15th APL 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဧပြီလ ( ၁၅ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ဟားခါးနယ်မှာ CNA ရဲ‌ဘော် Salai Saw Mana တိုက်ပွဲကျ

 

ဟားခါး - ဖလမ်းအကြား တနေရာတိုက်ပွဲမှာ CNA ရဲ‌ဘော် Salai Saw Mana ကျဆုံးတယ်လို့ သိရပါတယ်။

 

ပြီးခဲ့တဲ့ ဧပြီ ၁၀ ရက်နေ့ တိုက်ပွဲမှာ ကျဆုံးတာလို့ယူဆရပြီး ရုပ်အလောင်းကို ဧပြီလ (၁၂)ရက်မှာ ပြန်တွေ့တာလို့ Salai Saw Mana နဲ့ ဆွေမျိုးတော်စပ်သူက ပြောပါတယ်။

 

“၁၀ ရက်နေ့က တိုက်ပွဲတွင်း ပျောက်တယ်ကြားတော့ ကျနော်တို့လည်း တာဝန်ရှိပုဂ္ဂိုလ်တွေကို ဆက်သွယ်တယ်။ နောက်၂ရက်မြောက်နေ့မှ ကျသွားပြီဆိုတာ သေချာသိရတာ။” လို့ ပြောပါတယ်။

 

Salai Saw Mana ဟာ အာဏာသိမ်းပြီးတဲ့နောက် စစ်ကောင်စီကို လက်နက်ကိုင်တော်လှန်ဖို့ ချင်းအမျိုးသားတပ်မတော် (CNA) ထဲ ဝင်ခဲ့တာဖြစ်ပြီး ကျဆုံးချိန်မှာ အသက် ၂၃ နှစ်ဝန်းကျင်သာရှိသေးတယ်လို့ သိရပါတယ်။

 

ကန်ပက်လက်မြို့နယ်ဇာတိဖြစ်တဲ့ CNA ရဲဘော် Salai Saw Manaရဲ့ ရုပ်ကလပ်ကိုတော့ CAN ဌာနချုပ်မှာ ကောင်းကောင်းမွန်မွန် သင်္ဂြိုဟ်ပေးသွားပြီလို့ သိရပါတယ်။

 

ပြီးခဲ့တဲ့လကလည်း Salai Saw Mana နဲ့ ညီအစ်ကိုဝမ်းကွဲတော်စပ်တဲ့ CNA ရဲဘော်တစ်ဦး ‌ရှေ့တန်းတနေရာမှာ ကျဆုံးခဲ့ရသလို ချင်းအမျိုးသားတပ်မတော် (CNA) ပူးပေါင်းတပ်နဲ့ စစ်ကောင်စီတို့ ချင်းပြည်နယ် ဟားခါး၊ ဖလမ်းနယ်တွေမှာ ဧပြီ ၁၃ ရက်အထိ တိုက်ပွဲပြင်းထန်နေဆဲ ဖြစ်ပါတယ်။

 

========================

 

📌📌 ၂။  ၂ ရက်တာပစ်ခတ်မှုမှာ စစ်ကောင်စီ ၁၅ ဦးထက်မနည်းသေတယ်လို့ CDF မင်းတပ် အတည်ပြု

 

မင်းတပ်မြို့နယ် - မကွေးတိုင်းနယ်စပ် CDF မင်းတပ်၊ ယောဒေသကာကွယ်ရေးပူးပေါင်းတပ်နဲ့ စစ်ကောင်စီတို့ရဲ့ ပစ်ခတ် တိုက်ခိုက်မှုသတင်းကို ကာကွယ်ရေးအင်အားစုက ဧပြီ ၁၂ ရက်မှာသတင်းအတည်ပြု ထုတ်ပြန်လာပါတယ်။

 

ပြီးခဲ့တဲ့ ဧပြီ ၇ ရက်နေ့ဖြစ်ပွားခဲ့တဲ့ ကာကွယ်ရေးပူးပေါင်းတပ်နဲ့ စစ်ကောင်စီတို့ ထိတွေ့မှုမှာ ရန်သူ့အင်အား ၁၅ ဦးသေတယ် လို့ CDF မင်းတပ်က ထုတ်ပြန်ချက်မှာ ဖော်ပြထားပါတယ်။

 

တနေကုန်နီးပါးဖြစ်တဲ့ ဒီပစ်ခတ်မှုမှာ ပူးပေါင်းတပ်ဘက်က ထိခိုက်ဒဏ်ရာရသူတွေရှိနေတယ်လို့ ပြောပါတယ်။

 

ဒါ့ပြင် ဧပြီ ၁၀ ရက်နေ့ကလည်း မင်းတပ်မြို့အနောက်ဘက် ၉ မိုင်အနီးတဝိုက်မှာ စစ်ကောင်စီတပ်နဲ့ CDF မင်းတပ်တို့ နာရီဝက် လောက်ကြာတဲ့ ပစ်ခတ်မှုရှိတယ်လို့ ဆိုပါတယ်။

 

“သူတို့ (စခ) ကင်းလှည့်တာ စတော်ဘယ်ရီခြံနားဖြစ်မယ်၊ အပြန်လှန်ရယ်လို့တော့ မဟုတ်လောက်ဘူး။ စောင့်ပစ်တဲ့သဘော ထင်တယ်။ ညဘက်ဆိုတော့ ကျန်တာ မသိလိုက်ဘူး။” လို့ မင်းတပ်မြို့ အနောက်ရပ်ကွက်နေထိုင်သူက ပြောပါတယ်။ 

 

အဲဒီပြောက်ကျားစနစ်နဲ့ ပစ်ခတ်မှုမှာ ၃ ဦးသေတယ်လို့ CDF မင်းတပ်က ဆိုပါတယ်။

 

နေရာတိုင်းမှာ တိုက်ခိုက်ခံနေရတဲ့ စစ်ကောင်စီတပ်ဟာ ခုရက်ပိုင်း မင်းတပ်နယ်ထဲ လေကြောင်းတိုက်ခိုက်မှု ၁၀ ကြိမ်ထက် မနည်း ပြုလုပ်ထားပြီး လူနေအိမ်နဲ့ ဘုန်းကြီးကျောင်းတချို့ ထိခိုက်ပျက်စီးမှုရှိတယ်လို့လည်း ကာကွယ်ရေးဘက်က ထုတ်ပြန် ထားပါတယ်။

 

စစ်ကောင်စီနဲ့ ထိတွေ့ပစ်ခတ်တာတွေ ခပ်စိပ်စိပ်ရှိလာတဲ့ မင်းတပ်နယ်နိမိတ်အတွင်းမှာ ရိုးရာပွဲလမ်းသဘင်၊ လူစု၊ လူဝေး လုပ်တာမျိုး အထူးရှောင်ကြဖို့ CDF မင်းတပ်က ဧပြီ ၇ ရက်နေ့ ထုတ်ပြန်ချက်မှာ အရေးပေါ်အနေနဲ့ ကြေညာထား ပါတယ်။

 

========================

 

📌📌 ၃။ စစ်ကောင်စီရဲ့ ဗားရ်စခန်းကို CNDF သိမ်းပိုက်

 

ဖလမ်းမြို့နယ်၊ ဗားရ်ရွာစစ်ကောင်စီအ‌ခြေချစခန်းကို ဧပြီ ၁၀ ရက် ချင်းအမျိုးသားတပ် CNDF က တိုက်ခိုက်သိမ်းပိုက်တယ်လို့ သိရပါတယ်။

 

မနက် ၅ နာရီ မိနစ် ၃၀ ဝန်းကျင်မှာ စတင်တိုက်ခိုက်ခဲ့တာလို့သိရပြီး တစ်နာရီကျော်ကြာတဲ့ ဒီတိုက်ပွဲမှာ စစ်ကောင်စီ ဗိုလ်ကြီး တစ်ဦးအပါဝင် ၁၄ ဦးသေဆုံးပြီး ကျန် ၁၁ ဦးကို အဲဒီနေရာမှာတင် ဖမ်းမိထားတယ်လို့ CNDF က ပြောပါတယ်။

 

ဗားရ်စခန်းကနေ လက်၊နက်ပေါင်းစုံနဲ့ ကျ၊ည်အမြောက်မြား သိမ်းဆည်းရမိတယ်လို့လည်း CNDF က ထုတ်ပြန်ထားပါတယ်။

 

တိုက်ပွဲအတွင်း CNDF ရဲဘော်တစ်ဦးကျဆုံးခဲ့ပြီး ဗားရ်စခန်းသိမ်းပိုက်ခံရတဲ့ ဧပြီ ၁၀ ရက် ၁၁ နာရီဝန်းကျင် စစ်ကောင်စီက ဖလမ်းမြို့နယ် ဝေဘူလမြို့မှာ လေကြောင်း တိုက်ခိုက်တာကြောင့် ပြည်သူ ၉ ဦးထက်မနည်း ထိခိုက်အသက်ဆုံးရှုံးခဲ့ရပါတယ်။

 

========================

 

📌📌 ၄။ စစ်ကောင်စီရဲ့ သံချပ်ကာ ၂ စီးအပါဝင် လက်နက်၊ ရိက္ခာတင်ကားအားလုံး CNA ပူးပေါင်းတပ်က သိမ်းပိုက်

 

ချင်းအမျိုးသား တပ်မတော် (CNA), ချင်းကာကွယ်ရေးတပ် (CDF) နဲ့အတူ ပူးပေါင်းတပ်တွေက စစ်ကောင်စီရဲ့ သံချပ်ကာ ၂ စီးပါယာဉ်တန်းကို ဟားခါး - ဖလမ်း အကြားတနေရာမှာ သိမ်းပိုက်တဲ့ ဝေဟင်ရုပ်ပုံတွေလို့ The Chin Journal က ဧပြီ ၁၃ ရက်မှာ ဖော်ပြလာပါတယ်။

 

ဒီယာဉ်တန်းဟာ ပြီးခဲ့တဲ့ မတ်လဆန်းပိုင်းက ကလေးမြို့ကနေ ချင်းတောင်ဘက်ကို တိုက်ခိုက်ရေးသုံး သံချပ်ကာ ၂ စီးအပါဝင် ကားအစီးရေ ၃၀ ဝန်းကျင်နဲ့ တက်လာတာတဲ့ စစ်ကောင်စီယာဉ်တန်းရှည်ပါ။ 

 

လမ်းတလျှောက်တိုက်ခိုက်ခံလာရတဲ့ စစ်ကောင်စီတပ်ကတော့ ဟားခါး - ဖလမ်းအကြား ချွန်ကျူံးကျေးရွာအရောက်မှာ လက်နက်၊ ရိက္ခာတင်မော်တော်ယာဉ်အားလုံးလည်း လုံးပါးပါးသွားပါတယ်။ ရက်ပေါင်း ၃၀ ကျော်ကြာတဲ့ စစ်ကောင်စီရဲ့ ယာဉ်တန်းရှည်တိုက်ခိုက်မှုမှာ ကာကွယ်ရေးပူးပေါင်းတပ်ဘက်က ထိခိုက်ဆုံးရှုံးမှုတွေ ရှိနေပါတယ်။

 

ဒီယာဉ်တန်းရှည်ကို ချင်းအမျိုးသား တပ်မတော် (CNA), ချင်းကာကွယ်ရေးတပ် (CDF) တို့က ပူးပေါင်းတိုက်ခိုက်တာလို့ သိရပြီး ယောဒေသ ပြည်သူ့ကာကွယ်ရေးတပ်ဖွဲ့ (YPDF) ကလည်း ချင်းတောင်တနေရာမှာ ချင်းကာကွယ်ရေးတပ်တွေနဲ့ ပူးပေါင်းတိုက်ပွဲဝင်နေတာ တလရှိနေပြီလို့ ဧပြီ ၁၃ ရက် အစောပိုင်းက သတင်းထုတ်ပြန်ထားပါတယ်။

 

========================

 

📌📌 ၅။ လေကြောင်းတိုက်ခိုက်ခံရတဲ့ ပဇီကြီးမှာ အသက်ဆုံးရှုံးသူ ၁၆၀ ကျော်လာ

 

စစ်ကိုင်းတိုင်း၊ ကန့်ဘလူမြို့နယ်၊ ပဇီကြီးကျေးရွာ လေကြောင်းတိုက်ခိုက်ခံရမှုမှာ ဧပြီ ၁၃ ရက် မနက်ပိုင်းထိ အသက်ဆုံးရှုံး ရသူအရေတွက် ၁၆၀ ကျော်လာပြီလို့ Myanmar Now ရဲ့ သတင်းတစ်ပုဒ်မှာ ရေးထားပါတယ်။

 

ပြီးခဲ့တဲ့ ဧပြီ ၁၁၊ ၁၂ ရက်နေ့က ကျေးရွာပြည်သူ့လုံခြုံရေးအဖွဲ့ (ပလဖ) ရုံးဖွင့်ပွဲ ကျင်းပနေတဲ့ချိန် စစ်ကောင်စီက လေကြောင်း ကနေ ဗုံးနှစ်လုံးကြဲပြီးတဲ့နောက် ရဟတ်ယာဉ်နဲ့ အနီးကပ်လိုက်လံပစ်ခတ်ခဲ့တာလို့ မြေပြင်သတင်းရင်းမြစ်တွေကို ကိုးကားတဲ့ သတင်းဌာနတွေထံက သိရပါတယ်။

 

အခမ်းအနားတက်ရောက်လာတဲ့ ကာကွယ်ရေးအဖွဲ့ဝင်တွေ၊ ရွာခံ သက်ကြီးရွယ်အို၊ အမျိုးသမီးနဲ့ ကလေး စုစုပေါင်း ၂၀၀ ကျော်ရှိနေတဲ့ လူအုပ်တည့်တည့်မှာ ဖျက်အားပြင်း ဗုံး ၂ လုံးကျဲချခံရတာဖြစ်ပြီး သေဆုံးသူ ၁၆၀ ကျော်နဲ့ ဒဏ်ရာရသူ ၅၀ ကျော်ရှိနေပါတယ်။

 

အသက်ဆုံးရှုံးရသူတွေထဲမှာ ၁၈ နှစ်အောက် ကလေးအယောက် ၂၀ ဝန်းကျင်ပါတယ်လို့ NUG က ဧပြီ ၁၂ ရက် ညနေပိုင်းမှာ သတင်းထုတ်ပြန်ထားပါတယ်။

 

ဧပြီ ၁၁ ရက်နေ့ ကန့်ဘလူမြို့နယ်၊ ပဇီကြီးကျေးရွာ လေကြောင်းတိုက်ခိုက်ခံရမှုနဲ့ ပတ်သက်ပြီး စစ်ကောင်စီ သတင်း ထုတ်ပြန်ရေး ခေါင်းဆောင် ဇော်မင်းထွန်းက သူတို့ လေကြောင်းကတိုက်ခိုက်တာ မှန်ပေမယ့် PDF တွေရဲ့ မိုင်းတွေပေါက်ကွဲပြီး လူထိခိုက်မှုပိုများတာလို့ စစ်ကောင်စီဝါဒဖြန့် MRTV မှာ ပြောသွားပါတယ်။

 

#RadioNUGLocalNews

#SpringRevolution