9 Jun 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇွန်လ ( ၉ ) ရက်နေ့ ရပြည်တွင်းသတင်းများ

📌📌 ၁/ ဟားခါးမြို့ရှိ စကစလက်အောက်ခံ ရဲတပ်ဖွဲ့ဝင်တစ်ဦး CDF-Hakha ထံ အလင်းဝင် 

 

ဟားခါးမြို့ရှိ စကစလက်အောက်ခံ ရဲတပ်ဖွဲ့ဝင်တစ်ဦးသည် လက်နက်၊ ခဲယမ်းများနှင့်အတူ ၂၀၂၅ ခုနှစ် မေလ ၃၁ ရက်နေ့တွင် Chinland Defense Force - Hakha ထံ အလင်းဝင်လာကြောင်း သိရသည်။

အလင်းဝင်လာသူကို Chinland Defense Force - Hakha မှ နွေးနွေးထွေးထွေး ကြိုဆိုပြီး ငွေသားဆုကြေးများ ချီးမြှင့်သည့်အပြင်၊ လုံခြုံသောနေရာရောက်သည်အထိ တာဝန်ယူ ဆောင်ရွက်ပေးသွားမယ်လို့ သိရပါသည်။

ဆက်လက်၍ စစ်ကောင်စီလက်အောက်မှ ပြည်သူ့တော်လှန်ရေးဘက်သို့ အလင်းဝင်ရောက်လိုသူများကို CDF-Hakha မှ ကြိုဆိုလျက်ရှိပြီး၊ လုံခြုံသောနေရာရောက်သည်အထိ တာဝန်ယူမည်ဖြစ်ကြောင်း ထုတ်ပြန်ထားပါသည်။

၂၀၂၅ ခုနှစ် မေလအတွင်းမှာ ဟားခါးမြို့က စကစတပ်ဖွဲ့ဝင် (၃) ဦးသည် လက်နက်များနဲ့အတူ CDF-Hakha ထံ အလင်းဝင်လာခဲ့ပြီး၊ ဟားခါးမြို့ပေါ်မှာ ပြည်သူယောင်ဆောင်ပြီး သတင်းယူနေတဲ့ စကစတပ်ဖွဲ့ဝင် (၂) ဦးအပါအဝင် စကစတပ်ဖွဲ့ဝင် (၃) ဦးကိုလည်း CDF-Hakha မှ အရှင်ဖမ်းဆီးနိုင်ခဲ့ပါတယ်။

========================

 

📌📌 ၂/ မီဇိုရမ်၊ လောင်တလိုင်မှာ ရေကြီးမှုကြောင့် ပလက်ဝ(ချင်း)စစ်ရှောင်အိမ်ခြေ(၁၀၀)ကျော် ပျက်စီး ၊ အရေးပေါ်အကူညီများလိုအပ်နေ

 

The Matupi Times ၊ ဇွန်လ ၃ ၊ ၂၀၂၅ 

မီဇိုရမ်ပြည်နယ်၊ လောင်တလိုင်ခရိုင်မှာ မိုးသည်းထန်စွာ ရွာသွန်းပြီး ရေကြီးမှုကြောင့် တွီဒင်းကျေးရွာ နှင့် ကာကီကျေးရွာမှာ ခိုလှုံနေတဲ့ ပလက်ဝစစ်ရှောင်တွေရဲ့ အိမ်ခြေ (၁၀၀) ကျော် လုံးဝ ပျက်စီးသွားကြောင်း သိရပါတယ်။
တွီဒင်းကျေးရွာ နှင့် ကာကီကျေးရွာဟာ အိန္ဒိယ - မြန်မာနယ်စပ်၊ လောင်တလိုင်ခရိုင်ထဲက ရွာတွေ ဖြစ်ပါတယ်။
ပြီးခဲ့တဲ့ မေ ၂၉ ရက်က စတင် ရေကြီးတာဖြစ်လို့၊ ကုလားတန်မြစ်နဲ့ နီးတဲ့ ဒီရွာတွေက ဒေသခံနေအိမ်တွေသာမက ချင်းပြည်နယ်၊ ပလက်ဝမြို့နယ်က စစ်ဘေးရှောင်လာတဲ့ မြန်မာစစ်ရှောင်တွေရဲ့ နေအိမ်တွေပါ ရေထဲနစ်မြုပ်ခဲ့ပါတယ်။

တွီဒင်း စစ်ရှောင်စခန်းတွင် အိမ်ခြေ ၂၇၀ ရှိရာ၊

အိမ်ခြေ ၁၈ လုံး (လုံးဝပျက်စီး)

အိမ်ခြေ ၄၅ လုံး (အနည်းငယ် ထိခိုက်)

အိမ်သာ ၇၅ လုံး (လုံးဝ ပျက်စီး) ခဲ့ရပြီး၊

ကာကီ စစ်ရှောင်စခန်းတွင် အိမ်ခြေ ၁၄၁ လုံး ရှိရာ၊

အိမ်ခြေ ၆၉ လုံး (လုံးဝပျက်စီး)

အိမ်သာ ၃၅ လုံး (လုံးဝပျက်စီး) ခဲ့ကြောင်း Paletwa IDPs and Humanitarian Supporting ထံက သိရပါတယ်။

လက်ရှိမှာတော့ စစ်ရှောင်ရင်း ရေဘေးကြုံရတဲ့ ပလက်ဝစစ်ဘေးရှောင်တွေကို ကျေးရွာတွေထဲက ခန်းမဆောင်တွေမှာ ပြောင်းရွှေ့နေရာ ချပေးပြီး၊ စစ်ရှောင်ပြည်သူများအနေဖြင့် ထိခိုက်ဒဏ်ရာ ရရှိသူမရှိဘူးလို့ သိရပါတယ်။
ယခုအခါ စစ်ရှောင်များအတွက် ပြန်လည်တည်ဆောက်နိုင်ရန် အမိုး၊ အကာပစ္စည်းများ အရေးပေါ်လိုအပ်နေသလို၊ ကျန်းမာရေးစောင့်ရှောက်မှုနှင့် ဆေးဝါးများ၊ အခြေခံစားနပ်ရိက္ခာများလည်း လိုအပ်နေတယ်လို့ သိရပါတယ်။
လက်ရှိအခြေအနေအရ မည်သည့် လူမှုကယ်ဆယ်ရေးအဖွဲ့အစည်းများမှ မရောက်ရှိသေးကြောင်းနှင့် ကူညီမှုများ လိုအပ်နေတယ်လို့ သိရပါတယ်။

 

========================

 

📌📌 ၃/ ရန်ကုန်မှာ တစ်ပတ်အတွင်း ကိုဗစ် လူနာသစ် ၁၇ ဦးတွေ့ရှိ

 

The Matupi Times ၊ ဇွန်လ ၃ ၊ ၂၀၂၅ 

ရန်ကုန်မြို့မှာ တစ်ပတ်အတွင်း ကိုဗစ်အတည်ပြု လူနာ (၁၇) ဦး တွေ့ရှိကြောင်း သိရပါတယ်။

ပြီးခဲ့တဲ့ တစ်ပတ်အတွင်း ကိုဗစ်သံသယ လူနာ (၁၇၇၈) ဦးကို စစ်ဆေးခဲ့ရာမှာ၊ ရန်ကုန်တိုင်းထဲမှာ ကိုဗစ် လူနာသစ် ၁၇ ဦးကို တွေ့ရှိထားတယ်လို့ စစ်ကောင်စီ ကျန်းမာရေးဝန်ကြီးဌာနက ဒီနေ့ မနက်ပိုင်းမှာ သတင်းထုတ်ပြန်ပါတယ်။

ကိုဗစ် လူနာသစ် ၁၇ ဦးကို ၂၀၂၅ ခုနှစ် ယခင် မေလ ၂၅ ရက်ကနေ ဇွန်လ ၁ ရက် မနက်ပိုင်းအတွင်း တွေ့ထားတာလို့ ဆိုပါတယ်။

တစ်ပတ်အတွင်း ကိုဗစ် လူနာတွေ့ကြသူတွေထဲမှာ လှိုင်မြို့နယ်က ၃ ဦးနဲ့ အများဆုံးဖြစ်ကြောင်း ထုတ်ပြန်ချက်အရ သိရသည်။

စစ်ကောင်စီ ကျန်းမာရေးဝန်ကြီးဌာနဟာ ကိုဗစ်-၁၉ ရောဂါ စောင့်ကြည့်မှုအခြေအနေကို အပတ်စဉ် ထုတ်ပြန်နေတာလည်း ဖြစ်ပါတယ်။

 

========================

 

📌📌 ၄/ မီဇိုရမ်တွင် မတူပီ(ချင်း)စစ်ရှောင်တစ်ဦး မတော်တဆ ဓာတ်လိုက်သေဆုံး

 

The Matupi Times ၊ ဇွန်လ ၅ ၊ ၂၀၂၅ 

မီဇိုရမ်ပြည်နယ်၊ လောင်တလိုင်မြို့ ပြည်သူ့ဆေးရုံမှာ ဒီကနေ့ ဇွန်လ ၅ ရက်နေ့ နေ့လယ်ပိုင်း၌ မတူပီ (ချင်း) စစ်ရှောင်တစ်ဦး ဆေးသုတ်နေရင်း မတော်တဆ ဓာတ်လိုက်သေဆုံးသွားတယ်လို့ သိရပါတယ်။
သေဆုံးသူမှာ အသက် (၂၀) နှစ်အရွယ် ဆလိုင်း စိုးဝင်းနိုင် ဖြစ်ပြီး၊ မတူပီမြို့နယ်၊ တွီဘောကျေးရွာဇာတိမှ အဘဦး သန်းစိုး ၏ သားဖြစ်ကြောင်း သိရသည်။
စိုးဝင်းနိုင်သည် စစ်ကောင်စီအာဏာသိမ်းယူပြီးနောက် မတူပီမြို့နယ်မှ မီဇိုရမ်ပြည်နယ်သို့ ၂၀၂၁ ခုနှစ်တွင် စစ်ရှောင်အဖြစ် လာရောက်လှုံနေထိုင်သူ ဖြစ်ပါတယ်။

လောင်တလိုင်မြို့ ပြည်သူ့ဆေးရုံမှာ ဒီနေ့ နေ့လည် (၁၁:၀၀) နာရီအချိန်ခန့်မှာ မတော်တဆ ဓာတ်လိုက်သေဆုံးသွားခြင်း ဖြစ်ကြောင်း သိရသည်။

"သူက ဆေးရုံမှာ နေ့စားအနေနဲ့ အလုပ်လုပ်တာပါ။ သူက တစ်ယောက်တည်း ခေါင်မိုးပေါ်မှာ သွပ်တွေကို ဆေးသုတ်နေတာ။ သူ ဆေးသုတ်တဲ့နေရာက လျှပ်စစ်မီးကြိုးနီးတယ်၊ သိပ်မကွာဘူး။ ဆေးသုတ်ရင်းသုတ်ရင်း ဆေးသုတ်တံနဲ့ လျှပ်စစ်မီးကြိုးထိမိလို့ ဓာတ်လိုက်ခံရပြီး သေဆုံးသွားတာ" လို့ Council Camp တာဝန်ခံက The Matupi Times ကို ပြောပါတယ်။

ဆလိုင်း စိုးဝင်းနိုင် ရဲ့ ရုပ်အလောင်းကိုတော့ မနက်ဖြန် ညနေပိုင်းမှာ လောင်တလိုင်မြို့မှာပဲ မြေမြုပ်သဂြိုလ်သွားမယ်လို့ သိရပါတယ်။

========================

 

📌📌 ၅/ ကမ္ဘာ့ပတ်ဝန်းကျင်ထိန်းသိမ်းရေးနေ့ အထိမ်းအမှတ်ဖြင့် မင်းတပ်မြို့ဝင်တွင် သစ်ပင်များစိုက်ပျိုး

 

The Matupi Times ၊ ဇွန်လ ၅ ၊ ၂၀၂၅ 

ချင်းညီနောင်အဖွဲ့ သိမ်းပိုက်ထိန်းချုပ်ထားတဲ့ ချင်းပြည်နယ် တောင်ပိုင်း၊ မင်းတပ်မြို့မှာ ဒီကနေ့ ဇွန်လ (၅) ရက်နေ့၌ ကျရောက်သော ကမ္ဘာ့ပတ်ဝန်းကျင်ထိန်းသိမ်းရေးနေ့ အထိမ်းအမှတ်ဖြင့် သစ်ပင်များ စိုက်ပျိုးခဲ့ကြောင်း သိရသည်။

ကြားကာလ မင်းတပ်မြို့နယ် ပြည်သူ့အုပ်ချုပ်ရေးအဖွဲ့၊ သစ်တောဌာန၏ ဦးဆောင်မှုဖြင့် မြို့နယ်ပြည်သူ့အုပ်ချုပ်ရေး ရုံးအဖွဲ့ဝင်များ၊ ချင်းကာကွယ်ရေးတပ်ဖွဲ့ (မင်းတပ်) – တပ်ရင်းအမှတ် (၁) မှ ရဲဘော်များနှင့် ပြည်သူအချို့ ပူးပေါင်းပါဝင်မှုဖြင့် မင်းတပ်မြို့ဝင် မုခ်ဦးအနီးတွင် သစ်ပင်များ စိုက်ပျိုးခဲ့ကြကြောင်း မင်းတပ်မြို့နယ် (ပအဖ) ထံက သိရပါတယ်။

မင်းတပ်မြို့နယ် ပြည်သူ့အုပ်ချုပ်ရေးအဖွဲ့အနေဖြင့် ရှားပါးအပင်မျိုးစိတ်များ၊ သားရဲတိရစ္ဆာန်နှင့် ရေမြေ သဘာဝပတ်ဝန်းကျင် ထိန်းသိမ်းခြင်းတို့ကို စနစ်တကျ အချိန်ယူ အရှိန်မြှင့် လုပ်ဆောင်သွားရန် စီစဉ်ထားရှိပြီး၊ ယင်းမှတဆင့် သဘာဝခရီးသွား လုပ်ငန်းများ တိုးတက်လာပြီး ဒေသခံများ၏ အလုပ်အကိုင်နှင့် ဝင်ငွေအခွင့်အလမ်းများ ပေါ်ပေါက် တိုးတက်လာစေရန် လုပ်ဆောင်သွားမည်ဖြစ်ကြောင်း ထုတ်ပြန်ချက်မှာ ဖော်ပြထားပါတယ်။

 

========================

 

📌📌 ၆/ မတူပီမြို့နယ်အတွင်း မိုးများပြီး ကားလမ်းများပျက်စီး၊ ဒေသခံပြည်သူများ ခရီးသွားလာရန် အခက်ကြုံတွေ့နေ

 

The Matupi Times ၊ ဇွန်လ ၇ ၊ ၂၀၂၅ ။

မတူပီမြို့နယ်အတွင်း မိုးများပြီး မြေပြိုတာတွေကြောင့် မတူပီ–မင်းတပ်မြို့လမ်းပိုင်း၊ မတူပီ–ရေဇွာမြို့လမ်းပိုင်း နှင့် မတူပီ–တင်လောင်းကျေးရွာ ကားလမ်းများ ပျက်စီးသွားကြောင်း သိရသည်။

ကားလမ်းပျက်စီးမှုတွေကြောင့် ဒေသခံပြည်သူများအနေဖြင့် ခရီးသွားလာရာတွင် အခက်အခဲများ ကြုံတွေ့နေရကြောင်း သိရသည်။

မင်းတပ်–မတူပီ လမ်းပိုင်းကို MRO/CDF Matupi က ပြုပြင်လျက်ရှိရာ ယခုရက်ပိုင်း ရာသီဥတု ဆိုးရွားမှုကြောင့် လမ်းပြုပြင်မှု မပြီးစီးသေးတာကြောင့် ဇွန်လ (၁၅) ရက်နေ့ထိ ယာဉ်များအားလုံး ဖြတ်သန်းသွားလာခြင်း မပြုလုပ်ကြဖို့ အသိပေးထားပါတယ်။

အလားတူ ရေဇွာ–မတူပီ လမ်းပိုင်းတနေရာတွင်လည်း မြေပြိုကျမှုတွေကြောင့် ကားလမ်း ပျက်စီးသွားပြီး ယာဉ်များ ဖြတ်သန်းသွားလာလို့ မရဘဲ ဆိုင်ကယ်သာ ဖြတ်သန်းသွားလာနိုင်ကြောင်း သိရသည်။

ဒါ့အပြင် မတူပီမြို့နှင့် တင်လောင်းကျေးရွာကြားတွင်လည်း မိုးများပြီး တောင်ကျရေတွေကြောင့် မြေပြို၊ ရေတိုက်စားလို့ အများပြည်သူ သုံးလမ်း ပျက်စီးသွားပြီး သွားလာရန် အခက်အခဲ ကြုံတွေ့နေရကြောင်း သိရပါတယ်။

#RadioNUGLocalNews

#SpringRevolution