16 Jun 2025 - (Ethnic language program-Matupi) by The Matupi Times

 

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇွန်လ ( ၁၆ ) ရက်နေ့ ရပြည်တွင်းသတင်းများ

📌📌 ၁/ ဂန့်ဂေါ-ရေဇွာလမ်းပိုင်းကို ချင်းပြည် (ချင်းလဲန်း) အစိုးရနှင့် ဇိုတုန်ဖက်ဒရယ်ကောင်စီတို့မှ ပြုပြင်ဆောင်ရွက်နေ

The Matupi Times၊ ဇွန်လ ၉၊ ၂၀၂၅

ချင်းပြည် (ချင်းလဲန်း) အစိုးရနှင့် ဇိုတုန်ဖက်ဒရယ်ကောင်စီတို့ ပူးပေါင်းပြီး မိုးရွာသွန်းမှုကြောင့် ပျက်စီးသွားသည့် ဂန့်ဂေါ-ရေဇွာ လမ်းမကြီးကို ပြုပြင်ဆောင်ရွက်လျက်ရှိကြောင်း သိရသည်။

ဂန့်ဂေါမြို့မှ ချင်းပြည်သို့ ဆက်သွယ်သော ပြည်ထောင်စုလမ်းမကြီး ဂန့်ဂေါ-ရေဇွာလမ်းသည် မိုးအဆက်မပြတ် ရွာသွန်းမှုကြောင့် လမ်းများ ပျက်စီးလျက်ရှိပြီး ကုန်စည်စီးဆင်းမှု မပြတ်လတ်စေရန် ချင်းပြည် (ချင်းလဲန်း) အစိုးရနှင့် ဒေသန္တရအစိုးရတို့ ပူးပေါင်းလျက် လမ်းများ ပြုပြင်လျက်ရှိတယ်လို့ ဆိုပါတယ်။

အဆိုပါ လမ်းမကြီးသည် ပြည်သူများအတွက် အဓိကအားထားရသည့် လမ်းပိုင်းဖြစ်တာကြောင့် ပြည်သူများနှင့် ကုန်စည်သမားများအနေဖြင့် တတ်နိုင်သည့်ဖက်မှ ဝိုင်းဝန်းပူးပေါင်း ပါဝင်ပေးကြဖို့လည်း တောင်းဆိုထားပါတယ်။ ပြီးခဲ့တဲ့ရက်ပိုင်းက မိုးသည်းထန်စွာ ရွာသွန်းမှုကြောင့် ရေဇွာ-မတူပီလမ်းပိုင်းလည်း ပျက်စီးမှုတွေရှိတယ်လို့ ဒေသခံတွေထံက သိရပါတယ်။

 

========================

 

📌📌 ၂/ စစ်ကောင်စီဂျက်ဖိုက်တာ တစင်းကို ပြည်သူ့လွတ်မြောက်ရေးတပ်မတော် - PLA ပစ်ချနိုင်ခဲ့

The Matupi Times၊ ဇွန် ၁၀၊ ၂၀၂၅

စစ်ကိုင်းတိုင်း၊ ပုလဲမြို့နယ်၊ ကန့်ဒေါင့်စခန်းသိမ်း တိုက်ပွဲတွင် ပြည်သူ့လွတ်မြောက်ရေးတပ်မတော် - PLA က စစ်ကောင်စီ၏ ဂျက်ဖိုက်တာ တစင်းကို ဇွန်လ ၁၀ ရက် နေ့လယ် ၁၂:၁၅ မိနစ်အချိန်ခန့်တွင် ပစ်ချနိုင်ခဲ့ကြောင်း သိရပါတယ်။

လေယာဉ်ပျက်ကျသည့်နေရာတွင် ပေါက်ကွဲပြီး ထွက်လာတဲ့ ပိုင်းလော့ဆောင်း ဦးထုတ်တလုံးနဲ့ ဦးခေါင်းခွံ တခု တွေ့ရှိခဲ့ရပြီး၊ ပစ္စည်းနှင့် ခန္ဓာကိုယ်အစိတ်အပိုင်းများအရ လေယာဉ်မှူးများ သေဆုံးသည်ဟု ယူဆရကြောင်း သိရသည်။

ပစ်ချခံရ၍ တိုက်လေယာဉ်ပျက်ကျမှုကို စက်ချို့ယွင်း၍ မတော်တဆ ပျက်ကျခြင်းသာဖြစ်ကောင်း စစ်ကောင်စီက ပစ်ချခံရပြီး နာရီပိုင်းအတွင်း သတင်းထုတ်ပြန်လိုက်ပါတယ်။

လေယာဉ်ပျက်မှုနဲ့ ပတ်သက်လို့ အကြမ်းဖက်စစ်ကောင်စီက တပ်မတော်မှ တိုက်ခိုက်လေယာဉ်တစင်းသည် လေ့ကျင့်ရေး ဆောင်ရွက်စဉ် ရုတ်တရက် စက်ချို့ယွင်း ဖြစ်ပေါ်ကာ ပုလဲမြို့နယ်၊ မင်းတိုင်ပင်ကျေးရွာ၏ အရှေ့မီတာ ၂၀၀၀ ခန့်အကွာ စပါးစေ့ကျေးရွာအနီး ပျက်ကျခဲ့တယ်လို့ သတင်းထုတ်ပြန်ပါတယ်။

 

========================

 

📌📌 ၃/ MDF / CDF-Mindat / SRF တို့၏ အခြေခံစစ်သင်တန်းဆင်းပွဲများ အသီးသီးကျင်းပ

The Matupi Times၊ ဇွန်လ ၁၃၊ ၂၀၂၅

ချင်းကာကွယ်ရေးတပ်ဖွဲ့ မင်းတပ် (Chin Defense Force - Mindat) ဗဟိုလေ့ကျင့်ရေးသင်တန်းကျောင်းမှ ပြုလုပ်သော အခြေခံစစ်သင်တန်းအပတ်စဉ် (၅) သင်တန်းဆင်းပွဲကို အောင်မြင်စွာ ကျင်းပပြုလုပ်ခဲ့ကြောင်း သိရသည်။

အဆိုပါ သင်တန်းဆင်းပွဲကို ယမန်နေ့ ဇွန်လ ၁၂ ရက်နေ့တွင် ကျင်းပပြုလုပ်ခဲ့ခြင်းဖြစ်ပြီး၊ သင်တန်းဆင်းပွဲသို့ စစ်ဦးစီးချုပ်နဲ့ တပ်မှူးများ တက်ရောက်ခဲ့ကြောင်း CDF-Mindat က ဒီကနေ့ညပိုင်းမှာ သတင်းထုတ်ပြန်ပါတယ်။

မရာနယ်မြေအုပ်ချုပ်ရေးကောင်စီ / မရာလဲန်းကာကွယ်ရေးတပ်ဖွဲ့မှ စီစဉ်ပြုလုပ်သည့် အခြေခံစစ်ပညာသင်တန်း အမှတ်စဉ် (၄) သင်တန်းဆင်းပွဲ အခမ်းအနားကို ပြီးခဲ့တဲ့ ဇွန်လ ၁၁ ရက်နေ့တွင် အောင်မြင်စွာ ကျင်းပခဲ့ကြောင်း သိရပြီး Senthang Revolution Force (SRF) ၏ ပထမအကြိမ် စစ်ပညာစွမ်းရည်မြှင့်တင်ရေး မွမ်းမံသင်တန်းကို ၂၀၂၅ ခုနှစ်၊ ဇွန်လ ၁၁ ရက်နေ့တွင် အောင်မြင်စွာ ကျင်းပပြုလုပ်ခဲ့ကြောင်း သိရသည်။

 

========================

 

📌📌 ၄/ နတ်ရေကန်စခန်းမှ ထွက်ပြေးလာသော စစ်ကောင်စီတပ်သား (၂၀) ကျော်ကို CDF - Asho အရှင်ဖမ်းဆီးရမိ

The Matupi Times၊ ဇွန်လ ၁၄၊ ၂၀၂၅

မကွေးတိုင်း၊ ငဖဲမြို့နယ်၊ နတ်ရေကန် လေကြောင်းရန်ကာကွယ်ရေးတပ်စခန်း (ဗျူဟာကုန်း) မှ စစ်ကောင်စီ တပ်သား (၂၀) ကျော်ကို အရှင်ဖမ်းဆီးရမိခဲ့တယ်လို့ ချင်းကာကွယ်ရေးတပ် - အရှို (CDF - Asho) က ယမန်နေ့ ဇွန်လ ၁၃ ရက်နေ့မှာ သတင်းထုတ်ပြန်ပါတယ်။

ယခု ဖမ်းဆီးရမိခဲ့တဲ့ စစ်သုံးပန်းတွေဟာ စစ်မှုမထမ်းမနေရ ဥပဒေကြောင့် အတင်းအဓမ္မ ပေါ်တာဆွဲဖမ်းဆီးခံရသူတွေဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

CDF-Asho အနေဖြင့် စစ်ကောင်စီတပ်သား (၂၃) ဦးကို နတ်ရေကန်လမ်းဟောင်းကို ဖြတ်တောက်တိုက်ခိုက်ရေး လုပ်ဆောင်နေစဉ် ဇွန်လ ၈ ရက်နေ့မှ ၁၂ ရက်နေ့အတွင်း ဗျူဟာကုန်း မှ ထွက်ပြေးလာသော စစ်ကောင်စီတပ်သား ၂၃ ဦးကို (၅) ရက်အတွင်း ဖမ်းဆီးရမိခဲ့တာလို့ ဆိုပါတယ်။ ရှာဖွေဖမ်းဆီးမှုအတွင်း MA-1 (၅) လက်၊ MA-3 (၃) လက်နဲ့ ခဲယမ်းတချို့ကို သိမ်းဆည်းရမိခဲ့တယ်လို့ သိရပါတယ်။

ဒါ့အပြင် ပြီးခဲ့တဲ့ ဇွန်လ ၄ ရက်နေ့ကလည်း နတ်ရေကန် လေကြောင်းရန်ကာကွယ်ရေးတပ်စခန်း (ဗျူဟာကုန်း) ရှေ့တန်းကာကင်းတာဝန်ထမ်းဆောင်နေစဉ် ထွက်ပြေးလာသော စကစတပ်သား ပြည်သူ့စစ် (၃) ဦးကိုလည်း လက်နက်ခဲယမ်းများနဲ့အတူ CDF-Asho က အရှင်ဖမ်းဆီးရမိခဲ့တယ်လို့ သိရပါတယ်။

 

========================

 

📌📌 ၅/ အိန္ဒိယလေယာဉ်ပျက်ကျမှုမှာ လူ ၂၇၀ ၏ ရုပ်အလောင်းရရှိထား၊ ဗြိတိန်နိုင်ငံသား ခရီးသည်တစ်ဦး အသက်ရှင်

The Matupi Times၊ ဇွန်လ ၁၄၊ ၂၀၂၅

အိန္ဒိယနိုင်ငံ အနောက်ပိုင်းမှာ ဖြစ်ပွားခဲ့တဲ့ (Air India) လေယာဉ်ပျက်ကျမှုမှာ လူ ၂၇၀ ခန့် သေဆုံးပြီး၊ လေယာဉ်တွင်လိုက်ပါသည့် ဗြိတိန်နိုင်ငံသား ခရီးသည်တစ်ဦး လွတ်မြောက်အသက်ရှင်ကြောင်း BBC သတင်းထံက သိရပါတယ်။

အဆိုပါ လေယာဉ်ဟာ ဗြိတိန်နိုင်ငံ၊ လန်ဒန်မြို့သို့ ထွက်ခွာရာ လေဆိပ်မှ စတင်ပျံသန်းပြီး မကြာခင်မှာပဲ လေဆိပ်အနီးက လူနေရပ်ကွက်ထဲကို ပျက်ကျခဲ့တာပါ။ လေယာဉ်နဲ့အတူ ရပ်ကွက်ထဲက အဆောက်အအုံတွေလည်း မီးလောင်ကျွမ်းခဲ့ရပါတယ်။

လူနေအိမ်ခြေတွေရှိတဲ့အပေါ် လေယာဉ်ပျက်ကျမှုကြောင့် ခရီးသည်တယောက်ပဲ အသက်ရှင်လွတ်မြောက်ပြီး လူအယောက် ၂၇၀ ခန့် သေဆုံးတယ်လို့ BBC သတင်းတပုဒ်မှာ ဖော်ပြထားပါတယ်။ ၎င်းတို့အနက် ၂၄၁ ဦးမှာ ခရီးသည်များနှင့် လေယာဉ်အမှုထမ်းများ ဖြစ်နိုင်တယ်လို့ ယူဆရပြီး၊ အလောင်း ၃၀ ခန့်ကိုလည်း ဆွေမျိုးတွေရဲ့ DNA နမူနာများကို အသုံးပြု၍ တရားဝင်ဖော်ထုတ်နေတယ်လို့ သိရပါတယ်။

လေယာဉ်မှာ လိုက်ပါလာခဲ့တဲ့ ဗြိတိန်နိုင်ငံသား ထိုင်ခုံနံပါတ် (11A) တန်းက Vishwash Kumar Ramesh ဆိုသူဟာ လွတ်မြောက်အသက်ရှင်ခဲ့ပြီး လက်ရှိမှာ ဆေးကုသမှုခံယူနေတယ်လို့ သိရပါတယ်။ သူက "လေယာဉ်ပျံတက်ပြီး စက္ကန့်သုံးဆယ်ကြာတော့ ကျယ်လောင်တဲ့ အသံတစ်ခု ထွက်လာပြီး လေယာဉ်ပျက်ကျတယ်။ ဒါတွေအားလုံးက မြန်မြန်ဆန်ဆန် ဖြစ်ပျက်သွားတာ" လို့ India Media တွေကို သူက ပြောပါတယ်။

========================

 

📌📌 ၆/ UFC Flyweight အဆင့် ၁ ဖိုက်တာနဲ့ Joshua Van ထိုးသတ်မည်

The Matupi Times၊ ဇွန်လ ၁၀၊ ၂၀၂၅

ချင်းဖိုက်တာ Joshua Van ဟာ ဇွန်လ (၂၈) ရက်မှာ ကျင်းပမယ့် UFC 317 ပြိုင်ပွဲမှာ UFC Flyweight အဆင့် (၁) ဖိုက်တာ Brandon Royval နဲ့ ယှဉ်ပြိုင်ထိုးသတ်သွားမယ်လို့ သိရပါတယ်။

တွဲဆိုင်းက တရားဝင်ပါပဲ Joshua Van ကိုယ်တိုင်ကလည်း အခုပွဲကို အတည်ပြုထားပါတယ်။ မူလက Brandon Royval နဲ့ Manel Kape တို့ကို တင်ပေးတာဖြစ်ပေမယ့် Manel Kape နှုတ်ထွက်တာကြောင့် Joshua Van က (၁၈) ရက်အလိုမှ လူစားဝင်ထိုးရတာပါ။

ပြီးခဲ့တဲ့ UFC:316 အင်တာဗျူးမှာ Joshua Van ဟာ UFC Flyweight Ranking (2) က Brandon Moreno နဲ့ ထိုးချင်တယ်လို့ စိန်ခေါ်ထားတာပါ။ ဒါပေမယ့် အခုက သူ့အထက် အဆင့်မြင့်တဲ့ Brandon Royval နဲ့ ပွဲဖြစ်သွားတာပါ။ Brandon Royval က Brandon Moreno ကို အနိုင်ယူပြီး UFC Flyweight Ranking မှာ အဆင့် (၁) မှာ ရပ်တည်နေတာလည်း ဖြစ်ပါတယ်။

နိုင်ပွဲဆက်နေတဲ့ ချင်းလူငယ်ဖိုက်တာ Joshua Van အတွက် ဒီပွဲက အရေးကြီးပါတယ်။ တကယ်လို့သာ Joshua Van က Brandon Royval ကိုသာ အနိုင်ရခဲ့ရင် ချန်ပီယံ ခါးပတ်လုခွင့် စိန်ခေါ်နိုင်မှာလည်း ဖြစ်ပါတယ်။ UFC အဖွဲ့အစည်းမှာ Joshua Van အတွက် ပထမဆုံး Main Card ပွဲစဉ်လည်း ဖြစ်ပါတယ်။ ပြိုင်ပွဲကျင်းပဖို့ ၃ ပတ် ဝန်းကျင်ပဲ လိုတော့ပါတယ်။

#RadioNUGLocalNews

#SpringRevolution