12 Jul 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဇူလိုင်လ ( ၁၂ ) ရက်နေ့နောက်ဆုံးရပြည်တွင်းသတင်းများ

📌📌 ၁။ စစ်ပညာသင်တန်းအပတ်စဉ် ၂ ပြီးစီးတယ်လို့ ချင်းကာကွယ်ရေးတပ်ဖွဲ့ - ကန်ပက်လက် ထုတ်ပြန်။

 

စစ်စည်းကမ်းပြည့်ဝတဲ့ စစ်သားကောင်းပေါ်ပေါက်လာစေဖို့နဲ့ အိမ်နီးချင်း မိတ်ဖက်မဟာမိတ်တပ်ဖွဲ့တွေနဲ့အတူ အဖိနှိပ်ခံပြည်သူတရပ်လုံး လွတ်မြောက်တဲ့အထိ ချင်းညီနောင်နဲ့အတူ တိုက်ပွဲဝင်သွားမယ်လို့ ချင်းကာကွယ်ရေးတပ်ဖွဲ့ - ကန်ပက်လက်က ထုတ်ပြန်ပါတယ်။

ချင်းကာကွယ်ရေးတပ်ဖွဲ့ - ကန်ပက်လက်ရဲ့ အခြေခံစစ်ပညာသင်တန်းအပတ်စဉ် ၂ ဆင်းပွဲနဲ့အတူ အခုလို ထုတ်ပြန်တာပါ။

ကျင်ဒွေးမြို့နဲ့ ကန်ပက်လက်မြို့နယ်အတွင်းရှိ အသက် ၁၈ နှစ်အထက် လူငယ်မောင်မယ်အားလုံး အမျိုးသားရေးတာဝန်ကို ရှောင်လွှဲခြင်းမပြုကြဖို့နဲ့ လာမယ့် အခြေခံစစ်ပညာသင်တန်းအပတ်စဉ် ၃ မှာ တက်ကြွစွာ ပူးပေါင်းပါဝင်တက်ရောက်ပေးကြဖို့လည်း ဖိတ်ခေါ်ထားပါတယ်။

အပတ်စဉ် ၂ အခြေခံစစ်ပညာသင်တန်း ပြီးမြောက်နိုင်ရေးအတွက် ပံ့ပိုးကူညီပေးတဲ့ မဟာမိတ် ရက္ခိုင်အမျိုးသားအဖွဲ့ချုပ်/ အာရက္ခိတပ်တော်(ULA/AA) နဲ့ ပြည်တွင်းပြည်ပ ရောက်ရှိနေကြတဲ့ ထောက်ပို့ပြည်သူများအားလုံးကို အထူးကျေးဇူးတင်တဲ့အကြောင်း ချင်းကာကွယ်ရေးတပ်ဖွဲ့ - ကန်ပက်လက်က ထုတ်ပြန်ပါတယ်။

 

========================

 

📌📌 ၂။ ညီအစ်ကိုချင်း သွေးထွက်သံယိုကိစ္စကြောင့် ညီညွတ်ရေးလမ်းစဉ် ထိခိုက်စေတယ်လို့ CDF - Paletwaပြော။

 

ချင်းပြည်အတွင်း ညီအစ်ကိုကြား သွေးထွက်သံယိုကိစ္စကြောင့် စည်းလုံးညီညွတ်ရေးလမ်းစဉ် ထိခိုက်စေတယ်လို့ CDF - Paletwa ဇူလိုင် ၇ရက်နေ့က

ထုတ်ပြန်ပါတယ်။

CDF - Paletwaဟာ စစ်ကောင်စီနဲ့ အာဏာရှင်စနစ်ကိုသာ တိုက်ခိုက်မှာဖြစ်သလို တော်လှန်ရေးကာလ မျိုးနွယ်စု၊ ဒေသဆိုင်ရာ ကိစ္စရပ်တွေထဲ ဝင်ရောက်စွက်ဖက်မှာ မဟုတ်ဘူးလို့ ပြောပါတယ်။ အချင်းချင်း ပဋိပက္ခဖြစ်တဲ့ ဘယ်လက်နက်ကိုင်အဖွဲ့အစည်းကိုမှ အားပေးထောက်ခံမှာ မဟုတ်ဘူးလို့လည်း ထုတ်ပြန်ထားပါတယ်။

၂၀၂၅ ဇူလိုင်လ ပထမအပတ်စတင်တဲ့ ဖလမ်းမြို့နယ်ထဲ CNO/CNDF နဲ့ HPO/CDF-Hualngoram အကြား နှစ်ဘက်ပစ်ခတ်မှုကြောင့် ပြည်သူ ၃,၀၀၀ ဝန်းကျင် မီဇိုရမ်ပြည်နယ်ဘက် တိမ်းရှောင် နေရပါတယ်။ ဒီဋိပက္ခဖြစ်စဉ်အတွက် မီဇိုရမ်ငြိမ်းချမ်းရေးအကျိုးဆောင်အဖွဲ့၊ YMA - မီဇိုလူငယ်အဖွဲ့အစည်းတာဝန်ရှိသူတွေက CNO/CNDF, HPO/CDF-Hualngoram တာဝန်ရှိသူတွေကို တွေ့ဆုံညှိနှိုင်းပေမယ့် နှစ်ဘက်တင်းမာမှု ဆက်ရှိနေပါတယ်။

 

========================

 

📌📌 ၃။ နိုင်ငံရေးယဉ်ကျေးမှု ကိုင်စွဲထားကြဖို့ ချင်းတော်လှန်ရေးအင်အားစု ၃ ခုကို NUG ယာယီသမ္မတ တိုက်တွန်း။

 

ချင်းတော်လှန်ရေး လက်နက်ကိုင်တွေဖြစ်တဲ့ Chin National Defense Force – CNDF, Chin National Front/ Chin National Army (CNF/CNA) နဲ့ Chinland Defense Force - Hualngoram တို့အကြား နှစ်ဘက်ပစ်ခတ်မှုနဲ့ စစ်ရေးတင်းမာမှုတွေ ဆက်တိုက်ဖြစ်ပွားနေတာနဲ့ ပတ်သက်လို့  နိုင်ငံရေး စားပွဲဝိုင်းမှာသာ ညှိနှိုင်းအဖြေရှာကြဖို့ NUG ယာယီသမ္မတ Duwa Lashi Laက တိုက်တွန်းလိုက်ပါတယ်။

တော်လှန်ရေးအင်အားစုများကြား ပဋိပက္ခ၊ မတူကွဲပြားတဲ့ သဘောထားအမြင် ပေါ်ပေါက်လာရင် လက်နက်နဲ့ မဖြေရှင်းဘဲ ငြိမ်းချမ်းစွာ ဆွေးနွေးအဖြေရှာတဲ့ နိုင်ငံရေးယဉ်ကျေးမှုကို ကိုင်စွဲထားမှ တော်လှန်ရေးပန်းတိုင်အရောက်လှမ်းနိုင်မယ်လို့ ဖော်ပြထားပါတယ်။

အမျိုးသားညီညွတ်ရေးအတိုင်ပင်ခံကောင်စီ - NUCC ကလည်း ချင်းတော်လှန်ရေးအင်အားစုအချင်းချင်ကြား လက်နက်နဲ့ဖြေရှင်းမှုကိုအမြန်ဆုံးရပ်တန့်ပြီး နိုင်ငံရေး နည်းလမ်းနဲ့ ဆွေးနွေးအဖြေရှာကြဖို့ တိုက်တွန်းထားပြီး NUCCက ပါဝင်ကူညီဆောင်ရွက်ပေးဖို့ အသင့်ရှိကြောင်း ဇူလိုင် ၈ ရက်နေ့ ကြေညာပါတယ်။

၂၀၂၅ ဇူလိုင်လ ပထမအပတ်စတင်တဲ့ ဖလမ်းမြို့နယ်ထဲ CNO/CNDF နဲ့ HPO/CDF-Hualngoram အကြား နှစ်ဘက်ပစ်ခတ်မှုကြောင့် ပြည်သူ ၃,၀၀၀ ဝန်းကျင် မီဇိုရမ်ပြည်နယ်ဘက် ထွက်ပြေးတိမ်းရှောင်နေရပါတယ်။

#RadioNUGLocalNews

#SpringRevolution