24th DEC 2022 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဒီဇင်ဘာလ ( ၂၄ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ 'ဖေးမကူညီ လောက်နူး CDMer များဆီ' ကမ်ပိန်းရရှိငွေကနေ CDM ဝန်ထမ်း ၅၁၉ ဦးကို ပံ့ပိုး

ကန်ပက်လက်မြို့နယ်အတွင်း CDM ပြုလုပ်သူတွေကို 'ဖေးမကူညီ လောက်နူး CDMer များဆီ' ကမ်ပိန်းကနေ ရရှိလာတဲ့ ငွေသားတချို့နဲ့ ပံ့ပိုးခဲ့တယ်လို့ ကန်ပက်လက် ပအဖ က ဒီဇင်ဘာလ ၂၀က ရှင်းလင်းတင်ပြလာပါတယ်။ 'ဖေးမကူညီ လောက်နူး CDMer များဆီ' ကမ်ပိန်းကနေ ငွေသား စုစုပေါင်း ၃၇,၃၂၉,၃၉၀ ကျပ်တိတိ လက်ခံရရှိပြီး CDM ဝန်ထမ်း တစ်ဦးကို ၅၀၀၀၀ ကျပ်၊ စုစုပေါင်း ၅၁၉ ဦးအတွက် ၂၅,၉၅၀,၀၀၀ ကျပ်တိတိ ပံ့ပိုးထားပြီးဖြစ်တယ်လို့ ဆိုပါတယ်။

ကန်ပက်လက်မြို့နယ် ရဲ့ CDM ဆိုင်ရာမူဝါဒပါ သတ်မှတ်ချက်နဲ့ကိုက်ညီတဲ့ (၂၀၂၁၊ ဖေဖော်ဝါရီမှစတင်ပြီး ယနေ့အထိ CDM တွင် ပါဝင်ခဲ့သူ) CDMer ၅၁၉ ဦးကို ပံ့ပိုးခဲ့တာပါ။

CDM ဝန်ထမ်းတွေ ပံ့ပိုးပြီးတဲ့နောက် လက်ကျန်ငွေ ၁၁,၃၇၉,၃၉၀ ကျပ်တိတိ ကျန်ရှိတယ်လို့ ကန်ပက်လက်မြို့နယ် ပြည်သူ့အုပ်ချုပ်ရေးအဖွဲ့ ရဲ့ ကြေညာချက်မှာ ဖော်ပြပါတယ်။

အဲဒီ လက်ကျန်ငွေသားတွေကိုတော့ မြို့နယ် အုပ်ချုပ်ရေး၊ ကာကွယ်ရေးနဲ့ တခြားကဏ္ဍအတွက် ထပ်မံအသုံးပြုခဲ့တယ်လို့ ရှင်းလင်းထားပါတယ်။

လက်ရှိအချိန်ထိ ပံ့ပိုးငွေသား မထုတ်သေးတဲ့ CDMer တွေ ဝန်ထမ်းရေးရာဌာနဆီ ခိုင်လုံတဲ့ အထောက်အထားနဲ့ ဒီဇင်ဘာ ၂၅ ရက်နေ့နောက်ဆုံးထား ဆက်သွယ်ထုတ်ယူနိုင်တယ်လို့လည်း ကန်ပက်လက်မြို့နယ် ပြည်သူ့အုပ်ချုပ်ရေးအဖွဲ့က ထပ်မံအသိပေးထားပါတယ်။

========================

📌📌 ၂။ စစ် ကောင်စီ တပ်သားတစ်ဦး CDF - Daai ထံသို့ အလင်းဝင်

ပြီးခဲ့တဲ့ ဒီဇင်ဘာလ ၁၂ ရက် နေ့မှာ စစ် ကောင်စီ တပ်သားတစ်ဦး Chinland Defnse Force - Daai/ CDF - Daai ထံသို့ အလင်းဝင် ရောက်လာတယ်လို့ ဒီဇင်ဘာလ ၁၉ ရက် နေ့စွဲနဲ့ သတင်းထုတ်ပြန်လာပါတယ်။ အဆိုပါ စစ် ကောင်စီ တပ်သားတစ်ဦးဟာ ကချင်ပြည်နယ် အ ခြေစိုက် ခမရ (၆၀၂) က တပ်ကြပ်ကြီး စာ ရေးတစ်ဦးဖြစ်ပြီး ကိုယ်ပိုင်အမှတ် (တ/၄၇၂၈၁၆) ဖြစ်တယ်လို့ သိရပါတယ်။

စစ် ကောင်စီ လက် အောက်မှာ ဆက်လက်ပြီးတာဝန် ထမ်း ဆောင်လိုခြင်း မရှိ တော့တဲ့အတွက် CDF - Daai ထံကို အလင်းဝင် ရောက်လာတယ်လို့ သိရပါတယ်။

ယင်းစစ် ကောင်စီ တပ်သားဟာ လက်နက် ယူ ဆောင်လာခြင်းရှိ၊ မရှိကို တော့ ထုတ်ပြန်ချက်မှာ ဖော်ပြမထားပါဘူး။ CDF - Daai အ နေနဲ့ အဆိုပါ စစ် ကောင်စီတပ်သားကိုနွေး ထွေးစွာ ကြိုဆိုခဲ့ပြီး လွတ် မြောက်နယ် မြေတစ်ခုကို ပို့ ဆောင် ပေးခဲ့တယ်လို့ သိရပါတယ်။ ပြည်သူ့ရင်ခွင် ခိုလှုံလိုတဲ့ စစ် ကောင်စီတပ်သားတွေကို CDF-Daai အ နေနဲ့ နွေး ထွေးစွာ ကြိုဆိုလက်ခံသွားမှာ ဖြစ်တယ်လို့ ထုတ်ပြန်ထားပါတယ်။

CDFF - Daai ကို ၂၀၂၁ ခုနှစ် စက်တင်ဘာလ ၂၁ ရက် နေ့မှာ စတင်ဖွဲ့စည်းခဲ့ပြီး ဖွဲ့စည်းခြင်း တစ်နှစ်ပြည့် အခမ်းအနား ကိုလည်း ၂၀၂၂ ခုနှစ် စက်တင်ဘာလ ၂၁ ရက် နေ့မှာ (CDF - Daai) ဗဟိုဌာနချုပ် တစ် နေရာမှာ ကျင်းပခဲ့ ပါတယ်။

========================

📌📌 ၃။ တီးတိန်မြို့အခြေစိုက် ခလရ ၂၆၉ တပ်ရင်းက စစ်ကောင်စီတပ်သား သုံးဦး အလင်းဝင်

တီးတိန်မြို့အခြေစိုက် ခလရ ၂၆၉ က တပ်သား သုံးဦး အလင်းဝင်လာတယ်လို့ CDF CDM Siyin က ဒီဇင်ဘာလ ၁၇ရက် နေ့က သတင်းထုတ်ပြန်ပါတယ်။ အလင်းဝင်လာတဲ့ စစ်ကောင်စီတပ်သား သုံးဦးဟာ အောင်အောင် (ကိုယ်ပိုင်နံပါတ် - တ ၀၁၉၂)၊ လှိုင်ဝင်းအောင် (ကိုယ်ပိုင်နံပါတ် - တ ၅၀၄၈၁၉) နဲ့ ရဲမင်းသိမ်း (ကိုယ်ပိုင်နံပါတ် - တ ၅၇၄၂၆၀) တို့ ဖြစ်တယ်လို့ ထုတ်ပြန်ချက်မှာ ဖော်ပြပါတယ်။

သူတို့အနေနဲ့ ပြည်သူ လူထုနဲ့အတူ စစ်အာဏာရှင်ကို တော်လှန်ဖို့ တပ်ထဲက ထွက်လာတာလို့ ထွက်ဆိုထားကြပါတယ်။

ချင်းပြည်နယ် မင်းတပ်မြို့အခြေစိုက် ခလရ ၂၇၄ တပ်ရင်းကနေ ဒီဇင်ဘာလ ၁၆ ရက်နေ့မှာ လက်နက်နဲ့ အလင်းဝင်လာတဲ့ စစ်ကောင်စီတပ်သား တစ်ဦးကို CDF မင်းတပ်က လက်ခံထားပါတယ်။

ပြီးခဲ့တဲ့ ဒီဇင်ဘာလ ၁၄ ရက်ကလည်း မတူပီမြို့အခြေစိုက် တပ်ရင်းတစ်ခုက လက်နက်အပြည့်အစုံနဲ့ ထွက်ပြေးတဲ့ တပ်သား သုံးဦးကို စစ်ကောင်စီက ပြန်လည်ဖမ်းမိတယ်လို့ သတင်းထွက်ပေါ်နေပေမယ့် The Mindat Post အနေနဲ့ သီးခြားအတည်ပြုနိုင်တာမျိုး မရှိသေးပါဘူး။

========================

📌📌 ၄။ ခလရ ၂၇၄ တပ်ရင်းက စစ်ကောင်စီတပ်သားတစ်ဦး CDF မင်းတပ်ထံ လက်နက်နဲ့ အလင်းဝင်လာ

မင်းတပ်မြို့၊ နယ်မြေခံတပ်ရင်း ခလရ ၂၇၄ ကနေ စစ်ကောင်စီတပ်သား မျိုးသက်ပိုင်ဟာ ဒီဇင်ဘာလ ၁၆ရက်နေ့က လက်နက်၊ ခဲယမ်းနဲ့အတူ အလင်းဝင်လာတယ်လို့ CDF မင်းတပ်က တရားဝင် သတင်းထုတ်ပြန်ပါတယ်။ အလင်းဝင် လာတဲ့ တပ်သားက MA 1 အမျိုးအစားသေနတ် ၁လက်၊ ကျည်အိမ် ၄ခု၊ ကျည်တောင့် ၆၅တောင့်နဲ့ ကျည်ကာ အင်္ကျီ ၁စုံတို့ကို သူနဲ့အတူယူလာတာလို့ CDF မင်းတပ် ပြောရေးဆိုခွင့်ရှိသူက The Mindat Post ကို ပြောပါတယ်။

“မနေ့က ကျွန်တော်တို့နဲ့ ချိတ်ဆက်ပြီး အလင်းဝင်လာတာ၊ ဘယ်လိုပုံစံနဲ့ လာတယ်ဆိုတာတော့ လုံခြုံရေးအရ ပြောလို့မရဘူးပေါ့။ နောက်ထပ်လာမယ့် သူတွေလည်း ရှိတော့လေ၊ အဲဒါကြောင့်ပါ” လို့ ပြောပါတယ်။

CDF မင်းတပ်ဆီ အလင်းဝင်လာတဲ့ တပ်သား မျိုးသက်ပိုင်ကို လက်နက်နဲ့ ပူးပေါင်းလာတဲ့ စစ်ကောင်စီတပ်သားတွေကို ပေးအပ်တဲ့ ဆုကြေးငွေအတိုင်း ပေးအပ်သွားမှာလို့ သူက ဆက်ပြောပါတယ်။

စစ်အာဏာရှင်စနစ်ရဲ့ ရက်စက်ယုတ်မာမှု၊ တပ်တွင်း ဖိနှိပ်ခံရမှုတွေနဲ့ စစ်အာဏာရှင်စနစ်အောက်က ရုန်းထွက်လာတဲ့ သူ့ရဲ့ရည်ရွယ်ချက်တွေကို မေးမြန်းပြီး ဖော်ပြပေးသွားမယ်လို့လည်း CDF မင်းတပ်က ထုတ်ပြန်ထားပါတယ်။

========================

📌📌 ၅။ ဒေါ်အောင်ဆန်းစုကြည်ကို လွှတ်ပေးဖို့အပါအဝင် မြန်မာ့အရေးဆုံးဖြတ်ချက် လုံခြုံရေးကောင်စီ အတည်ပြု

မြန်မာနိုင်ငံမှာ အကြမ်းဖက်တိုက်ခိုက်မှုတွေ အမြန်ဆုံးရပ်ဆိုင်းဖို့၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားအားလုံး လွှတ်ပေးဖို့ တိုက်တွန်းထားတဲ့ ဆုံးဖြတ်ချက်ကို ကုလသမဂ္ဂလုံခြုံရေး ကောင်စီအစည်းအဝေးမှာ မဲခွဲဆုံးဖြတ်ပြီး အတည်ပြုလိုက်ပါတယ်။

ဒီဇင်ဘာ ၂၁ ရက်နေ့က ကျင်းပတဲ့ အစည်းအဝေးမှာ ဒီဆုံးဖြတ်ချက်နဲ့ ပတ်သက်ပြီး တရုတ်၊ ရုရှားနဲ့ အိန္ဒိယတို့က ကြားနေခဲ့ကြပြီး ကျန်တဲ့ လုံခြုံရေးကောင်စီအဖွဲ့ဝင် နိုင်ငံအားလုံးက ထောက်ခံခဲ့တာဖြစ်ပါတယ်။

ဒါဟာ စစ်တပ်က အာဏာသိမ်းထားတဲ့ မြန်မာနိုင်ငံအရေးနဲ့ ပတ်သက်လို့ ပထမဆုံး ဆုံးဖြတ်ချက်ဖြစ်ပြီး၊ လုံခြုံရေး ကောင်စီအဖွဲ့ဝင် နိုင်ငံတွေ၊ အာဆီယံနိုင်ငံတွေ၊ ဒေသတွင်းက အခြားအရေးကြီးတဲ့ နိုင်ငံတွေနဲ့ ဆွေးနွေးသုံးသပ်ပြီးမှ ဖြစ်ပေါ်လာတာလို့ ကုလသမဂ္ဂဆိုင်ရာ ယူကေနိုင်ငံ သံအမတ်ကြီးက ပြောပါတယ်။

ဒီဆုံးဖြတ်ချက်ဟာ အာဆီယံရဲ့ မြန်မာနိုင်ငံအရေး ဖြေရှင်းဖို့ ကြိုးပမ်းမှုတွေကို ကုလသမဂ္ဂကနေ ထောက်ခံဖို့ အာဆီယံခေါင်းဆောင်တွေရဲ့ ပန်ကြားချက်ကို တုံ့ပြန်လိုက်တာလည်း ဖြစ်တယ်လို့ သူက ပြောပါတယ်။ မြန်မာ့အရေး ဆုံးဖြတ်ချက်မူကြမ်းကို ဗြိတိန်နိုင်ငံက ဦးဆောင်ရေးဆွဲခဲ့တာဖြစ်ပါတယ်။လုံခြုံရေးကောင်စီရဲ့ ဆုံးဖြတ် ချက်ဟာ ရက်စက်ကြမ်းကြုတ်တဲ့ စစ်ဗိုလ်ချုပ်တွေကို အရေးယူနိုင်မယ့် မြန်မာပြည်သူတွေကိုယ်စား အရေးကြီးတဲ့ ခြေလှမ်းတစ်ခုဖြစ်တယ်လို့ နိုင်ငံတကာ လူ့အခွင့်အရေးလေ့လာ စောင့်ကြည့်ရေးအဖွဲ့ HRWရဲ့ အာရှဆိုင်ရာဒါရိုက်တာ Elaine Pearson က ကြေညာချက်ထုတ်ပြီး ပြောလိုက်ပါတယ်။

ဒါ့အပြင် ဒီမိုကရေစီရေးအတွက် တိုက်ပွဲဝင်နေတဲ့ မြန်မာပြည်သူတွေရဲ့ ရဲရင့်တဲ့ ကြိုးပမ်းမှုတွေကို အသိအမှတ် ပြုမှုလည်း ဖြစ်တယ်လို့ ပြောပါတယ်။ ဒါဟာ ၁၉၄၈ ခုနှစ် မြန်မာနိုင်ငံ လွတ်လပ်ရေးရပြီးနောက်ပိုင်း မြန်မာ့အရေးနဲ့ ပတ်သက်တဲ့ ကုလသမဂ္ဂလုံခြုံရေး ကောင်စီရဲ့ ပထမဆုံးသော ဆုံးဖြတ်ချက်ဖြစ်ပါတယ်။

လုံခြုံရေးကောင်စီရဲ့ဒီဆုံးဖြတ်ချက်မှာ အကြမ်းဖက်တိုက်ခိုက်မှုတွေ ရပ်တန့်ဖို့၊ အာဆီယံနဲ့ရထားတဲ့ သဘောတူညီ ချက်တွေကို အမြန်ဆုံး အကောင်အထည် ဖော်ဖို့၊ မြန်မာပြည်သူတွေရဲ့မဲဆန္ဒကို လေးစားလိုက်နာဖို့၊ လူ့အခွင့်အရေးနဲ့ တာဝန်ခံမှု စံနှုန်းတွေကို လိုက်နာဖို့၊ လူသားချင်းစာနာမှုအကူအညီတွေကို အကန့်အသတ်မရှိ ခွင့်ပြုပေးဖို့နဲ့ မတရားဖမ်းဆီး ထိန်းသိမ်းထားသူတွေကို ပြန်လွှတ်ပေးဖို့ စတဲ့ အချက်တွေ ပါဝင်ပါတယ်။