14 Jun 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဇွန်လ ( ၁၄ ) ရက်နေ့နောက်ဆုံးရပြည်တွင်းသတင်းများ

📌📌 ၁။ အမေရိကန်ရောက် မြန်မာတွေ အခက်အခဲရှိရင် NUGဆီ အကူအညီတောင်းနိုင်တယ်လို့ပြော။

 

အမေရိကန်ပြည်ထောင်စုမှာရှိနေတဲ့ မြန်မာနိုင်ငံသားတွေအနေနဲ့ အမျိုးသားညီညွတ်ရေးအစိုးရ - NUG တာဝန်ရှိသူတွေနဲ့ဆက်သွယ်ပြီး အကူအညီတောင်းလာရင် တတ်နိုင်သမျှကူညီမယ်တယ်လို့ NUG ဝန်ကြီးချုပ်ရုံးပြောရေးဆိုခွင့်ရှိသူ ဦးနေဘုန်းလတ်က ပြောပါတယ်။

ဇွန် ၁၀ရက်နေ့ ပြုလုပ်တဲ့ “ပြည်သူလူထုနှင့်နိုင်ငံတကာသို့ သတင်းစကားပြောကြားခြင်း” အစီအစဉ်မှာ အမေရိကန်နိုင်ငံရဲ့ ပြည်ဝင်ခွင့်ပိတ်ပင်တဲ့နိုင်ငံစာရင်းထဲ မြန်မာနိုင်ငံပါဝင်နေတာနဲ့ ပတ်သက်ပြီး ထည့်သွင်းပြောခဲ့တာပါ။

“အမေရိကန်ရဲ့ ပြည်ဝင်ခွင့်ပိတ်ပင်တဲ့ထဲမှာ မြန်မာနိုင်ငံပါဝင်နေတာ စိတ်မကောင်းဖွယ် တွေ့ရှိရပါတယ်။ လုံခြုံရေးအပါအဝင် အခြားကိစ္စရပ်တွေနဲ့ ပတ်သက်ပြီး စိုးရိမ်ဖွယ်ရှိတာကြောင့် လုပ်သင့်တဲ့အရာ ဆောင်ရွက်တဲ့အပေါ် နားလည်ပါတယ်။ မြန်မာနိုင်ငံသားတွေနဲ့ မြန်မာနွယ်ဖွားတွေအနေနဲ့ အမေရိကန်ပြည်ထောင်စုရဲ့ တည်ဆဲဥပဒေနဲ့ စည်းမျဉ်းစည်းကမ်းတွေကို  လိုက်နာဆောင်ရွက်ပေးကြဖို့ကို တိုက်တွန်းပါတယ်။ အခက်အခဲတစုံတရာရှိမယ်ဆိုရင်လည်း အမေရိကန်ပြည်ထောင်စုမှာရှိနေတဲ့ အမျိုးသားညီညွတ်ရေးအစိုးရ တာဝန်ရှိသူတွေနဲ့ဆက်သွယ်ပြီး အကူအညီတောင်းနိုင်ပါတယ်။ အမျိုးသားညီညွတ်ရေးအစိုးရ အနေနဲ့ ကူညီဆောင်ရွက်နိုင်တဲ့ကိစ္စဆိုရင် တတ်နိုင်သမျှကူညီဆောင်ရွက် ပေးသွားမှာဖြစ်ပါတယ်”လို့ NUG ဝန်ကြီးချုပ်ရုံးပြောရေးဆိုခွင့်ရှိသူ ဦးနေဘုန်းလတ်က ပြောပါတယ်။

အမေရိကန်နိုင်ငံရဲ့ အမျိုးသားလုံခြုံရေးနဲ့ ပြည်သူ့လုံခြုံရေးအန္တရာယ် ကာကွယ်ဖို့အတွက်ဆိုပြီး မြန်မာအပါအဝင် နိုင်ငံပေါင်း ၁၂ နိုင်ငံကို အမေရိကန်နိုင်ငံထဲ ခရီးသွားလာဝင်ရောက်ခွင့် တားမြစ်တဲ့အမိန့်ကို သမ္မတဒေါ်နယ်ထရမ့်က ၂၀၂၅ ဇွန်လ ၅ ရက်က လက်မှတ်ရေးထိုး ထုတ်ပြန်ခဲ့တာ ဖြစ်ပါတယ်။

 

========================

 

📌📌 ၂။ ပုလဲမြို့နယ်မှာ PLA ကဂျက်ဖိုက်တာတစ်စီးပစ်ချ။

 

စစ်ကိုင်းတိုင်း၊ပုလဲမြို့နယ်မှာ ပြည်သူ့လွတ်မြောက်ရေးတပ်မတော်က-PLAက စစ်ကောင်စီရဲ့ ဂျက်ဖိုက်တာတစ်စီးပစ်ချနိုင်ခဲ့တယ်လို့ ဇွန်လ ၁၀ရက်နေ့မှာ ထုတ်ပြန်ပါတယ်။

ဇွန်လ ၁၀ရက်နေ့ ကန့်ဒေါင့်စခန်းသိမ်းပွဲအတွင်း စစ်ကောင်စီဘက်က လေကြောင်းပစ်ကူလာတဲ့ ဂျက်ဖိုက်တာတစ်စီးကို နေ့လည် ၁၂:၁၃မိနစ်အချိန်မှာ ပြည်သူ့လွတ်မြောက်ရေးတပ်မတော် PLA က ပစ်ချနိုင်ခဲ့တာလို့ သိရပါတယ်။

ပုလဲမြို့နယ် ပုလဲနှင့်ဂန့်ဂေါ်လမ်းမပေါ်မှာရှိတဲ့ ကန့်ဒေါင့်ရဲစခန်းကို ဇွန်လ ၂ရက်နေ့ကစပြီး PLAနှင့်ပူးပေါင်းတပ်ဖွဲ့များက ထိုးစစ်ဆင်တိုက်ခိုက်ခဲ့တာဖြစ်ပြီး အချက်အလက်များကို ဆက်လက်ဖော်ပြသွားမယ်လို့လည်း ထုတ်ပြန်ထားပါတယ်။

ပြီးခဲ့တဲ့ မေလ၂၀ရက်နေ့မှာလည်း ဗန်းမော်မြို့သိမ်းတိုက်ပွဲအတွင်း စစ်ကောင်စီ ရဟတ်ယာဉ် ၂စီးကို KIAက ပစ်ချနိုင်ခဲ့တာလည်းဖြစ်ပါတယ်။

 

========================

 

📌📌 ၃။ မတူပီမြို့နယ်အတွင်း မိုးများပြီး ကားလမ်းများပျက်စီး၊ ဒေသခံပြည်သူများ ခရီးသွားလာရန် အခက်ကြုံတွေ့နေ။

 

မတူပီမြို့နယ်အတွင်း မိုးများပြီး မြေပြိုတာတွေကြောင့် မတူပီ-မင်းတပ်မြို့လမ်းပိုင်း၊ မတူပီ-ရေဇွာမြို့လမ်းပိုင်း နှင့် မတူပီ-တင်လောင်းကျွေးရွာ ကားလမ်းများ ပျက်စီးသွားကြောင်းသိရပါတယ်။

ကားလမ်းပျက်စီးမှုတွေကြောင့် ဒေသခံပြည်သူများအနေဖြင့် ခရီးသွားလာရာတွင် အခက်အခဲများကြုံတွေ့နေရကြောင်းသိရပါတယ်။ မင်းတပ်-မတူပီလမ်းပိုင်းကို MRO/CDF Matupiက ပြုပြင်နေပြီး ယခုရက်ပိုင်း ရာသီဥတုဆိုးရွားမှုကြောင့် လမ်းပြုပြင်မှုမပြီးစီးသေးတာကြောင့်  ဇွန်လ(၁၅)ရက်နေ့ထိ ယာဉ်များအားလုံးဖြတ်သန်းသွားလာခြင်းမပြုလုပ်ကြဖို့ အသိပေးထားပါတယ်။

အလားတူ ရေဇွာ-မတူပီ လမ်းပိုင်းတစ်နေရာတွင်လည်း မြေပြိုကျမှုတွေကြောင့် ကားလမ်းပျက်စီးသွားပြီး ယာဉ်များဖြတ်သန်းသွားလာလို့မရဘဲ ဆိုင်ကယ်သာဖြတ်သန်းသွားလာနိုင်ကြောင်းသိရပါတယ်။ ဒါ့အပြင် မတူပီမြို့နှင့်တင်လောင်းကျေးရွာ ကြားတွင်လည်း မိုးများပြီး တောင်ကျရေတွေကြောင့် မြေပြို၊ရေတိုက်စားလို့ အများပြည်သူသုံးလမ်းပျက်စီးသွားပြီး သွားလာရန်အခက်အခဲကြုံတွေ့နေရကြောင်းသိရပါတယ်။

#RadioNUGLocalNews

#SpringRevolution