14th MAY 2022 - (Ethnic language program-CHO_DAAI) by Radio NUG

📌(ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ မေလ ၁၄ ရက်နေ့ နောက်ဆုံးရပြည်တွင်းသတင်းများ 

📌📌၁။ စစ်ကောင်စီတပ်၏ ယာဥ်တန်း ထပ်မံတိုက်ခိုက်ခံရ၍ စစ်သား (၅၀) ခန့် သေဆုံးမှုရှိနိုင်ကြောင်း CDF-MINDAT ထုတ်ပြန်

စစ်ကောင်စီတပ်၏ ယာဥ်တန်းနှင့် CDF မင်းတပ်အကြား မင်းတပ်-မတူပီ မိုင်တိုင်အမှတ် (၂၅) ဝန်းကျင်၌ မေလ ၉ရက်  နံနက် ၁၁ နာရီခန့်မှ နေ့လည် ၁ နာရီခန့်အထိ အနီးကပ်တိုက်ပွဲ ဆက်လက်ဖြစ်ပွားခဲ့ပြီး စစ်ကောင်စီတပ်သား ၁၀ ဦးခန့် သေဆုံးကြောင်း၊ တစ်ချိန်တည်းမှာပင် မိုင်းကွင်းထဲသို့ဝင်ရောက်လာကြသော စစ်ကောင်စီတပ်သား ၂ဝ ခန့်ကို မိုင်းဆွဲတိုက်ခိုက်နိုင်ခဲ့ပြီး အများအပြား သေဆုံးဒဏ်ရာရရှိကြောင်း CDF-MINDAT (သတင်းနှင့် ပြန်ကြားရေးဌာန) က မေ ၉တွင်ထုတ်ပြန်သည်။ 

ထို့နောက် မိုင်တိုင်အမှတ် (၂၄) တွင်လည်း ရှေ့ပြေးစစ်ကောင်စီတပ်သား အယောက် ၃၀ ခန့်ကို ထပ်မံမိုင်းခွဲခဲ့ရာ ထိခိုက်သေဆုံးမှုများစွာရှိသည်ဟု CDF-MINDAT ပြောရေးဆိုခွင့်ရှိသူက အတည်ပြုသည်။

ပြီးခဲ့သည့် ဧပြီ ၂၇ တွင် မတူပီမှ စတင်ထွက်ခွာလာသော အကြမ်းဖက် စစ်ကောင်စီယာဥ်တန်းသည် ၁၂ ရက်ခန့်အကြာ၊ မင်းတပ် မတူပီ မိုင်တိုင်အမှတ် (၂၀) ဝန်းကျင်သာရောက်ရှိနေပြီး စစ်ကောင်စီတပ်ဖက်တွင် အထိခိုက်အသေဆုံး အများအပြားရှိသည်။ မေလ (၁၂)ရက်တွင်လည်း မင်းတပ်-မတူပီလမ်း မိုင်တိုင် ၁၄ ဝန်းကျင်တွင် စစ် ကောင်စီ နဲ့ CDF မင်းတပ်တို့ ထပ်မံထိ တွေ့တိုက်ပွဲ ပြင်းထန် နေပြီး စစ်ကောင်စီဘက်က (၁၀)ဦးခန့်သေဆုံးကြောင်း CDF-MINDAT ကသတင်း ထုတ်ပြန်ထားသည်။ မေလ(၉)ရက်နေ့မှ တိုက်ပွဲအတွင်း စစ်ကောင်စီတပ်သား စုစုပေါင်း (၅၀) ခန့် သေဆုံး နိုင်ကြောင်း သိရှိရပါသည်။

📌📌၂။ စစ်ကောင်စီတပ်သား တစ်ဦး CDF-KKG ထံသို့ လက်နက်အပြည့်စုံဖြင့် အလင်းဝင်

မကွေးတိုင်း၊ လောင်းရှည်နယ်မြေရဲစခန်းမှ (ဂန့်ဂေါမြို့တွင် ယာယီတွဲဖက်တာဝန်ထမ်းဆောင်နေသည့်) တပ်သား အောင်ကျော်လင်း (ကိုယ်ပိုင်အမှတ်- လ/ ၂၇၇၄၀၄) သည် အာဏာသိမ်းစစ်ကောင်စီ၏ မတရားမှုများကို ဆန့်ကျင်ပြီး M22 မောင်းပြန်သေနတ်တစ်လက်၊ ကျည်အိမ်အပိုတစ်ခု၊ ကျည် (၉၁) ထောင့်တို့နှင့်အတူ CDF-KKG ထံသို့ အလင်းဝင် ရောက်ခဲ့ကြောင်း မေလ ၈ရက် တွင် CDF-KKGက သတင်းထုတ်ပြန်ထားသည်။ 

လက်နက်အပြည့်စုံ တပါတည်းယူဆောင်လာသော တပ်သား အောင်ကျော်လင်းကို ထိုက်သင့်သည့် ဆုကြေးငွေများ ချီးမြှင့်ပြီး လွတ်မြောက်နယ်မြေသို့ ပို့ဆောင်ပေးခဲ့ကြောင်း အဆိုပါ ထုတ်ပြန်ချက်တွင် ပါရှိသည်။

ယခုအခါ CDF-KKG မှတဆင့် CDM ပြုလုပ်ပြီး အလင်းဝင်ရောက်လာသည့် စစ်သားနှင့် ရဲအရေအတွက် စုစုပေါင်း (၈) ဦးအထိ ရှိပြီး လက်နက်/ ကျည်အပြည့်အစုံဖြင့် အလင်းဝင်ရောက်လာသူများကိုသာ ဆုကြေးငွေနှင့်တကွ လုံခြုံစိတ်ချ ရသော နယ်မြေသို့ ပို့ဆောင်ပေးသွားမည်ဖြစ်ကာ လက်နက်/ ကျည် မပါသူများကို မိမိတို့အနေဖြင့် တာဝန်ယူမည် မဟုတ်ပါကြောင်း ဖော်ပြထားသည်။ 

📌📌၃။ အကြမ်းဖက် ခေါင်းဆောင် မင်းအောင်လှိုင်ရဲ့အိမ်နဲ့ခြံရောင်းချမှု ၅ ရက်အတွင်း အမေရိကန်ဒေါ်လာ ၅ သန်းဖိုး ရောင်းချရ

အကြမ်းဖက် ခေါင်းဆောင် မင်းအောင်လှိုင်ရဲ့အိမ်နဲ့ခြံရောင်းချမှု ၅ ရက်အတွင်း အမေရိကန်ဒေါ်လာ ၅ သန်းဖိုး ရောင်းချရတယ်လို့ မေလ ၁၀ ရက်နေ့ ညပိုင်းမှာ စီမံကိန်း၊ ဘဏ္ဍာရေးနဲ့ ရင်းနှီးမြုပ်နှံမှုဝန်ကြီးဌာန ပြည်ထောင်စုဝန်ကြီး ဦးတင်ထွန်းနိုင်ကဆိုပါတယ်။

၁၄/အင်းလျားမစ်ရှင် ၃ ပုံ ၁ ပုံ ခန့် အောင်မြင်ခဲ့ပါပြီ။ စတင်ရောင်းချပြီး ငါးရက်ပြည့်မြောက်ချိန်မှာ ပြည်တွင်း/ ပြည်ပကနေ  တခဲနက် ဝယ်ယူအားပေးကြတာ အမေရိကန်ဒေါ်လာ ၃ သန်း ပြည့်မီသွားပြီ ဖြစ်ပါတယ်။

ယနေ့အချိန်အထိ စုစုပေါင်းရှယ်ယာဝယ်ယူမှု အကြိမ်ရေငါးထောင်ကျော်ရှိသည့်အနက် ၁၀% ကျော်က နိုင်ငံခြားသား များဝယ်ယူကြတာ ဖြစ်ပါတယ်။ အဲဒီထဲမှာအကြောင်းကြောင်းကြောင့် မြန်မာနိုင်ငံသားအဖြစ်ကို စွန့်လွှတ်ပြီး နိုင်ငံခြား သား ခံယူလိုက်သူတွေ ပါသလို၊ မြန်မာပြည်ဖွား မဟုတ်တဲ့ နိုင်ငံခြားသားတွေလည်းပါဝင်နေပါတယ်လို့ ဝန်ကြီးက ပြောဆိုထားပါတယ်။

 

📌📌၄။ NUG နိုင်ငံခြားရေးဝန်ကြီး ဒေါ်ဇင်မာအောင် ဝါရှင်တန်ဒီစီရောက်နေပြီး အမေရိကန်အစိုးရ အဆင့်မြင့်ကိုယ်စား လှယ် များနဲ့တွေ့ဆုံ

မေလ ၁၂ ရက်နေ့မှာ သတင်းထုတ်ပြန်ချက်များအရ အမျိုးသားညီညွတ်ရေးအစိုးရ နိုင်ငံခြားရေးဝန်ကြီး ဒေါ်ဇင်မာအောင်သည် အစိုးရကိုယ်စားပြုကာ အမေရိကန်နိုင်ငံ ဝါရှင်တန်ဒီစီကိုရောက်ရှိနေပြီး အမေရိကန်အစိုးရ အဆင့်မြင့်ကိုယ်စားလှယ်များနဲ့ ျတွေ့ဆုံခဲ့တယ်လို့သတင်းရရှိတယ်။

ခရီးစဥ်အတွင်းမှာ အမေရိကန်အစိုးရ ခေါင်းဆောင် တွေနဲ့ အာဆီယံနိုင်ငံခေါင်းဆောင်တွေပါ တွေ့ဆုံမယ်လို့ သိရပါတယ်။ လက်ရှိမှာ အမေရိကန်-အာဆီယံ ထိပ်သီးညီလာခံကို မေလ ၁၂ ရက်နဲ့ ၁၃ ရက်မှာ ကျင်း ပမှာဖြစ်ပြီးတော့အ မေရိကန် သမ္မတဂျိုးဘိုင်ဒင် ဦးဆောင်တက်ရောက်မှာဖြစ်ပါတယ်။

 

ပြည်ပသတင်း

📌📌၅။ အမေရိကန်-အာဆီယံ ထိပ်သီးညီလာခံမှာ မြန်မာ့အရေး အလေးပေးဆွေးနွေးဖို့ AI အဖွဲ့တိုက်တွန်း

အမေရိကန်ပြည်ထောင်စု ဝါရှင်တန်ဒီစီမြို့တော်မှာ မေလ ၁၂ ရက်နဲ့ ၁၃ ရက်နေ့ နှစ်ရက်ကြာကျင်းပတဲ့ အမေရိကန်-အာဆီယံ အရှေ့တောင် အာရှအာရှနိုင်ငံများအသင်း ထိပ်သီးညီလာခံမှာ အာဆီယံခေါင်းဆောင်တွေ တွေ့ဆုံကြတဲ့အခါ မြန်မာနိုင်ငံက အကြမ်းဖက်မှုနဲ့ လူ့အခွင့်အရေးချိုးဖောက်မှု ကိစ္စတွေကို အလေးပေးဆွေးနွေးကြဖို့ နိုင်ငံတကာ လွတ်ငြိမ်းချမ်းသာခွင့်အဖွဲ့ (Amnesty International) က တိုက်တွန်းလိုက်ပါတယ်။

မြန်မာနိုင်ငံမှာ စစ်အာဏာသိမ်းပြီးနောက် စစ်ကောင်စီက မြန်မာပြည်သူတွေအပေါ် လူ့အခွင့်အရေး ပိုမိုချိုးဖောက် ကျူးလွန်နေတာတွေ ရပ်တန့်မသွားတဲ့အတွက် အာဆီယံ ဘုံသဘောတူညီချက် ငါးချက် မအောင်မြင်ဘူးလို့ AI အဖွဲ့က ထောက်ပြထားပါတယ်။

မြန်မာနိုင်ငံက လူ့အခွင့်အရေးချိုးဖောက်မှုတွေဟာ ‌အာဆီယံဒေသအတွက် စိုးရိမ်စရာဖြစ်လာနေတယ်ဆိုတာကို အာဆီ ယံအနေနဲ့ ဝန်ခံအသိအမှတ်ပြုရလိမ့်မယ်လို့ AI အဖွဲ့ရဲ့ ဒေသဆိုင်ရာ လက်ထောက်ညွှန်ကြားရေးမှူး Emerlynne Gil က ပြောပါတယ်။ မြန်မာစစ်တပ်ရဲ့ အကြမ်းဖက်လုပ်ရပ်တွေကြောင့် မြန်မာပြည်သူတွေ အသက်အန္တရာယ် မလုံခြုံရုံသာမက တိုင်းပြည် စီးပွားရေးကိုပါ ထိခိုက်နေကြောင်း၊ အသက်ရှင်ရပ်တည်ရေးနဲ့ စားဝတ်နေရေးအတွက် အိမ်နီးချင်းနိုင်ငံတွေကို ထွက် ပြေး တိမ်းရှောင်ရသူတွေ အများအပြားရှိလာနေကြောင်း၊ အာဆီယံအနေနဲ့ မြန်မာ့အ‌ရေးဖြေရှင်းဖို့ ပိုပြီးအသေး စိတ် တိကျတဲ့ အစီအစဉ်တစ်ခု ရေးဆွဲချမှတ်သင့်ပြီဖြစ်ကြောင်းလည်း AI အဖွဲ့ရဲ့ ကြေညာချက်မှာ ဖော်ပြထားပါတယ်။

#RadioNUGLocalNews

#SpringRevolution