၂၀၂၅ သြဂုတ်လ ၂၅ ရက်နေ့ ညပိုင်း နောက်ဆုံးရပြည်တွင်းသတင်းများ
📌 ၁။ ဒိုက်ဦးအကျဉ်းထောင်က နိုင်ငံရေးအကျဉ်းသူ ၈ ဦး မတရားတိုက်ပိတ်ခံထားရတယ်လို့ PPNM ပြော
📌 ၂။ ကျောက်မဲမြို့မှာ တအာင်းမြို့နယ်ရဲတပ်ဖွဲ့က မူးယစ်ဆေးဝါးရောင်း ဝယ်သူတဦး ဖမ်းဆီးရမိ
📌 ၃။ လောင်းလုံးမြို့နယ်မှာ စစ်တပ်နဲ့ ပတ်သတ်နေသူဆီက WY စာတန်းပါ စိတ်ကြွဆေးပြားတွေဖမ်းဆီးရမိ
========================
၂၀၂၅ ခုနှစ် သြဂုတ်လ ၂၅ ရက် ညပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ
🚩 ၁။ ကျောက်မဲမြို့နယ်က ဝါဆိုကျောင်းကို စစ်တပ်က လေယာဉ်နဲ့ ဗုံးကြဲတာကြောင့် ကိုရင် ၃ ပါး ဒဏ်ရာရ
🚩 ၂။ မြစ်ကြီးနားမြို့မှာ စစ်တပ်က ပစ်လိုက်တဲ့လက်နက်ကြီးကျည်ကျရောက်ပေါက်ကွဲတာကြောင့် အသက် ၁၃ နှစ်အရွယ် ၅ တန်းကျောင်းသူ သေဆုံးပြီး ၂ ဦးဒဏ်ရာရ
🚩 ၃။ တယ်လီဂရမ်ကနေ စိန်ခေါ်ထားတဲ့ စစ်သားတဦးကို ယူနီကွန်းပြောက်ကျားတပ်ဖွဲ့ဖမ်းမိ
🚩 ၄။ ထားဝယ်မြို့နယ် သင်္ကန်းတုန်းကျေးရွာတိုက်ပွဲမှာ စစ်သား ၂၀ ထက်မနည်းသေဆုံးပြီး လက်နက်တင်စစ်ကားတစီးကို မီးရှို့ရှင်းလင်း
🚩 ၅။ ကန့်ဘလူမြို့နယ်မှာ အကြမ်းဖက်စစ်အုပ်စုက ဒေသနေပြည်သူ ၉ ဦးကို ဖမ်းဆီးသတ်ဖြတ်ပြီး ရွာတွေကို မီးရှို့ဖျက်ဆီးတာ ကြောင့် အိမ်ခြေ ၄၃ဝ ကျော် ပျက်စီး
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ ဒိုက်ဦးအကျဉ်းထောင်က နိုင်ငံရေးအကျဉ်းသူ ၈ ဦး မတရားတိုက်ပိတ်ခံထားရတယ်လို့ PPNM ပြော
သြဂုတ်လ (၂၅)ရက်
ပဲခူးတိုင်း ဒိုက်ဦးအကျဉ်းထောင်မှာ နိုင်ငံရေးအကျဉ်းသူ ၈ ဦးကို ထောင်အာဏာပိုင်တွေက အကြောင်းပြ ချက် ခိုင်ခိုင်လုံလုံမရှိဘဲ တိုက်ပိတ်ပြစ်ဒဏ်ပေးထားတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသား များ ကွန်ရက် - PPNM က ဒီနေ့ ဩဂုတ် ၂၅ မှာ ထုတ်ပြန်လာပါတယ်။
အကျဉ်းဦးစီးဝန်ထမ်းတွေ ဇူလိုင်လ ၂၃ ရက်နေ့က အမျိုးသမီးတွေကိုထားတဲ့ မေခဆောင် အခန်း - ၁ ကို တရားမဝင်ပစ္စည်းများရှိမရှိ ရှာဖွေရာမှာ နိုင်ငံရေးအကျဉ်းသူ မနိုဗာနီနီထွေးရဲ့ နေရာအနီးမှာ ဖုန်းဘတ္ထရီ တခု တွေ့တယ်ဆိုပြီး တိုက်ပိတ်ပြစ်ဒဏ်ပေးဖို့ မနိုဗာနီနီထွေးကို အကျဉ်းဦးစီးဝန်ထမ်းတွေ လာရောက် ခေါ်ဆောင်သွားတယ်လို့ ဆိုပါတယ်။
သိမ်းဆည်းရရှိတယ်ဆိုတဲ့ပစ္စည်းကို တရားဝင်ပြသခြင်းမရှိတဲ့အပြင် မနိုဗာနီနီအေးရဲ့ လက်ဝယ်မှာမရှိဘဲ ရည်ရွယ်ချက်ရှိရှိ စွပ်စွဲပြီး အပြစ်ပေးတဲ့ပုံစံဖြစ်နေတဲ့အတွက် ပြစ်ဒဏ်မခံနိုင်ဘူးလို့ မနိုဗာနီနီထွေးက ထောင်တာဝန်ရှိသူတွေကို တင်ပြခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
အကျဉ်းဦးစီးကဝန်ထမ်းတွေဟာ အင်အားသုံးပြီး မနိုဗာနီနီအေးကို တိုက်ပိတ်မယ့်နေရာ ခေါ်ဆောင်ခဲ့ရာမှာ ဦးစီးမှူးဖြစ်တဲ့ ဒေါ်ဇင်မာကြည်အောင်၊ တပွင့်တင်ထားတဲ့ ဒေါ်သဇင်မြင့်နဲ့ တပ်သား ဖြိုးထက်ထက်အောင် တို့က ဆံပင်ဆွဲပြီး ခေါ်ဆောင်ခြင်း၊ ခန္ဓာကိုယ်အနောက်ခြမ်းအား ရိုက်နှက်ခြင်းများကို ကျူးလွန်ခဲ့ကြတယ် လို့လည်း ထုတ်ပြန်ချက်က ဆိုထားပါတယ်။
ဒါဟာ မတရားတဲ့လုပ်ရပ်ဖြစ်တဲ့အတွက် မနိုဗာနီနီအေးကို တိုက်ပိတ်ပြစ်ဒဏ်မပေးဖို့နဲ့ ဖိနှိပ်မှုမလုပ်ဖို့ ဒိုက်ဦး အကျဉ်းထောင်မှာရှိတဲ့ နိုင်ငံရေးအကျဉ်းသူတွေ ဝိုင်းဝန်းတောင်းဆိုခဲ့ကြတယ်လို့ သိရပါတယ်။
ထောင်အာဏာပိုင်တွေက မနိုဗာနီနီအေးကို တိုက်ပိတ်ခဲ့တဲ့အပြင် ထောင်ဆူပူအောင်လုပ်တယ်ဆိုတဲ့ အကြောင်းပြချက်နဲ့ ဝိုင်းဝန်းတောင်းဆိုခဲ့ကြသူတွေထဲက နိုင်ငံရေးအကျဉ်းသူတွေဖြစ်တဲ့ ဒေါ်နုနုအောင်၊ မညိုညိုဝင်း၊ ခင်ရတနာဝင်း၊ မမြသန္တာအောင်၊ မအေးအေးဝင်း၊ မချယ်ရီထွေးနဲ့ မစုနန္ဒာလှိုင်တို့ကို အမျိုးသားထောင်ဝန်ထမ်းတွေ လာရောက်ခေါ်ဆောင်ခဲ့ပြီး တိုက်ပိတ်ခဲ့ကြတယ်လို့PPNM က အသိပေး ပါတယ်။
ထောင်အာဏာပိုင်တွေဟာ အမျိုးသမီးအဆောင်တိုက်မှာ လူပြည့်နေတယ်ဆိုပြီး အမျိုးသားအဆောင် ၄ နဲ့ စားဖိုဆောင်ကြားက နဂိုမူလ အမျိုးသားများထားရာတိုက်မှာ နိုင်ငံရေးအကျဉ်းသူတွေကို တိုက်ပိတ်ထား တယ်လို့ စုံစမ်းသိရှိထားတယ်လို့လည်း PPNM ကပြောပါတယ်။
ဒီတိုက်ထဲမှာ တိုက်ပိတ်ခံထားရတဲ့ နိုင်ငံရေး အကျဥ်းသူ ၂၇ ဦးဝန်းကျင် ရှိနေပြီး အောက်ခံအခင်းမရှိဘဲ သမံတလင်းမှာ နေရသလို တိုက်ခန်းတွေဟာ ဟောင်းနွမ်းနေတဲ့ မိုးယိုတာ၊မိုးပက်တဲ့ဒဏ် ခံနေရသလို အခန်းအတွင်း မိလ္လာရေတွေစီးနေတဲ့အတွက် ဆိုးရွားတဲ့ အနံ့အသက်တွေကိုပါ ခံစားနေကြရတယ်လို့ သိရပါတယ်။
ဒီအခြေအနေတွေကြောင့် နိုင်ငံရေးအကျဉ်းသူတွေ ကျန်းမာရေးအားနည်းတာ နေမကောင်းတာတွေ ဖြစ်နေပေမယ့် ထောင်ဆရာဝန်တွေက အချိန်နဲ့တပြေးညီ လာရောက်ကြည့်ရှုပေးတာမရှိဘူးလို့ PPNM က ပြောပါတယ်။
ဒါ့အပြင် နိုင်ငံရေးအကျဥ်းသူတွေဟာ အမျိုးသားအဆောင်ကနေ မြင်ရတဲ့ တိုက်အပြင်ဘက်ထွက်ပြီး ရေချိုးရတဲ့အတွက် ရေချိုးရသည့်အခါတိုင်း စိတ်မလုံခြုံမှုတွေပါ ခံစားနေကြရတယ်လို့ သိရပါတယ်။
========================
📌📌 ၂။ ကျောက်မဲမြို့မှာ တအာင်းမြို့နယ်ရဲတပ်ဖွဲ့က မူးယစ်ဆေးဝါးရောင်း ဝယ်သူတဦး ဖမ်းဆီးရမိ
သြဂုတ်လ (၂၅)ရက်
ရှမ်းမြောက်ဒေသ တအာင်းတပ်မဟာ ၂ နယ်မြေဖြစ်တဲ့ ကျောက်မဲမြို့မှာ တအာင်းမြို့နယ်ရဲတပ်ဖွဲ့က မူးယစ်ဆေးဝါးရောင်း ဝယ်သူတဦးကို ဖမ်းဆီးရမိခဲ့တယ်လို့ PSLF/TNLA ဘက်က ဒီနေ့ ဩဂုတ် ၂၅ မှာ ထုတ်ပြန်လာပါတယ်။
ကျောက်မဲမြို့မှာရှိတဲ့ စစ်ဆေးရေးဂိတ်တခုမှာ တအာင်းမြို့နယ်ရဲတပ်ဖွဲ့က ရှောင်တခင်စစ်ဆေးမှုတွေလုပ်နေရာက သြဂုတ် ၂၃ ရက်နေ့မှာ မူးယစ်ဆေးဝါးရောင်းဝယ်သူ အမျိုးသားတဦးကို ဖမ်းဆီးရမိခဲ့တာလို့ ဆိုပါတယ်။
တအာင်းမြို့နယ်ရဲတပ်ဖွဲ့က ရှောင်တခင်စစ်ဆေးမှုတွေလုပ်နေချိန်မှာ အသက် ၅၄ နှစ်အရွယ် ဦးကျော်လှဆိုသူဆီကနေ WY စာတန်းပါ စိတ်ကြွမူးယစ်ဆေးပြား တသောင်း၊ ဘိန်းဖြူထည့်ထားတဲ့ ဆပ်ပြာခွက် ၆ ခွက် KENBO ဆိုင်ကယ်တစီး ဖမ်းဆီး ရမိခဲ့တာလို့ အသိပေးပါတယ်။
မူးယစ်ဆေးဝါးရောင်းဝယ်သူကို ပလောင်ပြည်နယ်လွတ်မြောက်ရေးတပ်ဦး PSLF/TNLA တပ်ဖွဲ့က မူးယစ်ဆေးဝါး တိုက်ဖျက်ရေး ဥပဒေနဲ့ အရေးယူဆောင်ရွက်သွားမယ်လို့ သိရပါတယ်။
ပြီးခဲ့တဲ့ သြဂုတ်လ ၂၀ ရက်နေ့ကလည်း နမ္မတူနဲ့မန်တုံမြို့နယ် စစ်ဆေးရေးဂိတ်တို့မှာ တအာင်းမြို့နယ်ရဲတပ်ဖွဲ့က ရှောင် တခင်စစ်ဆေးရာက မူးယစ်ဆေးဝါးရောင်းဝယ်သူအမျိုးသမီး တဦး၊ သုံးစွဲသူအမျိုးသား ၅ ဦးနဲ့အတူ မူးယစ်ဆေးပြား ၆၀ ပြား၊ ဘိန်းဖြူထည့်ထားတဲ့ ဆေးဗူးအသေး ၇ ဗူးတို့နဲ့အတူ ဖမ်းဆီးရမိခဲ့တယ်လို့ PSLF/TNLA သတင်းနှင့်ပြန်ကြားရေးဌာန မှတ်တမ်းတွေအရ သိရပါတယ်။
========================
📌📌 ၃။ လောင်းလုံးမြို့နယ်မှာ စစ်တပ်နဲ့ ပတ်သတ်နေသူဆီက WY စာတန်းပါ စိတ်ကြွဆေးပြားတွေဖမ်းဆီးရမိ
သြဂုတ်လ (၂၅)ရက်
တနင်္သာရီတိုင်း လောင်းလုံးမြို့နယ်မှာ စစ်တပ်နဲ့ ပတ်သတ်ဆက်နွယ်နေသူဆီကနေ WY စာတန်းပါ စိတ်ကြွမူးယစ်ဆေးပြား တွေ ဖမ်းဆီးရမိထားတယ်လို့ မြို့နယ် ပြည်သူ့အုပ်ချုပ်ရေးအဖွဲ့က ပြောပါတယ်။
လောင်းလုံးမြို့နယ် လမ်းပိုင်းတနေရာမှာ စစ်တပ်နဲ့ ပတ်သက်ဆက်နွယ်နေတဲ့သူကို မသင်္ကာလို့ လောင်းလုံး ပကဖ ဇုံ ၁ က ဩဂုတ်လ ၂၀ ရက်နေ့မှာ ရှောင်တခင် စစ်ဆေးရာကနေ ဖမ်းဆီးနိုင်ခဲ့တာလို့ ဆိုပါတယ်။
အဲဒီအမျိုးသား ယူဆောင်လာတဲ့ အိတ်ထဲကနေ wy စာတန်းပါ စိတ်ကြွမူးယစ်ဆေးပြား ၅၇၃ ပြား တွေ့ရှိခဲ့တာကြောင့် အဲဒီအမျိုးသားကို သက်သေခံပစ္စည်းတွေနဲ့အတူ လောင်းလုံးမြို့နယ် ပြည်သူ့လုံခြုံရေးတပ်ဖွဲ့ - ပလဖ ထံ လွှဲပြောင်းအပ်နှံ လာတယ်လို့ အသိပေးပါတယ်။
လက်ရှိမှာ ဖမ်းဆီးရမိသူကို ဥပဒေနဲ့အညီ ဆက်လက်အရေးယူနိုင်ဖို့ ပထမသတင်းပေးတိုင်ချက်အမှတ် မယ (ပ) ၃/၂၀၂၅ မူးယစ်ဆေးဝါးနဲ့စိတ်ကိုပြောင်းလဲစေနိုင်သော ဥပဒေ ပုဒ်မ ၁၉ က နဲ့ အမှုဖွင့်ဖမ်းဆီးထားတယ်လို့ ပြည်သူ့လုံခြုံရေးတပ်ဖွဲ့ က ထုတ်ပြန်ထားပါတယ်။
အခုတင်ပြခဲ့တဲ့ သတင်းကိုတော့ Radio NUGသတင်းထောက် ကိုခန့်မှ ပေးပို့ထားတာဖြစ်ပါတယ်။
========================
========================
🚩🚩 ၁။ ကျောက်မဲမြို့နယ်က ဝါဆိုကျောင်းကို စစ်တပ်က လေယာဉ်နဲ့ ဗုံးကြဲတာကြောင့် ကိုရင် ၃ ပါး ဒဏ်ရာရ
သြဂုတ်လ (၂၅)ရက်
ရှမ်းပြည်နယ်မြောက်ပိုင်းမှာရှိပြီး တအာင်းတပ်မတော် TNLA သိမ်းပိုက်ထိန်းချုပ်ထားတဲ့ ကျောက်မဲမြို့နယ်အတွင်းက ဝါဆိုကျောင်းကို အကြမ်းဖက်စစ်တပ်က လေယာဉ်နဲ့ ဗုံးကြဲခဲ့တာကြောင့် ကိုရင် ၃ ပါး ဒဏ်ရာရသွားတယ်လို့ ဒေသတွင်း သတင်းရင်းမြစ်တွေက ပြောပါတယ်။
ဒီနေ့ ဩဂုတ်လ ၂၅ ရက် မနက် ၁၁ နာရီကျော်အချိန်မှာ စစ်တပ် တိုက်လေယာဉ်က ကျောက်မဲမြို့နယ်အနီး ပိန္နဲကုန်းရွာက ဝါဆိုကျောင်းကို ဗုံးတိုက်ခိုက်ခဲ့တာလို့ ဆိုပါတယ်။
ကျောက်မဲမြို့အနီး ပိန္နဲကုန်းရွာ ဝါဆိုကျောင်းအနီးကို စစ်တပ်က ဂျက်လေယာဥ်နဲ့ ပေါင် ၂၅၀ ဗုံး ၂ လုံး ကြဲချ တိုက်ခိုက်ခဲ့တာ ဖြစ်ပါတယ်လို့ ဒေသတွင်းသတင်းတွေကို အသိပေးနေတဲ့ ရွှေဖီမြေမှာ ဖော်ပြထားပါတယ်။
ဒေသနေပြည်သူတွေ စစ်ဘေးရှောင်နေချိန်ဖြစ်တာကြောင့် အရပ်သားထိသေဆုံးမှု မရှိပေမယ့် စစ်တပ်ရဲ့ ဗုံးကြဲတိုက်ခိုက်မှုကြောင့် နေအိမ်အလုံး ၂၀ နီးပါးပျက်စီးခဲ့တယ်လို့လည်း ဒေသနေပြည်သူတွေရဲ့အဆိုကို ကိုးကားပြီး ဖော်ပြထားပါတယ်။
ကျောက်မဲမြို့နယ်ထဲက နောင်ပိန်ရွာမှာ အကြမ်းဖက်စစ်တပ်နဲ့ တအာင်းတပ်မတော် TNLA တို့ကြား တိုက်ပွဲတွေ ဆက်လက်ပြင်းထန်နေတာကြောင့် ကျောက်မဲမြို့ကဒေသနေပြည်သူတွေလည်း စစ်ဘေးရှောင်နေရတယ်လို့ သိရပါတယ်။
========================
🚩🚩 ၂။ မြစ်ကြီးနားမြို့မှာ စစ်တပ်က ပစ်လိုက်တဲ့လက်နက်ကြီးကျည်ကျရောက်ပေါက်ကွဲတာကြောင့် အသက် ၁၃ နှစ်အရွယ် ၅ တန်းကျောင်းသူ သေဆုံးပြီး ၂ ဦးဒဏ်ရာရ
သြဂုတ်လ (၂၅)ရက်
ကချင်ပြည်နယ် မြစ်ကြီးနားမြို့မှာ မြောက်ပိုင်းတိုင်းစစ်ဌာနချုပ်က ပစ်ခတ်လိုက်တဲ့ လက်နက်ကြီးကျည်ကျရောက် ပေါက်ကွဲတာကြောင့် အသက် ၁၃ နှစ်အရွယ် ၅ တန်းကျောင်းသူ မယုသဉ္ဇာခိုင် ဗုံးစထိမှန်သေဆုံးပြီး ၂ ဦး ဒဏ်ရာရသွား တယ်လို့ ဒေသတွင်း သတင်းရင်းမြစ်တွေက ပြောပါတယ်။
မနေ့ ဩဂုတ်လ ၂၄ ရက် ညနေ ၆ နာရီခွဲဝန်းကျင်မှာ မြစ်ကြီးနားမြို့ပေါ်မှာရှိတဲ့ မြောက်ပိုင်းတိုင်းစစ်ဌာနချုပ်က ပစ်ခတ် လိုက်တဲ့ လက်နက်ကြီးကျည် ရမ်ပူရပ်ကွက်အတွင်း ကျရောက်ပေါက်ကွဲတာကြောင့် စာကျက်နေတဲ့ ၅ တန်းကျောင်းသူ မယုသဉ္ဇာခိုင် သေဆုံးခဲ့ရပြီး အမျိုးသမီး၂ဦး ဒဏ်ရာရသွားတယ်လို့ ဆိုပါတယ်။
မြစ်ကြီးနားမြို့ ရမ်ပူရပ်ကွက် နယ်မြေ ၁၂ ဦးပိန်တံတားအနီးက ကိုနိုင်စိုးရဲ့ အိမ်ရှေ့မှာ လက်နက်ကြီးကျည် ကျရောက် ပေါက်ကွဲခဲ့တာကြောင့် ကူညီကယ်ဆယ်ရေး လုပ်ပေးခဲ့ရတယ်လို့ မျိုးဆက်သစ် လူမှုကယ်ဆယ်ရေးအသင်းကလည်း အသိပေးပါတယ်။
အဲဒီပေါက်ကွဲမှုကြောင့် အသက် ၁၃ နှစ်အရွယ် ၅ တန်းကျောင်းသူ မယုသဉ္ဇာခိုင် (ခ) ချစ်စုမက လက်နက်ကြီးစထိမှန်ပြီး ဘယ်ဘက်ရင်အုံပွင့်သွားတာကြောင့် ပွဲချင်းပြီး သေးဆုံးကာ အသက် ၂၀ အရွယ် မဇင်မင်းက ပေါင်၊ ခြေသလုံးနဲ့ နားထင်မှာ လက်နက်ကြီးစတွေ ထိမှန်ဒစ်ရာရခဲ့ကာ အသက် ၆၅ နှစ်အရွယ် ဒေါ်ငွေကတော့ လက်မောင်းအောက် မိုင်းစဝင်သွားတာ ကြောင့် ကုတင် ၃ဝဝ ဆေးရုံပို့ထားပြီး ဆေးကုသမှုခံနေရတယ်လို့ သိရပါတယ်။
လက်နက်ကြီးကျရောက်ပေါက်ကွဲမှုကြောင့် အိမ်တွေပျက်စီးသွားသလို ဆိုင်ကယ်နဲ့ အခြားအဖိုးတန်ပစ္စည်းတွေလည်း ပျက်စီးသွားခဲ့တယ်လို့လည်း ဒေသနေပြည်သူတွေက ပြောပါတယ်။
မြစ်ကြီးနားမြို့ပေါ်မှာရှိတဲ့ စစ်တပ်ဟာ မြစ်တဖက်ကမ်းမှာရှိတဲ့ ၀ိုင်းမော်မြို့နယ်ဘက်ကရွာတွေကို လက်နက်ကြီးတွေနဲ့ မကြာခဏ ပစ်ခတ်လေ့ရှိတယ်လို့လည်း ဆိုပါတယ်။
ပြီးခဲ့တဲ့ ဧပြီလတုန်းကလည်း စစ်တပ်ကပစ်ခတ်လိုက်တဲ့လက်နက်ကြီးကျည် မြစ်ကြီးနားမြို့မှာရှိတဲ့ မလိခဝန်ထမ်းအိမ်ရာ အတွင်း ကျရောက်ပေါက်ကွဲခဲ့တာကြောင့် ထိခိုက်သေဆုံးမှုတွေရှိခဲ့တယ်လို့ မှတ်တမ်းတွေအရ သိရပါတယ်။
========================
🚩🚩 ၃။ တယ်လီဂရမ်ကနေ စိန်ခေါ်ထားတဲ့ စစ်သားတဦးကို ယူနီကွန်းပြောက်ကျားတပ်ဖွဲ့ဖမ်းမိ
သြဂုတ်လ (၂၅)ရက်
တယ်လီဂရမ်ကနေ တော်လှန်ရေးရဲဘော်တွေကို စိန်ခေါ်ထားတဲ့ စစ်သားတဦးကို ဖမ်းဆီးရမိထားတယ်လို့ ယူနီကွန်း ပြောက်ကျားတပ်ဖွဲ့က ထုတ်ပြန်ထားပါတယ်။
စစ်ကိုင်းမြို့ မင်းကွန်းရဲစခန်းက စစ်သားနဦးကို အရှင်ဖမ်းမိခဲ့တာနဲ့ပတ်သက်လို့ ယူနီကွန်းအဖွဲ့က မနေ့ ဩဂုတ်လ ၂၄ ရက် ညပိုင်းမှာ ထုတ်ပြန်ထားတာဖြစ်ပါတယ်။
တပ်မ ၃၃ လက်အောက်ခံ ဆက်သွယ်ရေးနှင့်အင်ဂျင်နီယာတပ်က တပ်ကြပ်ရဲနိုင်လင်း ကွမ်းယာထွက်ဝယ်ချိန်မှာ ဖမ်းဆီးရမိခဲ့တာဖြစ်ပြီး လက်နက်မပါဘဲ ဖုန်း ၂ လုံး သိမ်းဆည်းရမိခဲ့တယ်လို့ အသိပေးပါတယ်။
ဖုန်းအတွင်းကနေ ယူနီကွန်းတယ်လီဂရမ် ချန်နယ်ကိုစိန်ခေါ်ထားတဲ့ message တွေ တွေ့ရပြီ သေမင်းတမန်အမည်နဲ့ chat box မှာ စိန်ခေါ်ထားတဲ့စာတွေကို တွေ့ရတယ်လို့လည်း သိရပါတယ်။
လက်ရှိမှာ ဖမ်းဆီးရမိထားတဲ့ စစ်သား ရဲနိုင်လင်းကို ဆက်လက်စစ်ဆေးနေပြီး လိုအပ်သလို အရေးယူဆောင်ရွက်မှုတွေ ဆက်လုပ်သွားမယ်လို့ ယူနီကွန်းပြောက်ကျားတပ်ဖွဲ့က ထုတ်ပြန်ထားပါတယ်။
========================
🚩🚩 ၄။ ထားဝယ်မြို့နယ် သင်္ကန်းတုန်းကျေးရွာတိုက်ပွဲမှာ စစ်သား ၂၀ ထက်မနည်းသေဆုံးပြီး လက်နက်တင်စစ်ကားတစီးကို မီးရှို့ရှင်းလင်း
သြဂုတ်လ (၂၅)ရက်
တနင်္သာရီတိုင်း ထားဝယ်မြို့နယ် သင်္ကန်းတုန်းကျေးရွာတိုက်ပွဲမှာ စစ်တပ်ဘက်က စစ်သား ၂၀ ထက်မနည်း သေဆုံးသွား ပြီး လက်နက်တင် စစ်ကားတစီးကို မီးရှို့ရှင်းလင်းနိုင်ခဲ့တယ်လို့ ဒူရက စစ်ကြောင်းက ထုတ်ပြန်ထားပါတယ်။
ဩဂုတ်လ ၂၁ ရက်နေ့ မနက် ၅ နာရီဝန်းကျင်ကစပြီး သင်္ကန်းတုန်းကျေးရွာမှာအထိုင်ချနေတဲ့ အ ကြမ်းဖက်စစ်သားတွေကို တတိယအကြိမ် တိုက်ခိုက်ခဲ့ရာ အပြန်အလှန်ပစ်ခတ်မှုတွေဖြစ်ပြီး ၁၂ နာရီခန့်ကြာတဲ့ တိုက်ပွဲဖြစ်ခဲ့တယ်လို့ ဆိုပါတယ်။
တိုက်ပွဲအတွင်း စစ်သား ၂၀ ထက်မနည်းသေဆုံးကာ ဒဏ်ရာရသူတွေလည်းများတယ်လို့ အသိပေးပါတယ်။
တိုက်ပွဲပြီးချိန်မှာ အကြမ်းဖက်စစ်သားတွေကိုင်တဲ့ MA-1 အမျိုးအစား သေနတ် ၂ လက်၊ ကျည်ဘောက် ၁၂ ခု၊ အီနာဂါ ဗုံးသီး ၅ လုံး၊ လက်ပစ်ဗုံး ၅ လုံးနဲ့ ဆက်စပ်ပစ္စည်းတွေ သိမ်းဆည်းနိုင်ခဲ့တယ်လို့လည်း ဒူရက စစ်ကြောင်း ထုတ်ပြန် ချက်မှာ ဖော်ပြထားပါတယ်။
ဒီတိုက်ခိုက်မှုကို ဓဝယ်အမျိုးသားလွတ်မြောက်ရေးတပ်တော် - DNLA ရဲ့ ဒူရကစစ်ကြောင်း၊ ထားဝယ်ပြည်သူ့ လွတ်မြောက်ရေးတပ်ဖွဲ့ - TPLF၊ ဧဒင်မှူး၊ က္လားသစ္ဆတ် (ကျားသစ်နက်)၊ ဘီလုံး ပျောက်ကျားတပ်ဖွဲ့၊ ဒေါနတပ်ခွဲ ၇ နဲ့ ထားဝယ် အရှေ့တောတပ်ဖွဲ့ - DEF တို့ ပူးပေါင်း တိုက်ခိုက်ခဲ့တာဖြစ်ပြီး ဓဝယ်တပ်တော် - DNLA က ရဲဘော်တဦး မြင့်မြတ်စွာ ကျဆုံးခဲ့ရကာ ရဲဘော် ၃ ဦး ထိခိုက်ဒဏ်ရာရရှိခဲ့တယ်လို့ သိရပါတယ်။
သင်္ကန်းတုန်းရွာမှာရှိနေတဲ့ စစ်တပ်စစ်ကြောင်းဟာ လက်ရှိမှာ ရှေ့ဆက်မတိုးသေးဘဲ ထောက်လှမ်းရေးသုံး ဒရုန်းနဲ့ အရင် ကင်းထောက်နေတာတွေရှိတယ်လို့လည်း သိရပါတယ်။
လက်ရှိအချိန်ဟာ တနိုင်ငံလုံးအတိုင်းအတာနဲ့ စစ်ရေးအရှိန် တိုးမြင့်လုပ်ဆောင်နေတဲ့အချိန်ဖြစ်တာကြောင့် ပြည်သူလူထု အနေနဲ့ စစ်ရေးအခြေအနေတွေကို အထူးသတိပြု သွားလာနေထိုင်ကြဖို့ တိုက်တွန်းထားသလို အကြမ်းဖက်စစ်တပ်က အချိန်မရွေး လေကြောင်းအသုံးပြု တိုက်ခိုက်မှုတွေ ရှိလာနိုင်တာကြောင့် လေကြောင်းရန် ကာကွယ်ရေးနဲ့ဆိုင်တဲ့ သတင်း အချက်အလက်တွေကို လိုက်နာကျင့်သုံးကြဖို့ ဒူရကစစ်ကြောင်းက နှိုးဆော်ထားပါတယ်။
တော်လှန်ရေးနဲ့ စစ်ရေးအရှိန် မြင့်လာတာနဲ့အမျှ ပြည်သူ့ဘက်၊ အမှန်တရားဘက် ရပ်တည်လိုတဲ့ စစ်သားတွေနဲ့ ရဲတပ်ဖွဲ့ဝင် များအနေနဲ့လည်း ပြည်သူ့ရင်ခွင် ခိုလှုံပြီး အမြန်ဆုံး ပူးပေါင်းပေးကြဖို့ မေတ္တာရပ်ခံထားပါတယ်။
========================
🚩🚩 ၅။ ကန့်ဘလူမြို့နယ်မှာ အကြမ်းဖက်စစ်အုပ်စုက ဒေသနေပြည်သူ ၉ ဦးကို ဖမ်းဆီးသတ်ဖြတ်ပြီး ရွာတွေကို မီးရှို့ဖျက်ဆီးတာ ကြောင့် အိမ်ခြေ ၄၃ဝ ကျော် ပျက်စီး
သြဂုတ်လ (၂၅)ရက်
စစ်ကိုင်းတိုင်း ကန့်ဘလူမြို့နယ်မှာ အခု ဩဂုတ်လအတွင်း အကြမ်းဖက်စစ်အုပ်စုရဲ့ ဖမ်းဆီးသတ်ဖြတ်မှုကြောင့် အရပ်သား ၉ ဦး သေဆုံးခဲ့ပြီး မီးရှို့ဖျက်ဆီးခံရတဲ့အတွက် အိမ်ခြေ ၄၃ဝ ကျော် မီးလောင်ပျက်စီးခဲ့ရတယ်လို့ ဒေသတွင်း တော်လှန်ရေး အင်အားစုတွေက ပြောပါတယ်။
အကြမ်းဖက်စစ်သားနဲ့ ပျူစောထီးတွေပါတဲ့ အကြမ်းဖက်စစ်အုပ်စုက အင်အား ၂ဝဝ ကျော်ဟာ ဩဂုတ်လ ၁၆ ရက်ကနေ ၂ဝ ရက်နေ့အထိ ကန့်ဘလူမြို့နယ်ထဲကို စစ်ကြောင်းထိုးခဲ့ပြီး ရွာမရွာသစ်၊ ထိန်တော၊ အင်္ဂါဒေါင့်၊ သရက်တာ၊ ကိုင်းရိုးနဲ့ ကျေးပင်အက် စတဲ့ ကျေးရွာ ၆ ရွာကို စစ်ကြောင်းထိုးပြီး မီးရှို့ဖျက်ဆီးခဲ့တာလို့ ဆိုပါတယ်။
အကြမ်းဖက်စစ်အုပ်စုရဲ့ မီးရှို့ဖျက်ဆီးမှုကြောင့် ပြည်သူပိုင်အိမ် အလုံး ၄၃ဝ နဲ့ စာသင်ဆောင် ၄ ဆောင် ပျက်စီးဆုံးရှုံးခဲ့ရ ကာ အရပ်သားပြည်သူ ၉ ဦး ရက်ရက်စက်စက် မီးရှု့သတ်ဖြတ်ခံခဲ့ရတယ်လို့ ကျွန်းလှ-ကန့်ဘလူ တက်ကြွလှုပ်ရှားသူများ အဖွဲ့က မမနေ့ ဩဂုတ် ၂၄ ညပိုင်းက ထုတ်ပြန်ထားပါတယ်။
အကြမ်းဖက်စစ်သားတွေနဲ့ ပျူစောထီးတွေပါတဲ့စစ်ကြောင်းဟာ ဩဂုတ်လ ၂၁ ရက်နေ့ကလည်း ကျေးပင်အက်ရွာကနေ ငှက်ပျောတိုင်းရွာသစ် အထိုင်စခန်းကို ဝင်ရောက်လာခဲ့ပြီး ပေကြီးရွာဘက်ထွက်လာပြီး နောက်ရက်မှာ ယမနေ ပျူအထိုင် စခန်းကို ဝင်သွားတယ်လို့ အသိပေးထားပါတယ်။
ဩဂုတ်လ ၂၃ ရက်နေ့မှာတော့ ဘူးကုန်းရွာဘက်ကို စစ်ကြောင်းထိုးဝင်ရောက်လာတဲ့အတွက် တော်လှန်ရေးအဖွဲ့တွေနဲ့ ထိတွေ့မှုဖြစ်ခဲ့ရာမှာ လမ်းမှာတွေတဲ့ ဆီဘောက်စာကား မီးလောင်စေလိုတဲ့ ရည်ရွယ်ချက်နဲ့ သေနတ်နဲ့ပစ်ခဲ့ပေမယ့် ကားကို မထိဘဲ အပြစ်မဲ့ကားသမား ၂ ယောက်ကို ထိမှန်ခဲ့တာကြောင့် သေဆုံးခဲ့ရတယ်လို့ သိရပါတယ်။
မနေ့ သြဂုတ်လ၂၄ ရက်မှာတော့ ကျီကျင်းရွာဘက် စစ်ကြောင်းထိုးဝင်ရောက်လာခဲ့ပြီး ကျီကျင်းရွာကို တနေကုန်နီးပါး မီးရှို့ဖျက်ဆီးကာ ရွာပတ်ပတ်လည်နေရာတွေကို Drone နဲ့ ဗုံးသီးချတိုက်ခိုက်ခဲ့တာကြောင့် အနီးနားမှာရှိတဲ့ ရွာတွေက ဒေသနေပြည်သူတွေ ဘေးလွတ်ရာရှောင်တိမ်းနေရတယ်လို့ ကျွန်းလှ-ကန့်ဘလူ တက်ကြွလှုပ်ရှားသူများ အဖွဲ့က မမနေ့ ထုတ်ပြန်ထားပါတယ်။
အခုတင်ပြခဲ့တဲ့ သတင်းကိုတော့ Radio NUGသတင်းထောက် ကိုခန့် မှ ပေးပို့ထားတာဖြစ်ပါတယ်။
No comments:
Post a Comment