20 Sep 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ စက်တင်ဘာလ ( ၂၀ ) ရက်နေ့နောက်ဆုံးရပြည်တွင်းသတင်းများ

📌📌 ၁။ မင်းတပ်နဲ့ ဝေးလံတဲ့ ကျေးရွာတွေမှာ SAVE Team က ဆေးကုသမှုဆောင်ရွက်ပေးနေ။

 

မင်းတပ်နဲ့ ဝေးလံတဲ့ ကျေးရွာတွေမှာ SAVE Teamဆေးအဖွဲ့က ဆေးကုသမှုဆောင်ရွက်ပေးနေတယ်လို့ သိရပါတယ်။ 

ပြီးခဲ့တဲ့ ရက်သတ္တပတ်ကစပြီး ကွင်းဆင်းကုသမှုပေးတာလို့ SAVE Team ဆေးအဖွဲ့က ပြောပါတယ်။

“လောလောဆယ် ကျနော်တို့ လူနာ ၅၀၀ ကျော် ဆေးကုသပေးနိုင်တယ်၊ ဆေးလိုအပ်ချက်ရှိလာတော့ အကုန်မပတ်နိုင်ခဲ့ဘူး။ အဖြစ်များကြတာက Seasonal Flu (ရာသီတုပ်ကွေး) တော်တော်ဖြစ်နေတယ်။”လို့ ပြောပါတယ်။

SAVE Team အနေနဲ့ ပြည်သူ့ကျန်းမာရေးအတွက် ကျေးရွာတွေမှာ အခမဲ့ဆေးကုသမှု ဆောင်ရွက်ပေးနေတာဖြစ်လို့ ဆေးဝါးလိုအပ်ချက်တွေ ရှိနေတယ်လို့လည်း ပြောပါတယ်။

၂၀၂၁ အာဏာသိမ်းကာလကစလို့ CDM ကျန်းမာရေးဝန်ထမ်း၊ တခြားတက်ကြွလူငယ်တွေနဲ့ ဖွဲ့ထားတဲ့ SAVE Team ဟာ ၄ နှစ်ကျော်ကာလအချိန်ထိ မင်းတပ်မြို့နယ် ပြည်သူ့ကျန်းမာရေးအတွက် ကိုယ်ထူကိုယ်ထ လုပ်ဆောင်ပေးလျက်ရှိပါတယ်။

 

========================

 

📌📌 ၂။ ပလက်ဝမြို့နယ်မှာ ငှက်ဖျားရောဂါပျံ့နှံ့ကူးစက်၊ ကလေးတစ်ဦး ထပ်မံသေဆုံး။

 

ချင်းပြည်နယ်၊ ပလက်ဝမြို့နယ်၊ ဟုမ်းကျေးရွာမှာ ငှက်ဖျားရောဂါကြောင့် ဆေးကုသမှု မလုံလောက်လို့ ကလေးငယ်တစ်ဦး ထပ်မံ သေဆုံးခဲ့တယ်လို့ ဒေသခံတွေဆီက သိရပါတယ်။

သေဆုံးသူဟာ ဟုမ်းကျေးရွာက ဦးအိုင်ထန်နဲ့ ဒေါကေ့လွန်တို့ရဲ့ သမီးငယ် အသက် (၅) နှစ်အရွယ် မဆွေးအိုင်ထန်ဖြစ်ပြီး စက်တင်ဘာ ၁၅ ရက် ညနေ ၅ နာရီအချိန်ဝန်းကျင်မှာ သေဆုံးခဲ့တာပါ။

"ငှက်ဖျားရောဂါနဲ့ သေဆုံးတာပါ။ ရွာမှာ ဆေးဝါးတွေမရှိလို့ လုံလောက်စွာ ဆေးကုသမှုမရဘဲ အသက်ဆုံးရှုံးတာပါ။ ဆေးကုသရင် အသက်ဆုံးရှုံးတဲ့ထိ ရှိမှာမဟုတ်ဘူး။ အခု ရွာမှာလည်း အတော်ဖြစ်နေကြသေးတယ်"လို့ ဒေသခံတစ်ဦးက ပြောပါတယ်။

လက်ရှိ ဟုမ်းကျေးရွာမှာ ငှက်ဖျားရောဂါ နဲ့ ရာသီတုတ်ကွေး ကူးစက်မှုရောဂါကြောင့် ဖျားနာနေကြတဲ့ လူနာတွေအများပြားရှိနေသေးတယ်လို့ သူက ပြောပါတယ်။

ပြီးခဲ့တဲ့ စက်တင်ဘာ ပထမအပတ်နဲ့ ဒုတိယအပတ်တုန်းကလည်း ပလက်ဝမြို့နယ်၊ မောင်၊ ဗုဒ္ဓဂါမ၊ အထက်ဗုဒ္ဓဂါမ၊ ကိုဖေကြီး စတဲ့ကျေးရွာတွေမှာ ငှက်ဖျားရောဂါနဲ့ ရာသီတုတ်ကွေး ကူးစက်မှုရောဂါကြောင့် ကလေးငယ် ၃ ဦးအပါ အဝင် ၄ ဦး သေဆုံးခဲ့ပါတယ်။

သေဆုံးသူတွေဟာ ဆေးကုသမှုမရကြတဲ့သူတွေ၊ လုံလောက်စွာ ဆေးကုသမှုမရကြတဲ့သူတွေဖြစ်ပါတယ်။

ပလက်ဝမြို့နယ်၊ လေမြိုချောင်းရှိ ကျေးရွာ (၁၀) ခန့်တွင် ပြီးခဲ့တဲ့ သြဂုတ်လမှစ၍ ငှက်ဖျားရောဂါနဲ့ ရာသီတုတ်ကွေး ကူးစက်မှုရောဂါဖြစ်ပွားခဲ့တာဖြစ်ပါတယ်။

အဲဒီငှက်ဖျားရောဂါနဲ့ ရာသီတုတ်ကွေး ကူးစက်မှုရောဂါဖြစ်ပွားတဲ့ကျေးရွာမှာ ကျန်းမာရေးဝန်ထမ်းနဲ့ ဆေးဝါးတွေ အရေးပေါ်အကူအညီတွေ လိုအပ်နေပါတယ်။

 

========================

 

📌📌 ၃။ ပလက်ဝ၊မတူပီ၊မင်းတပ်၊ကန်ပက်လက် မြို့နယ်တွင် ရွေးကောက်ပွဲကျင်းပမည်မဟုတ်ကြောင်း စစ်ကော်မရှင်ထုတ်ပြန်။

 

ဒီဇင်ဘာလ ရွေးကောက်ပွဲကျင်းပဖို့ပြင်ဆင်နေတဲ့ စစ်ကော်မရှင်က ရွေးကောက်ပွဲကျင်းပရန်အခြေအနေ မရှိသည့်မြို့နယ်တွေကို  ထုတ်ပြန်ကြေညာပါတယ်။

မြန်မာတစ်နိုင်ငံလုံးတွင် ရွေးကောက်ပွဲကျင်းပမယ်လို့ စစ်အုပ်စုလက်အောက်ခံ ရွေးကောက်ပွဲကော်မရှင်က အစောပိုင်းမှာထုတ်ပြန်ထားပေမယ့် စက်တင်ဘာ ၁၄ ရက် ညပိုင်းမှာတော့ မြို့နယ်ပေါင်း ၅၆ မြို့နယ်မှာ ရွေးကောက်ပွဲကျင်းပနိုင်မှာ မဟုတ်တော့ဘူးလို့ ထုတ်ပြန်လာတာပါ။

ရွေးကောက်ပွဲတွေ ကျင်းပခြင်း မပြုမယ့်မြို့တွေထဲမှာ ချင်းပြည်နယ်က ပလက်ဝ၊မတူပီ၊မင်းတပ်၊ကန်ပက်လက် မြို့နယ်တို့ပါဝင်လာပါတယ်။ 

ပလက်ဝမြို့နယ်ကို အာရက္ခတပ်တော်(အေအေ)က သိမ်းပိုက်ထိန်းချုပ်ထားတာဖြစ်ပြီး မင်းတပ်၊မတူပီနှင့်ကန်ပက်လက်မြို့တွေကို ချင်းညီနောင်အဖွဲ့ဝင် ဒေသခံကွယ္ရေးအဖွဲ့တွေက သိမ်းပိုက်ထိန်းချုပ်ထားတာဖြစ်ပါတယ်။

ဒါဟာ နိုင်ငံတဝန်း ရွေးကောက်ပွဲကျင်းပဖို့ ပြင်ဆင်နေတဲ့ စစ်အုပ်စုအနေနဲ့ သူတို့မထိန်းချုပ်နိုင်တဲ့ မြို့နယ်တွေမှာ ရွေးကောက်ပွဲကျင်းပဖို့ မဖြစ်နိုင်တဲ့အခြေအနေကို တရားဝင်ထုတ်ဖော်ဝန်ခံလိုက်တာလည်း ဖြစ်ပါတယ်။

လာမယ့်ဒီဇင်ဘာလ ၂၈ ရက်မှာပြုလုပ်မယ့် အထွေထွေရွေးကောက်ပွဲအပိုင်း(၁)ကိုတော့ စစ်ကောင်စီထိန်းချုပ်ထားတဲ့ ဟားခါးနဲ့တီးတိန်မြို့နယ်မှာ ကျင်းပပြုလုပ်မည်ဖြစ်ကြောင်း စစ်ကော်မရှင်က ဩဂုတ်လ ၂၀ ရက်နေ့က ထုတ်ပြန်ထားပါတယ္။

စစ်ကော်မရှင်ဟာ ရွေးကောက်ပွဲအတွက် နိုင်ငံတဝန်း မြို့နယ်ပေါင်း ၃၃၀ လုံးမှာ မဲဆန္ဒနယ်တွေ သတ်မှတ်ထားပြီး သူတို့ ထိန်းချုပ်ထားတဲ့ ၁၀၂ မြို့နယ်မှာပဲ ကနဦးပြုလုပ်ဖို့ စီစဉ်နေတာဖြစ်ပါတယ်။ 

#RadioNUGLocalNews

#SpringRevolution