19th AUG 2022 - (Ethnic language program-CHO_KAANG) by Radio NUG

📌 (ချင်း တိုင်းရင်းသား - Kaang ကာဏ်း ဘာသာစကား) ထုတ်လွှင့်မှု အစီအစဥ် ၂၀၂၂ သြဂုတ်လ ( ၁၉ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ ဖေ့ဘုတ် (Facebook) အစားထိုး လူမှုကွန်ရက်ပလက်ဖောင်းတစ်ခုကို ပြင်ဆင်နေတယ်လို့ စစ်ကောင်စီပြော

အင်တာနက် လူမှုကွန်ရက် ဖေ့ဘုတ် (Facebook) ကို အစားထိုးနိုင်မယ့် လူမှုကွန်ရက် ပလက်ဖောင်းအသစ်တစ်ခု ဖန်တီးနေတဲ့အကြောင်း စစ်ကောင်စီ ပြောခွင့်ရသူက နေပြည်တော်မှာ ဒီကနေ့ ပြုလုပ်တဲ့ သတင်းစာရှင်းလင်းပွဲမှာ ပြောလိုက်ပါတယ်။ ရုရှားနိုင်ငံမှာ ပြုလုပ်တဲ့စစ်ရေးလေ့ကျင့်မှုမှာ မြန်မာစစ်တပ်သွားရောက်ယှဥ်ပြိုင်တဲ့အဖွဲ့ ဆုရရုပ်သံကို တပ်ဘက်ကရော၊ အရပ်ဘက်ကပါ ဖေ့ဘုတ်ပေါ်တင်တဲ့အခါ ခဏခဏ ဖြုတ်ချခံရတာကို ထောက်ပြပြီး ဖေ့ဘုတ်ရဲ့ စံနှုန်းတွေကို သူကမေးခွန်းထုတ်ထားပါသေးတယ်။ လက်ရှိမှာ အဲဒီလူမှုကွန်ရက်အသစ်အတွက် ဝန်ကြီးဌာနအချို့၊ နောက်ပညာရှင်တွေနဲ့ ပူးပေါင်းပြီးဖန်တီးနေတာလို့လည်း ဆိုပါတယ်။

 

📌📌 ၂။ ယင်းမာပင်မြို့နယ်တွင် စစ်ကောင်စီ၏ လေကြောင်းပစ်ခတ်မှုကြောင့် CDF မင်းတပ် ရဲဘော် (၂) ဦးကျဆုံး

ယင်းမာပင်မြို့နယ်၊ ရင်ပေါင်တိုင်ကျေးရွာတွင် သြဂုတ် ၁၁ ရက်က စစ်ကောင်စီ၏ လေကြောင်းပစ်ခတ်မှုကြောင့် CDF မင်းတပ် ရဲဘော် (၂) ဦး ကျဆုံးခဲ့ ကြောင်း သိရသည်။ ကျဆုံးရဲဘော်၏ ဈာပနအခမ်းအနားကို သြဂုတ် ၁၆ ရက်နေ့တွင် မင်းတပ်မြို့နယ် တစ်နေရာတွင် ပြုလုပ်ပေးခဲ့သည်ဟု သိရသည်။ 

ယင်းဖြစ်စဥ်သည် စစ်ကောင်စီထံ သတင်းပေးသူရှိမှုကြောင့် လေကြောင်းမှ တိုက်ခိုက် ခံရခြင်း​ဖြစ်ကာ သြဂုတ် ၁၄ ရက်နေ့ တိုက်ပွဲတွင်လည်း CDF မင်းတပ် ရဲဘော်တစ်ဦး ထပ်မံထိခိုက်ဒဏ်ရာ ရရှိခဲ့သည်ဟု မြေပြင်သတင်းနှင့် နီးစပ်သူများက ၎င်းတို့၏ လူမှုကွန်ရက်စာမျက်နှာတွင် ရေးသားထားကြသည်။ (The Mindat Post သတင်းဌာနအနေဖြင့် သီးခြားအတည်ပြုနိုင်ခြင်း မရှိသေးပါ။)

 

📌📌 ၃။ မင်းတပ်မြို့ပေါ်တွင် စစ်ကောင်စီက လုံခြုံရေးအင်အားကို ယခင်ထက် ပိုမိုတင်းကြပ်ထား

မင်းတပ်မြို့တွင်းနဲ့ မြို့အဝင်လမ်းဘေးတွေမှာ ယခုရက်ပိုင်းအတွင်း စစ်ကောင်စီတပ်က ယခင်ထက် အင်အားပိုမိုတိုးချဲ့စောင့်ကြည့်နေတယ်လို့ စုံစမ်းသိရှိရပါတယ်။ ၂၀၂၂ သြဂုတ်လ ၁၅ ရက်နေ့က စပြီးစစ်ကားတွေနဲ့လှည့်လည်ကာ အင်အားထပ်ချရင်း စောင့်ကြည့်ခိုင်းတာဖြစ်တယ်လို့ အမည်မဖော်လိုသူ ဒေသခံတစ်ဦးက The Mindat Post ကိုပြောပါတယ်။ 

“တအိမ်ဝင် တအိမ်ထွက်လိုက်စစ်ကြတယ်၊ ဒီနေ့တော့ စစ်တာဆေးတာ ပုံမှန်ပါပဲ၊ ဒါပေမယ့် ဆေးရုံးဝန်းထဲ စစ်သားတွေ အများကြီးရှိတာတော့တွေ့လိုက်တယ်” လို့ သူကပြောပါတယ်။ မင်းတပ်မြို့နယ်နဲ့ မကွေးတိုင်းနယ်စပ် တနေရာတွင်လည်း စစ်ကောင်စီက  ကျေးရွာတစ်ရွာဘက် ဦးတည်ကာ လက်နက်ကြီးပစ်ခတ် စစ်ကြောင်းထိုးနေတယ်လို့လည်း မြေပြင်သတင်းတွေအရ သိရပါတယ်။

 

📌📌 ၄။ စစ်ကောင်စီတပ်ဖွဲ့ဝင်များ ဖမ်းဆီးတဲ့ ဟိုင်မွာလ်ကျေးရွာက မောင်နှမ ၂ ဦး၏ရုပ်အလောင်းပြန်တွေ့

စစ်ကောင်စီတပ်ဖွဲ့ဝင်များက ၂၀၂၂ ဩဂုတ်လ ၁၄ ရက်နေ့တွင် တီးတိန်မြို့နယ်၊ ဟိုင်မွှာလ်ကျေးရွာကို ၀င်ရောက်စီးနင်းကာ ဖမ်းဆီးခဲ့တဲ့ ဆယ်ကျော်သက်အရွယ် မောင်နှမ ၂ ဦးရဲ့ ရုပ်အလောင်းကို သြဂုတ် ၁၆ ရက် မနက်ပိုင်းမှာပြန်တွေ့ခဲ့တယ်လို့ သိရပါတယ်။ ဖမ်းဆီးခံရသူတွေဟာ ၁၇ နှစ်အရွယ်နဲ့ ၁၅ နှစ်အရွယ် မောင်နှမနှစ်ယောက်ဖြစ်ပြီး စစ်ကောင်စီတပ်ဖွဲ့ဝင်တွေက ဟိုင်မွာလ်နှင့် ရိခေါ်ဒါရ်ကြား တစ်နေရာမှာ သေနတ်နဲ့ ပစ်သတ်ခဲ့တာလို့ ချင်းဂျာနယ်က ရေးသားထားပါတယ်။ ပြီးခဲ့တဲ့ သြဂုတ်လ ၁၄ ရက် ဟိုင်မွှားကျေးရွာကို စစ်ကောင်စီတပ်ဖွဲ့ဝင်များ ဝင်ရောက်ဖျက်ဆီးတဲ့တာကြောင့် ကျေးရွာအတွင်းက နေအိမ် ၈ လုံးခန့် ​မီးလောင်ပြာကျခဲ့တယ်လို့လည်း မျက်မြင်တစ်ဦးက ပြောပါတယ်။

 

📌📌 ၅။ ပလက်ဝဒေသနှင့် ရက္ခိုင်ပြည်တိုက်ပွဲများတွင် စစ်​ကောင်စီဘက်မှ ၃၁ ဦး​သေဆုံးပြီး လက်နက်အများအပြား သိမ်းဆည်းရမိ

၂၀၂၂ ခုနှစ်၊ သြဂုတ်လ (၁၃) ရက်နေ့တွင် မြန်မာစစ်တပ်နှင့် ရက္ခိုင်တပ်တော်တို့သည် ရက္ခိုင်ဒေသအတွင်း (၃) နေရာနှင့် ပလက်ဝဒေသအတွင်း (၁) နေရာ စသည်ဖြင့် စုစုပေါင်း (၄) နေရာတို့၌ တိုက်ပွဲများ ပြင်းထန်စွာ ဖြစ်ပွားခဲ့​ကြောင်း ရက္ခိုင့် တပ်​တော် AA က ဒီက​နေ့ ဩဂုတ် ၁၅ ရက်​နေ့ ရက်စွဲနဲ့ သတင်းထုတ်ပြန်လာပါတယ်။

အဆိုပါနေ့၌ ပထမဆုံးသောတိုက်ပွဲမှာ ရက္ခိုင်ပြည်၊ ရသေ့တောင်မြို့နယ်၊ ဒုံးပိုက်ကျေးရွာ၏ မြောက်ဖက် (၁.၅) ကီလိုမီတာအကွာအဝေး၌ မြန်မာစစ်တပ်နှင့် နယ်ခြားစောင့်တပ်တို့ ပူးပေါင်းထားသော စစ်ကြောင်းတစ်ခုနှင့် ရက္ခိုင့်တပ်တော်တို့ ဖြစ်ပွားခဲ့သောတိုက်ပွဲဖြစ်သည်။ ၂၀၂၂ ခုနှစ်၊ သြဂုတ်လ (၁၃) ရက်၊ နံနက် (၇) နာရီ (၃၅) မိနစ်မှ နံနက် (၉) နာရီ (၃၀) မိနစ်ခန့်အထိ နှစ်နာရီနီးပါးခန့်ကြာမြင့်ခဲ့ပြီး ပြင်းထန်သောတိုက်ပွဲတစ်ပွဲဖြစ်ခဲ့သည်။

မြန်မာစစ်တပ်နှင့် ၎င်းတို့၏ ပူးပေါင်းတပ်သည် မိမိတို့ တပ်ဖွဲ့ဝင်များရှိရာနေရာသို့ ဝင်ရောက်လာ သောကြောင့် တိုက်ပွဲဖြစ်ပွားခဲ့ခြင်းဖြစ်သည်။ နှစ်နာရီကြာ တိုက်ပွဲအတွင်း ရန်သူ့ဖက်မှ သေဆုံးသူ (၃၁) ဦးအထိ ရှိခဲ့ပြီး အထိအခိုက်အကျအဆုံးများခဲ့သည်။ မိမိတို့ဖက်မှလည်း အာရက္ခတိုင်းပြည်နှင့် လူမျိုးအတွက် အသက်ပေးဆပ် စွန့်လွှတ်ခဲ့ရသောတပ်ဖွဲ့ဝင် အနည်းငယ် နှင့် ဒဏ်ရာရရှိသူအချို့ ရှိခဲ့သည်။

ရန်သူ၏ ၆၀ မမ ပြောင်းရှည်(၁) လက်၊ MA-3 (၁၅) လက်၊ MA-1 (၆) လက်၊ MA-4 (၂) လက်၊ ပီစတို (၁) လက်၊ ဆက်သွယ်ရေးစက် (၁) လုံး၊ GPS (၂) လုံး၊ ဂျန်မာစက် (၁) လုံး အပါအဝင် စစ်အသုံးအဆောင် ပစ္စည်းများ၊ လက်နက်ခဲယမ်း အများအပြား ကိုသိမ်းဆည်းရမိခဲ့သည်။

#RadioNUGLocalNews

#SpringRevolution