29th APR 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဧပြီလ ( ၂၉ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ မင်းတပ် - ကျောက်ထုလမ်းမှာ ကာကွယ်ရေးပူးပေါင်းတပ်နဲ့ စစ်ကောင်စီအပြန်အလှန် ပစ်ခတ်မှုဖြစ်

 

မင်းတပ် - ကျောက်ထုလမ်းတနေရာမှာ CDF ကန်ပက်လက်၊ CDF မင်းတပ်၊ The Youth Force (Saw, Kyaukhtu) ကာကွယ်ရေး ပူးပေါင်းတပ်နဲ့ စစ်ကောင်စီအပြန်အလှန် ပစ်ခတ်မှုဖြစ်ခဲ့တယ်လို့ CDF ကန်ပက်လက်က သတင်းထုတ်ပြန်ပါတယ်။

 

ကျောက်ထုမြို့ အခြေစိုက် အမှတ် (၃၆၈) အမြောက်တပ်ကနေလာတဲ့ စစ်ကောင်စီတပ်နဲ့ ပူးပေါင်းတပ်တို့ ဧပြီ ၂၃ ရက်နေ့က ၁ နာရီကြာ ပစ်ခတ်မှု ဖြစ်ခဲ့တာပါ။

 

ဒီပစ်ခတ်မှုမှာ စစ်ကောင်စီတပ်သား ၇ ယောက်သေ၊ပြီး ပူးပေါင်းတပ်က တဦး ဒဏ်ရာရတယ်လို့ ဆိုပါတယ်။

 

ဒဏ်ရာရရဲဘော်ဟာ CDF မင်းတပ်ကလို့ သိရပြီး မစိုးရိမ်ရဘူးလို့လည်း ထုတ်ပြန်ပါတယ်။

 

“လက်နက်ကြီးကြောင့် ရတာပါ၊ ထုတ်ပြန်ထားသလိုပဲ မစိုးရိမ်ရဘူး။” လို့ CDF ကန်ပက်လက် တာဝန်ရှိသူက ပြောပါတယ်။

တိုက်ပွဲအပြီးမှာ စစ်ကောင်စီရဲ့ ဆက်စပ်ပစ္စည်းတချို့ကို ပူးပေါင်းတပ်က သိမ်းဆည်းထားပါတယ်။

 

အခုတလော စစ်ကောင်စီနဲ့ ဒေသခံကာကွယ်ရေးတပ်တွေအကြား စစ်ရေးတင်းမာနေတာကြောင့် သက်ဆိုင်ရာ ကာကွယ်ရေး တပ်ရဲ့ ထုတ်ပြန်ချက်တွေကို နားစွင့်ပေးကြဖို့ CDF ကန်ပက်လက်က အသိပေးထားပါတယ်။

 

========================

 

📌📌 ၂။ မင်းတပ်မှာ ၃ ရက်ဆက်တိုက် ပစ်ခတ်မှုဖြစ်

 

မင်းတပ်မှာ စစ်ကောင်စီနဲ့ ဒေသကာကွယ်ရေးတပ်တို့အကြား ၃ ရက်ဆက်တိုက် ပစ်ခတ်မှု ဖြစ်နေတယ်လို့ မြေပြင်သတင်း အရင်းမြစ်တွေထံကနေ သိရပါတယ်။

 

ပြီးခဲ့တဲ့ ဧပြီ ၂၃ ရက်နေ့ကနေ ဧပြီ ၂၆ ရက်အထိ ၃ ရက်ဆက်တိုက် ပစ်ခတ်မှု ရှိခဲ့တာပါ။

 

ဧပြီ ၂၃ ရက်နေ့ မင်းတပ် - ကျောက်ထုလမ်းတနေရာမှာ ကျောက်ထုမြို့ အခြေစိုက် အမှတ် (၃၆၈) အမြောက်တပ်ကနေ ထွက်လာတဲ့ စစ်ကောင်စီနဲ့ ကာကွယ်ရေးပူးပေါင်းတပ် (CDF ကန်ပက်လက်၊ CDF မင်းတပ် နဲ့ The Youth Force (Saw, Kyaukhtu) တို့ ရေရှင်ရွာအနီး ၁ နာရီဝန်းကျင်ကြာ ပစ်ခတ်မှု ဖြစ်ခဲ့ပါတယ်။

 

ဒီပစ်ခတ်မှုမှာ စစ်ကောင်စီတပ်သား ၇ ယောက်သေ၊ပြီး ပူးပေါင်းတပ် ချင်းကာကွယ်ရေးတပ် (မင်းတပ်) က ရဲဘော်တဦး ဒဏ်ရာ (မစိုးရိမ်) ရတယ်လို့ ဆိုပါတယ်။

 

ဧပြီ ၂၅ ရက်ကလည်း မင်းတပ်မြို့အခြေစိုက် ခလရ (၂၇၄) တပ်ရင်းအနီးနဲ့ ဧပြီ ၂၆ ရက် မနက်အစောပိုင်းက အနောက်ရပ်ကွက်၊ ကန်ပက်လက်လမ်းခွဲအနီး ထပ်မံပစ်ခတ်မှု ဖြစ်တာလို့ ချင်းကာကွယ်ရေးတပ်ဖွဲ့ (မင်းတပ်) က သတင်း ထုတ်ပြန်ပါတယ်။

 

ဧပြီလ ၂၅ ရက်၊ ၂၆ ရက်နေ့ ပစ်ခတ်မှုမှာ ထိခိုက်တဲ့အခြေနေအသေးစိပ်ကိုတော့ ထုတ်ပြန်မထားပါဘူး။

အခုတလော စစ်ကောင်စီနဲ့ ဒေသခံကာကွယ်ရေးတပ်တွေအကြား စစ်ရေးတင်းမာနေတာကြောင့် သတိပေးထုတ်ပြန်ချက် တွေကို နားစွင့်ပေးကြဖို့ သက်ဆိုင်ရာ ကာကွယ်ရေးတပ်ဖွဲ့တွေက အသိပေးထားပါတယ်။

 

========================

 

📌📌 ၃။ မဟာမိတ်အင်အားစုတွေနဲ့ ပူးပေါင်းပြီး စစ်ကောင်စီကို ဆက်လက် တော်လှန်သွားမယ်လို့ CDF မင်းတပ် သ‌ဘောထား ထုတ်ပြန်

 

မဟာမိတ်အင်အားစုတွေနဲ့ ပူးပေါင်းပြီး စစ်ကောင်စီကို ဆက်လက် တော်လှန်သွားမယ်လို့ CDF မင်းတပ်က သ‌ဘောထား တရားဝင်ထုတ်ပြန်လာပါတယ်။

 

ဧပြီ ၂၄ ရက်နေ့မှာ ကျရောက်တဲ့ CDF မင်းတပ်ရဲ့ လက်နက်ကိုင် ၂ နှစ်ပြည့်တော်လှန်ရေးနေ့မှာ အခုလို ထုတ်ပြန် ကြေညာလာတာပါ။

 

တော်လှန်‌ရေးကာလ ၂ နှစ်တာအတွင်း ကာကွယ်ရေးရဲဘော် ၅၅ ဦးကျဆုံးပြီး စစ်ကောင်စီတပ်သား ၄၀၀ကျော် ရှင်းလင်းနိုင် ခဲ့တယ်လို့လည်း CDF မင်းတပ်က ဆိုပါတယ်။

 

ငြိမ်းငြိမ်းချမ်းချမ်း ဆန္ဒထုတ်ဖော်တဲ့ ပြည်သူ ၇ ဦး (အမျိုးသား ၂ ဦး၊ အမျိုးသမီး ၅ ဦး) ကို စစ်ကောင်စီက ဖမ်းဆီးပြီး မြို့တွင်း စတင်ပစ်ခတ်တာကြောင့် ၂၀၂၁ ဧပြီလ ၂၄ ရက်နေ့မှာ မင်းတပ်ပြည်သူလူထုက ရရာလက်နက်ကိုင်စွဲ တော်လှန်လာခဲ့တာပါ။

 

လက်နက်ကိုင်တော်လှန်လာတဲ့ ၂ နှစ်အတွင်းမှာ ၂၀၂၁ မေလ၊ ဇွန်လမှာ ပစ်ခတ်တိုက်ပွဲ အများဆုံး (၅၃ ကြိမ်) ဖြစ်ပွားခဲ့ပြီး နှစ်ဘက်အကြားလည်း ထိခိုက်ဆုံးရှုံးမှု အကြီးမားဆုံး ကာလတွေ ဖြစ်ခဲ့ရပါတယ်။

 

၂၀၂၁ မေလ၊ ဇွန်လ ပစ်ခတ်တိုက်ပွဲကာလတွေမှာ CDF မင်းတပ်ရဲ‌ဘော် ၂၄ ဦးကျဆုံးခဲ့ရပြီး စစ်ကောင်စီ အင်အား ၁၇၀ ဝန်းကျင်နဲ့ စစ်ကား ၆ စီး၊ ရဲကား ၁ စီးတို့ကို သုတ်သင်ရှင်းလင်းနိုင်ခဲ့တယ်လို့ CDF မင်းတပ်က ထုတ်ပြန်ထားပါတယ်။

 

စစ်ကောင်စီတပ်သားတွေရဲ့ ထိခိုက်သေဆုံးမှုအရေအတွက် ခုဖော်ပြတဲ့စာရင်းထက် ပိုမိုများပြားနိုင်ပြီး အတိအကျကို‌တော့ CDF မင်းတပ်ဘက်က ထုတ်ပြန်မထားပါဘူး။

 

CDF မင်းတပ်ဟာ နွေဦးတော်လှန်ရေးမှာ အစောဆုံးလက်နက်ပြီး စစ်ကောင်စီကို တော်လှန်လာတဲ့ ကာကွယ်ရေးတပ်ဖွဲ့တခု ဖြစ်ခဲ့သလို ၂ နှစ်ရှိလာတဲ့ လက်ရှိအချိန်ထိလည်း စစ်ကောင်စီနဲ့ CDF မင်းတပ်အကြား တိုက်ပွဲတွေ ပြင်းထန်နေဆဲ ဖြစ်ပါတယ်။ 

 

========================

 

📌📌 ၄။ ထန်တလန်မှာ လေကြောင်းကနေ ထပ်မံတိုက်ခိုက်ခံရ

 

ဒေသခံ ၂ ဦး အသက်ဆုံးရှုံးပြီး ထိခိုက်ပျက်စီးတာတွေများတယ်လို့ ဖော်ပြကြပါတယ်။

 

ထန်တလန်မြို့နယ်၊ ထလန်လိုကျေးရွာကို စစ်ကောင်စီတပ်က လေကြောင်းကနေ တိုက်ခိုက်လို့ အရပ်သား ၂ ဦးသေဆုံးပြီး ထိခိုက်ပျက်စီးတာတွေများတယ်လို့ ဒေသတွင်းသတင်းဌာနတွေက ဖော်ပြကြပါတယ်။

 

ဧပြီ ၂၇ ရက် ညနေ ၃ နာရီ မိနစ် ၃၀ ဝန်းကျင်မှာ ကျေးရွာထဲက ဘုရားကျောင်း ၂ ကျောင်းအကြား တိုက်ခိုက်ခံရတာဖြစ်ပြီး အသက်ဆုံးရှုံးရသူတွေဟာ အမျိုးသမီးတဦးနဲ့ အမျိုးသားတဦးလို့ ချင်းဂျာနယ်က ဆိုပါတယ်။

 

ဒါ့အပြင် ချင်းဂျာနယ်ရဲ့ ဖော်ပြချက်အရ ကလေးငယ် ၂ ဦးအပါဝင် ထိခိုက်ဒဏ်ရာရသူလည်း ၆ ဦးအထိ ရှိနေပါတယ်။

 

လေကြောင်းတိုက်ခိုက်ခံရတဲ့ ထန်တလန်မြို့နယ်၊ ထလန်လိုကျေးရွာထဲက နေအိမ် ၁၀ လုံးဝန်းကျင် ထိခိုက်ပျက်စီးနိုင်တယ်လို့ မှတ်တမ်းရုပ်ပုံတွေအရ ခန့်မှန်းရပါတယ်။

#RadioNUGLocalNews

#SpringRevolution