24th SEP 2022 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ စက်တင်ဘာလ ( ၂၄ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ မင်းတပ်မြို့အဝင်ဂိတ်တစ်ခုကို CDF မင်းတပ် ဝင်ရောက်တိုက်ခိုက်၊ ထိခိုက် သေဆုံးမှုရှိနိုင်သည်ဟုဆို

စစ်ကောင်စီရဲ့ မင်းတပ်မြို့အဝင် ဂိတ်တစ်ခုကို CDF မင်းတပ်က ဝင်ရောက်တိုက်ခိုက်ခဲ့တယ်လို့ သိရပါတယ်။ စက်တင်ဘာလ ၂၁ ရက် မနက်အစောပိုင်း ၅ နာရီ ဝန်းကျင်က အလစ်ငိုက်ဝင်ရောက်ပစ်ခတ်ခဲ့တာဖြစ်ပြီး စစ်ကောင်စီ တပ်ဘက်က ထိခိုက်သေဆုံးမှုများနိုင်တယ်လို့လည်း မြေပြင်သတင်းနဲ့ နီးစပ်သူတွေက ပြောပါတယ်။

ဒီတိုက်ခိုက်မှုဟာ စစ်ကောင်စီရဲ့ မင်းတပ်မြို့ပေါ်မှာ ဝါဒဖြန့်ပြုလုပ်တဲ့ ဈေးရောင်းပွဲကို ဆန့်ကျင်ကန့်ကွက်တဲ့အနေနဲ့ စစ်ဆင် ရေးပြုလုပ်တာဖြစ်တယ်လို့ CDF မင်းတပ်က တရားဝင်ထုတ်ပြန်ထားပါတယ်။ အဲဒီနောက် မင်းတပ်မြို့ပေါ်နေ ပြည်သူတွေလည်း ခုရက်ပိုင်း နေအိမ်အတွင်း အကာအကွယ်နဲ့ လုံလုံခြုံခြုံနေကြဖို့ကို လည်း CDF မင်းတပ်က အရေးပေါ်ထုတ်ပြန်ချက်မှာ အသိပေးဖော်ပြထားပါတယ်။

စက်တင်ဘာလ ၂၁ ရက် ဒီကနေ့ စစ်ကောင်စီရဲ့ မြို့ဝင်ဂိတ်တခု ပစ်ခတ်တိုက်ခိုက်ခံရတာနဲ့ ပတ်သက်ပြီး ထိခိုက် သေဆုံးမှုကိုတော့ The Mindat Post အနေနဲ့ သီးခြားအတည်ပြုနိုင်ခြင်း မရှိသေးပါဘူး။

📌📌 ၂။ ရဲတပ်သားတစ်ဦး သေနတ် ၂လက်၊ ကျည်အမြောက်အမြား၊ စစ်အသုံးဆောင်အချို့နှင့်အတူ CDF ကန်ပက်လက်ထံ CDM ပြုလုပ်

ကန်ပက်လက်မြို့နယ်တွင် တာဝန်ထမ်းဆောင်သော ရဲတပ်သား ပြည့်ဖြိုးဇင်သည် CDM ပြုလုပ်လိုကြောင်း ဆက်သွယ်ကာ သေနတ် ၂လက်၊ ကျည်အမြောက်အမြား၊ စစ်အသုံးဆောင်အချို့နှင့်အတူ လာရောက်ပူးပေါင်းကြောင်း CDF ကန်ပက်လက်၏ စက်တင်ဘာ ၂၁ရက်နေ့ ညနေပိုင်း သတင်းထုတ်ပြန်ချက်အရ သိရသည်။

အဆိုပါ CDM ရဲတပ်သားကို ထိုက်သင့်သည့် ချီးမြှင့်ငွေပေးအပ်ကာ လွတ်မြောက်နယ်မြေသို့ ပို့ဆောင်ပေးခဲ့ပြီး ဖြစ်ကြောင်းလည်း ၎င်းထုတ်ပြန်ချက်တွင် ဖော်ပြထားသည်။

CDF ကန်ပက်လက်အနေဖြင့် ပြည်သူနှင့် ပူးပေါင်းလိုသော မည်သည့်ရဲနှင့် တပ်မတော်သားများကိုမဆို နွေးထွေးစွာ လက်ခံလျက်ရှိကြောင်း ထပ်မံဖိတ်ခေါ်နေသည်။

📌📌 ၃။ စစ်ကောင်စီရှေ့တန်းတပ်စခန်းတခု CDF မတူပီက အလစ်ဝင်တိုက်၊ ၆ ယောက်သေ၊ ဒဏ်ရာရသူများပြား

မင်းတပ်-မတူပီ မော်တော်ကားလမ်းပိုင်း မတူပီမြို့အနီး စစ်ကောင်စီ ရှေ့တန်းစခန်းတစ်ခုကို CDF မတူပီက စက်တင်ဘာလ ၁၉ရက်နေ့က အလစ်ဝင် တိုက်ခိုက်ခဲ့တယ်လို့ သိရပါတယ်။

အဲဒီတပ်စခန်း ဝင်ရောက်ပစ်ခတ်မှုမှာ စစ်ကောင်စီတပ်သား ၆ယောက်ပွဲချင်းပြီးသေဆုံးခဲ့သလို ဒဏ်ရာရရှိသူ ၈ယောက် ရှိတယ်လို့ CDF မတူပီ သတင်းနှင့် ပြန်ကြားရေးရဲ့ စက်တင်ဘာ ၂၀ရက်နေ့ ထုတ်ပြန်ချက်ထဲမှာ ဖော်ပြထားပါတယ်။

📌📌 ၄။ ချင်းပြည်သူ့ကာကွယ်ရေးတပ် CDF နှင့် ကောင်းမွန်တဲ့ ဆက်ဆံရေးရှိကြောင်း ရက္ခိုင့်တပ်တော် AA ဆို

ချင်းပြည်သူ့ကာကွယ်ရေးတပ် CDF နဲ့ ရင်းနှီးကောင်းမွန်တဲ့ ဆက်ဆံရေးရှိတဲ့အကြောင်း ရက္ခိုင့်တပ်တော် AA ပြောခွင့်ရပုဂ္ဂိုလ် ဦးခိုင်သုခက စက်တင်ဘာ ၁၉ ရက်နေ့ သတင်းစာရှင်းလင်းပွဲမှာ ပြောသွားတယ်လို့ ဒေသတွင်း သတင်းဌာနတစ်ခုဖြစ်တဲ့ Laymro Media Group က စက်တင်ဘာ ၂၀မှာ ရက္ခိုင်ဘာသာနဲ့ ရေးသားထားပါတယ်။

“လေးမြို့ချောင်းဘက်မှာရှိတဲ့ ချင်းပြည်သူ့ကာကွယ်ရေးတပ်တွေနဲ့ ရင်းနှီးတဲ့ ဆက်ဆံရေးတော့ရှိပါတယ်။ ဒါပေမယ့် စစ်ရေးအရ ပူးပေါင်းတာမျိုးတော့ မရှိပါ” လို့ ရက္ခိုင့်တပ်တော် AA ပြောခွင့်ရသူက ဆိုပါတယ်။

ရက္ခိုင်ပြည်နယ်ထဲမှာ ဒေသခံကာကွယ်ရေးတပ် PDF တွေမရှိပေမယ့် ရက္ခိုင်ပြည်နယ်နဲ့ နယ်နိမိတ်ချင်း ထိစပ်နေတဲ့ ချင်းပြည်နယ်၊ မကွေးတိုင်းဘက်က ကာကွယ်ရေးတပ်ဖွဲ့ဝင်တွေကို လူမှုရေး၊ ကျန်းမာရေး စတဲ့ကဏ္ဍတွေမှာတော့ AA ကနေ အကူအညီပေးနေတာမျိုးရှိတယ်လို့ အဲဒီသတင်းစာရှင်းလင်းပွဲမှာ ရက္ခိုင့်တပ်တော် AA ပြောခွင့်ရ ဦးခိုင်သုခ က ပြောထားပါတယ်။

📌📌 ၅။ မီဇိုရမ်တက္ကသိုလ်တွင် မြန်မာဘာသာရပ်ကို သင်ကြားပေးမည်

အိန္ဒိယနိုင်ငံ၊ မီဇိုရမ်တက္ကသိုလ်တွင် ချင်းရေးရာအဖွဲ့ချုပ် (Institute of Chin Affairs) နှင့် မီဇိုရမ်တက္ကသိုလ် (Mizoram University) တို့ပူးပေါင်းကာ မြန်မာဘာသာရပ်နှင့် ဆက်သွယ်ပြောဆိုနိုင်ရေးဘာသာရပ်ကို ယခုနှစ်အောက်တိုဘာမှ စတင်သင်ကြားပေးသွားမည်ဟု Mizoram University က စက်တင်ဘာ ၂၀ ရက်စွဲဖြင့် ကြေညာသည်။

အိန္ဒိယသည် မြန်မာနှင့် ကီလိုမီတာ ၁၆၀၀ ခန့်ထိစပ်နေပြီး မြန်မာ့ဓလေ့ထုံးတမ်းနှင့် မြန်မာဘာသာစကား လေ့လာ သိရှိရန် ဆက်စပ်နေသည်ဟုလည်း ၎င်းကြေညာချက်တွင်ဖော်ပြသည်။ သင်တန်းကာလအား ၁၀ လကြာသတ်မှတ်ကာ နာရီပေါင်း ၁၂၀ ကိုအတန်းတွင်းသင်ကြားပို့ချပြီး နာရီ ၃၀ ကိုမူ မိမိကိုယ်တိုင် လေ့လာသင်ယူရမည့်အချိန်ဟု သတ်မှတ်သည်။

မြန်မာဘာသာရပ် သင်တန်းတက်ရောက်သူများအနေဖြင့် မြန်မာစာ၊ ဝေါဟာရနှင့် သဒ္ဒါဖွဲ့စည်းပုံတို့ကို နားလည် သဘောပေါက်စေမည့်အပြင် စကားပြော၊ စကားဝိုင်းနှင့် စာပေအရေးအသားများကို လေ့ကျင့်သင်ကြား ပေးမည် ဟူ၍လည်း Mizoram University ၏ကြေညာချက်တွင် ရေးသားထားသည်။

📌📌 ၆။ စစ်ကောင်စီ ခြေကုတ်ယူသည့် ကြိတ်စခန်းကို KNLA တပ်ရင်း ၁၈နှင့် ပူးပေါင်းတပ်ဖွဲ့တို့ သိမ်းယူ

ကရင် ပြည်နယ်၊ ကော့ကရိတ် KNLA တပ်ရင်း ၁၈နှင့် ဒေါနစစ်ကြောင်း-SOG ပူးပေါင်းတပ်ဖွဲ့တို့က စစ်ကောင်စီ ခြေကုတ်စခန်းဖြစ်သည့် ကြိတ်စခန်းကိုစက်တင်ဘာ ၂၀ ရက်နေ့တွင် သိမ်းပိုက်နိုင်ခဲ့သည်ဟု ကရင်အမျိုးသား အစည်းရုံး KNU က စက်တင်ဘာ ၂၁ ရက်တွင် သိမ်းဆည်းရသည့် လက်နက်၊ ခဲယမ်း၊ ကျည်များနှင့်တကွ ထုတ်ပြန်သည်။

၎င်းစခန်းသိမ်းတိုက်ပွဲတွင် အာဏာသိမ်းစစ်ကောင်စီတပ်သား ၇ယောက် သေဆုံးကာ နောက်ထပ်၂ယောက်ကိုဒဏ်ရာနှင့် ဖမ်းမိထားကြောင်း ကရင်အမျိုးသား အစည်းအရုံး KNU ထုတ်ပြန်ချက်တွင် ဖော်ပြသည်။ ကြိတ်စခန်းကို ပြီးခဲ့သည့် သြဂုတ် ၈ ရက်နေ့၌ ပိတ်ဆို့ရိက္ခာဖြတ် တိုက်ခိုက်ခဲ့ကာ စက်တင်ဘာ ၂၀ ယမန်နေ့တွင် စခန်းတစ်ခုလုံးကို သိမ်းပိုက်နိုင်ခဲ့ ခြင်းဖြစ်သည်။