22nd APR 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဧပြီလ ( ၂၂ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ မင်းတပ်နယ် လေကြောင်းတိုက်ခိုက်နေတဲ့ ပိုင်းလော့တွေကို CDF မင်းတပ်က စုံစမ်းဖော်ထုတ်

မင်းတပ်မြို့နယ်ထဲ လေကြောင်းတိုက်ခိုက်နေတဲ့ ပိုင်းလော့ (Pilot) တွေကို CDF မင်းတပ်က စုံစမ်းသိရှိရတယ်လို့ ဧပြီ ၁၉ ရက်နေ့မှာ သတင်းထုတ်ပြန်ပါတယ်။

မင်းတပ်မြို့နယ် ပန်းပါကျေးရွာ ဂျက်ဖိုက်တာ ၂ စင်းနဲ့ တိုက်ခိုက်တဲ့ ပိုင်းလော့ (Pilot) ၂ ဦးဟာ ဗိုလ်မှူး နေဝင်းကျော်နဲ့ ဗိုလ်မှူး သက်လင်းမောင်လို့ CDF မင်းတပ်က ထုတ်ပြန်ချက်မှာ ဖော်ပြထားပါတယ်။

သူတို့ ၂ ဦးဟာ စစ်ကောင်စီ လေတပ် Yak – 130 ဂျက်ဖိုက်တာ တိုက်ခိုက်ရေးအဖွဲ့ထဲကလို့ သိရှိထားတဲ့အကြောင်း CDF မင်းတပ် သတင်းပြန်ကြားရေး တာဝန်ခံက The Mindat Post ကို ပြောပါတယ်။

“သူတို့က နေပြည်တော် အေလာ လေတပ်မှာနေတာ၊ သူတို့မှာ မိန်းမနဲ့ ကလေးရှိတယ်။ ပြင်ဦးလွင်ဇာတိလို့တော့ သိထားတယ်။” လို့ ပြောပါတယ်။

ဒီသတင်းအရင်းမြစ်တွေကို တပ်တွင်းသတင်းပေး (ဖရဲသီး) ထံကနေ သိရတာလို့ CDF မင်းတပ် သတင်းပြန်ကြားရေး တာဝန်ခံက ပြောဆိုပေမယ့် အချက်လက်တွေမှန်ကန်မှုရှိ၊ မရှိကိုတော့ The Mindat Post အနေနဲ့ သီးခြား အတည်မပြုနိုင်သေး ပါဘူး။

ချင်းပြည်နယ်နဲ့ မကွေးတိုင်းမှာ လေကြောင်းတိုက်ခိုက်နေတဲ့ လေတပ်ဟာ နေပြည်တော်အခြေစိုက် လေတပ်စခန်း၊ မန္တလေးတိုင်း တံတားဦးလေတပ်စခန်းနဲ့ မကွေးလေတပ်စခန်းက ဂျက်ဖိုက်တာတွေလို့ စစ်ကောင်စီရဲ့ လေကြောင်းရန် အနီးကပ်စောင့်ကြည့် အသိပေးနေတဲ့ (WaiHin) ရဲ့ ဖော်ပြချက်တွေအရ သိရပါတယ်။

ဗိုလ်မှူး နေဝင်းကျော်နဲ့ ဗိုလ်မှူး သက်လင်းမောင်တို့ဟာ နေပြည်တော် အေလာလေတပ်၊ တံတားဦးလေတပ်နဲ့ မှော်ဘီလေတပ်ကို တိုက်ရိုက်ညွှန်ကြားနေတဲ့ ဒုဗိုလ်မှူးကြီး ရဲဇော်နိုင်ရဲ့ စီမံအုပ်ချုပ်မှု လက်အောက်မှာ အလုပ်လုပ်နေသူတွေဖြစ်ပြီး အားအထားရဆုံးသူတွေဖြစ်တယ်လို့ ဆိုပါတယ်။

၂၀၂၃ ခုနှစ်အတွင်း စစ်ကောင်စီရဲ့ လေကြောင်းတိုက်ခိုက်တာတွေ နိုင်ငံအနှံ့ခပ်စိပ်စိပ်ရှိလာပြီး ဧပြီ ၁၆ ရက်နေ့က အရပ်သားထိခိုက်သေဆုံးမှု ၁၀ ဦးဝန်းကျင်ရှိခဲ့တဲ့ ပန်းပါကျေးရွာတိုက်ခိုက်ခံရမှုအပါအဝင် မင်းတပ်မြို့နယ်ထဲမှာ အကြိမ် ၆၀ ထက်မနည်း ရှိနိုင်တယ်လို့ The Mindat Post က စုံစမ်းသိရှိထားပါတယ်။

မင်းတပ်မြို့နယ်၊ ကျေးရွာတွေမှာ ရည်ရွယ်ချက်ရှိရှိ တိုက်ခိုက်နေတဲ့ Pilot (လေယာဉ်မောင်းသူ) နှစ်ဦး (ဒါမှမဟုတ်) သူတို့နဲ့ အလိုတူ အလိုပါဆောင်ရွက်နေသူတွေကို နီးစပ်ရာတော်လှန်ရေး အင်အားစုတွေက အပြစ်ပေးဖို့ကိုလည်း CDF မင်းတပ်က ထုတ်ပြန်ချက်မှာ တောင်းဆိုထားပါတယ်။

========================

📌📌 ၂။ မင်းတပ်နယ်၊ ယောဒေသတွေမှာ ဖုန်းလိုင်းဖြတ်တောက်ခံရ

မင်းတပ်မြို့နယ်၊ ယောဒေသတွေမှာ ဆက်သွယ်ရေးဖုန်းလိုင်းအားလုံး ဖြတ်တောက်ခံနေရတယ်လို့ သိရပါတယ်။

ဧပြီ ၁၈ ရက် ညနေပိုင်းကနေ ဖြတ်တောက်ခံရတာဖြစ်ပြီး မင်းတပ်နယ်၊ ယောနယ်တွေက ပြည်သူတွေအသွားအလာ သတိထားဖို့ မြေပြင်သတင်းရင်းမြစ် HKL Mindat က သူ့ရဲ့ လူမှုကွန်ရက်စာမျက်နှာကနေ အသိပေးထားပါတယ်။

ပြည်တွင်းအချင်းချင်းခေါ်ဆိုမှုတွေပါ ပြတ်တောက်နေတာလို့ ပြည်တွင်းမှာနေထိုင်သူတဦးက The Mindat Post ကို ပြောပါတယ်။ “နေ့လယ်ထိ ခေါ်လို့ရသေးတယ်၊ ညနေ ၂ နာရီလောက်ကနေ ဖုန်းဆက်မရတော့တာ။ ခုထိပဲ၊ မြို့ထဲမှာ WiFi တော့ နဲနဲမိတယ်။” လို့ ကျောက်ထုဒေသခံတဦးက ညနေ ၆ နာရီကျော်မှာ ပြောပါတယ်။

ဧပြီ ၁၆ ရက်နေ့က လေကြောင်းတိုက်ခိုက်ခံရတဲ့ မင်းတပ်နယ်နဲ့ နယ်နိမိတ်ချင်း ထိစပ်နေတဲ့ ယောဒေသကိုပါ စစ်ကောင်စီက ဆက်သွယ်ရေးဖုန်းလိုင်းတွေ ဖြတ်တောက်ထားတာပါ။

အာဏာသိမ်းစစ်ကောင်စီက အစောဆုံးစစ်အုပ်ချုပ်ရေးစနစ် ကြေညာထားတဲ့ မင်းတပ်မြို့နယ်အများစုမှာတော့ ဆက်သွယ် ရေးဖုန်းလိုင်း၊ အင်တာနက်ဖြတ်တောက်ခံရတာ နှစ်ချီရှိနေပြီ ဖြစ်ပါတယ်။

========================

📌📌 ၃။ ကျောက်ထု လေတပ်၊ အမြောက်တပ်ထဲကို ၂ ရက်ဆက်တိုက် ရှော့တိုက်ဒုံးနဲ့ပစ်

ကျောက်ထုမြို့နယ်၊ စစ်ကောင်စီရဲ့ အမှတ် ၂၃ ကာကွယ်ရေး ပစ္စည်းထုတ် စက်ရုံ၊ ကျောက်ထုလေတပ်၊ အမှတ် ၃၆၈ အမြောက်တပ်ရင်းနဲ့ ကျောက်ထုမြို့နယ် ရဲစခန်းတွေကို PDF ပူးပေါင်းတပ်ဖွဲ့က ရှော့တိုက်ဒုံးတွေနဲ့ ပစ်ခတ်တိုက်ခိုက်ခဲ့တယ်လို့ ဧပြီ ၁၇ ရက် MoD NUG က သတင်းထုတ်ပြန်ပါတယ်။

ကပစ ၂၃ ကို မကွေးခရိုင် PDF အမှတ် ၁ တပ်ရင်း၊ (ဂန့်ဂေါခရိုင်) အမှတ်၂၊ ၄ ၊ ၁၀ တပ်ရင်းနဲ့ ပကဖ (ဆော) တို့က မတ် ၁၃ ရက်၊ ည ၇ နာရီဝန်းကျင်မှာ ရှော့တိုက်ဒုံး၊ Rocket တွေနဲ့ ပစ်ခတ်တိုက်ခိုက်ခဲ့တာပါ။

အမှတ် ၃၆၈ အမြောက်တပ်ရင်းနဲ့ မြို့နယ်ရဲစခန်းကို‌တော့ PDF ဂန့်ဂေါခရိုင် အမှတ် ၈၊ ၉ တပ်ရင်း၊ ဆော PDF YRPA နဲ့ DRONE. Revolutionary Rebel Force တို့က မတ် ၁၄ ရက်၊ မွန်းလွဲ ၁၂ နာရီမှာ ရှော့တိုက်ဒုံး၊ Rocket တွေနဲ့ ပစ်ခတ်တိုက်ခိုက်ခဲ့ရာ အတွင်းရှိ အဆောက်အဦးတွေ မီးလောင်ပျက်စီးခဲ့တယ်လို့ သတင်းထုတ်ပြန်ထားပါတယ်။

အကြမ်းဖက်စစ်ကောင်စီရဲ့ထိခိုက်သေဆုံးမှုကို အတည်မပြုနိုင်သေးပေမဲ့ ပူးပေါင်းတပ်ဖွဲ့ဝင်အားလုံး အထိအခိုက်မရှိ ဆုတ်ခွာနိုင်ခဲ့တယ်လို့ MoD NUG က ဆိုပါတယ်။

ကျောက်ထုမြို့မှာ အခြေစိုက်ထားတဲ့ စစ်ကောင်စီရဲ့ အမြောက်တပ်၊ လေတပ်၊ စစ်ကောင်စီလက်အောက်ခံ ရဲစခန်း တိုက်ခိုက်ခံရတာနဲ့ ပတ်သက်ပြီး ကျောက်ထုမြို့ပေါ်နေ ဒေသခံတဦးကလည်း မှန်ကန်တယ်လို့ အတည်ပြုပါတယ်။

“အဲ့သတင်းမှန်တယ်၊ လောလောဆယ် မြို့တွင်းရော၊ ကျောက်ထုနယ်တဝိုက်မှာ အစစ်ဆေးတွေအရမ်းကျပ်နေတာ၊ အထိခိုက်ဘာညာတော့ မသိဘူး၊ ခုချိန်အသွားအလာ အားလုံးဆင်ခြင်ရင် ကောင်းမယ်။” လို့ The Mindat Post ကို ပြောပါတယ်။

ကျောက်ထုနယ်အတွင်းမှာ စစ်ကောင်စီတပ်က အစစ်ဆေးတွေ တင်းကျပ်ထားပြီး လူငယ်၊ လူရွယ်တွေကို မတရား စွပ်စွဲဖမ်းဆီးတာမျိုးရှိနေတယ်လို့လည်း အဲဒီဒေသခံက အသိပေးထားပါတယ်။