8th JUL 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇူလိုင်လ ( ၈ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ချင်းပြည်နယ်မှာ အရပ်သားသေဆုံးမှု ပိုမိုမြင့်တက်လာတယ်လို့ ချင်းရေးရာအဖွဲ့ချုပ် ထုတ်ပြန် 

 

စစ်ကောင်စီ အာဏာသိမ်းကာလမှာ ချင်းပြည်နယ်က အရပ်သားပြည်သူတွေ အသက်ဆုံးရှုံးရတာ မြင့်တက်လာတယ်လို့ ချင်းရေးရာအဖွဲ့ချုပ် (Institute of Chin Affairs - ICA) က ဇူလိုင် ၄ ရက်နေ့‌ ထုတ်ပြန်တဲ့ အစီရင်ခံစာတခုမှာ ဖော်ပြထား ပါတယ်။

 

၂ နှစ်ခွဲနီးပါးကာလအတွင်း ၂၀၂၃ ခုနှစ်ရဲ့ ၆ လတာထဲမှာ ချင်းအမျိုးသားများ ဒေသကာကွယ်ရေးတပ်ဖွဲ့ဝင်တွေနဲ့ အရပ်သားပြည်သူ သေဆုံးမှု ၁၀၉ ဦးကျော်နဲ့ စံချိန်တင် မြင့်တက်လျက်ရှိတယ်လို့ ဆိုပါတယ်။

 

အဲဒီထဲမှာ ဒေသကာကွယ်ရေးတပ်ဖွဲ့ဝင် ၅၉ ဦးနဲ့ အရပ်သားပြည်သူ ၅၀ ဦး ပါဝင်တယ်လို့ ချင်းရေးရာအဖွဲ့ချုပ်ရဲ့ ထုတ်ပြန်ချက်မှာ ဖော်ပြပါတယ်။

 

၂၀၂၁၊ ၂၀၂၂ ခုနှစ် ၂ နှစ်တာကာလအတွင်းမှာ ချင်းပြည်နယ်အတွင်းက အသက်ဆုံးရှုံးရသူ ၄၈၆ ဦး ရှိပြီး လက်ရှိ ၆ လအတွင်းမှာ ၂၃ ဒဿမ ၃ ရာခိုင်နှုန်းအထိ မြင့်တက်လာတာပါ။

 

ချင်းရေးရာအဖွဲ့ချုပ် (Institute of Chin Affairs - ICA) က ထုတ်ပြန်ထားသလို ချင်းပြည်နယ်မှာ စစ်ကောင်စီက မတရား စွပ်စွဲ ဖမ်းဆီးသတ်ဖြတ်တဲ့ ပြည်သူအရေအတွက်ဟာ အခုထက် ပိုများနိုင်တယ်လို့ The Mindat Post က မေးမြန်းတဲ့ ဒေသတွင်း သတင်းအရင်းအမြစ်တွေက ပြောပါတယ်။

 

မြန်မာနိုင်ငံအတွင်း လက်ရှိဖြစ်ပွားနေတဲ့ နိုင်ငံရေးပဋိပက္ခ၊ လူ့အခွင့်အရေးချိုးဖောက်ခံရတာတွေကို နိုင်ငံတကာ အသိုက်အဝန်းတွေကလည်း ထိထိရောက်ရောက် စစ်ဆေးအရေးယူမှုတွေ ပြုလုပ်ပေးဖို့ ချင်းရေးရာအဖွဲ့ချုပ် (Institute of Chin Affairs - ICA) လက်ထောက် ညွှန်ကြားရေးမှူး Salai Van Sui San က အဲဒီ အစီရင်ခံစာကနေတဆင့် တိုက်တွန်း ထားပါတယ်။

 

========================

 

📌📌 ၂။ သံချပ်ကာ ၂ စီး သိမ်းပိုက်နိုင်ခဲ့တဲ့ CNA, CDF ပူးပေါင်းတပ်ဖွဲ့ကို NUG က ကျပ်သိန်း ၄၀၀၀ နဲ့ ဂုဏ်ပြု

 

စစ်ကောင်စီရဲ့ သံချပ်ကာ ၂ စီးအပါအဝင် လက်နက်၊ ရိက္ခာတင်ယာဉ်တန်းရှည်ကို ချေမှုန်းနိုင်ခဲ့တဲ့ ချင်းအမျိုးသား တပ်မတော် (CN‌A)၊ ချင်းကာကွယ်ရေးတပ်ဖွဲ့ (CDF) ပူးပေါင်းတပ်ဖွဲ့ကို အမျိုးသားညီညွတ်ရေးအစိုးရ (NUG) က ငွေကျပ်သိန်း ၄၀၀၀ ဂုဏ်ပြုလိုက်ပါတယ်။

 

ဇူလိုင် ၄ ကျင်းပတဲ့ အမျိုးသားညီညွတ်ရေးအစိုးရ (NUG) ရဲ့ ၂၂ ကြိမ်မြောက် အစိုးရအဖွဲ့အစည်းအဝေးမှာ အခုလို ဂုဏ်ပြုလိုက်တာလို့ NUG က သတင်းထုတ်ပြန်ပါတယ်။

 

“ချင်းတော်လှန်ရေး အင်အားစုတွေက အကြမ်းဖက်စစ်အုပ်စုရဲ့ သံချပ်ကာယာဉ် ၂ စီးကို ချေမှုန်းဖျက်ဆီးနိုင်ခဲ့တာကို အထောက်အထားတွေနဲ့တကွ တင်ပြလာတဲ့အတွက် စိစစ်ချီးမြှင့်ရေးအဖွဲ့က လေ့လာသုံးသပ် စိစစ်ကာ အတည်ပြု နိုင်ခဲ့တာကြောင့် အမျိုးသားညီညွတ်ရေးအစိုးရအနေနဲ့ ထုတ်ပြန်ခဲ့တဲ့ ကြေညာချက်နဲ့အညီ သံချပ်ကာ ယာဉ်တစ်စီးကို ကျပ်သိန်း (၂၀၀၀) နဲ့ (၂) စီးအတွက် မြန်မာကျပ်ငွေ သိန်း (၄၀၀၀) ကို ချင်းပြည်နယ် CNF/CNA+ CDAs ရဲ့ တာဝန်ရှိသူ တွေကို ဂုဏ်ပြုချီးမြှင့်ခဲ့ပါတယ်။” လို့ အဲဒီ ထုတ်ပြန်ချက်မှာ ဖော်ပြထားပါတယ်။

 

စစ်ကောင်စီရဲ့ သံချပ်ကာ ၂ စီးပါ ယာဉ်တန်းရှည်ကို ချင်းအမျိုးသား တပ်မတော် (CNA), ချင်းကာကွယ်ရေးတပ် (CDF) ပူးပေါင်းတပ်ဖွဲ့က ဟားခါး - ဖလမ်း အကြားတနေရာမှာ ၂၀၂၃ ဧပြီလတုန်းက သိမ်းပိုက်နိုင်ခဲ့တာပါ။

ရက်ပေါင်း ၃၀ ကျော်ကြာတဲ့ စစ်ကောင်စီ ယာဉ်တန်းရှည်တိုက်ခိုက်မှုမှာ ကာကွယ်ရေးပူးပေါင်းတပ်ဘက်မှာလည်း ထိခိုက်ဆုံးရှုံးမှုတွေ ရှိခဲ့ပါတယ်။

 

========================

 

📌📌 ၃။ ဟားခါး - ထန်တလန်အကြား ၂ ဖက်တိုက်ပွဲ ဆက်လက် ပြင်းထန်နေ

 

ဟားခါး - ထန်တလန်အကြားမှာရှိတဲ့ သီတာကျေးရွာဘက်မှာ စစ်ကောင်စီက ထိုးစစ်ဆင်နေတာကြောင့် ၂ ဖက်တိုက်ပွဲ ပြင်းထန်နေတယ်လို့ သိရပါတယ်။ဇူလိုင် ၃ ရက် မနက် ၃ နာရီဝန်းကျင်မှာ စစ်ကောင်စီက ထိုးစစ်ဆင်တိုက်ခိုက် တာကြောင့် တိုက်ပွဲပြင်းထန်နေတာလို့ မြေပြင်သတင်းအရင်းမြစ်တွေကို ကိုးကားပြီး ချင်းဂျာ နယ်က ရေးသားပါတယ်။

လေကြောင်းအပြင် ဟားခါးကနေ လက်နက်ကြီးတွေနဲ့ပါ ပစ်ကူနေတာလို့ ပြောပါတယ်။

 

၂၀၂၃ အစောပိုင်းကတည်းက ချင်းကာကွယ်ရေးတပ်မတော် (CNA)၊ ချင်းကာကွယ်ရေးတပ်ဖွဲ့ (CDF) ပူးပေါင်း တပ်ဖွဲ့ဝင် တွေနဲ့ အင်အားသုံးစစ်ကြောင်းထိုးနေတဲ့ စစ်ကောင်စီအကြား တိုက်ပွဲ ပြင်းထန်နေခဲ့တာပါ။

 

ဇူလိုင် ၃ ရက် ဟားခါး - ထန်တလန်အကြား သီတာစစ်ဆင်ရေးမှာ တပ်စုမှူး အသက်ဆုံးရှုံးတယ်လို့ ချင်းကာကွယ်ရေး တပ်ဖွဲ့ (ဇိုဖေ) က ဇူလိုင် ၃ ရက် နေ့လယ်ပိုင်းက သတင်းထုတ်ပြန်ထားပါတယ်။ 

 

ဒီကနေ့ ဟားခါး - ထန်တလန်အကြားက တိုက်ပွဲနဲ့ ပတ်သက်လို့ ထိခိုက်မှု အသေးစိပ် အခြေအနေကိုတော့ မသိရသေး ပါဘူး။ ၆ လနီးပါး တိုက်ပွဲပြင်းထန်လာတဲ့ ဟားခါး - ထန်တလန်အကြားမှာ စစ်ကောင်စီရဲ့ သံချပ်ကာ ၂ စီးအပါအဝင် ထိခိုက် သေဆုံးတာများခဲ့သလို ကာကွယ်ရေးပူးပေါင်းတပ်ဖွဲ့ဘက်မှာလည်း ဆုံးရှုံးတာတွေ ရှိနေပါတယ်။

 

စစ်ကောင်စီရဲ့ လေကြောင်းတိုက်ခိုက်မှုကြောင့် ဟားခါး - ထန်တလန်အကြားက အရပ်သားပြည်သူနဲ့ နေအိမ်တွေ ပျက်စီးမှု များခဲ့ပါတယ်။ဇွန်လ ၂၈ ရက်နေ့ကလည်း မင်းတပ်မှာ လေကြောင်းတိုက်ခိုက်ခံရတာကြောင့် လုပ်ခေးဘုန်းကြီး ကျောင်းဆောင်နဲ့ နေအိမ် ၃ လုံးခန့် ပျက်စီးသွားပါတယ်။

 

========================

 

📌📌 ၄။ အရှေ့တီမောသမ္မတနဲ့ NUG သီးသန့်တွေ့ဆုံဆွေးနွေး

 

အမျိုးသား ညီညွတ်ရေးအစိုးရ (NUG) နိုင်ငံခြားရေးဝန်ကြီး ဒေါ်ဇင်မာအောင်ကို အရှေ့တီမောနိုင်ငံ သမ္မတ Mr. José Ramos-Horta (ဟိုဆေးရာမို့စ်ဟော်တာ)က ဇူလိုင်လ ၂ ရက်နေ့မှာ သီးသန့် လက်ခံတွေ့ဆုံခဲ့ပါတယ်။

 

မြန်မာပြည်မှာ လက်ရှိဖြစ်ပျက်နေတာတွေကို အရှေ့တီမော သမ္မတနဲ့ ဆွေးနွေးခဲ့တယ်လို့ ဝန်ကြီး ဒေါ်ဇင်မာအောင်က ပြောပါတယ်။

 

"မြန်မာပြည်မှာ လက်ရှိဖြစ်ပျက်နေတာတွေကို ကျွန်မတို့ဆွေးနွေးကြပါတယ်။ သမ္မတဟိုဆေးရာမို့စ်ကလည်းကျွန်မတို့ ကို အားပေးပါတယ်။ ထောက်ခံပါတယ်။ နိုင်ငံတကာစာမျက်နှာမှာ ကျွန်မတို့ ဘယ်လိုအလုပ်လုပ်ကြမလဲ၊ ကျွန်မတို့ မြန်မာပြည်သူတွေရဲ့ အခက်အခဲတွေ နိုင်ငံတကာကို ဘယ်လိုသတင်းစကားပေးကြမလဲဆိုတာတွေ ဆွေးနွေးဖြစ်ပါတယ်"

ဝန်ကြီး ဒေါ်ဇင်မာအောင် ဦးဆောင်တဲ့ NUG အစိုးရအဖွဲ့ဟာ အရှေ့တီမောနိုင်ငံအစိုးရသစ် ကျမ်းသစ္စာကျိန်ဆိုပွဲကို တရားဝင် ဖိတ်ကြားခံခဲ့ရတာပါ။

 

ဒါဟာ NUG အစိုးရအတွက်တော့ နိုင်ငံတော်အဆင့် အခမ်းအနားတစ်ခုမှာ မြန်မာနိုင်ငံကိုယ်စားပြု အစိုးရအဖြစ် ပထမဆုံးအကြိမ် အသိအမှတ်ပြုခံရတာလည်း ဖြစ်ပါတယ်။

 

အရှေ့တီမောနိုင်ငံဟာ အာဆီယံ- အရှေ့တောင်အာရှနိုင်ငံများအသင်းမှာ အဖွဲ့ဝင်ဖြစ်ဖို့ ကြိုးစားနေတဲ့ နိုင်ငံဖြစ်ပါတယ်။ 

 

ပြီးခဲ့တဲ့နှစ်က ကျင်းပတဲ့ အာဆီယံထိပ်သီးညီလာခံမှာ အသင်းဝင်နိုင်ငံအဖြစ် လက်ခံဖို့ ကနဦးဆုံးဖြတ်ထားပါတယ်။

 

သမ္မတဟိုဆေးရာမို့စ်ဟော်တာဟာ မြန်မာ့အရေးနဲ့ ပတ်သက်ပြီး ပြင်းပြင်းထန်ထန် ဝေဖန်ပြောဆိုသူလည်းဖြစ်ပါတယ်။

#RadioNUGLocalNews

#SpringRevolution