07 Jul 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇူလိုင်လ ( ၇ ) ရက်နေ့ ရပြည်တွင်းသတင်းများ

📌📌 ၁/ CDF-Matupi မှ မတူပီမြို့သိမ်းတိုက်ပွဲပါဝင်သည့် ချင်းညီနောင်နဲ့မဟာမိတ်တပ်ဖွဲ့များကို ကျေးဇူးတင်ကြောင်း တစ်နှစ်ပြည့် အထိမ်းအမှတ် မှာထုတ်ပြန်ကြေငြာ

 

The Matupi Times ၊ဇွန်လ ၂၉ ၊ ၂၀၂၅ 

ချင်းလက်နက်ကာကွယ်ရေးတပ်ဖွဲ့-မတူပီက မတူပီမြို့သိမ်းတိုက်ပွဲအောင်ပွဲ တစ်နှစ်ပြည့် ယနေ့ ဇွန်လ ၂၉ ရက်နေ့မှာ ထုတ်ပြန်ကြေညာချက်တစ်ရပ် ထုတ်ပြန်ပါတယ်။

ထုတ်ပြန်ချက်တွင် မတူပီမြို့သိမ်းတိုက်ပွဲတွင် ပါဝင်တိုက်ပွဲဝင်ခဲ့ကြသည့် ချင်းညီနောင်၊ အာရက်ခတပ်တော် နှင့် ယောပြည်သူ့ကာကွယ်ရေးတပ်ပေါင်းစု တပ်ဖွဲ့ရဲဘော်များအားလုံးကို အထူးကျေးဇူးတင်ကြောင်း နှင့် ဒဏ်ရာရရဲဘော်များ နှင့် ကျဆုံးသွားသည့် အာဇာနည်သူရဲကောင်းတပ်ဖွဲ့ဝင်များကို အောက်မေ့သတိရရင်း ဂုဏ်ပြုကြောင်း ဖော်ပြထားပါတယ်။

ဒါ့အပြင် CDF-Matupi စတင်ဖွဲ့စည်းချိန်မှ ယနေ့အထိ ထောက်ပို့လမ်းစဉ်အတိုင်း မြေပြင်တော်လှန်ရေးအစုအဖွဲ့များ ပိုမိုအားကောင်းစေရန် အဖက်ဖက်မှ ထောက်ပံ့ကူညီပေးကြသည့် နိုင်ငံတကာထောက်ပို့အဖွဲ့များအပေါ် ကျေးဇူးတင်ရှိကြောင်းနှင့် မြို့သိမ်းပိုက်ပြီး ပြန်လည်တည်ဆောက်ရေး၊ ပြန်လည်နေရာချထားရေး၊ မိုင်းရှင်းလင်းရေး နှင့် စစ်ကောင်စီလက်အောက်ပြန်လည်မရောက်ရှိစေရန် အဖက်ဖက်မှ ကြိုးပမ်းနေကြသည့် တပ်ပေါင်းစုများ၊ ပြည်တွင်းပြည်ပရှိ ပြည်သူများအပေါ် ကျေးဇူးတင်တယ်လို့ ဆိုပါတယ်။

လက်ရှိအချိန်တွင် MRO/CDF-Matupi အနေဖြင့် လုံခြုံရေးနှင့် ကာကွယ်ရေးအင်အား တိုးမြှင့်ဆောင်ရွက်ခြင်း၊ မြို့ရွာပြန်လည်တည်ဆောက်ခြင်းတို့ကို အင်တိုက်အားတိုက် ဆောင်ရွက်နေတယ်လို့ ဆိုပါတယ်။ တစ်နှစ်ပြည့် မတူပီမြို့သိမ်းတိုက်ပွဲအောင်မြင်ခြင်းအထိမ်းအမှတ်နေ့မှစ၍ အနာဂတ်တွင် ချိတ်ဆက်ပူးပေါင်းဆောင်ရွက်မှု၊ မဟာမိတ်ပေါင်းစည်းမှု၊ ဝိုင်းဝန်းဖေးမမှုဖြင့် ဆက်လက်ပါဝင်ပေးကြဖို့လည်း တိုက်တွန်းနှိုးဆော်ထားပါတယ်။

ချင်းပြည်နယ်တောင်ပိုင်း၊ စစ်ကောင်စီအခိုင်အမာအခြေချထားသော မတူပီမြို့ကို ချင်းညီနောင်မဟာမိတ်ပူးပေါင်းအဖွဲ့က ဇွန်လ ၂၉၊ ၂၀၂၄ ရက်နေ့မှာ အပြီးသတ်သိမ်းပိုက်လိုက်ခဲ့တာပါ။ မတူပီမြို့သိမ်းစစ်ဆင်ရေးကို ချင်းညီနောင်မဟာမိတ်ပူးပေါင်းအဖွဲ့က ဇွန်လ ၉၊ ၂၀၂၄ ရက်နေ့က စတင်ခဲ့တာဖြစ်ပြီး ရက်ခိုင့်တပ်တော် (AA) ၊ Yaw Army ၊ Yaw Defense Force (YDF) တို့ ပူးပေါင်းတိုက်ပွဲဝင်ခဲ့ကြပါတယ်။

 

========================

 

📌📌 ၂/ တော်လှန်ရေး (၄) နှစ်တာကာလအတွင်း CDF-KKG ရဲဘော် (၇၃) ဦး ကျဆုံးကြောင်း သတင်းထုတ်ပြန်

 

The Matupi Times ၊ ဇူလိုင် ၂ ရက် ၊ ၂၀၂၅

တော်လှန်ရေး (၄) နှစ်တာကာလအတွင်း CDF-KKG တပ်ဖွဲ့ဝင် (၇၃) ဦး ကျဆုံးပြီး၊ ကိုယ်လက်အင်္ဂါပေးဆပ်ခဲ့သူနဲ့ ဒဏ်ရာရရှိသူ (၁၅၀) ကျော်ရှိကြောင်း CDF – KKG တည်ထောင်တဲ့ ၄ နှစ်ပြည့်တဲ့ ယမန်နေ့ ဇူလိုင်လ ၁ ရက်နေ့မှာ ကြေငြာချက် ထုတ်ပြန်ပါတယ်။

စစ်အာဏာရှင် တိုက်ဖျက်ရေး၊ ပြည်သူလူထုကာကွယ်ရေးနှင့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးအတွက် ပေးဆပ်တိုက်ပွဲဝင်ခဲ့ကြတဲ့ ရဲဘော်အားလုံးကို ဦးညွှတ်ဂုဏ်ပြုမှတ်တမ်းတင်ကြောင်း ထုတ်ပြန်ချက်မှာ ဖော်ပြပါတယ်။

CDF-KKG အနေဖြင့် တော်လှန်ရေး သက်တမ်း (၄) နှစ်တာကာလအတွင်း ၎င်းတို့တပ်ဖွဲ့ အခြေပြုလှုပ်ရှားရာ ဒေသဖြစ်သော ကလေး-ကဘော်-ဂန့်ဂေါ ဒေသတွင်သာမက အခြားသော ဒေသများတွင်လည်း တိုက်ပွဲဝင်ခဲ့ရာ တိုက်ပွဲပေါင်း (၄၀၀) ကျော်တွင် ပါဝင်တိုက်ခိုက်ခဲ့ပြီး CDF-KKG ၏ Major Operation ကိုလည်း ၂၀၂၄ တွင် စတင်ပြင်ဆင်ခြင်းနှင့်အတူ ၂၀၂၅ နှစ်အစပိုင်းတွင် မဟာမိတ်တပ်များ ပူးပေါင်းမှုဖြင့် စတင်နိုင်ခဲ့ပြီး ကလေးနှင့် ဂန့်ဂေါအကြားရှိ စကစ စစ်စခန်း (၅) ခုကို သိမ်းပိုက်နိုင်ခဲ့တယ်လို့ ဆိုပါတယ်။

CDF-KKG သည် ကလေး-ကဘော်-ဂန့်ဂေါမြို့နယ်တွေမှာ အဓိကစစ်ရေးလှုပ်ရှားနေတဲ့ ချင်းလက်နက်ကိုင် တော်လှန်ရေးတပ်ဖွဲ့တစ်ခုဖြစ်ပြီး ကလေး - ကဘော် - ဂန့်ဂေါ ဒေသလွတ်မြောက်ရေးမှသည် မြန်မာတပြည်လုံး စစ်ကောင်စီလက်အောက်ကနေ လွတ်မြောက်ပြီး ပြည်သူလိုလားတဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်နိုင်သည်အထိ တိုက်ပွဲဝင်သွားမည်ဖြစ်ကြောင်း ထုတ်ပြန်ချက်တွင် ထည့်သွင်းဖော်ပြထားသည်။

 

========================

 

📌📌 ၃/ CDF-Matupi တပ်မဟာ(၂) ၊ အောက်ချင်းတပ်ရင်း၏ အ‌ခြေခံစစ်သင်တန်းပြီးစီး

 

The Matupi Times ၊ ဇူလိုင်လ ၂ ၊ ၂၀၂၅ 

CDF-Matupi တပ်မဟာ (၂) တပ်ဖွဲ့ဝင် Vakok Battalion (အောက်ချင်းတပ်ရင်း) ၏ အပတ်စဉ် (၁၀) အခြေခံစစ်သင်တန်းသည် ပြီးခဲ့သည့် ဇွန်လ ၂၈ ၊ ၂၀၂၅ ရက်နေ့၌ အောင်မြင်စွာ ကျင်းပပြီးစီးခဲ့ကြောင်း ဒီကနေ့ညပိုင်းမှာ သတင်းထုတ်ပြန်ပါတယ်။

Chinland Defense Force-Matupi တပ်မဟာ (၂) အမည်နာမကို Chinland Defense Force-Matupi အဖြစ် ပြီးခဲ့တဲ့ မေလ ၃၁ ရက်နေ့မှာ ပြန်လည်ပြောင်းလဲလိုက်တာဖြစ်ပါတယ်။

ချင်းလက်နက်ကာကွယ်ရေးတပ်ဖွဲ့-မတူပီ (၄) နှစ်ပြည့်နှင့် တပ်မဟာ (၂) ဒုတိယအကြိမ်ညီလာခံကို ၂၀၂၅ ခုနှစ်၊ မေလ (၂၈ မှ ၂၉) ရက်နေ့ထိ (၂) ရက်တာ ကျင်းပပြုလုပ်ခဲ့ပြီး၊ Chinland Defense Force-Matupi တပ်မဟာ (၂) အမည်နာမ ၊ အမှတ်တံဆိပ် ၊ ရုံးတံဆိပ်တို့အား ပယ်ဖျက်ပြီး Chinland Defense Force-Matupi အဖြစ် ပြန်လည်အတည်ပြုပြောင်းလဲခဲ့တာလည်း ဖြစ်ပါတယ်။

 

========================

 

📌📌 ၄/ ရိခေါဒါရ်မြို့မှာ ချင်းလက်နက်ကိုင်နှစ်ဖွဲ့ တိုက်ပွဲဖြစ်လို့ ဒေသခံပြည်သူထောင်ကျော် အိန္ဒိယဘက် ထွက်ပြေးတိမ်းရှောင်

 

The Matupi Times ၊ ဇူလိုင်လ ၆ ၊ ၂၀၂၅

အိန္ဒိယ - မြန်မာနယ်စပ်၊ ချင်းပြည်နယ် ရိခေါဒါရ်မြို့မှာ ချင်းကာကွယ်ရေးတပ်‌ဖွဲ့တွေဖြစ်တဲ့ (CDF Hualngo) နဲ့ CNO/CNDF တို့အကြား တိုက်ပွဲဖြစ်တာကြောင့် ဒေသခံပြည်သူတွေဟာ အိန္ဒိယနိုင်ငံ မီဇိုရမ်ပြည်နယ်ဘက်ကို ထွက်ပြေးတိမ်းရှောင်နေကြရပါတယ်။

အပြန်အလှန် ပစ်ခတ်မှုတွေကြောင့် ယမန်နေ့ညပိုင်းမှာ ဒေသခံပြည်သူ ၂၅၀၀ ကျော်ဟာ နယ်စပ်ကိုဖြတ်ပြီး မီဇိုရမ်၊ ဇိုခေါထာ ရွာထဲကို ဝင်ရောက်လာခဲ့တယ်လို့ သိရပါတယ်။ အိန္ဒိယ စစ်တပ်အပါအဝင် သက်ဆိုင်ရာအဖွဲ့တွေကလည်း တံခါးဖွင့်ပေးထားပြီး ဝင်ခွင့်ပြုထားတယ်လို့ သိရပါတယ်။

ထွက်ပြေးတိမ်းရှောင်လာသူအများစုမှာ ဇိုခေါထာမှာရှိတဲ့ နီးစပ်ရာဆွေးမျိုးမိသားစုတွေထံ ခိုလှုံကြပြီး ဆွေမျိုးမရှိသူတွေနဲ့ နေထိုင်စရာမရှိသူတွေကိုတော့ (ဇိုခေါထာ-YMA) ခန်းမမှာ နေထိုင်ခွင့်ပေးထားတယ်လို့ သိရပါတယ်။

CNO/CNDF က ချင်းပြည်ကောင်စီဝင် CDF Hualngo ဟွာလ်ငိုးနယ်မြေတွေထဲကို ထိုးစစ်ဆင်လာတာဟာ ချင်းပြည်နယ် တည်ဆောက်ရေးကို အဟန့်အတားဖြစ်စေပြီး နယ်မြေအရေးကို တော်လှန်ရေးကာလအလွန်မှာ ငြိမ်းချမ်းသောနည်းလမ်းဖြင့်သာ အဖြေရှာဖို့ လိုလားတယ်လို့ ချင်းပြည်ကောင်စီက ဇွန် ၃ ရက်မှာ သတင်းထုတ်ပြန်ထားသလို ချင်းညီနောင်အဖွဲ့ကလည်း CNO/CNDF နှင့် CDF Hualngoram ကြား ဖြစ်ပွားနေသော လက်နက်ကိုင်ပဋိပက္ခများကို တွေ့ဆုံဆွေးနွေးပြီး ငြိမ်းချမ်းသောနည်းဖြင့် အဖြေရှာကြရန် နှင့် ပဋိပက္ခများအကြား ချင်းညီနောင်အနေဖြင့် ပါဝင်ပတ်သက်မှာ မဟုတ်ဘူးလို့ ထုတ်ပြန်ထားပါတယ်။

ရိခေါဒါရ်မြို့ရှိ စစ်ကောင်စီတပ်စခန်းကို ချင်းပြည်ကောင်စီပူးပေါင်းတပ်ဖွဲ့က ၂၀၂၃ ခုနှစ် နိုဝင်ဘာလတွင် တိုက်ခိုက်သိမ်းပိုက်ခဲ့တာဖြစ်ပါတယ်။

 

========================

 

📌📌 ၅/ ဟားခါးမြို့နေ လူငယ်များအားလုံး  အရံသင်တန်းတက်ရောက်ကြရန် CDF -Hakha ထုတ်ပြန်

 

The Matupi Times ၊ ဇူလိုင်လ ၃ ၊ ၂၀၂၅ 

ချင်းပြည်နယ် ဟားခါးမြို့နယ် ဒေသခံကာကွယ်ရေးတပ်ဖွဲ့ CDF – Hakha မှ ၂၀၂၅ ဇူလိုင်လ ၁ ရက်နေ့မှစပြီး ဟားခါးမြို့နယ်အတွင်း မွေးဖွားကြီးပြင်းသူများ၊ အိမ်ပိုင်ယာပိုင်ရှိသူများနဲ့ လက်ရှိနေထိုင်နေတဲ့ လူငယ်မှန်သမျှ သိရှိလိုက်နာစေရမယ့် အချက် (၄) ချက်ကို ဇူလိုင်လ ၃ ရက်နေ့မှာ သတင်းထုတ်ပြန်ပါတယ်။

ထုတ်ပြန်ချက်ထဲမှာ ဟားခါးမြို့နေ လူငယ်များ ဟားခါးမြို့နယ်ကနေ မထွက်ခွါဖို့နဲ့ ထွက်ခွါရန် ကြိုးစားသူများကိုလည်း ဂိတ်ကနေ လှည့်ပြန်ခိုင်းမှာဖြစ်ကြောင်း၊ လူငယ်အမျိုးသားမှန်သမျှ ဟားခါးမြို့နယ်အရန်တပ်ဖွဲ့ သင်တန်းတက်ရောက်ရန်၊ မီဇိုရမ်ပြည်နယ်နဲ့ ပြည်တွင်းအခြားနေရာအသီးသီးမှာ ရောက်ရှိနေတဲ့ လူငယ်အမျိုးသားအားလုံး ဇူလိုင်လအတွင်း ဟားခါးမြို့နယ်အတွင်း ပြန်လာကြရန် စတဲ့အချက်တွေကို ထည့်သွင်းထားပါတယ်။

ဒါ့အပြင် နွေဦးတော်လှန်ရေးကာလမှာ နိုင်ငံခြားကို ရောက်နေတဲ့ ဟားခါးမြို့နယ်က သူတွေအနေနဲ့ ၂၀၂၅ ခုနှစ်အတွင်း အမေရိကန်ဒေါ်လာ တစ်ထောင်စီ ထည့်ဝင်ကြဖို့ကိုလည်း CDF - Hakha ရဲ့ ထုတ်ပြန်ချက်မှာ ဖော်ပြထားပါတယ်။

 

========================

 

📌📌 ၆/ စကစတပ်စွဲထားသည့် မွာလ်ပီးရွာကို ချင်းကာကွယ်ရေးပူးပေါင်းတပ်က သိမ်းပိုက် 

 

The Matupi Times ၊ ဇူလိုင် ၆ ၊ ၂၀၂၅

ချင်းပြည်နယ် မြောက်ပိုင်း ကလေး-သိုင်းငင်းလမ်းမပေါ် မွှာလ်ပီးရွာရှိ စစ်ကောင်စီတပ်စခန်းကို ချင်းကာကွယ်ရေးပူးပေါင်းတပ်များက ယမန်နေ့ညနေပိုင်းတွင် အပြီးသတ် သိမ်းပိုက်နိုင်ခဲ့တယ်လို့ သိရပါတယ်။

မေလ ၁၈ ရက်က စတင်၍ ကလေးမြို့မှ ချင်းတောင်ဖက်သို့ အင်အားရာချီနဲ့ စစ်ကြောင်းထိုးလာသည့် စစ်ကောင်စီစစ်ကြောင်းဟာ မေလကစပြီး စစ်ကိုင်းတိုင်း ကလေးမြို့နယ်နဲ့ ချင်းပြည်နယ်အစပ် ကလေး - သိုင်းငင်းလမ်းပေါ်က မွှာလ်ပီးရွာမှာ တပ်စွဲနေခဲ့တာပါ။

အင်အားရာချီ စကစ စစ်ကြောင်းသည် ချင်းပြည် (Chinland) ကောင်စီတပ်ဖွဲ့ဝင်များ၊ ချင်းညီနောင် တပ်ဖွဲ့ဝင် တော်လှန်ရေးတပ်များနှင့် အခြားသော မဟာမိတ်တပ်များ၏ ပူးပေါင်းခုခံမှုကြောင့် ရှေ့ဆက်မတိုးနိုင်ဖြစ်ခဲ့ပြီး မွှာလ်ပီးရွာတွင်သာ ခြေကုပ်ယူ တပ်စွဲခဲ့တာဖြစ်ပါတယ်။

စစ်ကောင်စီ စစ်ကြောင်း အခြေကုပ်စခန်းချထားတဲ့ မွှာလ်ပီးကျေးရွာကို ယမန်နေ့ ဇူလိုင် ၅ ရက် နံနက် ၆ နာရီမှ စ၍ ချင်းတပ်များ ထိုးစစ်ဆင်ခဲ့ရာ ညနေ ၅ နာရီတွင် သိမ်းပိုက်နိုင်ခဲ့ပြီး အချိန် ၁၁ နာရီကြာ တိုက်ပွဲ ပြင်းထန်ခဲ့တယ်လို့ သိရပါတယ်။

မွှာလ်ပီးကျေးရွာစခန်းကို တိုက်ခိုက်ခဲ့အပြီးမှာ လက်နက်ခဲယမ်းတချို့ သိမ်းပိုက်ရရှိခဲ့သလို စစ်ကောင်စီတပ်ဖွဲ့ဝင်အလောင်း ဆယ်နဲ့ချီပြီး တွေ့ရတယ်လို့ စစ်ရေးအရင်းအမြစ်သတင်းတွေထံက သိရပါတယ်။

အင်အား ၈၀၀ ခန့်ရှိ စကစ စစ်ကြောင်းဟာ ချင်းတော်လှန်ရေးအဖွဲ့တွေ သိမ်းပိုက်ထားတဲ့ သိုင်းငင်းဗျူဟာစခန်းကို ဦးတည်လာတာဖြစ်ပြီး သိုင်းငင်းရွာဟာ စစ်ကိုင်းတိုင်းထဲကနေ ချင်းပြည်နယ်ကို ဝင်ဖို့ ပြည်နယ်ဝင်ပေါက်ဖြစ်သလို ချင်းမြောက်ဖျားပိုင်းက CNF/CNA ပူးပေါင်းတပ်တွေ သိမ်းထားတဲ့ တွန်းဇံကို တက်သွားလို့ရသလို ချင်းညီနောင် သိမ်းထားတဲ့ ဖလမ်းဘက်ကို ဆင်းသွားကာ တောင်ပိုင်းကို ဝင်ရောက်နိုင်ပါတယ်။

#RadioNUGLocalNews

#SpringRevolution