23 Jun 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇွန်လ ( ၂၃ ) ရက်နေ့ ရပြည်တွင်းသတင်းများ

📌📌 1/ မတူပီမြို့နယ်ရှိ ကျေးရွာ (၈) ရွာမှ ကျောင်းသူ/သားများအတွက် Future Hope Foundation မှကျောင်းသုံးပစ္စည်းများထောက်ပံ့ပေးအပ်

 

The Matupi Times ၊ ဇွန် ၁၇ ၊ ၂၀၂၅ 

ချင်းပြည်နယ်၊ မတူပီမြို့နယ်အတွင်းက ကျေးရွာ (၈) ရွာမှ ကျောင်းများနှင့် ကျောင်းသူ/သားများအတွက် လိုအပ်လျက်ရှိသော ကျောင်းသုံးပစ္စည်းများကို Future Hope Foundation မှ ထောက်ပံ့ပေးအပ်ခဲ့ကြောင်း သိရသည်။

အဆိုပါ ကျောင်းများအတွက် စနစ်သစ် ကျောင်းသုံး ပုံနှိပ်စာအုပ်များနှင့် ကျောင်းသုံးပစ္စည်းတချို့ကို Future Hope Foundation မှ ထောက်ပံ့ပေးအပ်ခဲ့တယ်လို့ သိရပါတယ်။

အဆိုပါ ကျောင်းသုံးပစ္စည်းများကို ဇွန်လ ၁ ရက်နေ့တွင် မြေပြင်၌ ပေးအပ်ခဲ့ခြင်းဖြစ်ပြီး ကျောင်းသား၊ ကျောင်းသူများအနေဖြင့် ကျောင်းသုံး ပုံနှိပ်စာအုပ်များနှင့် ကျောင်းသုံးပစ္စည်းများကို ဝယ်ယူအသုံးပြုရန် အခက်အခဲ ကြုံတွေ့နေရသောကြောင့် အခုလို ကူညီထောက်ပံ့ပေးအပ်ခဲ့တာလို့ ဆိုပါတယ်။

"အခု ထောက်ပံ့မှုက ရွာမှာရှိတဲ့ ပညာရေးဘုတ်အဖွဲ့တွေက ဆက်သွယ်လာတာပါ။ ပုံနှိပ်နဲ့ ကျောင်းသုံးပစ္စည်းတွေ ဝယ်ယူဖို့ သူတို့ အခက်ကြုံတွေ့နေကြတယ် ဆိုလို့ ကျွန်တော်တို့လည်း အတတ်နိုင်ဆုံး ကြိုးစားပြီး ကူညီထောက်ပံ့ပေးတာပါ။ ကျွန်တော်တို့အနေနဲ့ ကျေးရွာ (၈) ရွာက ကျောင်းသား/သူတွေအတွက် ကျောင်းသုံးပစ္စည်းတွေ ထောက်ပံ့ပေးနိုင်ခဲ့ပါတယ်။ အခုလောလတ်ဆယ် မနှစ်က ရရှိထားတဲ့ စာရင်းအရဘဲ ထောက်ပံ့ပေးနိုင်ခဲ့တာကြောင့် လုံလောက်မှု မရှိသေးဘူး။ ဘာလို့လဲဆိုရင် ဒီနှစ်ထဲမှာ ကျောင်းသားဦးရေ ထပ်တိုးလာတယ်။ မနှစ်က ရရှိထားတဲ့ စာရင်းနဲ့ အခုပြန်ရထားတဲ့ စာရင်းအရ ကျောင်းသားဦးရေက တော်တော်လေး ကွာနေတာ တွေ့ရတယ်။ အဲဒါကြောင့် နောက်ထပ် ကျွန်တော်တို့ သတ်မှတ်ထားတဲ့ အရေအတွက် ပြည့်ရင် ဒုတိယသုတ်အနေနဲ့ ထောက်ပံ့ပစ္စည်းတွေ ထပ်ပေးနိုင်ဖို့လည်း ကျွန်တော်တို့ စီစဉ်နေပါတယ်။" လို့ FOH တာဝန်ရှိသူတစ်ဦးက The Matupi Times ကို ပြောပါတယ်။

ဆက်လက် မတူပီမြို့နယ်ထဲက မည်သည့် ကျေးရွာမဆို ကျောင်းသုံးပစ္စည်းကိရိယာများ လိုအပ်ပါက Future Hope Foundation ထံ ဆက်သွယ်နိုင်တယ်လို့ ဆိုပါတယ်။

"မတူပီမြို့နယ်ထဲက ဘယ်ကျေးရွာမဆို ကျောင်းသားတွေအတွက် ကျောင်းသုံး ပုံနှိပ်/စာရေးကိရိယာတွေ လိုအပ်တယ် ဆိုရင် ကျွန်တော်တို့ Future Hope Foundation ကို ဆက်သွယ်လို့ရပါတယ်။ ကျွန်တော်တို့အနေနဲ့ အတတ်နိုင်ဆုံး ကြိုးစားပြီး ကူညီပေးသွားပါ့မယ်။" လို့ သူက ပြောပါတယ်။

 

========================

 

📌📌 2/ ချင်းတော်လှန်ရေးလက်နက်ကိုင်အဖွဲ့များကြား အချင်းချင်းပွတ်တိုက်မှု၊ငြင်းပွားမှုတွေိကို နိုင်ငံရေးနည်းလမ်းဖြင့်သာ အဖြေရှာကြရန် ချင်းလက်နက်ကိုင် ၁၈ ဖွဲ့က ပူးတွဲထုတ်ပြန်

 

The Matupi Times ၊ ဇွန်လ ၁၉ ၊ ၂၀၂၅ 

ချင်းပြည်အတွင်း ချင်းတော်လှန်ရေးလက်နက်ကိုင်အဖွဲ့အစည်းများအကြားက မကြာခဏအချင်းချင်းပွတ်တိုက်မှုနှင့် အငြင်းပွားမှုတွေကို လက်နက်ဖြင့် မဖြေရှင်းကြဘဲ တော်လှန်ရေးကာလအလွန်တွင် နိုင်ငံရေးနည်းလမ်းဖြင့်သာ အဖြေရှာကြဖို့ ချင်းတော်လှန်ရေးလက်နက်ကိုင်အဖွဲ့ (၁၈) ဖွဲ့က ပူးတွဲထုတ်ပြန်လိုက်ပါတယ်။

ဒါ့အပြင် ချင်းလက်နက်ကိုင်အဖွဲ့များအနေနဲ့ လက်နက်ဖြင့် အဖြေရှာရန် ကြိုးပမ်းခြင်း၊ လက်နက်ကိုင်အဖွဲ့အစည်းများနှင့် ပြည်သူများအကြား စည်းလုံးညီညွတ်မှုအားနည်းလာခြင်းတို့သည် ပြည်သူ့တော်လှန်ရေးခရီးအား နှောင့်နှေးမှေးမှိန်သွားစေနိုင်ပြီး ချင်းလူမျိုးများ၏ တော်လှန်ရေးရည်မှန်းချက်ပန်းတိုင်ကိုလည်း ကျရှုံးစေနိုင်တယ်လို့ ဆိုပါတယ်။

ဒါကြောင့် အချင်းချင်းကြား နားလည်မှုလွဲမှားစေသော အပြောအဆို၊ အပြုအမူများကို ရှောင်ရှား၍ ဘုံရန်သူကိုသာ ပထမဦးစားပေး တော်လှန်တိုက်ပွဲဆင်ကြဖို့ ဒီကနေ့ ဇွန်လ (၁၉) ရက်နေ့ထုတ်ပြန်ချက်မှာ တိုက်တွန်းထားပါတယ်။

 

========================

 

📌📌 3/ မတူပီမြို့နယ္ ၊ လုံလှော်ကျေးရွာအနီးကို စစ်ကောင်စီဗုံးကြဲတိုက်ခိုက်

 

The Matupi Times ၊ ဇွန်လ ၂၀ ၊ ၂၀၂၅ 

စစ်ကောင်စီ ကင်းစင်ပြီဖြစ်တဲ့ ချင်းပြည်နယ်တောင်ပိုင်း၊ မတူပီမြို့နယ် လုံလှော်ကျေးရွာကို စစ်ကောင်စီတပ်က ယမန်နေ့ညပိုင်းမှာ အကြောင်းမဲ့ ဗုံးကြဲတိုက်ခိုက်မှု (၂) ကြိမ် ပြုလုပ်ခဲ့ကြောင်း သိရပါတယ်။

စစ်ကောင်စီတပ်က လုံလှော်ရွာအနီး တနေရာကို တိုက်ခိုက်သွားတာဖြစ်ပြီး၊ ပထမ (၆) လုံးနှင့် ဒုတိယ (၄) လုံး အတွဲလိုက် ကြဲချခဲ့တာဖြစ်တယ်လို့ သိရပါတယ်။ နေအိမ် ပျက်စီးမှုနှင့် ထိခိုက်ဒဏ်ရာ ရရှိသူ မရှိဘူးလို့ ဒေသခံတွေထံက သိရပါတယ်။

========================

 

📌📌 4/ မင်းတပ်-မတူပီ လမ်းမကြီးအား ဇွန်လကုန်ပိုင်းအထိ ယာယီပိတ်ထားမည်ဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့ အသိပေးထုတ်ပြန်

 

The Matupi Times ဇွန်လ ၂၁၊ ၂၀၂၅

ချင်းပြည်နယ်တောင်ပိုင်း၊ မင်းတပ်-မတူပီ လမ်းမကြီးသည် မိုးသည်းထန်စွာ ရွာသွန်းမှုကြောင့် လမ်းများ၊ မြေပြို ပျက်စီးလျက်ရှိသဖြင့် လမ်းပြုပြင်ရေးလုပ်ငန်းများ ဆောင်ရွက်လျက်ရှိကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။

အဆိုပါ လမ်းပိုင်းကို (၁၈.၆.၂၀၂၅) ရက်နေ့မှစ၍ စက်ယန္တရားများဖြင့် ပြုပြင်ဆောင်ရွက်လျက်ရှိပြီး ကောင်းမွန်မြန်ဆန်စွာ ပြင်ဆင်ဆောင်ရွက်နိုင်ရေးအတွက် (၂၁.၆.၂၀၂၅) မှ (၂၈.၆.၂၀၂၅) ရက်နေ့အထိ အဆိုပါ လမ်းမကြီးအား ယာယီလမ်းပိတ်ထားကြောင်း အသိပေးထားပါတယ်။

ဒါ့အပြင် (မင်းတပ်-မတူပီ-ဆမီး) လမ်းပိုင်းကိုလည်း လမ်းပျက်စီးမှုအခြေအနေအရ လာမည့် (ဇွန်လ ၂၅၊ ၂၀၂၅) ရက်နေ့မှစ၍ မိုးရာသီအတွင်း ကုန်တင်ယာဉ်ကြီးများကို ပြေးဆွဲခွင့် ပိတ်ထားမည်ဖြစ်ကြောင်း CDF-Matupi က ဇွန်လ ၁၉ ရက်နေ့တွင် သတင်းထုတ်ပြန်ထားပါတယ်။

========================

 

📌📌 5/ အီရန်ရှိ နျူစက်ရုံသုံးရုံကို အမေရိကန် ဗုံးကြဲတိုက်ခိုက်၊ အီရန် အနေနဲ့ငြိမ်းချမ်းရေးချက်ချင်းလုပ်ဆောင်ရန် ထရမ့်ပြောကြား

 

The Matupi Times ၊ ဇွန်လ ၂၂၊ ၂၀၂၅

အမေရိကန် စစ်လေယာဉ်တွေက အီရန်နိုင်ငံရှိ နျူကလီးယားစီမံကိန်း စက်ရုံတွေရှိရာ သုံးနေရာကို ဇွန်လ ၂၂ ရက်နေ့ မနက်အစောပိုင်းက ဝင်ရောက် ဗုံးကြဲတိုက်ခိုက်ခဲ့ကြောင်း သိရပါတယ်။

အမေရိကန်သမ္မတ ဒေါ်နယ်ထရမ့်က အီရန်ရှိ နျူကလီးယား သန့်စင်စက်ရုံ ဖော်ဒိုနဲ့ အခြား စီမံကိန်းနေရာတွေကို အောင်မြင်စွာ တိုက်ခိုက်ခဲ့တယ်လို့ ကြေညာလိုက်ပါတယ်။

အီရန်အစိုးရမီဒီယာကတော့ ဖော်ဒိုရဲ့ အစိတ်အပိုင်းတချို့ "ရန်သူရဲ့ တိုက်ခိုက်မှု" ခံခဲ့ရတယ်လို့ ထုတ်ပြန်ပါတယ်။

အီရန်က နျူကလီးယားစက်ရုံနေရာတွေကို တိုက်ခိုက်မှုအပြီးမှာ အီရန်အနေနဲ့ ငြိမ်းချမ်းရေး အခုလုပ်မှရမယ်လို့ အမေရိကန်သမ္မတ ဒေါ်နယ်ထရမ့်က ပြောလိုက်ပါတယ်။ "သူတို့ မလုပ်ဘူးဆိုရင်တော့ အနာဂတ်မှာ တိုက်ခိုက်မှုတွေ ပိုကြီးမယ်၊ တိုက်ဖို့လည်း ပိုလွယ်သွားမယ်" လို့ ထရမ့်က ပြောပါတယ်။

အီရန်ရှိ တောင်တစ်ခုအောက်မှာ ပေရာပေါင်းများစွာ တူးပြီး တည်ဆောက်ထားတဲ့ ဖော်ဒိုအမည်ရ နျူကလီးယားစီမံကိန်းနေရာကို အမေရိကန်ပိုင်ဆိုင်တဲ့ ဗုံးကြဲလေယာဉ်တွေနဲ့ ပေါင်သုံးသောင်းအလေးချိန် ဗုံးတွေ အသုံးပြုကာ တိုက်ခိုက်ခဲ့တာဖြစ်ပါတယ်။

အမေရိကန် ဝင်ရောက်တိုက်ခတ်ခဲ့တဲ့ ပစ်မှတ် သုံးနေရာအနက် နှစ်ခုမှာ အီရန်နိုင်ငံရဲ့ ယူရေနီယံ သန့်စင်ထုတ်လုပ်ရေး စခန်းကြီးတွေဖြစ်ပြီး ပထမတစ်ခုမှာ ဖော်ဒိုတောင်အောက်စခန်း ဖြစ်ကာ၊ ဒုတိယတစ်ခုမှာ နတ်တန့်ဇ် ဒေသရှိ စခန်း ဖြစ်ပါတယ်။ ဒုတိယမြောက်စခန်းက ပိုမိုကြီးမားတဲ့ ယူရေနီယံ သန့်စင်စခန်းဖြစ်ပါတယ်။

#RadioNUGLocalNews

#SpringRevolution