30th JUL 2023 - Evening Daily News by Radio NUG

၂၀၂၃ ဇူလိုင်လ ၃၀ ရက်နေ့  ညနေခင်း နောက်ဆုံးရပြည်တွင်းသတင်းများ

သတင်းခေါင်းစဉ်များ -

📌 ၁။ ပြည်သူ့ကာကွယ်ရေးတပ်မတော်တွေက ထိုးစစ်၊တိုက်စစ်အဖြစ်လှုပ်ရှားနိူင်သလို စစ်ကောင်စီဘက်ကတော့ ခံစစ်အသွင်ပြောင်းလဲလှုပ်ရှားနေပြီလို့ ဝန်ကြီးချုပ်ပြောကြား

📌 ၂။ မဲဆန္ဒရှင်တွေရှိရာ ကွမ်းခြံကုန်းကို ပြန်လာမယ်လို့ လျှပ်စစ်နဲ့စွမ်းအင်ဝန်ကြီး အသိပေး

📌 ၃။ CRPH ပညာရေးကော်မတီက ကရင်နီပြည်နယ်ရှိ ကြားကာလအုပ်ချုပ်ရေးကောင်စီ(IEC)မှ ပညာရေးကော်မတီဝင်များ၊ မြို့နယ်ပညာရေးဘုတ်အဖွဲ့များနှင့် တွေ့ဆုံဆွေးနွေး

📌 ၄။ အမျိုးသားညီညွတ်ရေးအစိုးရတရားရေးဝန်ကြီးဌာန ကြားကာလတရားစီရင်ရေးဆိုင်ရာဦးစီးဌာနနှင့် မြို့နယ်တရားရုံးများမှ တရားသူကြီးများ(သီးသန့်) တွေ့ဆုံဆွေးနွေး

📌 ၅။ အကြမ်းဖက်စစ်ကောင်စီတပ်၏ မြေမြှုပ်မိုင်းနှင့် တိုက်မိုင်းများကြောင့် အပြစ်မဲ့ပြည်သူ ၁၂ နှစ် သမီးအရွယ် အမျိုးသမီးငယ် တစ်ဦး အပါအဝင် ၃ ဦး ဒဏ်ရာရ

📌 ၆။ လိမ်လည်သည်ဟု တိုင်ကြားခံရသူများ၏ အကောင့်များနှင့် လိမ်လည်သူများကို ငွေထုတ်နိုင်ရန် ကူညီပေးနေသည့် အကောင့်အချို့ကို NUG Payကပိတ်သိမ်း ခဲ့

ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်

========================

📌📌 ၁။ ပြည်သူ့ကာကွယ်ရေးတပ်မတော်တွေက ထိုးစစ်၊တိုက်စစ်အဖြစ်လှုပ်ရှားနိူင်သလို စစ်ကောင်စီဘက်ကတော့ ခံစစ်အသွင်ပြောင်းလဲလှုပ်ရှားနေပြီလို့ ဝန်ကြီးချုပ်ပြောကြား

ဇူလိုင်၃၀ 

ဇူလိုင်လအတွင်း ကျင်းပတဲ့ ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီအစည်းအဝေး အမှတ်စဉ်(၃၀/၂၀၂၃)တွင် ပြည်ထောင်စုဝန်ကြီးချုပ် မန်းဝင်းခိုင်သန်းက အခုလိုပြောကြားလိုက်ပါတယ်။

''မြန်မာနိုင်ငံနေရာအနှံ့အပြားမှာ စစ်ဒေသတွေ ခွဲခြားသတ်မှတ်ပြီး စစ်အာဏာရှင်ကို တော်လှန်ခဲ့ကြရာမှာ အခုဆိုရင်တော့ ကျွန်တော်တို့က ထိုးစစ်/တိုက်စစ်တွေအဖြစ် အသွင်ပြောင်းလဲလှုပ်ရှားနိုင်လာသလို စစ်ကောင်စီဘက်ကတော့ ပြန့်ကျဲနေတဲ့ အင်အားတွေကို စုစည်းပြီး ခံစစ်အသွင်ပြောင်းလဲလှုပ်ရှားရင်း သူတို့နေထိုင်ရာအဝန်းအဝိုင်းပြင်ပကို လုံးဝမထွက်ရဲတော့တဲ့အထိကို ဖြစ်လာနေပါတယ်''လို့ ဝန်ကြီးချုပ်ကဆိုပါတယ်။

၂၀၂၁ ခုနှစ် စက်တင်ဘာ၇ရက်မှာ ပြည်သူ့ခုခံတွန်းလှန်စစ်များ စတင်ဖို့ အမျိုးသားညီညွတ်ရေးအစိုးရက ကြေညာခဲ့ပါတယ်။

ပြည်သူ့ခုခံတွန်းလှန်စစ် ၂နှစ် တာကာလအတွင်း အကြမ်းဖက်စစ်ကောင်စီဘက်ကဘတပ်ဖွဲ့ဝင် သုံးသောင်းကျော်သေဆုံးခဲ့ပါတယ်။

========================

📌📌 ၂။ မဲဆန္ဒရှင်တွေရှိရာ ကွမ်းခြံကုန်းကို ပြန်လာမယ်လို့ လျှပ်စစ်နဲ့စွမ်းအင်ဝန်ကြီး အသိပေး

ဇူလိုင်၃၀

ဇူလိုင်လအတွင်းမှာ  NUGလျှပ်စစ်နဲ့စွမ်းအင်ဝန်ကြီး ဦးစိုးသူရထွန်းမှ "နိုင်ငံကို ချစ်တဲ့ အတွက်၊ တိုင်းရင်းသား ပြည်သူတွေကို ချစ်တဲ့အတွက် ကျွန်တော်တို့ အိမ်ပြန်လာဖို့ ကြိုးစားနေကြပါတယ်။ ကျွန်တော် ရန်ကုန်ပြန်လာမယ်၊ မဲဆန္ဒရှင်တွေရှိရာ ကွမ်းခြံကုန်းကို ပြန်လာမယ်။ ပြည်သူ အတွက် အများကြီး လုပ်နိုင်ခဲ့တဲ့ နေပြည်တော်ကို ပြန်လာမယ်။ မုံရွာနဲ့ လက်ပံတောင်းက ပြည်သူ တွေဆီ ပြန်လာမယ်။ ကြီးပြင်းခဲ့တဲ့ မြစ်ကြီးနားနဲ့ မြစ်ဆုံကို ပြန်လာမယ်။ အသက်နဲ့ ဘဝတွေ ပေးဆပ်နေကြတဲ့ ညီရင်း အကိုတွေ၊ သားသမီးများ နဲ့အတူ ပြန်လာပါမယ်"လို့ဆိုပါတယ်။

၂၀၂၁ ခုနှစ် ဖေဖော်ဝါရီ၁ရက်နေ့ စစ်တပ်က နိူင်ငံတော်အာဏာကို လုယူပြီးနောက်ပိုင်း စစ်အာဏာရှင် စနစ်ဆန့်ကျင်ရေး လူထုလှုပ်ရှားမှုနဲ့အတူ နွေဦးတော်လှန်ရေးပေါ်ပေါက်ခဲ့ပါတယ်။

========================

📌📌 ၃။ CRPH ပညာရေးကော်မတီက ကရင်နီပြည်နယ်ရှိ ကြားကာလအုပ်ချုပ်ရေးကောင်စီ(IEC)မှ ပညာရေးကော်မတီဝင်များ၊ မြို့နယ်ပညာရေးဘုတ်အဖွဲ့များနှင့် တွေ့ဆုံဆွေးနွေး

ဇူလိုင်၃၀

ဇူလိုင်လ ၂၉ ရက်၊ နံနက် ၁၀:၀၀ နာရီအချိန်တွင် ဗီဒီယိုကွန်ဖရင့်မှတစ်ဆင့် မြေပြင်တွင် ဆောင်ရွက်ထားရှိသည့် ပညာရေးဆိုင်ရာအခြေအနေများနှင့်စပ်လျဥ်း၍ တွေ့ဆုံဆွေးနွေးခြင်းကိုကျင်းပခဲ့ပါတယ်။

တွေ့ဆုံဆွေးနွေးပွဲတွင် CRPH ပညာရေးကော်မတီဥက္ကဋ္ဌက ကရင်နီပြည်နယ် ကြားကာလအုပ်ချုပ်ရေးကောင်စီ ဖွဲ့စည်းနိုင်ခဲ့ခြင်းအား လေးစားဝမ်းမြောက်ပါကြောင်း အဖွင့်အမှာစကားပြောကြားပြီးနောက် ကော်မတီအတွင်းရေးမှူးက တွေ့ဆုံရခြင်းရည်ရွယ်ချက်သည် တော်လှန်ရေးကာလတွင် ကရင်နီပြည်နယ်အတွင်းရှိ ပညာရေးကဏ္ဍ အကောင်အထည်ဖော် ဆောင်ရွက်နိုင်ရေးအတွက် လိုအပ်သည့်အကူအညီများ၊ ချိတ်ဆက်ဆောင်ရွက်မှုများနှင့် အနာဂတ်ဖက်ဒရယ်ပညာရေးအတွက် ပူးပေါင်းဆောင်ရွက်သွားနိုင်စေရန်ဖြစ်ပါကြောင်း ပြောကြားခဲ့ပြီး ကော်မတီ၏ ဆောင်ရွက်ထားရှိမှု အခြေအနေများအား ရှင်းလင်းခဲ့ပါတယ်။

ဆက်လက်၍ ကရင်နီပြည်နယ်၊ ကြားကာလအုပ်ချုပ်ရေးကောင်စီ (IEC)မှ ပညာရေးကော်မတီ ဒုတိယဥက္ကဋ္ဌက CRPH ပညာရေးကော်မတီနှင့် IEC ပညာရေးကော်မတီတို့ ပညာရေးကိစ္စရပ်များ အတူပူးပေါင်းဆောင်ရွက်နိုင်ရေးအတွက် တွေ့ဆုံမှုများ ပုံမှန်ပြုလုပ်လိုပါကြောင်းနှင့် ၎င်းတို့ပြုလုပ်မည့် ကမ်ပိန်းတွင်လည်း ပါဝင်အားဖြည့်ပေးစေလိုပါကြောင်း ပြောကြားဆွေးနွေးခဲ့ပါတယ်။

========================

📌📌 ၄။ အမျိုးသားညီညွတ်ရေးအစိုးရတရားရေးဝန်ကြီးဌာန ကြားကာလတရားစီရင်ရေးဆိုင်ရာဦးစီးဌာနနှင့် မြို့နယ်တရားရုံးများမှ တရားသူကြီးများ(သီးသန့်) တွေ့ဆုံဆွေးနွေး

ဇူလိုင်၃၀

အမျိုးသားညီညွတ်ရေးအစိုးရ၊ တရားရေးဝန်ကြီးဌာန၊ ကြားကာလတရားစီရင်ရေးဆိုင်ရာ ဦးစီးဌာနနှင့် မြေပြင်တရားရုံး(၂၈)ရုံးမှ တရားသူကြီးများ(သီးသန့်) တွေ့ဆုံဆွေးနွေးသည့် အစည်း အဝေးအမှတ်စဉ်(၂/၂၀၂၃)ကို ဇူလိုင်၂၉ရက်နေ့ ကကျင်းပခဲ့ပါတယ်။

အစည်းအဝေးသို့ တရားရေးဝန်ကြီးဌာန၊ ကြားကာလတရားစီရင်ရေးဆိုင်ရာဦးစီးဌာန ဒုတိယညွှန်ကြားရေးမှူးချုပ် ဒေါ်မေအောင်သူ၊ ညွှန်ကြားရေးမှူးများ၊ ကြားကာလတရားစီရင်ရေး ဆိုင်ရာဦးစီးဌာနမှ တာဝန်ရှိဝန်ထမ်းများ၊ မြေပြင်တရားရုံး(၂၈)ရုံးမှ မြို့နယ်တရားသူကြီးများ နှင့် ဆက်သွယ်ရေးတာဝန်ခံများ တက်ရောက်ခဲ့ကြပြီး တက်ရောက်လာသူများ၏ မေးမြန်းမှုများအပေါ် တာဝန်ရှိသူများမှ အသီးသီးပြန်လည် ဖြေကြားခဲ့ကြပါတယ်။

ထို့နောက် ဒုတိယညွှန်ကြားရေးမှူးချုပ် ဒေါ်မေအောင်သူမှ တက်ရောက်လာသော တရားသူကြီးများနှင့် ယခုလို အပြန်အလှန်ဆွေးနွေးမှုများရရှိခဲ့၍ လွန်စွာဝမ်းမြောက်ကြောင်း၊ တွေ့ဆုံဆွေးနွေး မေးမြန်းမှုများအတွက် တစုံတရာ အသိပညာ အတွေ့အကြုံကောင်းများ ရရှိနိုင်လိမ့်မည်ဟု ယုံကြည်ကြောင်း တက်ရောက်လာသူ ဆရာ/ဆရာမ များအားလုံးအား အထူးပင်ကျေးဇူးတင်ရှိပြီး ဘေးအန္တရာယ်ကင်းဝေးပါစေကြောင်းပြောကြားခဲ့ပါတယ်။

========================

📌📌 ၅။ အကြမ်းဖက်စစ်ကောင်စီတပ်၏ မြေမြှုပ်မိုင်းနှင့် တိုက်မိုင်းများကြောင့် အပြစ်မဲ့ပြည်သူ ၁၂ နှစ် သမီးအရွယ် အမျိုးသမီးငယ် တစ်ဦး အပါအဝင် ၃ ဦး ဒဏ်ရာရ

ဇူလိုင်လ ၂၉ ရက်၊ မနက် ၆ နာရီ ၄၃ မိနစ်    အချိန်ခန့်တွင် စကခ(၁၃) လက်အောက်ခံ၊ နဗဟ(၂) မှူး ဗိုလ်မှူးကြီး ကျော်ဇင်ယျ ဦးဆောင်သော ဝေါ်လေဗျူဟာကုန်းစခန်းမှ ပြည်သူနေ ကျေးရွာအနီးသို့ လိုက်လံထောင်ထားသော မြေမြှုပ်မိုင်းများကြောင့် ပြည်သူများ ထိခိုက်ဒဏ်ရာရရှိတယ်လို့ ကေအဲန်ယူ - ဒူးပလာယာ ခရိုင်ကဆိုပါတယ်။

 မြေမြှုပ်မိုင်းများကြောင့် ကေအဲန်ယူ - တပ်မဟာ (၆)၊ ဒူးပလာယာခရိုင်၊ ကော့ကရိတ်မြို့နယ်၊ အောင်မင်္ဂလာကျေးရွာနေ အဖဦးအောင်လင်း၏ သမီး နှစ်ဦးဖြစ်သော မခင်မာအေး (၁၂) နှစ် (စိုးရိမ်ဒဏ်ရာ)၊ မဌေးမိုး (၁၉) နှစ် နှင့် အဖ ဦးအောင်ဝင်း၏ သမီး မကောက်ချမ်း (၂၂)နှစ် တို့မှာ မျှစ်ရှာမှိုကောက်ရင်း မှိုင်းနင်းမိ ​ပေါက်ကွဲ ဒဏ်ရာရခဲ့တယ်လို့သိရပါတယ်။

အာဏာသိမ်းအကြမ်းဖက်စစ်ကောင်စီတပ်မှ အပြစ်မဲ့ ပြည်သူနေကျေးရွာများသို့ လက်နက်ကြီးများဖြင့် ရမ်းသမ်းပစ်ခတ်ခြင်း နှင့် မိုင်းများ လိုက်လံထောင်ထားခြင်းကြောင့် နယ်မြေခံပြည်သူများမှာ ဥယာဥ်ခြံမြေသို့ အလုပ်အကိုင် သွားလာလုပ်ကိုင်ရန် မဝံ့မရဲကြတော့ပဲ စိုးရိမ်ထိတ်လန့်လျှက် ရှိနေရကြောင်း သိရပါတယ်။

========================

📌📌 ၆။ လိမ်လည်သည်ဟု တိုင်ကြားခံရသူများ၏ အကောင့်များနှင့် လိမ်လည်သူများကို ငွေထုတ်နိုင်ရန် ကူညီပေးနေသည့် အကောင့်အချို့ကို NUG Payကပိတ်သိမ်း ခဲ့

ဇူလိုင်၃၀

ဇူလိုင်နောက်ဆုံးပတ်မှာ NUG Payက အခုလိုအသိပေးဖော်ပြပါတယ်။

NUGPay အနေဖြင့် တော်လှန်ရေးအတွင်းတွင် အများပြည်သူတို့၏ လှူဒါန်းထောက်ပံ့မှုများကို အခွင့်ကောင်းယူ၍ အသွင်ယူစိမ့်ဝင်မှုများနှင့် လိမ်လည်မှုများကို တားဆီးအရေးယူမှုများ ဆောင်ရွက် လျက်ရှိပြီး လိမ်လည်မှုများကို ကိုင်တွယ်ဆောင်ရွက်ရန် Fraud Management Team ကို ဖွဲ့စည်းပြီး ခိုင်လုံသော သက်သေများကို အခြေခံ၍ အရေးယူ ဆောင်ရွက်နေတယ်လို့ဖော်ပြပါတယ်။

 PDF, LPDF, UG စသော အဖွဲ့အစည်းများ အသွင်ယူ၍ လိမ်လည်သည်ဟု တိုင်ကြားမှုများ ရှိလာပါက သက်ဆိုင်ရာ ဝန်ကြီးဌာနများနှင့် သော်လည်းကောင်း၊ သက်ဆိုင်ရာအစုအဖွဲ့များ၏ တာဝန်ခံများနှင့် သော်လည်းကောင်း၊ ငွေကြေးလွဲပြောင်းမှု မှတ်တမ်းများကို စိစစ်အတည်ပြုပြီးမှသာ အရေးယူမှုများ ပြုလုပ်ဆောင်ရွက်တယ်လို့ဆိုပါတယ်။

အရေးယူမှုများ ပြုလုပ်ရာတွင် (Warning) သတိပေးခြင်း၊ (Temporary Freezing of Account) အကောင့် အသုံးပြုခွင့် ယာယီ ပိတ်သိမ်းခြင်း၊ (Permanent Freezing of Account) ရာသက်ပန် အကောင့်ပိတ်သိမ်းခြင်း၊ (Blacklisting) အကောင့်အသစ်ထပ်မံဝယ်ယူခွင့် ပိတ်သိမ်းခြင်းတို့ကို သက်သေ အထောက်အထားများကို အခြေခံ၍ ဆောင်ရွက်လျက်ရှိပြီး (Fraud Suspects) လိမ်လည်သည်ဟု တိုင်ကြားခံရသူများ၏ အကောင့်များနှင့် လိမ်လည်သူများကို ငွေထုတ်နိုင်ရန် ကူညီပေးနေသည့် အကောင့်အချို့ကို ပိတ်သိမ်း ခဲ့တယ်လို့ဖော်ပြပါတယ်။

အခု တင်ပြ‌ပေးခဲ့တဲ့ သတင်းတွေကို Radio NUG သတင်းထောက် မင်းသီဟန်က ပေးပို့ထားတာ ဖြစ်ပါတယ်။

#RadioNUGLocalNews

#SpringRevolution