22nd JUL 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇူလိုင်လ ( ၂၂ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ကန်ပက်လက်မြို့နယ်၊ မဆာတွီကျေးရွာ လေကြောင်းကနေ ဗုံးကြဲခံရ

ကန်ပက်လက်မြို့နယ်၊ မဆာတွီကျေးရွာမှာ လေကြောင်းတိုက်ခိုက်ခံရတယ်လို့ သိရပါတယ်။

ဇူလိုင် ၁၈ ရက် မနက် ၁၁ နာရီဝန်းကျင်မှာ ဂျက်ဖိုက်တာ ၅ စင်းနဲ့ ဗုံးကြဲခံရတာကြောင့် နေအိမ်တွေ ပျက်စီးတာ များတယ်လို့ ချင်းကာကွယ်ရေးတပ်ဖွဲ့ (ကန်ပက်လက်) ခေါနူးတပ်ရင်းက သတင်းထုတ်ပြန်ပါတယ်။

ထိခိုက်‌ပျက်စီးတဲ့ နေအိမ်၊ အဆောက်အအုံအရေအတွက် များနေပြီး ကျေးရွာနေ ပြည်သူတွေ ထိခိုက်မှု ရှိ၊ မရှိကိုတော့ မသိရသေးပါဘူး။

မကွေးတိုင်းကနေ ကန်ပက်လက်နယ်၊ ကျင်‌‌ဒွေးအထိုင်စခန်းကို လက်နက်၊ ရိက္ခာဖြည့်တင်းမယ့် စစ်ကောင်စီယာဉ် တန်းစစ်ကြောင်းနဲ့ ချင်းကာကွယ်ရေးတပ်ဖွဲ့ (ကန်ပက်လက်) ပူးပေါင်းတပ်ဖွဲ့တို့အကြား စစ်ရေးတင်းမာနေပြီး နှစ်ဘက်ထိ တွေ့မှုတွေလည်း ရှိနေတာပါ။

လက်ရှိ အခြေအနေတွေကြောင့် ချင်း - မကွေးလမ်းပိုင်းကို ယာယီပိတ်ထားသလို ကျင်ဒွေးလမ်းမကြီးတလျှောက် စစ်ရေးလှုပ်ရှားနေတဲ့ ချင်းကာကွယ်ရေးတပ်ဖွဲ့ (ကန်ပက်လက်) ခေါနူးတပ်ရင်းကလည်း တိုက်ပွဲကာလ ကြာမြင့်နိုင် တယ်လို့ ဇူလိုင် ၁၇ ရက်နေ့ အစောပိုင်းက သတင်းထုတ်ပြန်ပါတယ်။

ကန်ပက်လက်ကို ဦးတည်တဲ့ ကျောက်ထုအမြောက်တပ် စစ်ကြောင်းနဲ့ ကျင်ဒွေးစစ်ကြောင်းကြောင့် ဒေသခံပြည်သူ ၂၀၀၀ နီးပါး တောတောင်တွေထဲ တိမ်းရှောင်နေရတယ်လို့ ချင်းကာကွယ်ရေးတပ်ဖွဲ့ (ကန်ပက်လက်) တပ်မဟာမှူးက ပြောပါတယ်။

စစ်ကောင်စီက ကျေးရွာ၊ စာသင်ကျောင်း၊ ဘာသာရေး အဆောက်အအုံတွေကို ပစ်မှတ်ထားတိုက်ခိုက်နေတာကြောင့် ကျေးရွာတိုင်းမှာ ဗုံးခိုကျင်းတွေကို စီမံထားကြဖို့ ချင်းပြည်နယ်ရှိ မြို့နယ်ပြည်သူ့အုပ်ချုပ်ရေးအဖွဲ့တွေနဲ့ ဒေသကာကွယ် ရေးတပ်ဖွဲ့တိုင်းက တိုက်တွန်းထားပါတယ်။

========================

📌📌 ၂။ ကန်ပက်လက်နယ်ထဲ ရက်ရှည်တိုက်ပွဲ ဆက်ဖြစ်

ကန်ပက်လက်နယ်မှာ စစ်ကောင်စီရဲ့ လက်နက်၊ ရိက္ခာတင် ယာဉ်တန်းရှည် စစ်ကြောင်းနဲ့ ဒေသကာကွယ်ရေး မဟာမိတ်ပူးပေါင်းတပ်တွေအကြား တိုက်ပွဲတွေ ဆက်တိုက်ဖြစ်နေတယ်လို့ ချင်းကာကွယ်ရေးတပ်ဖွဲ့ (ကန်ပက်လက်) က သတင်းထုတ်ပြန်ပါတယ်။ ပြီးခဲ့တဲ့ ဇူလိုင်လ လလယ်လောက်က စတဲ့ ထိတွေ့တိုက်ပွဲဟာ ရက်သတ္တပတ်ရှိပြီ ဖြစ်ပါတယ်။

စစ်ကောင်စီက ကျင်ဒွေးမြို့အထိုင်စခန်းမှာ လက်နက်၊ ရိက္ခာဖြည့်တင်းနိုင်ဖို့ ကြိုးပမ်းနေတာဖြစ်ပြီး စစ်‌ကြောင်း ၂ ကြောင်းအပြင်၊ လေကြောင်းကနေပါ အင်အားအလုံးအရင်းနဲ့ တိုက်ခိုက်နေတာလို့ ချင်းကာကွယ်ရေးတပ်ဖွဲ့ (ကန်ပက်လက်) က ထုတ်ပြန်ပါတယ်။ တိုက်ပွဲအတွင်း စစ်ကောင်စီဘက်က ၂၀ ကျော်သေဆုံးသလို မဟာမိတ် ပူးပေါင်းတပ်ဖွဲ့က ရဲဘော် ၃ ဦး ထိခိုက်ရတယ်လို့လည်း ပြောပါတယ်။ ထိခိုက်မှုများတဲ့ စစ်ကောင်စီတပ်ဟာ ချင်း - မကွေးနယ်စပ်ရှိ ရင်းကဲကျေး ရွာအတွင်း နေအိမ် ၃၀၀ ကျော် မီးရှို့ခဲ့သလို ဇူလိုင် ၁၈ ရက်နေ့ လေကြောင်းဗုံး ကြဲတိုက် ခိုက်မှုကြောင့် ကန်ပက်လက်မြို့နယ်၊ မဆာတွီကျေးရွာ ဘုရားကျောင်းနဲ့ နေအိမ် ၅ လုံးထက်မနည်း ပျက်စီး ခဲ့ရပါတယ်။

ဇူလိုင်လ (၁၉) ရက်နေ့၊ ညနေ ၆:၀၀ နာရီခန့်မှာလည်း ကန်ပက်လက်မြို့အဝင်၊ မြတ်နိုးသူအကွေ့နားတွင် စစ်‌ကောင် စီတပ်နှင့် CDF-Kanpetletတူမီးတပ်ရင်း ထိတွေ့တိုက်ပွဲဖြစ်ပွားခဲ့ပြီး စစ်ကောင်စီဘက်မှ (၅) ဦးသေဆုံး၍ CDF-Kanpetletရဲဘော် (၄)ဦးထိခိုက်ဒဏ်ရရှိထားတယ်လို့ ဆိုပါတယ်။

တိုက်ပွဲရက် ကြာရှည်လာတာနဲ့အမျှ ကာကွယ်ရေးတပ်ဖွဲ့ဝင်တွေအတွက် ကျည်၊ စားနပ်ရိက္ခာလိုအပ်မှုတွေ ရှိလာ တဲ့အတွက် ပါဝင်ပေးကြဖို့ကိုလည်း CDF-Kanpetletကတောင်းဆိုပါတယ်။

========================

📌📌 ၃။ ဟားခါးမှာ စစ်ကောင်စီတပ်ဖွဲ့ဝင်တဦး လက်နက်နဲ့ အလင်းဝင်လာ

ဟားခါးမြို့ အခြေစိုက် အမှတ် ၂၆၆ ခြေလျင်တပ်ရင်းက စစ်ကောင်စီတပ်ဖွဲ့ဝင်တဦး လက်နက်နဲ့အလင်းဝင်လာတယ်လို့ ချင်းကာကွယ်ရေးတပ်ဖွဲ့ (ဟားခါး)က ဇူလိုင် ၁၇ ရက်နေ့ သတင်းထုတ်ပြန်ပါတယ်။

အဲဒီစစ်ကောင်စီတပ်ဖွဲ့ဝင်ဟာ စစ်ကောင်စီလက်အောက်မှာ တာဝန်ထမ်းဆောင်လိုခြင်းမရှိတာကြောင့် အာဏာဖီဆန်ပြီး အလင်းဝင်လာတာပါ။သူနဲ့အတူ MA 1 သေနတ်တလက်၊ ကျည်အိမ် ၄ ခုနဲ့ ကျည်ဆံ ၁၂၆ တောင့် ယူဆောင် အလင်း၀င် လာတာလို့ ထုတ်ပြန် ချက်မှာ ဖော်ပြပါတယ်။

လက်နက်နဲ့ အလင်းဝင်လာသူကို ဆုငွေကျပ်သိန်း ၅၀ ပေးအပ်ပြီး လွတ်မြောက်နယ်မြေပို့ဆောင်ပေးသွားမယ်လို့လည်း သိရပါတယ်။

========================

📌📌 ၄။ အရေးပေါ်ကာလ သက်တမ်းတိုး၊ မတိုးကို ကာလုံမှာ ဆုံးဖြတ်မယ်လို့ စစ်ကောင်စီပြော

စစ်ကောင်စီရဲ့ အရေးပေါ်ကာလနဲ့ ပတ်သက်ပြီး အမျိုးသားကာကွယ်ရေးနဲ့ လုံခြုံရေးကောင်စီ (ကာလုံ) အစည်းအဝေးမှာ ထပ်ဆုံးဖြတ်သွားမယ့်အကြောင်း စစ်ကောင်စီ သတင်းထုတ်ပြန်ရေးခေါင်းဆောင် ဇော်မင်းထွန်းက ပြောတယ်လို့ ဘီဘီစီ မြန်မာပိုင်းက ရေးသားပါတယ်။

ကာလုံ အစည်းအ‌ဝေးကို ၂၀၂၃ ဇူလိုင်လမကုန်ခင် ကျင်းပသွားမယ်လို့လည်း ဆိုပါတယ်။

အရေးပေါ်ကာလ ကြေညာချက်ကို စစ်ကောင်စီ ယာယီသမ္မတ ဦးမြင့်ဆွေက စုစုပေါင်း ၂ နှစ်ခွဲအထိ ကြေညာပေး ခဲ့ပြီးဖြစ်လို့ လာမယ့် ကာလုံမှာ ခြောက်လ သက်တမ်းထပ်တိုးရင် စုစုပေါင်း ၃ နှစ်အထိ ဖြစ်လာမှာပါ။

အရေးပေါ်ကာလ သက်တမ်းဆက်မတိုးတော့ဘဲ ပြီးဆုံးခဲ့ရင် လာမယ့်ခြောက်လအတွင်း ရွေးကောက်ပွဲ ကျင်းပပေး ရမှာလည်း ဖြစ်ပါတယ်။

စစ်ကောင်စီအနေနဲ့ ရွေးကောက်ပွဲကျင်းပပြီး အနိုင်ရပါတီကို အာဏာလွှဲပေးမယ်လို့ ပြောထားပေမယ့် ရွေးကောက်ပွဲကို ဘယ်အချိန်ကျင်းပမယ် ဆိုတာနဲ့ပတ်သက်လို့ တိတိကျကျ ထုတ်ပြောတာမရှိတော့ပါဘူး။

ရွေးကောက်ပွဲမပြုလုပ်နိုင်သရွေ့ စစ်ကောင်စီကပဲ အာဏာထိန်းချုပ်ထားမှာဖြစ်ပြီး လက်နက်ကိုင် တော်လှန်အရှိန် မြင့်နေတဲ့ ချင်း၊ စစ်ကိုင်းနဲ့ ကရင်နီဒေသတွေကို ထိုးစစ်အရှိန်မြှင့်ဖို့ စစ်ခေါင်းဆောင် မင်းအောင်လှိုင်က စစ်ဘက်နဲ့ အရပ်ဘက် ထိပ်ပိုင်းခေါင်းဆောင်တွေကို အခုဇူလိုင်လအတွင်းမှာ အမိန့်ပေးထားပါတယ်။