📌 ၂၀၂၄ ခုနှစ် ဇန်နဝါရီလ ၈ ရက်နေ့မနက်ပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ

📌📌 ၁။ ဟုမ္မလင်းမြို့နယ်၊ သောင်သွပ်စံပြရွာရှိ ရန်သူ့တပ်စခန်းများကို PDFများ တိုက်ခိုက်သိမ်းပိုက် နိုင်ခဲ့ကြောင်း ကာကွယ်ရေးဝန်ကြီးဌာနထုတ်ပြန်

ဇန်နဝါရီလ (၇) ရက်နေ့ 

ဟုမ္မလင်းမြို့နယ်၊ သောင်သွပ်စံပြရွာရှိ ရန်သူ့တပ်စခန်းများကို PDFများ တိုက်ခိုက်သိမ်းပိုက် နိုင်ခဲ့ကြောင်း ကာကွယ်ရေးဝန်ကြီးဌာနက ဇန်နဝါရီလ ၇ရက်မှာ စစ်ရေးသတင်းကို ထုတ်ပြန်ပါတယ်။

"စစ်ကိုင်းတိုင်း၊ ခန္တီးခရိုင်၊ ဟုမ္မလင်းမြို့နယ်၊ သောင်သွပ်စံပြကျေးရွာတွင် အခြေချတပ်စွဲထားသည့် ရန်သူ့တပ်စခန်းများကို ဇန်နဝါရီလ (၅) ရက်နေ့၊ နံနက် (၆) နာရီတွင် အပြီးသတ် တိုက်ခိုက် သိမ်းပိုက် နိုင်ခဲ့တယ်"လို့ဆိုပါတယ်။ 

အမှတ် (၁) စစ်ဒေသကွပ်ကဲမှုဖြင့် ပြည်သူ့ကာကွယ်ရေးတပ်မတော်(PDF) စစ်ကိုင်းတိုင်း အထူး တပ်ရင်းများ၊ ခရိုင်တပ်ရင်းများ၊ ပကဖတို့ ပူးပေါင်းတိုက်ခိုက် သိမ်းပိုက်ခဲ့ခြင်းဖြစ်ကြောင်း ကာကွယ်ရေးဝန်ကြီးဌာနက ကနဦး အသိပေးထုတ်ပြန်ထားပါတယ်။

========================

📌📌 ၂။ တမူးမြို့နယ် ကာနန်စံပြကျေးရွာကို အကြမ်းဖက်စစ်တပ်က လေကြောင်းတိုက်ခိုက်ခဲ့တာကြောင့် ကလေးငယ် ၄ ဦးအပါအဝင် ၁၅ ဦးသေဆုံး

ဇန်နဝါရီလ ၇ရက်။

စစ်ကိုင်းတိုင်း တမူးမြို့နယ် ခမ်းပတ်မြို့မှာရှိတဲ့ ကာနန်စံပြကျေးရွာကို အကြမ်းဖက်စစ်တပ်က လေကြောင်းကနေ ပစ်ခတ်တိုက်ခိုက်ခဲ့တာကြောင့် ကလေးငယ် ၄ ဦးအပါအဝင် ၁၅ ဦး သေဆုံးခဲ့တယ်လို့ ဒေသတွင်းသတင်းရင်းမြစ်တွေဆီက သိရပါတယ်။ 

ဇန်နဝါရီလ ၇ ရက်နေ့ မနက် ၁ဝ နာရီခွဲခန့်အချိန်မှာ ခမ်းပတ်မြို့က ကာနန်စံပြကျေးရွာကို အကြမ်းဖက် စစ်တပ်က တိုက်လေယာဉ်အသုံးပြုပြီး ဗုံးကြဲတိုက်ခိုက်ခဲ့တာလို့ သိရပါတယ်။ 

အကြမ်းဖက်စစ်တပ်ရဲ့ တိုက်လေယာဉ်တစီးက ဗုံး ၄ လုံးကြဲချခဲ့ရာမှာ အထက်တန်းကျောင်းအနီး ကျရောက် ပေါက်ကွဲခဲ့တာကြောင့် ကျောင်းအနီးရှိ နေအိမ်တွေပျက်စီးခဲ့ပြီး အရွယ်မရောက်သေးတဲ့ ကလေးငယ်တွေ အပါအဝင် ဒေသခံ ၁၅ ဦး သေဆုံးခဲ့ရတယ်လို့ ဒေသတွင်းသတင်းတွေကို ဖော်ပြနေတဲ့ Chin World က အသိပေးထားပါတယ်။ 

အဆိုပါလေကြောင်းတိုက်ခိုက်မှုကြောင့် စာသင်ကျောင်းဆောင်တွေပျက်စီးခဲ့တယ်လို့လည်း သိရပါတယ်။ 

လက်ရှိမှာ ဒဏ်ရာရသွားတဲ့သူတွေကို နီးစပ်ရာဆေးရုံမှာ ပို့ဆောင်ကုသပေးနေပေမယ့် ထိခိုက်ဒဏ်ရာရသူ အရေအတွက်ကိုတော့ လတ်တလောမှာ အတိအကျမသိရသေးပါဘူး။ 

ကာနန်ကျေးရွာဟာ ကလေး-တမူး အာရှလမ်းမကြီးပေါ်မှာရှိပြီး ချင်းလူမျိုးတွေ အများစုနေထိုင်တဲ့ စံပြကျေးရွာဖြစ်တယ်လို့ ဒေသတွင်းသတင်းရင်းမြစ်တွေဆီက သိရပါတယ်။ 

ခမ်းပတ်မြို့ကို ပြည်သူ့ကာကွယ်ရေးတပ်တွေက ၂ဝ၂၃ ခုနှစ် နိုဝင်ဘာလဆန်းပိုင်းမှာ တိုက်ခိုက်သိမ်းပိုက်ခဲ့ တာဖြစ်ပါတယ်။

========================

📌📌 ၃။ နမ့်ဆန်မြို့နယ် မြို့သစ်ကျေးရွာကို စစ်ကောင်စီတပ်မှ Jet Fighter ဖြင့် (၂)ကြိမ် ဗုံး  လာရောက် ကြဲချပစ်ခတ်တိုက်ခိုက်၍ ကျောင်းဆရာမ (၃)ဦးအပါအဝင် ပြည်သူ (၅)ဦး သေဆုံးခဲ့ရ

ဇန်နဝါရီလ ၇ရက်။

ဇန်နဝါရီလ ၇ ရက်နေ့ တပ်မဟာ(၂)စစ်ဒေသ၊ နမ့်ဆန်မြို့နယ် မြို့သစ်ကျေးရွာ၊ နေ့လည် (၂း၃၅)နာရီ အချိန်တွင် စစ်ကောင်စီတပ်မှ Jet Fighter ဖြင့် (၂)ကြိမ် ဗုံး (၅)လုံးဖြင့် လာရောက် ကြဲချပစ်ခတ်တိုက်ခိုက်ခဲ့တယ်လို့ ဇန်နဝါရီလ ၇ရက်မှာ စစ်ရေးသတင်းကို TNLAကအတည်ပြုဆိုပါတယ်။

စစ်ကောင်စီတပ်မှ စာသင်ကျောင်းတွင် ဗုံးကြဲတိုက်ခိုက်မှုကြောင့် TNEC ကျောင်းဆရာမ (၃)ဦးအပါအဝင် ပြည်သူ (၅)ဦး သေဆုံးခဲ့ရပြီး၊ ကျေးရွာဒေသခံ (၆)ဦး ကျည်စထိမှန် ဒဏ်ရာပြင်းထန်ရရှိခဲ့ပြီး လူနေအိမ် (၇)လုံး ကျည်စထိမှန် ပျက်စီးဆုံးရှုံးခဲ့ပါတယ်။

အလားတူ နောင်ချိုမြို့နယ် စစ်ကောင်စီတပ်မှ တိုက်ပွဲဖြစ်ပွားရာ ကျောက်မဲလေးကျေးရွာသို့ Mi35 ဖြင့် (၅)ကြိမ်၊ Jet Fighter ဖြင့် (၆)ကြိမ်၊ ဖျက်အားပြင်း ပေါင် (၅၀၀)ဗုံး (၂)လုံး လာရောက်ပစ်ခတ်တိုက်ခိုက်ခဲ့ရာ စစ်ကောင်စီတပ်၏ ပစ်ခတ်တိုက်ခိုက်မှုကြောင့် ကျောက်မဲလေးရွာရှိ လူနေအိမ် (၃)လုံး ကျည်စထိမှန် မီးလောင်ပျက်စီးခဲ့ရပါတယ်။

========================

📌📌 ၄။ တောင်ငူ ခရိုင်အတွင်းရှိ အာဏာသိမ်းအကြမ်းဖက်စစ်ကောင်စီ၏ တပ်စခန်း (၁) လုံး ထပ်မံ စွန့်ခွာ ထွက်ပြေး

ဇန်နဝါရီလ (၇) ရက်

ဇန်နဝါရီလ ၇ရက် ကေအဲန်ယူ−ဗဟိုက စစ်ရေးသတင်းကိုအတည်ပြုပါတယ်။

ကေအဲန်ယူ−ကရင်အမျိုးသားအစည်းအရုံး၊ ကော်သူးလေအုပ်ချုပ်နယ်မြေ၊ တောအူး(တောင်ငူ)ခရိုင်၊ တပ်မဟာ (၂)၊ ထောတထူ(ထန်းတပင်)မြို့နယ်၊ ဒေးလိုကျေးရွာအုပ်စု၊ မူဆာလေးတွင် ၂၀၁၃ ခုနှစ်မှ စတင်တပ်စွဲထားသည့် သောက်ရေခပ် အမှတ် (၂) ရေအားလျှပ်စစ်ထုတ်လုပ်ရေး ရေကာတာ လုံခြုံရေး ယူထားသော မူဆာလေးတပ်စခန်းမှ စကခ (၂၀) အောက်ရှိ ခမရ−၅၈၁ တပ်သားများမှာ (၂၀၂၄) ခုနှစ် ဇန်နဝါရီလ (၂) ရက်နေ့တွင် ၎င်းတို့၏ စခန်းများအား စွန့်ခွာပြီး ထွက်ပြေးသွားကြသည့် အတွက်ကြောင့် ကရင်အမျိုးသားလွတ်မြောက်ရေး တပ်မတော် (K.N.L.A) တပ်ရင်း (၆) မှ ထိုစခန်းအား ရှင်းလင်းရေးလုပ်ငန်းများ လုပ်ဆောင်ခဲ့ပြီးနောက် မီးရှို့ဖျက်ဆီးခဲ့တယ်လို့ဆိုပါတယ်။

တောအူး(တောင်ငူ)ခရိုင်အတွင်း ၂၀၂၃ ခုနှစ် ဒီဇင်ဘာလ (၃၁) ရက်နေ့တွင် ဖလေးဆာလိုတပ်စခန်း၊ ၂၀၂၄ ခုနှစ် ဇန်နဝါရီလ (၂) ရက်နေ့တွင် ကလောမီဒဲ တပ်စခန်းကြီးတို့မှ အသီးသီးစွန့်ခွာ ထွက်ပြေးသွားသောကြောင့် မူဆာလေး တပ်စခန်းရှိ စစ်ကောင်စီတပ်များသည်လည်း မနေရဲတော့ဘဲ ၎င်းတို့၏ တပ်စခန်းများကို စွန့်ခွာထွက်ပြေးသွားရခြင်းဖြစ်သည့်အတွက် (၃) ရက် အတွင်း အာဏာသိမ်း အကြမ်းဖက် စစ်ကောင်စီတပ်မှ စွန့်ခွာထွက်ပြေးသည့် တပ်စခန်း (၃) လုံး အထိ ရှိလာပြီး ဖြစ်တယ်လို့သတင်းရရှိပါတယ်။

========================

📌📌 ၅။ မွန်ပြည်နယ်ခေါဇာမြို့နယ်ရဲစခန်းကို မီးရှို့ရှင်းလင်း

ဇန်နဝါရီလ ၇ရက်။

မွန်ပြည်နယ်ခေါဇာမြို့နယ် ရဲစခန်းကို မီးရှို့ရှင်းလင်းခဲ့တယ်လို့ ရေးဘီလူးအဖွဲ့က ဇန်နဝါရီလ ၇ရက်မှာ ရေးဘီလူးကအတည်ပြုပြောပါတယ်။

"၂၀၂၂ တုန်းက ခေါဇာစခန်းမှူးနဲ့တပ်ကြပ်တစ်ဦး၊ တပ်သားတစ်ဦးတို့ကိုရှင်းလင်းခဲ့တယ်။၂၀၂၃ အကူးအပြောင်းမှာ ကျန်တဲ့သူကနေမရဲတော့ဘူးစခန်းမှာ။ စခန်းမှာမနေတော့ပဲ တပ်မှာသူတို့ပြောင်းနေတယ်။ ရဲစခန်းကိုတော့ လုံခြုံရေးချထားတာပေါ့။ အခုတော့ စခန်းကိုရှင်းလင်းလိုက်ချိန် သူတို့အလာစောင့်သေးတယ်။ လာရင်ပစ်ဖို့။ ဒါပေမယ့်သူတို့မလာရဲဘူး"လို့ရေးဘီလူးကပြောပါတယ်။

ခေါဇာမြို့ရဲစခန်းစခန်းမှူးအပါဝင်တပ်ကြပ်တဦးတပ်သားတို့ကို၂၀၂၂ ခုနှစ်ကရှင်းလင်းရာမှာ ဂမ်းတိုတလက်အရှည်၂လက်ပေါင်း၃လက်ရယူခဲ့ဘူးခဲ့ပါတယ်။

========================

📌📌 ၆။ ပခုက္ကူမြို့အနောက်ဖက် တင်းဂါတ်ဂိတ်ကို ဝေဟင်မှတိုက်ခိုက်၍ စကစတပ်ဖွဲ့ဝင်နှစ်ဦးအပြင်းထန်ဒဏ်ရာရ

ဇန်နဝါရီလ ၇ရက်။

ဇန်နဝါရီ၇ရက်မှာ စစ်ရေးသတင်းကို Young Force - UGကအတည်ပြုပါတယ်။

"ဇန်နဝါရီလ ၄ရက် နံနက်(၁၁)နာရီဝန်းကျင်ခန့်တွင် ပခုက္ကူမြို့အနောက်ဖက် တင်းဂါတ်ဂိတ်ကို ဝေဟင်မှ ဗုံးကြဲတိုက်ခိုက်ခဲ့ပါတယ်"လို့ဆိုပါတယ်။

စစ်ဆင်ရေးတွင်စကစဘက်ကနှစ်ဦးပြင်းထန်စွာဒဏ်ရာရရှိပြီး ပခုက္ကူမြို့ဆေးရုံသို့ အရေးပေါ်ကုသမှုခံယူနေရကြောင်းသိရှိရပါတယ်။

တိုက်ခိုက်မှုများကို မြိုင်ပကဖ တပ်ရင်း(၁)နှင့် ပခုက္ကူမြို့နယ် ပကဖ တပ်ခွဲ(၂)မှ ThuRain-TR(Pakokku)၊

Black Cobra Force(Pakokku)တို့မှ ပူးပေါင်းဆောင်ရွက်ခဲ့ပါတယ်။

========================

📌📌 ၇။ ဝန်းသိုမြို့နယ်တွင် စစ်တပ်ကဖမ်းဆီးသွားသူများကို သေဆုံးအနေအထားဖြင့် တွေ့ရှိ

ဇန်နဝါရီလ ၇ရက်။

စစ်ကိုင်းတိုင်း ကောလင်းခရိုင် ဝန်းသိုမြို့နယ်အတွင်း အကြမ်းဖက်စစ်တပ်၏ ဖမ်းဆီးခြင်းခံခဲ့ရသူများကို သေဆုံးနေတဲ့အနေအထားနဲ့ တွေ့ရှိရတယ်လို့ Kawlin Revolution- KR က ထုတ်ပြန်ပါတယ်။ 

ဇန်နဝါရီလ ၅ ရက်နေ့က ဝန်းသိုမြို့အခြေစိုက် ခမရ - ၁၂ဝ အနီး ဒေသအခေါ် ကျောက်စိမ်းဘုရားအနီးမှာ အကြမ်းဖက်စစ်တပ်ရဲ့ ဖမ်းဆီးခြင်းခံခဲ့ရတဲ့ စပါးကုန်သည်များနဲ့ ကားသမားအချို့ကို ဇန်နဝါရီလ ၇ ရက်နေ့ မှာ သေဆုံးနေတဲ့အနေအထားတွေနဲ့ တွေ့ရှိခဲ့တာဖြစ်တယ်လို့ သိရပါတယ်။ 

သေဆုံးသူတွေကို ခြေကျင်းဝတ်များနဲ့ လက်ပြန်ကြိုးတုပ်ထားတဲ့အနေအထားနဲ့တွေ့ရှိခဲ့တာဖြစ်ပြီး ရင်ဘတ် နဲ့ ခေါင်းတွေမှာ သေနတ်ဒဏ်ရာတွေနဲ့ သေဆုံးနေတာကိုတွေ့ရှိရတာလို့ အသိပေးထားပါတယ်။

စပါးကုန်သည်တွေနဲ့ ကားသမားတွေကိုဖမ်းဆီးခဲ့ချိန်က ကားတွေနဲ့ စပါးတွေကို ခမရ ၁၂ဝ တပ်က သိမ်းဆည်းသွားပြီး ဝန်းသိုမြို့တွင်းရှိ ဆန်စက်တွေမှာ ပြန်လည်ရောင်းချနေတယ်လို့ သတင်းရထားတဲ့ အကြောင်းလည်း Kawlin Revolution- KR က ပြောပါတယ်။ 

ဇန်နဝါရီလ ၇ ရက်နေ့ ညပိုင်းအထိ သေဆုံးသူတွေထဲက ကောလင်းမြို့ခံ ၅ ဦးရဲ့အမည်ကိုသာအတည်ပြုနိုင်သေးတဲ့အကြောင်းနဲ့ သေဆုံးသူတွေအနီးမှာ ကပစထုတ် ၅ ဒသမ ၅၆ မမ ကျည်ခွံတွေ တွေ့ရတဲ့အကြောင်း  Kawlin Revolution- KR က ထုတ်ပြန်ထားပါတယ်။

အခု တင်ပြခဲ့တဲ့ စစ်ရေးသတင်းကောက်နုတ်ချက်တွေကို Radio NUG သတင်းထောက် မင်းသီဟန်နဲ့ ကိုခန့် က ပေးပို့ထားတာ ဖြစ်ပါတယ်။

#RadioNUGLocalNews

#SpringRevolution