြင် MA-1 တစ်လက်၊ MA-11 တစ်လက်၊ လက်နက်ငယ် ၂ လက်နဲ့ ဆက်စပ်ခဲယမ်း ပစ္စည်းများ သိမ်းဆည်း ရရှိခဲ့ကာ စစ်ကော်မရှင်စစ်ကြောင်း နောက်သို့ ပြန်ခေါက်သွားခဲ့ရတယ်လို့ သိရပါတယ်။

အဆိုပါ တိုက်ခိုက်မှုကို ဘုတလင်မြို့နယ် တပ်ပေါင်းစု စစ်ကြောင်း‌၊ မုံရွာခရိုင် တပ်ရင်း - ၂၀ (BOB တပ်ရင်း) ၊ ပုလဲမြို့နယ် အခြေစိုက် ဗိုလ်မျက်လုံး တပ်ဖွဲ့၊ ဗမာ့တပ်တော် စစ်ဒေသ (၂) အမှတ် (၅၀၅) တပ်ရင်း၊ အမှတ် (၁) ရွှေဘိုခရိုင်စစ်ဌာန ကွပ်ကဲမှုအောက်ရှိ ရွှေဘိုခရိုင် တပ်ရင်း (၉)၊ တပ်ရင်း (၁၂)၊ ဗျူဟာ (၅၃) ဒီပဲယင်းအခြေစိုက် ဂဠုန်တပ်တော်၊ Depeyin Locan Mobile Team ၊ အနောက်မြောက်လွင်ပြင် - Galaxy Force ၊ ဖီးနစ်တပ်ခွဲ၊ ရေဦးမြို့နယ် ပကဖ နဲ့ ကနောင်တပ်ဖွဲ့ တို့က ပူးပေါင်းတိုက်ခိုက်ခဲ့တာ ဖြစ်ပါတယ်။

========================

🚩🚩 ၆။ ကမ္မမြို့နယ်တွင် မူးယစ်ဆေးသုံးစွဲသူများကို ဝင်ရောက်ဖမ်းဆီးခဲ့ရာ အရပ်သား ( ၃ )ဦးနှင့် အဖွဲ့အစည်းမှ ( ၃ )ဦး ဖမ်းမိ

မကွေးတိုင်းဒေသကြီး၊ ကမ္မမြို့နယ်တစ်နေရာတွင် မူးယစ်ဆေးသုံးစွဲသူများကို ဩဂုတ်လ ၂၂ရက်၊ ည ၁၀နာရီ အချိန်တွင် ဝင်ရောက်ဖမ်းဆီးခဲ့ရာ အရပ်သား ( ၃ )ဦးနှင့် အဖွဲ့အစည်းမှ ( ၃ )ဦးကို ဖမ်းမိခဲ့ကြောင်း Red Giant မှ သတင်းထုတ်ပြန်ပါတယ်။

၎င်းတို့နှင့်အတု မူးယစ်ဆေးဝါးများနှင့် လက်နက်ခဲယမ်း အချို့ပါ သိမ်းဆည်းရရှိခဲ့တယ်လို့ ဖော်ပြထားပါတယ်။

အဆိုပါ မူးယစ်ဆေးဝါး ဝင်ရောက်ဖမ်းဆီးခဲ့မှုတွင် RED GIANT၊ ABSDF အမှတ်( ၃ )စစ်ကြောင်း၊ YGF လူငယ်ပြောက်ကြားတပ်ဖွဲ့၊ ကိုထွန်းတောက်အဖွဲ့များမှ ပူးပေါင်းဖမ်းဆီးခဲ့တယ်လို့ သိရပါတယ်။

========================

🚩🚩 ၇။ ပခုက္ကူ တပ်မ ၁၀၁ တပ်ရင်းမှ ပေါ်တာဆွဲဖမ်းဆီးခံရသည့် စစ်မှုထမ်းတပ်သားသစ် တစ်ဦး အလင်းဝင်

ဩဂုတ်လ ၂၁ ရက်တွင် ပခုက္ကူ အခြေစိုက် တပ်မ ၁၀၁ တပ်ရင်းမှ စစ်မှုထမ်းတပ်သားသစ် တစ်ဦးသည် သေနတ်မပါဘဲ 8+ အညာမြေစစ်ဆင်ရေးအဖွဲ့ထံ ဆက်သွယ်ကာ အလင်းဝင်ရောက်ခဲ့ကြောင်း သတင်းထုတ်ပြန်ထားပါတယ်။

စစ်မှုထမ်းအပတ်စဉ် ၁၁မှ ၎င်းသည် နိုင်ငံခြားမှ ပြန်လာပြီး ခရီးသည်ကားဖြင့် ၎င်းနေထိုင်ရာမြို့သို့ ပြန်လာစဉ် ရန်ကုန်-မုံရွာလမ်းပိုင်းတွင် စစ်ကောင်စီတပ်က ဖမ်းဆီးခဲ့တယ်လို့ သိရပါတယ်။

စစ်ကောင်စီတပ်မှ အလင်းဝင်ရောက်လိုသည့် တပ်သားများနှင့် စစ်မှုထမ်းတပ်သားသစ်များကိုကြိုဆိုထောက်ပံ့မှာ ဖြစ်တယ်လို့ ဖော်ပြထားပါတယ်။

အခုတင်ပြခဲ့တဲ့သတင်းတွေကို Radio NUG သတင်းထောက် ခါးရှဲလ်နဲ့ ပဒဲဖိုးတို့က ပေးပို့ထားတာ ဖြစ်ပါတယ်။

#RadioNUGLocalNews

#SpringRevolution