19 Jul 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဇူလိုင်လ ( ၁၉ ) ရက်နေ့နောက်ဆုံးရပြည်တွင်းသတင်းများ

📌📌 ၁။ Chin CDM Medical Network က ချင်းပြည်သူ၊ တော်လှန်ရေးအင်အားစုနဲ့ သတင်းမီဒီယာတွေကို ပန်ကြားချက်ထုတ်။

 

ချင်းတော်လှန်ရေးအင်အားစုတွေအကြား အချင်းချင်း လက်နက်ကိုင်ဖြေရှင်းနေကြတဲ့ဖြစ်စဉ်တွေနဲ့ပတ်သက်လို့ ချင်းပြည်နယ် CDM ကျန်းမာရေးဝန်ထမ်းများ - Chin CDM Medical Network က ဇူလိုင် ၁၄ ရက်နေ့ သဘောထားထုတ်ပြန်ပါတယ်။

၂၀၂၅၊ ဇူလိုင်လ ၁၂၊ ၁၃ ရက်နေ့ လွတ်မြောက်ဒေသတနေရာမှာ ပြုလုပ်တဲ့ ချင်းပြည်နယ် CDM ကျန်းမာရေးဝန်ထမ်းတွေရဲ့ အစည်းအဝေးဆုံးဖြတ်ချက်အရလို့ ပြောပါတယ်။

၂၀၂၅ ဇူလိုင်လ ပထမအပတ်လောက်က CNO/CNDF, CNF/CNA နဲ့ CDF-Hualngoram စတဲ့ ချင်းတော်လှန်ရေးလက်နက်ကိုင် ၃ ဖွဲ့အကြား စစ်ရေးတင်းမာမှုကြောင့် ပစ်ခတ်မှုအထိ ဖြစ်ပွားခဲ့ကြတာပါ။

ချင်းတော်လှန်ရေးအင်အားစုအချင်းချင်း လက်နက်ကိုင်ဖြေရှင်းတာ ကြားသိရလို့ စိတ်ထိခိုက် ဝမ်းနည်းရသလို ဒီဖြစ်စဉ်တွေကြောင့် ပြည်သူအချင်းချင်းအကြား အမုန်းတရားများ တိုးပွားလာပြီး ဆိုးကျိုးအနေနဲ့ စိတ်ပိုင်းဆိုင်ရာ၊ ရုပ်ပိုင်းဆိုင်ရာ ဒဏ်ရာ (မသန်စွမ်းလူနာအပါအဝင်) ရရှိသူတွေ တိုးပွားလာနိုင်တာ၊ ကျန်းမာရေးနဲ့ ပြန်လည်ထူထောင်ရေး လုပ်ငန်းတွေ နှောင့်နှေးပြီး ပြည်သူ့ကျန်းမာရေးဆိုင်ရာ နောက်ဆက်တွဲဒုက္ခတွေ ပြည်သူတွေမှာ ကြုံတွေ့လာနိုင်တယ်လို့ ချင်းပြည်နယ် CDM ကျန်းမာရေးဝန်ထမ်းများအဖွဲ့အစည်းက အကြံပြု သတိပေးပါတယ်။

ဒါ့အပြင် ချင်းပြည်သူလူထု၊ တော်လှန်ရေးအဖွဲ့အစည်း၊ Supporting Team နဲ့ သတင်းမီဒီယာတွေကိုလည်း လိုက်နာပေးကြဖို့ဆိုပြီး ပန်ကြားချက်အကြံပြုချက်တွေ Chin CDM Medical Network က ထုတ်ပြန်ထားပါတယ်။

အချင်းချင်းအမုန်းပွားစေမယ့် အပြောအဆို ဆင်ခြင်ကြဖို့၊ အချင်းချင်းတိုက်ခိုက်မယ့်နေရာ အသုံးပြုမယ့် ရန်ပုံငွေရှာတာမျိုး ရှောင်ရှားပေးကြဖို့၊ လူမျိုးရေး အမုန်းပွားစေမယ့် ကိစ္စရပ်တွေ ရေးသားဖြန့်ဝေတာ မပြုလုပ်ကြဖို့၊ အငြင်းပွားဖွယ် ကိစ္စရပ်တွေကို ငြိမ်းချမ်းတဲ့နည်းလမ်းနဲ့ အဖြေရှာနိုင်ရေးကိုသာ ဦးစားပေးနိုင်ကြဖို့၊ မိမိအဖွဲ့အစည်းကို ကူညီလိုတဲ့ ဆန္ဒတခုတည်းနဲ့ ပြည်သူလူထုကို သတင်းမှား မဖြန့်ချိကြဖို့ အပါအဝင် ချင်းပြည်အတွင်း ကျန်းမာရေး၊ ပညာရေးနဲ့ ပြည်သူ့ဝန်ဆောင်မှုလုပ်ငန်းတွေကို အတားအဆီး မပြုလုပ်ကြဖို့ စတဲ့အချက်တွေ ပါဝင်ပါတယ်။

စစ်ကောင်စီအာဏာသိမ်းတဲ့နောက် တနိုင်ငံလုံးအတိုင်းအတာ ပြုလုပ်ထားတဲ့စာရင်းတွေအရ အကြမ်းမဖက် အာဏာဖီဆန်လှုပ်ရှားမှု - Civil Disobedience Movement မှာ ချင်းပြည်က ဝန်ထမ်း ၁၅,၀၀၀ ဝန်းကျင် ပါဝင်ခဲ့ပြီး တနိုင်ငံလုံးမှာ CDM ပြုလုပ်မှု အများဆုံး ပြည်နယ်တခု ဖြစ်ခဲ့ပါတယ်။

 

========================

 

📌📌 ၂။ ဟားခါးမြို့က ပြည်သူ့စစ်တစ်ဦးကို CDF-Hakha အရှင်ဖမ်းဆီးရမိ ၊ စစ်ကောင်စီတပ်ဖွဲ့ဝင်တစ်ဦး လက်နက်ခဲယမ်းများနှင့်အတူ CDF-Hakha ထံအလင်းဝင်။

 

ချင်းပြည်နယ်၊ ဟားခါးမြို့က စစ်ကောင်စီတပ်ဖွဲ့ဝင်တစ်ဦးသည် လက်နက်ခဲယမ်းများနှင့်အတူ CDF-Hakha ထံ အလင်းဝင်လာပြီး၊ ဟားခါးမြို့က စစ်ကောင်စီလက်အောက်ခံ ပြည်သူ့စစ်တစ်ဦးကိုလည်း CDF-Hakha မှ အရှင်းဖမ်းဆီးရမိတယ်လို့ သတင်းထုတ်ပြန်ပါတယ်။

CDF-Hakha မှ ဟားခါးမြို့ပေါ်က ပြည်သူ့စစ်တစ်ဦးကို ယမန်နေ့ ၂၀၂၅ ခုနှစ်၊ ဇူလိုင်လ ၁၃ ရက်နေ့တွင် ဖမ်းဆီးနိုင်ခဲ့တာဖြစ်ပါတယ်။

ဒါ့အပြင် ဇူလိုင်လ ၁၀ ရက်နေ့တွင်လည်း ဟားခါးမြို့ရှိ စစ်သားတစ်ဦးသည် လက်နက်ခဲယမ်းများနှင့်အတူ Chinland Defense Force – Hakha ထံသို့ အလင်းဝင်လာခဲ့တယ်လို့ သိရပါတယ်။

အလင်းဝင်လာသူကို Chinland Defense Force – Hakha မှ နွေးနွေးထွေးထွေး ကြိုဆိုပြီး ငွေသားဆုကြေးများ ချီးမြှင့်သည့်အပြင် လုံခြုံသည့်နေရာ ရောက်သည်အထိ တာဝန်ယူ ဆောင်ရွက်ပေးသွားမယ်လို့ ဆိုပါတယ်။

ဆက်လက်ပြီး စစ်ကောင်စီ လက်အောက်တွင် တာဝန်မထမ်းဆောင်လိုဘဲ ပြည်သူ့ရင်ခွင်သို့ ဘက်ပြောင်းချင်သူများကိုလည်း CDF-Hakha မှ အမြဲတမ်းကြိုဆိုကြောင်းနှင့် လုံခြုံသည့်နေရာ ရောက်သည်အထိ တာဝန်ယူမည်ဖြစ်ကြောင်း အသိပေးကြေညာလိုက်ပါသည်။

ပြီးခဲ့တဲ့ ၂၀၂၅ ခုနှစ်၊ ဇူလိုင်လ ၆ ရက်နေ့တွင်လည်း ဟားခါးမြို့က ရဲတပ်ဖွဲ့ဝင်ဟာ လက်နက်ခဲယမ်းများနှင့်အတူ Chinland Defense Force – Hakha ထံသို့ အလင်းဝင်လာခဲ့တယ်လို့ သိရပါတယ်။

 

========================

 

📌📌 ၃။ ချင်းအမျိုးသားကောင်စီ - မတူပီ (CNC-Matupi) ကို ဖွဲ့စည်းကြောင်းသတင်းထုတ်ပြန်။

 

ချင်းအမျိုးသားကောင်စီ - မတူပီ (Chin National Council - Matupi) ကို ဖွဲ့စည်းကြောင်း ဒီနေ့ ဇူလိုင်လ ၁၄ ရက်နေ့မှာ ကြေငြာပါတယ်။

ထုတ်ပြန်ချက်ထဲမှာ မတူပီမြို့နယ်ဆိုင်ရာကောင်စီတရပ်အား ဖွဲ့စည်းရန်အတွက် မတူပီမြို့အား စစ်ကောင်စီလက်အောက်မှ မသိမ်းပိုက်ခင်ကတည်းက မတူပီတစ်မြို့နယ်လုံးရှိ တော်လှန်ရေးအစုအဖွဲ့အားလုံးမှ သဘောတူညီခဲ့ကြပြီး ကောင်စီမူကြမ်းရေးဆွဲနိုင်ရန် မူကြမ်းရေးဆွဲရေးကော်မတီအတွက် အုပ်ချုပ်ရေး၊ ကာကွယ်ရေးနှင့် အထောက်အကူပြုကော်မတီတို့မှ ကိုယ်စားလှယ်များ ရွေးချယ်ကာ ပြင်ပ ဥပဒေပညာရှင်များအကူအညီဖြင့် ကောင်စီ ဥပဒေမူကြမ်းအား (၆) လကျော်ရေးဆွဲခဲ့ကြတယ်လို့ ဆိုပါတယ်။

အဆိုပါ မူကြမ်းကိုလည်း ၂၀၂၅၊ ဇန်နဝါရီလ ၁ ရက်နေ့တွင် အားလုံးသဘောတူအတည်ပြုခဲ့ကြတယ်လို့ ဆိုပါတယ်။

ချင်းအမျိုးသားကောင်စီ - မတူပီကို ကောင်စီဥပဒေပါ ပြဌာန်းချက်များနှင့်အညီ ပြည်ထောင်စုအတိုင်းအတာ၊ ချင်းတမျိုးသားလုံးအတိုင်းအတာနှင့် မြို့နယ်တခုလုံးအတိုင်းအတာတို့တွင် တော်လှန်ရေးအဖွဲ့အားလုံး အချိတ်ဆက်မိမိ၊ ဟန်ချက်ညီညီ လွှမ်းခြုံဆောင်ရွက်သွားမယ်လို့လည်း ထုတ်ပြန်ချက်မှာ ဖော်ပြထားပါတယ်။

ဒါ့အပြင် CNC-Matupi အနေဖြင့် လက်ရှိကောင်စီတွင် ပါဝင်ခြင်းမရှိသေးသည့် တော်လှန်ရေးအဖွဲ့ဝင်များရှိပါက အားလုံးပါဝင်နိုင်ရေးအတွက် စည်းရုံးဆောင်ရွက်သွားမယ်လို့လည်း ဆိုပါတယ်။

လက်ရှိ စစ်ကောင်စီကင်းစင်ပြီဖြစ်တဲ့ မတူပီမြို့မှာ MRO/CDF-Matupi နှင့် မတူပီမြို့နယ်ပြည်သူ့အုပ်ချုပ်ရေးအဖွဲ့တို့က အုပ်ချုပ်ရေးနှင့် ပြန်လည်တည်ဆောက်ရေး လုပ်ငန်းတွေကို ဆောင်ရွက်နေတာလည်း ဖြစ်ပါတယ်။

#RadioNUGLocalNews

#SpringRevolution