2nd JUL 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဇူလိုင်လ ( ၂ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ပလုံတွီ (Palung Tui) တိုက်ပွဲအတွင်း ပျောက်ဆုံးနေသည့် CDF မင်းတပ် ရဲဘော်နှစ်ဦး၏ ရုပ်အလောင်းပြန်တွေ့၊ ဖမ်းဆီး နှိပ်စက်သတ်ဖြတ်ခဲ့သည့် လက္ခဏာများတွေ့ရ

စစ်ကောင်စီနှင့် CDF မင်းတပ် ကာကွယ်ရေးတပ်တို့ ထိတွေ့ပစ်ခတ်မှု စတင်ဖြစ်ပွားသည့် ဇွန် ၂၉ရက် ပလုံတွီ တိုက်ပွဲတွင် ရဲဘော်နှစ်ဦးပျောက်ဆုံးနေပြီး၊ အဆိုပါပျောက်ဆုံးနေသည့် ရဲဘော်နှစ်ဦး၏ ရုပ်အလောင်းကို ဇွန် ၃၀ရက်ေန့ မွန်းလွဲပိုင်းတွင် ပြန်လည်တွေ့ရှိသည်ဟု CDF မင်းတပ်က သတင်းထုတ်ပြန်သည်။

ရဲဘော်နှစ်ဦး၏ ရုပ်အလောင်းတွင် ညှင်းပန်းနှိပ်စက် သတ်ဖြတ်ခဲ့သည့် လက္ခဏာများတွေ့ရှိရသည်ဟု ဆိုသည်။ စစ်ကောင်စီတပ်နှင့် ဒေသခံကာကွယ်ရေးတပ် CDF မင်းတပ်တို့ ထိတွေ့ပစ်ခတ်မှုအတွင်း စစ်ကောင်စီတပ် ၄ ဦးသေဆုံးကြောင်းနှင့် ထိခိုက် ဒဏ်ရာရရှိသူများရှိသကဲ့သို့ CDF မင်းတပ် ရဲဘော် ၃ ဦး အသက်ဆုံးပါးခဲ့ရသည်။ 

ပလုံတွီကျေးရွာတွင် တပ်စွဲသည့် စစ်ကောင်စီတပ်များသည် ကျေးရွာအတွင်းရှိ မော်တော်ယာဥ်နှင့် ပြည်သူပိုင်ပစ္စည်း ဥစ္စာတချို့ကို မီးရှို့ဖျက်ဆီးခဲ့သည်ဟု မင်းတပ်မြို့နယ် တိုက်နယ်အမှတ် ၁ သတင်းမှန်ပြန်ကြားရေးအဖွဲ့ တာဝန်ရှိသူက The Mindat Post သို့ပြောသည်။ ပလုံတွီတိုက်ပွဲတွင် တိုင်းပြည်နှင့်လူမျိုးအတွက် အသက်ပေးခဲ့သည့် ရဲဘော်သုံးဦးအား အလေးပြုမှတ်တမ်း တင်အပ် ပါသည်ဟု CDF မင်းတပ်က ထုတ်ပြန်သည်။

 

📌📌 ၂။ မင်းတပ်နယ်မြေခံတပ်ရင်း ၂၇၄ အနီးတွင် ကောင်စီတပ်သားများ စကားများရန်ဖြစ်၊ အချင်းချင်းပစ်ခတ်ရာ ၃ ယောက်သေ၍ ဒဏ်ရာရသူများလည်းရှိ

မင်းတပ်နယ်မြေခံတပ်ရင်း ၂၇၄ အနီး မင်းတပ် မတူပီလမ်း ၄ မိုင်ကုန်းတွင် ဇွန်လ ၂၉ရက် ညက စစ်ကောင်စီတပ်သားများ စကားများရန်ဖြစ်ရင်း အချင်းချင်းပစ်ခတ်ရာ ၃ ယောက်သေ၍ ဒဏ်ရာရသူများလည်းရှိကြောင်း CDF မင်းတပ်က သတင်းထုတ်ပြန်ထားသည်။ မင်းတပ်မြို့နယ် တိုက်နယ် အမှတ် (၁) ဘက်တွင်လည်း စစ်ကောင်စီ တပ်သားများနှင့် CDF မင်းတပ်တို့ ထိတွေ့ တိုက်ပွဲများ ဖြစ်လာနိုင်သည်ဟု ၎င်းထုတ်ပြန်ချက်တွင် ဖော်ပြထားသည်။ ဇွန် ၂၉ရက်နေ့ ပလုံတွီတိုက်ပွဲတွင် စစ်ကောင်စီဘက်မှ ၄ ဦးသေဆုံးပြီး CDF မင်းတပ် ရဲဘော် (CDM တက္ကသိုလ်ကျောင်းသား) တစ်ဦး ကျဆုံးခဲ့သည်။

 

📌📌 ၃။ စစ်ကောင်စီဟာ နိုင်ငံရေး၊ စစ်ရေးနဲ့ကဏ္ဍစုံမှာ အထိနာနေပြီလို့ ပြည်ထောင်စုဝန်ကြီးချုပ်ပြောကြား

စစ်ကောင်စီဟာ နိုင်ငံရေး၊ စစ်ရေးနဲ့ကဏ္ဍစုံမှာ အထိနာနေပြီလို့ ပြည်ထောင်စုဝန်ကြီးချုပ် မန်းဝင်းခိုင်သန်းက ပြောပါတယ်။ ဇွန်လနောက်ဆုံးပတ်ကျင်းပတဲ့အစိုးရအဖွဲ့အစည်းအဝေးမှာ ဝန်ကြီးချုပ်ကပြောခဲ့ပါတယ်။

"စစ်ကောင်စီဟာ နိုင်ငံရေး၊ စစ်ရေး၊ နိုင်ငံခြားရေး၊ အုပ်ချုပ်ရေး၊ စီးပွားရေးစတဲ့ ကဏ္ဍအစုံမှာ အထိနာနေတာဖြစ်ပါတယ်။ ဒါကြောင့်အကြမ်းဖက်မှုတွေကိုလည်း ပိုမိုလုပ်နေပြီး မြို့ပြမှာဆိုရင် တရားမဲ့ အဖမ်းအဆီးတွေကိုလည်း ကြမ်းကြမ်းတမ်းတမ်းလုပ်ဆောင်နေတာ တွေ့ရပါတယ် "လို့ဝန်ကြီးချုပ်ကပြောပါတယ်။

ထို့ကြောင့် တော်လှန်ရေးအင်အားစုများအားလုံး အတည်ပြုထားပြီးသားဖြစ်တဲ့ ဖက်ဒရယ်ဒီမိုကရေစီချာတာရဲ့ လမ်းပြမြေပုံအဆင့်ဆင့်ကို လုပ်ငန်းစဉ်အရလည်း တိုးတက်မှုရှိအောင် ကြိုးစားရမယ်လို့ဝန်ကြီးချုပ်က ထပ်လောင်း ပြောပါတယ်။ ၂၀၂၁ ခုနှစ် စက်တင်ဘာ ၇ ရက်နေ့က စတင်ကြေညာခဲ့တဲ့ ပြည်သူ့ခုခံတွန်းလှန်စစ်ဟာ ဆယ်လတာကာလအတွင်းရောက်ရှိစဥ် စကစတပ်များလည်း အကျအဆုံးများပြားလာ ခဲ့ပါတယ်။ 

📌📌 ၄။ မြန်မာမှာ အကြမ်းဖက်မှုတွေ တိုးပွားလာနေတဲ့အပေါ်  ကုလသတိပေး

အာဏာသိမ်းစစ်ကောင်စီက သူ့ရဲ့အာဏာကို ဆုပ်ကိုင်ထားနိုင်ဖို့အတွက်၊ အကြမ်းဖက်မှုတွေ ပိုတိုးကျူးလွန်နေကြောင်း မြန်မာဆိုင်ရာ ကုလသမဂ္ဂ အထူးကိုယ်စားလှယ် Tom Andrews က ဇွန်လ ၃၀ ရက်မှာ သတိပေး ပြောကြားလိုက်ပါတယ်။ နိုင်ငံတကာအနေနဲ့ မြန်မာအာဏာသိမ်း စစ်တပ်ခေါင်းဆောင်တွေအပေါ် အရေးယူ ဆောင်ရွက်ဖို့လည်း တိုက်တွန်း လိုက်ပါတယ်။

စစ်ကောင်စီရဲ့ ရက်စက်ကြမ်းကြုတ်တဲ့ လုပ်ရပ်တွေ၊ လူအစုအပြုံလိုက် သတ်ဖြတ်မှုတွေနဲ့ လူ့အခွင့်အရေး ကျယ်ကျယ်ပြန့်ပြန့် ချိုးဖောက်မှုတွေကို ကုလသမဂ္ဂ လူ့အခွင့်အရေးကောင်စီကို တင်ပြခဲ့ပြီးဖြစ်တယ်။ လိုအပ်တာတွေ ဆောင်ရွက်ဖို့ ပျက်ကွက်တာဟာ၊ လူထုအတွက် ပြင်မရတဲ့ ထိခိုက်မှုတွေကို ပေါ်ပေါက်စေပြီး၊ အရေအတွက် မသိနိုင်တဲ့ ပြည်သူတွေအတွက် သေမိန့်ချလိုက်သလို ဖြစ်တယ်လို့လည်း သူက ပြောပါတယ်။ မြန်မာ့လက်ရှိ အခြေအနေဟာ လွန်ခဲ့တဲ့သုံးလ သူ့ရဲ့ နောက်ဆုံး အစီရင်ခံစာထက် ပိုမိုဆိုးရွားနေတယ်လို့လည်း ဆိုပါတယ်။

လက်ရှိ စစ်ဗိုလ်ချုပ်တွေဟာ နိုင်ငံရေးအတိုက်အခံတွေကို အရှိန်မြှင့် တိုက်ခိုက်နေပြီး၊ ကလေးသူငယ်တွေ အပါအဝင် အရပ်ဘက် ပြည်သူ နှစ်ထောင်ကျော်ကို သတ်ဖြတ်၊ တစ်သောင်းတစ်ထောင်ကျာ်ကို ထင်သလို ဖမ်းဆီး အကျဉ်းချထားပါတယ်။ စစ်ကောင်စီ တပ်တွေကလည်း ဂျက်တိုက်လေယာဉ်တွေနဲ့ ကျေးရွာတွေကို ဗုံးကြဲ တိုက်ခိုက်နေဆဲ ဖြစ်ပါတယ်။ ဒီလုပ်ရပ်တွေဟာ စစ်ရာဇဝတ်မှုနဲ့ လူသားအဖြစ် ဆန့်ကျင်တဲ့ ရာဇဝတ်မှုတွေကို ကျူးလွန်တာဖြစ်တယ်လို့ Tom Andrews က ပြောပါတယ်။ ပဋိပက္ခအတွင်း ကလေးငယ် နှစ်သိန်းခွဲကျော် နေရာရွှေ့ပြောင်းခဲ့ရပြီး၊ ရာနဲ့ချီ သေဆုံးခဲ့ရ၊ ၁၄၀၀ ကျော် ဖမ်းဆီးခံခဲ့ရ နှိပ်စက်ညှဉ်းပမ်း ခံခဲ့ရပါတယ်။ 

လက်ရှိမှာ စစ်တပ်က ပြန်ပေးဆွဲထားတဲ့ ကလေး အနည်းဆုံး ၆၁ ဦးရှိပြီး ဒီနှစ်အတွင်း ကာကွယ်ဆေး ထိုးခွင့်မရလို့ သေဆုံးရတဲ့ ကလေး သုံးသောင်းသုံးထောင်လောက်အထိ ရှိလာနိုင်တယ်လို့ မြန်မာဆိုင်ရာ ကုလသမဂ္ဂ အထူးကိုယ်စားလှယ် Tom Andrews က ပြောဆိုပါတယ်။ ကုလသမဂ္ဂ လုံခြုံရေးကောင်စီ အနေနဲ့ မြန်မာနိုင်ငံအတွက် ဆုံးဖြတ်ချက်ကို ထည့်သွင်း စဉ်းစားရမှာဖြစ်ပြီး အာဆီယံနိုင်ငံတွေကိုလည်း စစ်ကောင်စီခေါင်းဆောင်တွေကို စီးပွားရေး၊ သံတမန်ရေး ပိတ်ဆို့ဖို့လည်း Tom Andrews က တိုက်တွန်းလိုက်ပါတယ်။

#RadioNUGLocalNews

#SpringRevolution