15th APR 2022 - (Ethnic language program-CHO_KAANG) by Radio NUG

📌(ချင်း တိုင်းရင်းသား - Kaang ကာဏ်း ဘာသာစကား) ထုတ်လွှင့်မှု အစီအစဥ် ၂၀၂၂ ဧပြီလ ၁၅ ရက်နေ့နောက်ဆုံးရပြည်တွင်းသတင်းများ

📌📌၁။ CDF-MINDAT အရာရှိဗိုလ်လောင်း အမှတ်စဉ် (၁) ၏သင်တန်းဆင်းပွဲပြုလုပ်

၂၀၂၂ ဧပြီလ ၁၁ ရက်နေ့တွင် CDF-MINDAT အရာရှိဗိုလ်လောင်း အမှတ်စဉ် ( ၁ ) ၏သင်တန်းဆင်းပွဲပြုလုပ်ကျင်းပခဲ့ကြောင်းသိရသည်။

အဆိုပါ သင်တန်းဆင်းပွဲတွင် သင်တန်းကာလ ပြီးစီးအောင် သင်ယူသော ရဲဘော်များကို ဂုဏ်ပြုလွှာပေးအပ်ခြင်းနှင့် ယခုအချိန်အထိ CDF-MINDAT နှင့်အတူ မားမားမတ်မတ်ရပ်တည်ပေးခဲ့ကြတဲ့ ပြည်တွင်းပြည်ပမှ အလှူရှင်တွေကို အထူးကျေးဇူးတင်ကြောင်းဖော်ပြထားသည်။

ဆက်လက်ပြီး CDF-MINDAT အနေဖြင့် စစ်အာဏာရှင် စနစ်တော်လှန်နိုင်ရေးအတွက် ပြည်တွင်း၊ ပြည်ပမှ မိဘညီအစ်ကို မောင်နှမများပါဝင်လှူဒါန်းနိုင်ကြောင်းကို တဆက်တည်းဖော်ပြထားပါသည်။

 

📌📌၂။ CDF Matupi ရဲ့ တစ်နှစ်ပြည့်ထုတ်ပြန်ချက်၊ မတူပီမြို့နယ်အတွင်း စကစမှ ဓါတုလက်နက်အသုံးပြု

၂၀၂၂ ဧပြီလ ( ၁၂ )ရက် နေ့လည် ( ၁ ) နာရီအချိန်ခန့်၌ မတူပီမြို့တွင် ရဟတ်ယာဉ်တစ်စီးရောက်လာပြီးတဲ့နောက်ပိုင်း Gas ဟုထင်မှတ်ရသော ဓာတုလက်နက်တစ်မျိုးဖြင့် စကစဘက်မှ Battalion -4 ဘက်သို့ပစ်ခတ်သောကြောင့် ပစ်ခတ်သည့်နေရာနှင့် ( ၁ ) မိုင်ဝန်းကျင်ပတ်လည်အတွင်းရှိပြည်သူများ ခေါင်းမူးအောအန်ခြင်းလက္ခဏာခံစားရသူများတွေ့ရကြောင်း The Matupi Times မှ ဖော်ပြထားပါသည်။

ခုတလော စကစများ အင်အားအလုံးအရင်းဖြင့် ကားလမ်းမကြီးအတိုင်း မလာဘဲ ဒေသခံပြည်သူတွေကို ဖမ်းဆီးပြီး လူသားဒိုင်းအဖြစ် လမ်းပြခေါ်ဆောင်ကာ တောင်ယာသွားလမ်း ၊ချောင်းသွားလမ်းတွေကနေ ထိုးစစ်ဆင်နေကြတာကြောင့် ခန့်မှန်းရခက်နေကြောင်းလဲ CDF Matupi တာဝန်ရှိပုဂ္ဂိုလ်တစ်ဦးထံမှ သိရှိရပါသည်။

၂၀၂၂ မတ်လ ( ၃၀ ) ရက်မှ ဧပြီလ ( ၇ ) ရက်နေ့အထိ ( ၉ ) ရက်ကြာတိုက်ပွဲတွင် စကစဖက်မှ ( ၃၀ ) ထက်မနည်း သေဆုံးပြီး အများအပြားဒဏ်ရာရှိခဲ့ပါသည်။ CDF-Matupi ဘက်မှ သူရဲကောင်းနှစ်ဦး တိုင်းပြည်

နှင့်လူမျိုးအတွက်အသက်ပေးသွားခဲ့ပါသည်။

CDF-Matupi နှင့် စကစ ကြားတစ်နှစ်အတွင်း တိုက်ပွဲပေါင်းအကြိမ် ( ၆၀ ) ဖြစ်ပွားခဲ့ပြီး CDF-MATUPI ဘက်မှ သူရဲကောင်း (၁၅) ဦး ကျဆုံးကာ (၂၁) ဦး ဒဏ်ရာရရှိခဲ့တယ်လို့ CHINLAND DEFENSE FORCE - MATUPI ရဲ့ တစ်နှစ်ပြည့် ထုတ်ပြန်ချက်တွင်ဖော်ပြထားပါသည်။

 

📌📌၃။ ချင်းရန်ပုံငွေအဖွဲ့ (CRFP) က တော်လှန်ရေးအတွက် လိုအပ်သည့် ဘဏ္ဍာငွေရှာဖွေနိုင်ရေး တူမီးထီ​ဖြင့်စတင်မိတ်ဆက်

ချင်းအမျိုးသား တော်လှန်ရေးအတွက်လိုအပ်တဲ့ ဘဏ္ဍာငွေရှာဖွေ​ရေးကဏ္ဍမှာ ချင်းရန်ပုံငွေအဖွဲ့ Chin Relief Funding Program (CRFP) က တူမီးထီ (Chin Digital Lottery) ကို စတင်မိတ်ဆက်လိုက်ကြောင်း ဧပြီ ( ၁၁ ) ရက်နေ့ ပြုလုပ်တဲ့ သတင်းစာရှင်းလင်းပွဲ ​​ဖြေကြားချက်များအရ သိရပါတယ်။

ယခုလို ရန်ပုံငွေရှာဖွေရာကနေ ရရှိလာတဲ့ ဘဏ္ဍာငွေတွေထဲက (၇၀) ရာခိုင်နှုန်းကို နွေဦးတော်လှန်ရေး၏ အဓိက အခန်းကဏ္ဍမှာပါဝင်နေကြတဲ့ လက်နက်ကိုင် ချင်းတော်လှန်ရေးအဖွဲ့အစည်းများ၊ CDM ဝန်ထမ်းများနှင့် တော်လှန်ရေးကာလအတွင်း စစ်ဘေးရှောင်ပြည်သူများထံ ထောက်ပံ့ပေးသွားမှာဖြစ်ကြောင်းသိရပါတယ်။

တူမီးထီ (Chin Digital Lottery) ကို ဧပြီလ ၁၁ ရက်နေ့မှာ စတင်ဖွင့်လှစ်ရောင်းချနေပြီဖြစ်ပြီး ၎င်းထီရဲ့ အမြင့်ဆုံး ဆုကြေး​ငွေဟာ အမေရိကန်ဒေါ်လာ ၇၅၀ ဖြစ်​ကြောင်း သိရပါတယ်။ နောက်ထပ်ဆု​ကြေး​ငွေ ပမာဏ ပေါင်းများစွာလည်း ရှိ​နေ​သေး​ကြောင်းသိရပါတယ်။

Chin Relief Funding Program (CRFP) ချင်းရန်ပုံငွေအဖွဲ့သည် ချင်းအမျိုးသားတော်လှန်ရေးအတွက် လိုအပ်သည့် ရန်ပုံငွေရှာဖွေရေးနှင့် တော်လှန်ရေးကာလအလွန် ပြန်လည်ထူထောင်ရေးကဏ္ဍများကိုဦးတည်လျက် ၂၀၂၁၊ ဒီဇင်ဘာလ (၁၉) ရက်နေ့တွင် စတင်ဖွဲ့စည်းခဲ့တာဖြစ်ကြောင်းသိရပါတယ်။

 

📌📌၄။ မြန်မာနိုင်ငံမှာ အကြမ်းဖက်မှုရပ်ဆိုင်းရေး အမေရိကန်နဲ့အိန္ဒိယ တိုက်တွန်း

၂၀၂၂ ခုနှစ်၊ ဧပြီလ ( ၇ ) ရက်တနင်္လာနေ့တွင် အမေရိကန်ပြည်ထောင်စု ဝါရှင်တန်ဒီစီမှာ ကျင်းပတဲ့ နှစ်နိုင်ငံဝန်ကြီးများ အစည်းအဝေးအပြီးမှာ မြန်မာနိုင်ငံမှာ အကြမ်းဖက်မှုတွေ၊ ထင်သလိုစိုင်း ဖမ်းဆီးနေတာတွေ၊ ဒီမိုကရေစီလမ်းကြောင်းနဲ့ အားလုံးပါဝင်တဲ့ အုပ်ချုပ်မှုကနေ သွေဖည်ပြီး နောက်ကြောင်းပြန်မယ့် အရိပ်လက္ခဏာတွေ ရပ်ဆိုင်းဖို့၊ အမေရိကန်နဲ့ အိန္ဒိယက တိုက်တွန်းလိုက်ပါတယ်။

ဒီအစည်းအဝေးကို အမေရိကန်နိုင်ငံခြားရေးဝန်ကြီး အန်တိုနီဘလင်ကင် ဦးဆောင်တက်ရောက်ပြီး အိန္ဒိယဘက်က ကာကွယ်ရေးဝန်ကြီး Rajnath Singh ဦးဆောင်တက်ရောက်ပါတယ်။

ဖေဖော်ဝါရီ ၁ ရက်နေ့၊ စစ်တပ်အာဏာသိမ်းခဲ့ချိန်ကစလို့ ပြည်သူ သုံးသောင်း‌လေးထောင်ဝန်းကျင် ထိန်းသိမ်းခံခဲ့ရပြီး မြန်မာအနေနဲ့ အာဆီယံရဲ့အချက် ငါးချက်ပါ သဘောတူညီချက်ကို အကောင်အထည်ဖော်ဖို့လည်း တိုက်တွန်းလိုက်ပါတယ်။ 

အဲဒီသဘောတူညီချက်မှာ နိုင်ငံအတွင်းအကြမ်းဖက်မှုတွေ အမြန်ရပ်ဖို့၊ အဖွဲ့တွေကြား ထိန်းထိန်းသိမ်းသိမ်းနဲ့ ငြိမ်းငြိမ်းချမ်းချမ်း အပြုသဘောဆောင် ဖြေရှင်းဆောင်ရွက်ကြဖို့ အချက်တွေ ပါဝင်ပါတယ်။

 

📌📌၅။ ရုရှားသမ္မတပူတင်၏ လုပ်ရပ် လူမျိုးတုံးသတ်ဖြတ်မှုမြောက်ဟု ဂျိုးဘိုင်ဒင်ပြော

ယူကရိန်းနိုင်ငံမှာ ရုရှားရဲ့လုပ်ရပ်တွေဟာ ‘လူမျိုးတုံးသတ်ဖြတ်မှု’ ဖြစ်ပြီး ဗလာဒီမာပူတင်က ယူကရိန်းလူမျိုး ဖြစ်တည်မှုကို သုတ်သင်ရှင်းလင်းပစ်ဖို့ ကြိုးစားနေတာလို့ အမေရိကန်သမ္မတ ဂျိုးဘိုင်ဒင်က ပြောပါတယ်။

“ကျနော် လူမျိုးတုံးသတ်ဖြတ်မှုလို့ပဲ ခေါ်ဝေါ်ပါတယ်။ ဘာကြောင့်လဲဆိုတော့ ယူကရိန်းလူမျိုး ဖြစ်ခြင်းဆိုတဲ့ အယူအဆကို ပူတင်က ဖျက်ဆီးချေမှုန်းပစ်ဖို့ ကြိုးစားနေတာ ပိုပိုပြီး မြင်လာနေရလို့ပါ။ သက်သေအထောက်အထားတွေ တောင်လိုပုံနေတာပဲလေ” လို့ အိုင်အိုဝါပြည်နယ် စီးပွားရေးညီလာခံတခုက အပြန် သတင်းသမားတွေကို ပြောခဲ့တာပါ။

ဘိုင်ဒင်က “လူမျိုးတုံးသတ်ဖြတ်မှု အမှုမြောက်မမြောက် နိုင်ငံတကာ ရှေ့နေတွေကို ဆုံးဖြတ်ခွင့်ပေးမှာပါ။ ဒါပေမဲ့ ကျနော်မြင်တာတော့ သေချာနေတယ်” လို့ ပြောပါတယ်။

#RadioNUGLocalNews

#SpringRevolution