19th NOV 2022 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ နိုဝင်ဘာလ ( ၁၉ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ကန်ပက်လက်မြို့နယ်ထဲ သစ်ခွပန်းမျိုးစုံ ရောင်းဝယ်ဖောက်ကားခြင်းမပြုလုပ်ဖို့ မြို့နယ်ပြည်သူ့အုပ်ချုပ်ရေးအဖွဲ့က အသိပေး

ကန်ပက်လက်မြို့နယ်အတွင်းက သစ်ခွပန်းမျိုးစုံကို ရှာဖွေပြီး ရောင်းဝယ်ဖောက်ကားတာမျိုး ပြည်သူတွေအနေနဲ့ မပြုလုပ် ကြဖို့ကို ကန်ပက်လက် မြို့နယ်ပြည်သူ့အုပ်ချုပ်အဖွဲ့က နိုဝင်ဘာလ ၁၄ရက်နေ့မှာ အသိပေးလိုက်ပါတယ်။ ကန်ပက်လက်မြို့နယ်၊ မြို့နယ်ပြည်သူ့အုပ်ချုပ်ရေးအဖွဲ့ရဲ့ ၈ကြိမ်မြောက် အစည်းအဝေးဆုံးဖြတ်ချက်အရ အခုလို ထည့်သွင်း ဆုံးဖြတ်တာဖြစ်တယ်လို့ ဆိုပါတယ်။

ဒါကြောင့် ပြည်သူတွေအနေနဲ့ မြို့နယ်အတွင်းက သစ်ခွပန်းမျိုးစုံ ရောင်းဝယ်ဖောက်ကားတာမျိုးမလုပ်ကြဖို့နဲ့ ရှာဖွေရောင်းဝယ်တာမျိုး ပြုလုပ်သူတွေ တွေ့ရှိခဲ့ရင် ပြည်သူ့အုပ်ချုပ်ရေးအဖွဲ့အနေနဲ့ ပြင်းပြင်းထန်ထန် အရေးယူသွားမှာ ဖြစ်တယ်လို့လည်း အသိပေးဖော်ပြထားပါတယ်။

📌📌 ၂။ ဟားခါးမြို့တွင်း စစ်ဆင်ရေးမှာ CNA ရဲဘော်တစ်ဦးကျဆုံး

ဟားခါးမြို့တွင်း စစ်ဆင်ရေးမှာ ချင်းအမျိုးသားတပ်တော် (CNA) တပ်ကြပ် ဆလိုင်းလာလ်ရိုတလွန် ရင်ဘတ် ကျည်ထိမှန်ပြီး ကျဆုံးသွားတယ်လို့ ဒေသတွင်းသတင်းရင်းမြစ်တစ်ခုဖြစ်တဲ့ ချင်းဂျာနယ်ရဲ့ ဖော်ပြချက်အရ သိရပါတယ်။ နိုဝင်ဘာလ ၁၆ရက် မနက် ၂နာရီခန့်ကနေ နှစ်ဘက် ပစ်ခတ်မှုစတင်ခဲ့ပြီးတဲ့နောက် ကျည်ထိမှန်ကျဆုံးတာဖြစ်တယ်လို့ ဆိုပါတယ်။ စစ်ကောင်စီဘက်ကတော့ ဟားခါးမြို့တွင်း ပစ်ခတ်မှုမှာ M4 မှန်ပြောင်းပါ သေနတ် ၁လက်၊ ကျည်အိမ် ၃ခု၊ ၅.၅၆ကျည် ၆၀တောင့်၊ အိုင်ကွန် ၁လုံးနဲ့ ကျည်ကာဦးထုပ် ၁လုံးတို့ကို သိမ်ဆည်းရတယ်လို့ ၎င်းတို့ရဲ့ ဝါဒဖြန့် တယ်လီဂရမ်ချန်နယ်တစ်ခုကနေ ဖော်ပြလာပါတယ်။

နိုဝင်ဘာလ ၁၆ရက် မနက်အစောပိုင်းက နှစ်ဘက်ပစ်ခတ်ပြီးနောက် စစ်ကောင်စီရဲ့ လက်နက်ကြီး ရမ်းသန်းပစ်ခတ်မှုကြောင့် ဟားခါးမြို့ သောက်ရေသန့်စက်ရုံတစ်ခုက စက်ရုံမန်နေဂျာရဲ့ အသက် ၁၄နှစ်အရွယ် သားတစ်ဦးသေဆုံးပြီး စက်ရုံ ဝန်ထမ်းနှစ်ဦး ပြင်းထန်ဒဏ်ရာရရှိထားတယ်လို့ ချင်းဂျာနယ်ရဲ့ နောက်ဆက်တွဲ သတင်းဖော်ပြချက်တွေအရ သိရပါတယ်။

📌📌 ၃။ စစ်ကောင်စီ၏ လွှတ်ငြိမ်းခွင့်စာရင်းတွင် ချင်းပြည်နယ်မှ ဖမ်းဆီးခံထားရသူများ မပါဝင်

ချင်းပြည်နယ်၊ မတူပီ၊ မင်းတပ်နှင့် ကန်ပက်လက်မြို့နယ်တို့မှ ပုဒ်မ ၅၀၅ အပါအဝင်အခြားပြစ်မှုများဖြင့် ဖမ်းဆီးထောင်ချခံထားရပြီး ပခုက္ကူအကျဉ်းထောင်ထဲတွင်ရောက်ရှိသူများ စစ်ကောင်စီ၏ လွတ်ငြိမ်းခွင့်စာရင်းတွင် ပါဝင်လာခြင်းမရှိကြောင်း သိရသည်။

စစ်တပ် အာဏာသိမ်းပြီးနောက် ချင်းပြည်နယ်အတွင်း အကြောင်းအမျိုးမျိုးကြောင့် ဖမ်းဆီးခံထားရသည့်သူများကို စစ်ကောင်စီက ပခုက္ကူအကျဉ်းထောင်၊ မကွေးအကျဉ်းထောင်နှင့် ကလေးမြို့အကျဉ်းထောင်များသို့ပို့ ဆောင်ခဲ့ခြင်း ဖြစ်သည်။

"အကျဉ်းကျနေတဲ့သူတွေလွတ်ပေးတယ်ဆိုတော့ အိမ်ကသားများ ပါလာမလားဆိုပြီး ပခုက္ကူအကျဉ်းထောင်ဝမှာ သွားစောင့်နေတာ။ တစ်နေသာကုန်သွားတယ်ပါမလာဘူး။ ၃၄ ယောက်တော့လွှတ်ပေးတယ်။ နိုင်ငံရေးသမားတွေ လူငယ်တွေပါမလာဘဲ တခြား ပြစ်မှုနဲ့ကျတဲ့သူတွေပဲလွှတ်ပေးတာ" ဟု ကန်ပက်လက်မြို့နယ်တွင် ဖမ်းဆီးခံခဲ့ရသည့် လူငယ်တစ်ဦး၏ အုပ်ထိန်းသူက ပြောသည်။

အဆိုပါ လူငယ်သည် ကန်ပက်လက်မြို့နယ်အတွင်း ဆိုင်ကယ်စီးနင်းရာတွင် ဓါးပလိုင်းလွယ်သည့်အတွက် စစ်ကောင်စီက ဖမ်းဆီးကာ ပခုက္ကူထောင်သို့ ပို့ဆောင်ခဲ့ခြင်း ဖြစ်သည်။

နိုဝင်ဘာ ၁၇ရက်တွင် စစ်ကောင်စီ၏ လွတ်ငြိမ်းဖြင့် ချင်းလူမျိုးအများအပြား အကျဉ်းကျနေသည့် ပခုက္ကူ အကျဥ်းထောင်မှ ၃၄ ဦးနှင့် စစ်ကိုင်းတိုင်း၊ ကလေးအကျဉ်းထောင်မှ ၂၇ ဦးလွတ်မြောက်လာသော်လည်း ချင်းလူမျိုးများ ပါဝင်ခဲ့ခြင်း မရှိကြောင်း သိရသည်။

စစ်ကောင်စီသည် အမျိုးသားနေ့အောင်ပွဲ အထိမ်းအမှတ်ဖြင့် နိုင်ငံတဝှမ်းရှိ အကျဉ်းသား ၅,၇၇၄ ဦးကို လွတ်ငြိမ်း ချမ်းသာခွင့်ပြုကြောင်း ကြေညာခဲ့သော်လည်း လွတ်ရက်စေ့ခါနီး နိုင်ငံရေးအကျဉ်းသား အနည်းအငယ်သာ ပြန်လွှတ်ပေးခဲ့ခြင်း ဖြစ်သည်။

📌📌 ၄။ စစ်ကောင်စီတပ်က ဆောမြို့နယ် လက်ပန်းရွာကိုမီးရှို့

မကွေးတိုင်း၊ ဆောမြို့နယ်ထဲက လက်ပန်းရွာကို နိုဝင်ဘာလ ၁၅ရက်နေ့၊ မနက်ပိုင်း ၁၁နာရီလောက်ကစပြီး စစ်ကောင်စီတပ်ဖွဲ့ဝင်တွေက ဝင်ရောက်မီးရှို့တာကြောင့် နေအိမ် ၁၀လုံးကျော် မီးလောင်နေပြီလို့ ‌‌လက်ပန်းကျေးရွာ မီးလောင်နေတာကို မျက်မြင်တွေ့ရှိနေသူတွေပြောပြချက်အရ သိရပါတယ်။

လက်ရှိစစ်ကောင်စီတပ်ဖွဲ့ဝင်တွေရှိတဲ့ လက်ပန်းရွာနဲ့ ဝန်းကျင်ကိုလည်း ‌၆မိုင်လောက်အကွာမှာရှိနေတဲ့ ကျောက်ထုအမြှောက်တပ်က လက်နက်ကြီး ၆ လုံးလောက်ကို ဆက်တိုက်ပစ်ခတ် နေတယ်လို့ ‌ဒေသကာကွယ်ရေး တပ်တွေဘက်ကနေ သိရပါတယ်။

နှစ်ဘက်ပစ်ခတ်တိုက်ခိုက်မှုမရှိပေမယ့် နှစ်ဘက်အကြား စစ်ရေးတင်းမာ‌မှုတွေ ရှိနေတာရယ်၊ စစ်ကြောင်းဝင်လာ တာရယ်ကြောင့် ပဆုပ်၊ ကံအိုးနဲ့ လက်ပန်းက ဒေသခံ ၄၀၀ ‌‌ကျော်က ထွက်ပြေးတိမ်းရှောင်နေတယ်လို့ သိရပါတယ်။ ကျေးရွာကိုမီးရှို့တယ်လို့ ဆိုတဲ့ကိစ္စရယ်၊ စစ်ကောင်စီတပ်သားတွေထွက်ပြေးမှုအပါအဝင် ‌ပဆုပ်၊ ကံအိုးနဲ့ လက်ပန်း ဒေသတွေဘက်က သတင်းတွေအပေါ် စစ်ကောင်စီကတော့ တစုံတရာထုတ်ပြန်ပြောဆိုတာမရှိသေးပါဘူး။ ဘီဘီစီအနေနဲ့လည်း ဖြစ်စဥ်တွေနဲ့ ပတ်သတ်ပြီး စစ်ကောင်စီဘက်ကို မေးမြန်းနိုင်ဖို့ ကြိုးစားနေပါတယ်လို့ ဆိုပါတယ်။

📌📌 ၅။ စစ်ကောင်စီက ဦးမောင်းဟာနဲ့ ဒေါက်တာ ဝုန်ဆွန်းထန်တို့ကို ဂုဏ်ထူးဆောင်ဘွဲ့ ပေး

မင်းအောင်လှိုင်ဦးဆောင်တဲ့ စစ်ကောင်စီက နိုဝင်ဘာ ၁၇ ရက်၊ တန်ဆောင်မုန်း လပြည့်ကျော် ၁၀ ရက်နေ့ ကျရောက်တဲ့ အမျိုးသားနေ့ အထိမ်းအမှတ်အနေနဲ့ နိုင်ငံတော်တာဝန်ကို ထမ်းဆောင်တဲ့ ပုဂ္ဂိုလ်တွေအတွက် ဘွဲ့တံဆိပ်တွေ ချီးမြှင့်တဲ့အကြောင်း အမိန့်ကြော်ငြာစာအမှတ် ၂၁၁/၂၀၂၂ နေ့ ကြေညာလာပါတယ်။

အခုလို စစ်ကောင်စီက ဘွဲ့တံဆိပ်ပေးအပ်တဲ့အထဲမှာ ချင်းအမျိုးသား ခေါင်းဆောင်ကြီး ဖြစ်တဲ့ ဦးဝမ္မသူးမောင်းရဲ့သား တစ်ဦးဖြစ်သူ ဦးမောင်းဟာနဲ့ လက်ရှိ စစ်ကောင်စီလက်အောက်ခံ ချင်းပြည်နယ် ဝန်ကြီးချုပ် ဒေါက်တာ ဝုန်ဆွန်းထန်လည်း ပါဝင်နေတယ်လို့ သိရပါတယ်။

၂၀၂၁ ခုနှစ် ဖေဖော်ဝါရီ ၁ ရက် စစ်ကောင်စီက အာဏာသိမ်းပြီးနောက် ဖွဲ့စည်းလိုက်တဲ့ နိုင်ငံတော်စီမံအုပ်ချုပ်ရေး ကောင်စီ (ခေါ်) စစ်ကောင်စီမှာ ဦးမောင်းဟာကို ဖြည့်စွက်အဖွဲ့ဝင်အဖြစ် ဖိတ်ခေါ်ခဲ့တာဖြစ်ပြီး ၂၀၂၂ နိုဝင်ဘာ ၁၇နေ့မှာ မဟာသရေစည်သူဘွဲ့ ပေးအပ်လိုက်တာပါ။

စစ်ကောင်စီက ပြီးခဲ့တဲ့ ၂၀၂၂ သြဂုတ်လမှာ ဦးငွန်ဆန်းအောင်ကို ဝန်ကြီးချုပ်အဖြစ်ကနေ ရပ်နားခိုင်းပြီးတဲ့နောက် ချင်းပြည်နယ် ဝန်ကြီးချုပ်အဖြစ် တာဝန်ရယူတဲ့ ဒေါက်တာ ဝုန်ဆွန်းထန်ကိုတော့ သီရိပျံချီဘွဲ့ ချီးမြှင့်တယ်လို့ သိရပါတယ်။