8th APL 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဧပြီလ ( ၈ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ တူမီးထီက CDF ကန်ပက်လက်အတွက် အားဖြည့်မယ်

 

အပတ်စဉ် ၁၂ ကနေရရှိလာမယ့် ရန်ပုံငွေတွေကို CDF ကန်ပက်လက်တွက် အားဖြည့်သွားမယ်လို့ တူမီးထီက ဧပြီ ၆ ရက်က ကြေညာပါတယ်။

 

“ထီထိုးမယ်ဆိုရင် messenger ကနေ လှမ်းမေးလို့ရတယ်နော်၊ အကောင့်ဖွင့်စရာ မလိုတော့ဘူး။” လို့ ထီလက်မှတ်အလွယ်တကူဝယ်လို့ရတဲ့အကြောင်း တူမီးထီ ဖေ့ဘွတ်ပေ့ချ်က အသိပေးထားပါတယ်။

 

ထီလက်မှတ် တစောင်ကို မြန်မာကျပ်ငွေ ၁၂၅၀၀ (တစ်သောင်းနှစ်ထောင့်ငါးရာ) သတ်မှတ်ထားတာပါ။

 

တူမီးထီ အပတ်စဉ် ၁၁ နဲ့ အပတ်စဉ် ၁၂ က ရရှိထားတဲ့ ရန်ပုံငွေတွေကို CDF မင်းတပ်၊ CDF ထန်တလန်အတွက် ပါဝင်ခဲ့သလို CDF - Lautu, CDF - Daai, Asho Chin Defence Force (ACDF), CDF - Huangoram နဲ့ Chinland Joint Defense Committee (CJDC) တို့ကိုလည်း အားဖြည့်ခဲ့ပြီးဖြစ်တယ်လို့ ဆိုပါတယ်။

 

“တော်လှန်ရေးအင်အားစုတွေကို ထောက်ပို့နေတဲ့ တူမီးထီကို ကျေးဇူးတင်တယ်။ ကန်ပက်လက်ဟာ ဘဏ္ဍာရေးထောက်ပို့မှု အပိုင်း အားအနည်းဆုံးပါ၊ ဒါကြောင့်ဘခုအပတ်စဥ်မှာ အများဆုံးဖြစ်အောင် ပါဝင်အားဖြည့်ပေးကြပါ။” လို့ CDF ကန်ပက်လက် တပ်မဟာမှူးက ပြောပါတယ်။

 

CDF ကန်ပက်လက်အနေနဲ့ တိုက်၊ပွဲပေါင်း ၁၀၀ ကျော် ဆင်နွှဲနိုင်ခဲ့သလို ရှေ့လျှောက်လည်း တော်လှန်ရေးအောင်တဲ့အထိ ကြိုးစား သွားမယ်လို့ သူက ဆက်ပြောပါတယ်။

 

ချင်းပြည်နယ်တော်လှန်ရေးအင်အားစုတွေကို ပံ့ပိုးအားဖြည့်နေတဲ့ တူမီးထီ - Chin Digital Lottery ဟာ ချင်းရန်ပုံငွေအဖွဲ့ - Chin Relief Funding Program (CRFP) ရဲ့ ရန်ပုံငွေရှာဖွေရေး လုပ်ငန်းစဉ်တွေထဲက ပထမဆုံးစီမံကိန်းဖြစ်ပြီး ၂၀၂၂ ဧပြီလ ၁၁ ရက်နေ့မှာ စတင်ဖွင့်လှစ်ခဲ့တာ ဖြစ်ပါတယ်။

 

========================

 

📌📌 ၂။ မတူပီ ကလားကျေးရွာလုံးကျွတ်နီးပါး မီးရှို့ခံရ၊ ချင်းပြည်နယ်အနှံ့ အိမ်မီးရှို့ခံရတာတွေ ဆက်တိုက်ဖြစ်နေ

 

မတူပီ - ပလက်ဝကားလမ်းမပေါ် ကျေးရွာတွေထဲ မတ်လ ၃၁ ရက်နေ့ကနေ နေအိမ်တွေမီးရှို့ခံရတာကြောင့် အိမ်ခြေ ၃၀ ကျော် မီးလောင်ပြာကျတယ်လို့ သိရပါတယ်။ 

 

ပလက်ဝဘက် ရိက္ခာပို့ဖို့သွားတဲ့ စစ်ကောင်စီတပ်ဖွဲ့ဝင်တွေက မတ်လ ၃၁ ရက်နေ့ ကလားကျေးရွာထဲ နေအိမ် ၉ လုံးနဲ့ ဧပြီလ ၁ ရက်နေ့ နေအိမ် ၂၁ လုံး စုစုပေါင်းအိမ်ခြေ ၃၀ ပြာကျခဲ့ရတယ်လို့ မတူပီမြို့နယ် ပြည်သူ့အုပ်ချုပ်ရေးအဖွဲ့က မနေ့က (ဧပြီ ၃ ရက်) သတင်းထုတ်ပြန်ပါတယ်။အိမ်ခြေ ၄၀ ဝန်းကျင်သာရှိတဲ့ ကျေးရွာထဲက နေအိမ်အလုံး ၃၀ မီးလောင်ပြာကျခဲ့တာပါ။

 

ဧပြီလ ၃ ရက်နေ့ကလည်း မတူပီ ဝလံတဲကျေးရွာက နေအိမ်တွေဆက်တိုက်မီးရှို့ခံနေရပြီး ပျက်စီးတဲ့ အိမ်ခြေအရေ တွက်ကိုတော့ အတိအကျမသိရသေးဘူးလို့ ပြောပါတယ်။

မတူပီ - ပလက်ဝကားလမ်းမပေါ်က ဒေသခံပြည်သူတွေ တောတောင်ထဲတိမ်းရှောင်နေရပြီး အရေးပေါ် အကူအညီတွေ လိုအပ် နေတယ်လို့ မတူပီမြို့နယ်ပြည်သူ့အုပ်ချုပ်ရေးအဖွဲ့က ဆော်ဩပါတယ်။

 

ခုရက်သတ္တပတ်ထဲမှာ မင်းတပ်မြို့နယ်ဒေသခံအများစု ခိုလှုံနေထိုင်နေတဲ့ ဆောမြို့နယ်ရှိ စစ်ရှောင်တဲ အလုံး ၁၀၀ နီးပါးကို စစ်ကောင်စီတပ်က မီးရှို့ဖျက်ဆီးထားပါတယ်။

 

ဒါ့ပြင် ချင်းပြည်နယ်မြောက်ပိုင်း ဖလမ်း - ဟားခါးကြားက ကျေးရွာတွေမှာလည်း စစ်ကောင်စီတပ်က နေအိမ်မီးရှို့နေတယ်လို့ ဒေသတွင်းသတင်းရင်းမြစ်တွေထံက သိရပါတယ်။

 

အာဏာသိမ်းကာလ ၂ နှစ်ကျော်အတွင်း စစ်ကိုင်းတိုင်း၊ မကွေးတိုင်းပြီးတဲ့နောက် ချင်းပြည်နယ်မှာ စစ်ကောင်စီတပ်ရဲ့ နေအိမ်မီးရှို့ခံရတာ တတိယအများဆုံးလို့ Data for Myanmar က ၂၀၂၃ ဖေဖော်ဝါရီ ၂၈ ရက်နေ့အထိ စာရင်းမှာ ဖော်ပြပါတယ်။

 

========================

 

📌📌 ၃။ စစ်ခေါင်းဆောင်နဲ့ ရုရှား ဂုဏ်ထူးဆောင်ဘွဲ့ချင်း အပေးအယူလုပ်

 

ရုရှားသိပ္ပံအကယ်ဒမီ၊ အရှေ့တိုင်းလေ့လာရေးအင်စတီကျူ့က စစ်ခေါင်းဆောင် မင်းအောင်လှိုင်ကို “ဂုဏ်ထူးဆောင် ဒေါက် တာဘွဲ့” ပေးတယ်လို့ စစ်ကောင်စီဝါဒဖြန့် မီဒီယာတွေက ဖော်ပြပါတယ်။

 

၂၀၂၃၊ ဧပြီ ၃ ရက်နေ့ အပေးအယူလုပ်ကြတာဖြစ်ပြီး စစ်ခေါင်းဆောင်ကလည်း ရုရှား၊ ကာကွယ်ရေးဝန်ကြီးဌာန ဒုဝန်ကြီးကို “သီရိပျံချီဘွဲ့တံဆိပ်” ပြန်ပေးတယ်လို့ ဆိုပါတယ်။

 

နိုင်ငံတွင်း စည်းလုံးညီညွတ်ရေး၊ လူမှုစီးပွားဘဝဖွံ့ဖြိုးတိုးတက်ရေးနဲ့ တရားမျှတမှုကို အခြေခံတဲ့ နိုင်ငံရေးပွင့်လင်း မြင်သာမှုတွေကို မျက်ဝါးထင်ထင်တွေ့မြင်လာရတာကြောင့် အပြန်အလှန်ပေးကြတာလို့ နှစ်ဘက်ခေါင်းဆောင်တွေက ပြောထားပါတယ်။

 

ဒါ့အပြင် လူသားချင်းစာနာထောက်ထားမှုနယ်ပယ်မှာ ဘက်စုံပူးပေါင်းဆောင်ရွက်တာ၊ ဖွံ့ဖြိုးတိုးတက်ရေးကို စွမ်းစွမ်းတမံ လုပ်ခဲ့တာကြောင့် စစ်ခေါင်းဆောင် မင်းအောင်လှိုင်ကို “ဂုဏ်ထူးဆောင်ဒေါက်တာဘွဲ့” ပေးတာလို့ ရုရှားဘက်က ဆိုပါတယ်။

စစ်ကောင်စီနဲ့ ရုရှားနိုင်ငံအကြား ဆက်ဆံရေးကောင်းမွန်နေပြီး ခေါင်းဆောင်တွေချင်း ခုလိုဂုဏ်ထူးဆောင်ပေးတာမျိုးကို မကြာခဏပြုလုပ်နေကြတာပါ။

 

အာဏာသိမ်းတဲ့နောက်ပိုင်း ပြည်တွင်းက စစ်ကောင်စီ ထောက်ခံအားပေးသူတွေကို စစ်ခေါင်းဆောင် ကိုယ်တိုင်က ဂုဏ်ထူး ဆောင်ဘွဲ့နဲ့ ချွေးသိပ်တာမျိုးလည်း အရင်ကာလတွေထက် ခေတ်စားနေပါတယ်။

#RadioNUGLocalNews

#SpringRevolution