21 Jul 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇူလိုင်လ ( ၂၁ ) ရက်နေ့ ရပြည်တွင်းသတင်းများ

📌📌 1/ တော်လှန်ရေး (၄) နှစ်ကာလအတွင်း CDF-Matupi ၊ ကိုင်ဆီးတပ်ရင်းမှ တပ်ဖွဲ့ဝင်(၇)ဦး ကျဆုံးကြောင်း သတင်းထုတ်ပြန်

 

တော်လှန်ရေး (၄) နှစ်တာကာလအတွင်း ချင်းလန်းကာကွယ်ရေးတပ်ဖွဲ့ မတူပီ (တပ်ရင်း-၃)၊ ကိုင်ဆီးတပ်ရင်း တပ်ဖွဲ့ဝင် ရဲဘော် (၇) ဦး ကျဆုံးပြီး (၃) ဦး ကိုယ်လက်အင်္ဂါပေးဆပ်ခဲ့ကြကြောင်း ကိုင်ဆီးတပ်ရင်း တည်ထောင်ခြင်း (၄) နှစ်ပြည့်နေ့ ယနေ့ ဇူလိုင်လ ၁၄ ရက်နေ့မှာ သတင်းထုတ်ပြန်ပါတယ်။

CDF-Matupi၊ ကိုင်ဆီးတပ်ရင်းကို ၂၀၂၁ ခုနှစ် ဇူလိုင်လ ၁၄ ရက်နေ့တွင် စတင်တည်ထောင်ခဲ့တာဖြစ်ပြီး၊ ချင်းပြည် (ချင်းလန်း) အတိုင်းအတာဖြင့် စခန်းသိမ်းတိုက်ပွဲများနှင့် စစ်ကြောင်းတိုက်ပွဲများတွင် အကြိမ်ပေါင်းများစွာ ပါဝင်နိုင်ခဲ့ပြီး၊ ထယ်ဘွေးကျေးရွာအနီး စစ်တပ်စခန်းကိုလည်း (Vui Bawk Operation) အမည်ဖြင့် မဟာမိတ်တပ်ဖွဲ့ဝင်များနှင့် ၂၀၂၃ ခုနှစ် ဒီဇင်ဘာလ (၈) ရက်နေ့တွင် သိမ်းပိုက်နိုင်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

ထုတ်ပြန်ချက်မှာ တော်လှန်ရေး (၄) နှစ်တာကာလအတွင်း ကိုင်ဆီးတပ်ရင်းမှ ကျဆုံးရဲဘော်များနှင့် ကိုယ်လက်အင်္ဂါပေးဆပ်ခဲ့သူများရှိသလို ပြည်သူ (၆) ဦး အသက်ဆုံးရှုံးခဲ့ရပြီး၊ (၄) ဦး ကိုယ်လက်အင်္ဂါပေးဆပ်ခဲ့ကြတယ်လို့ ဆိုပါတယ်။

ဆက်လက်၍ ကိုင်ဆီးတပ်ရင်းသည် မိဘပြည်သူများ၏ ထောက်ပံ့မှုဖြင့် (၄) နှစ်တိုင် တော်လှန်ရပ်တည်နိုင်ခဲ့တာဖြစ်ကြောင်း၊ မိမိလူမျိုးနှင့် တိုင်းပြည်အတွက် အာဏာရှင်အမြစ်ပြတ်ပျောက်ရေးနှင့် ဖက်ဒရယ် ဒီမိုကရေစီတည်ဆောက်ရေးအတွက် ဆက်လက်တိုက်ပွဲဝင်သွားမည်ဖြစ်သောကြောင့် မိဘပြည်သူများအနေဖြင့် ဆက်လက်ထောက်ပံ့ပေးကြရန်လည်း ထည့်သွင်းဖော်ပြထားပါတယ်။

========================

 

📌📌 2/ ဟားခါးမြို့က ပြည်သူ့စစ်တစ်ဦးကို CDF-Hakha အရှင်ဖမ်းဆီးရမိ ၊ စစ်ကောင်စီတပ်ဖွဲ့ဝင်တစ်ဦး လက်နက်ခဲယမ်းများနှင့်အတူ CDF-Hakha ထံအလင်းဝင် 

 

ချင်းပြည်နယ်၊ ဟားခါးမြို့က စစ်ကောင်စီတပ်ဖွဲ့ဝင်တစ်ဦးသည် လက်နက်ခဲယမ်းများနှင့်အတူ CDF-Hakha ထံ အလင်းဝင်လာပြီး၊ ဟားခါးမြို့က စစ်ကောင်စီလက်အောက်ခံ ပြည်သူ့စစ်တစ်ဦးကိုလည်း CDF-Hakha မှ အရှင်ဖမ်းဆီးရမိတယ်လို့ သတင်းထုတ်ပြန်ပါတယ်။

CDF-Hakha မှ ဟားခါးမြို့ပေါ်က ပြည်သူ့စစ်တစ်ဦးကို ယမန်နေ့ ၂၀၂၅ ခုနှစ်၊ ဇူလိုင်လ ၁၃ ရက်နေ့တွင် ဖမ်းဆီးနိုင်ခဲ့တာဖြစ်ပါတယ်။ ဒါ့အပြင် ဇူလိုင်လ ၁၀ ရက်နေ့တွင်လည်း ဟားခါးမြို့ရှိ စစ်သားတစ်ဦးသည် လက်နက်ခဲယမ်းများနှင့်အတူ Chinland Defense Force - Hakha ထံသို့ အလင်းဝင်လာခဲ့တယ်လို့ သိရပါတယ်။

အလင်းဝင်လာသူကို Chinland Defense Force - Hakha မှ နွေးနွေးထွေးထွေး ကြိုဆိုပြီး ငွေသားဆုကြေးများ ချီးမြှင့်သည့်အပြင် လုံခြုံသည့်နေရာရောက်သည်အထိ တာဝန်ယူဆောင်ရွက်ပေးသွားမယ်လို့ ဆိုပါတယ်။

 

========================

 

📌📌 3/ ချင်းအမျိုးသားကောင်စီ - မတူပီ(CNC-Matupi)ကို ဖွဲ့စည်းကြောင်းသတင်းထုတ်ပြန်

 

ချင်းအမျိုးသားကောင်စီ - မတူပီ (Chin National Council - Matupi) ကို ဖွဲ့စည်းကြောင်း ဒီ‌နေ့ ဇူလိုင်လ ၁၄ ရက်နေ့မှာ ကြေငြာပါတယ်။

ထုတ်ပြန်ချက်ထဲမှာ မတူပီမြို့နယ်ဆိုင်ရာ ကောင်စီတရပ်အား ဖွဲ့စည်းရန်အတွက် မတူပီမြို့အား စစ်ကောင်စီလက်အောက်မှ မသိမ်းပိုက်ခင်ကတည်းက မတူပီတစ်မြို့နယ်လုံးရှိ တော်လှန်ရေးအစုအဖွဲ့အားလုံးမှ သဘောတူညီခဲ့ကြပြီး ကောင်စီမူကြမ်းရေးဆွဲနိုင်ရန် မူကြမ်းရေးဆွဲရေးကော်မတီအတွက် အုပ်ချုပ်ရေး၊ ကာကွယ်ရေးနှင့် အထောက်အကူပြု ကော်မတီတို့မှ ကိုယ်စားလှယ်များ ရွေးချယ်ကာ ပြင်ပ ဥပဒေပညာရှင်များအကူအညီဖြင့် ကောင်စီ ဥပဒေမူကြမ်းအား (၆) လကျော်ရေးဆွဲခဲ့ကြတယ်လို့ ဆိုပါတယ်။

အဆိုပါ မူကြမ်းကိုလည်း ၂၀၂၅ ခုနှစ် ဇန်နဝါရီလ ၁ ရက်နေ့တွင် အားလုံးသဘောတူအတည်ပြုခဲ့ကြတယ်လို့ ဆိုပါတယ်။

ချင်းအမျိုးသားကောင်စီ - မတူပီကို ကောင်စီဥပဒေပါ ပြဌာန်းချက်များနှင့်အညီ ပြည်ထောင်စုအတိုင်းအတာ၊ ချင်းတမျိုးသားလုံးအတိုင်းအတာနှင့် မြို့နယ်တခုလုံးအတိုင်းအတာတို့တွင် တော်လှန်ရေးအဖွဲ့အားလုံးအချိတ်ဆက်၊ ဟန်ချက်ညီညီ လွှမ်းခြုံဆောင်ရွက်သွားမယ်လို့လည်း ထုတ်ပြန်ချက်မှာ ဖော်ပြထားပါတယ်။

ဒါ့အပြင် CNC-Matupi အနေဖြင့် လက်ရှိကောင်စီတွင် ပါဝင်ခြင်းမရှိသေးသည့် တော်လှန်ရေးအဖွဲ့ဝင်များရှိပါက အားလုံးပါဝင်နိုင်ရေးအတွက် စည်းရုံးဆောင်ရွက်သွားမယ်လို့လည်း ဆိုပါတယ်။

လက်ရှိ စစ်ကောင်စီကင်းစင်ပြီဖြစ်တဲ့ မတူပီမြို့မှာ MRO/CDF-Matupi နှင့် မတူပီမြို့နယ် ပြည်သူ့အုပ်ချုပ်ရေးအဖွဲ့တို့က အုပ်ချုပ်ရေးနှင့် ပြန်လည်တည်ဆောက်ရေးလုပ်ငန်းတွေကို ဆောင်ရွက်နေတာလည်း ဖြစ်ပါတယ်။

 

========================

 

📌📌 4/ ရေဇွာမြို့အနီးတွင် ကုန်တင်ယာဉ်ကားကြီး (၂) စီးတိမ်းမှောက် 

 

ချင်းပြည်နယ် တောင်ပိုင်း၊ ရေဇွာမြို့အနီးတွင် ဒီကနေ့ ဇူလိုင်လ ၁၆ ရက်နေ့ နေ့ခင်းပိုင်းတွင် ကုန်တင်ယာဉ်ကားကြီး (၂) စီး တိမ်းမှောက်ခဲ့ပြီး ထိခိုက်ဒဏ်ရာရရှိသူ မရှိဘူးလို့ ဒေသခံတွေထံက သိရပါတယ်။

ဖြစ်စဉ်မှာ စာလ်ထောင်ရွာမှ ရေဇွာမြို့သို့ ထွက်ခွာရာ လမ်းခုလတ်တွင် ကုန်တင်ယာဉ်ကားကြီး (၁) စီးသည် လမ်းအောက်ဘက်သို့ ထိုးကျခဲ့တာဖြစ်ပြီး အခြားကုန်တင်ယာဉ်တစ်စီးမှ အဆိုပါကားကို ပြန်လည်ဆယ်ယူရန် ကူညီပေးနေစဉ် ထိုကုန်တင်ယာဉ် (၁) စီးလည်း လမ်းပေါ်မှာ တိမ်းမှောက်ခဲ့တာဖြစ်ကြောင်း သိရသည်။

"အဲ့ဒီကားက စာလ်ထောင်နဲ့ ရေဇွာမြို့ကြားမှာ နေ့လည်က မှောက်တာ။ လမ်းမှာ ရပ်ထားတဲ့ကားရှောင်မောင်းရင် ကားတစ်စီးက ချောက်ထဲကျသွားတာလို့ ပြောတယ်။ ချောက်ထဲကျတဲ့ ကားကို နောက်ကားတစ်စီးက ဆွဲပေးရင်း အဲ့တစီးလည်း လမ်းပေါ်မှာ လဲသွားတယ်။ ကားမှောက်တဲ့နေရာက လမ်းနည်းနည်းကျဉ်းတယ်။ သေဆုံးတဲ့သူတွေတော့ မရှိဘူး။ ဒေသခံတွေကလည်း ကားမှောက်တဲ့နေရာသွားပြီး ဝိုင်းကူပေးကြတယ်။" လို့ ဒေသခံတစ်ဦးက The Matupi Times ကို ပြောပါတယ်။

အဆိုပါ ကား (၂) စီးမှာ ပြည်မဘက်မှာ ကုန်ပစ္စည်းများ တင်ဆောင်လာကာ ယမန်နေ့ညတွင် စာလ်ထောင် ကျေးရွာသို့ ဝင်ရောက်ခဲ့ပြီး တညတည်း ခိုပြီးနောက် ယနေ့မနက်ပိုင်း၌ ရေဇွာမြို့သို့ ဦးတည်ထွက်ခွာလာတာဖြစ်ကြောင်း သိရသည်။

 

========================

 

📌📌 5/ Chinland Defense Force –Matupi ဌာနချုပ်စခန်းကို စစ်ကောင်စီ ဗုံးကြဲတိုက်ခိုက် 

 

မတူပီမြို့နယ် ဒေသခံ လက်နက်ကိုင်အဖွဲ့တစ်ခုဖြစ်တဲ့ Chinland Defense Force – Matupi ဌာနချုပ်စခန်းကို စစ်ကောင်စီတပ်က ပြီးခဲ့တဲ့ ဇူလိုင်လ ၁၇ ရက်ညနေပိုင်းမှာ ပေါင် ၅၀၀ နဲ့ ဗုံးကြဲတိုက်ခိုက်ခဲ့တယ်လို့ သိရပါတယ်။

“ကျွန်တော်က ခရီးသွားရင်း အဲ့အနီးနားမှာ ခရီးတထောက်နားတာပေါ့။ စစ်တပ်လေယာဉ်သံကြားပြီး ဗုံးကြဲသွားတာ။ အချိန်မှီရှောင်နိုင်ခဲ့ကြလို့ ဒဏ်ရာရတဲ့တွေတော့ မရှိဘူး။ ကံကောင်းတယ်လို့ ပြောရမှာပေါ့။” ဟု ဒေသခံတစ်ဦးက ပြောပါတယ်။

CDF – Matupi ဟာ ချင်းပြည်ကာကွယ်ရေးတပ် - မတူပီ တပ်မဟာ (၂) ဆိုတဲ့နာမည်ကနေ မေလ ၃၁ ရက်နေ့က မှ နာမည်ပြောင်းလဲထားတဲ့ မတူပီဒေသတွင်း လက်နက်ကိုင်အဖွဲ့အစည်းတစ်ခု ဖြစ်ပါတယ်။

 

========================

 

📌📌 6/ မိုးသည်းထန်မှုကြောင့် ပျက်စီးနေသည့် မတူပီ-မင်းတပ်လမ်းပိုင်းကို ပြုပြင်ဆောင်ရွက်နေ 

 

The Matupi Times ၊ ဇူလိုင် ၂၀ ၊ ၂၀၂၅ 

မိုးသည်းထန်စွာ ရွာသွန်းမှုကြောင့် ပျက်စီးနေသည့် မတူပီ-မင်းတပ် လမ်းပိုင်းကို CDF-Matupi/MRO နှင့် စည်ပင်သာယာရေး၊ လမ်းတံတားဦးစီးဌာန ဝန်ထမ်းများ ပူးပေါင်းပြီး ပြုပြင်ဆောင်ရွက်နေကြောင်း ဒီနေ့ညပိုင်းမှာ သတင်းထုတ်ပြန်ပါတယ်။
အဆိုပါလမ်းပိုင်းသည် ၂၀၂၅ ခုနှစ် ဇွန်လမှ စတင်၍ ချင်းပြည်အတွင်း မိုးသည်းထန်စွာ ရွာသွန်းခြင်း၊ တောင်ကျချောင်းရေကြီးခြင်း၊ လမ်းပြိုခြင်းတို့ကြောင့် အဆမတန် ယိုယွင်းပျက်စီးသွားသောကြောင့် လုပ်သားအင်အား၊ ငွေအင်အား၊ ပြည်သူ့အင်အား စုပေါင်းကာ မတူပီ-မင်းတပ်လမ်းကို ယခုလ (ဇူလိုင်လ) အတွင်း ပြုပြင်ဆောင်ရွက်လျက်ရှိကြောင်း သိရသည်။

#RadioNUGLocalNews

#SpringRevolution