20 Jan 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇန်နဝါရီလ ( ၂၀ ) ရက်နေ့ ရပြည်တွင်းသတင်းများ

📌📌 1. CNF ခေါင်းဆောင်အပါအဝင် ငါးဦး မီဇိုရမ်မှာ ဖမ်းဆီး

 

ဇန်နဝါရီ ၁၆ ရက်။

အိန္ဒိယနိုင်ငံ၊ မီဇိုရမ်ပြည်နယ်အနောက်ပိုင်း မာမစ်ခရိုင်မှာ ချင်းအမျိုးသားတပ်ဦး (CNF/CNA) က ခေါင်းဆောင်တစ်ဦး အပါအဝင် ငါးဦးကို လက်နက်ခဲယမ်းတွေနဲ့အတူ ဖမ်းဆီးမိကြောင်း အိန္ဒိယအခြေစိုက် ThePrint သတင်းက ဇန်နဝါရီ ၁၅ ရက်နေ့မှာ ဖော်ပြပါတယ်။

CNF ခေါင်းဆောင်တစ်ဦးလို့ ပြောပေမဲ့ နာမည်နဲ့ ရာထူးအသေးစိတ်ကိုတော့ မဖော်ပြထားပါဘူး။

အိန္ဒိယရဲနဲ့ ထောက်လှမ်းရေးအဖွဲ့တို့ ပူးပေါင်းပြီး ဖမ်းဆီးမိသူတွေဆီက AK-47 ရိုင်ဖယ် ခြောက်လက်၊ ကျည်ကတ် ၁၃ ခုနဲ့ ကျည်ဆန်တစ်သောင်းကျော်ကို သိမ်းဆည်းရမိခဲ့တယ်လို့ ဆိုပါတယ်။

အခုလိုဖမ်းဆီးရမိတာ ပြည်နယ်တွင်း ပမာဏအများဆုံး လက်နက်သိမ်းဆည်းရရှိမှုတွေထဲက တစ်ခုဖြစ်ပြီး ဒေသတွင်း တည်ငြိမ်အေးချမ်းရေးအတွက် ခြိမ်းခြောက်မှုတစ်ခု ဖြစ်တယ်လို့လည်း အိန္ဒိယရဲတပ်ဖွဲ့က ပြောပါတယ်။

ကနဦးစစ်ဆေးမေးချက်အရ သိမ်းဆည်းရမိတဲ့ လက်နက်ခဲယမ်းတွေဟာ CNF နဲ့ ဘင်္ဂလားဒေ့ရှ်နိုင်ငံမှာ လှုပ်ရှားနေတဲ့ လက်နက်ကိုင်အဖွဲ့ (UPDFP) တို့ ကြား ရောင်းဝယ်ဖို့အတွက်ဖြစ်တယ်လို့ ဆိုပါတယ်။

 

========================

 

📌📌 2. အမ်းမြို့မှ ထွက်ပြေးလာသော စစ်ကောင်စီတပ်သား ၁၂ ဉီး ကို CDF-ASHO ကဖမ်းဆီးရမိ

 

ဇန်နဝါရီလ ၁၆

ရခိုင်ပြည်နယ် ၊ အမ်းမြို့နယ်မှ ထွက်ပြေးလာသော စစ်ကောင်စီတပ်သား(၁၂)ဦးကို CDF-ASHO ကဖမ်းဆီးနိုင်ခဲ့တယ်လို့သိရပါတယ်။

ရခိုင်ပြည်နယ်၊ အမ်းမြို့နယ်မှ ထွက်ပြေးလာသော စစ်ကောင်စီတပ်ဖွဲ့ဝင်များဟာ ဇန်နဝါရီလ ၁၃ ရက်နေ့ တွင် ပြည်သူ့ကာကွယ်ရေးတပ်ဖွဲ့ CDF-ASHO နဲ့ တိုက်ပွဲဖြစ်ပွားခဲ့ပြီး စကစတပ်ဖွဲ့ဝင်(၅)ဦးသည်လက်နက်မချသည့်အတွက် ပစ်ခတ်ဖမ်းဆီးခဲ့တယ်လို့ဆိုပါတယ်။

၂၀၂၅ ခုနှစ် ဇန်နဝါရီလ ၁၄ ရက်နေ့တွင်လည်း အမ်းမြို့နယ်မှ ထွက်ပြေးလာသော စကစတပ်သားအင်အား ၁၀၀ ခန့်နှင့် ပြည်သူ့ကာကွယ်ရေးတပ်ဖွဲ့ CDF-ASHO တို့တိုက်ပွဲဖြစ်ပွားခဲ့ရာ စကစတပ်ဖွဲ့ဝင်(၃)ဦး သေဆုံးခဲ့ပြီး (၈)ဦးအရှင်ဖမ်းဆီးနိုင်ခဲ့ပေမယ့်ကျန် စကစတပ်ဖွဲ့ဝင်များဟာ ထွက်ပြေးလွတ်မြောက်ခဲ့ကြတယ်လို့ ထုတ်ပြန်ချက်မှာ ဖော်ပြပါတယ်။

အဆိုပါတိုက်ပွဲများအတွင်း စကစတပ်ဖွဲ့ဝင် စုစုပေါင်း(၁၂)ဦးကိုအရှင်ဖမ်းဆီးနိုင်ခဲ့သည့်အပြင် လက်နက်ငယ်အချို့နှင့်စစ်အသုံးဆောင်ပစ္စများကိုလည်းသိမ်းဆည်းရမိခဲ့တယ်လို့ သိရပါတယ်။

 

========================

 

📌📌 3. စစ်အုပ်ချုပ်ရေး အမိန့်ထုတ်သည့် တောင်ကိုရီးယားသမ္မတ အဖမ်းခံရ

 

ဇန်နဝါရီ ၁၅၊ ၂၀၂၅

နိုင်ငံတော်ပုန်ကန်မှု စွပ်စွဲချက်များဖြင့် ရင်ဆိုင်နေရပြီး ရာထူးမှဆိုင်းငံ့ခံရသည့် တောင်ကိုရီးယား သမ္မတ ယွန်းဆွတ်ယိုကို ယနေ့နံနက်တွင် ၎င်း၏ နေအိမ်၌ ဖမ်းဆီးလိုက်ကြောင်းသိရပြီး ပြီးခဲ့သည့် ဒီဇင်ဘာ ၃ ရက်က စစ်အုပ်ချုပ်ရေးအမိန့်ကြေညာခဲ့ သည့် ကိစ္စနှင့်ပတ်သက်၍ သမ္မတအား စုံစမ်းစစ်ဆေးရန် ကြိုးစားနေရာမှ ယနေ့နံနက်တွင် သမ္မတအိမ်တော်အတွင်း ဝင်ရောက်ဖမ်းဆီးလိုက်ခြင်းဖြစ်ကြောင်း ကိုရီးယားသတင်းများက ဖော်ပြလာပါတယ်။

 

၂၀၂၅ ဇန်နဝါရီလ ၁၅ ရက်နေ့ နံနက်ပိုင်းတွင် စုံစမ်းစစ်ဆေးသူများက ယွန်းဆွတ်ယို၏နေအိမ်သို့ဝင်ရောက်ခဲ့ရာ သမ္မတလုံခြုံရေးတပ်ဖွဲ့နှင့် ထိပ်တိုက်တွေ့ခဲ့သဖြင့် ၎င်းအား ဖမ်းဆီးရန်ထုတ်ထားသည့်ဝရမ်းကို ပြသခဲ့ရကြောင်း၊ ထို့နောက်၎င်းအား သမ္မတလုံခြုံရေးမော်တော်ယာဉ်ဖြင့် စစ်ဆေးမေးမြန်းရန် အဂတိ လိုက်စားမှုတိုက်ဖျက်ရေးရုံးသို့ ခေါ်ဆောင်သွားကြောင်း သတင်း၌ ဖော်ပြထားသည်။

သမ္မတ ယွန်းဆွတ်ယို၏ ဒီဇင်ဘာ ၃ ရက်က ၆နာရီကြာ စစ်အုပ်ချုပ်ရေးအမိန့် ကြေညာခဲ့မှုနှင့် ပတ်သက်၍ နိုင်ငံတော် ပုန်ကန်မှုဦးဆောင်သူအဖြစ် တရားရုံးက ဖမ်းဝရမ်းထုတ်ထားသည့်အတွက် တောင်ကိုရီးယားနိုင်ငံသမိုင်းတွင် ပထမဆုံးအကြိမ်အနေဖြင့် သမ္မတကို ဖမ်းဝရမ်းထုတ်ခဲ့ခြင်းဖြစ်သည်။

 

========================

 

📌📌 4. အာဆီယံနှင့် ပူးပေါင်း၍ ဆိုက်ဘာမှုခင်းများကို တရုတ် အရှိန်မြှင့် နှိမ်နင်းမည်

 

ဇန်နဝါရီ ၁၇၊ ၂၀၂၅

တရုတ်နိုင်ငံခြားရေးဝန်ကြီး ဝမ်ယိသည် အာဆီယံအဖွဲ့ဝင်နိုင်ငံများမှ သံအမတ်ကြီးများနှင့် ယမန်နေ့ ပေကျင်းမြို့တော်၌ တွေ့ဆုံရာတွင် နယ်စပ်ဖြတ်ကျော် အွန်လိုင်းလိမ်လည်မှုများနှင့် တရားမဝင်လောင်းကစား ပူးပေါင်းနှိမ်နင်းရေးကိစ္စများ ဆွေးနွေးခဲ့ကြောင်း သိရသည်။

 

သက်ဆိုင်ရာ အစိုးရများအနေဖြင့် မိမိတို့နိုင်ငံအတွင်းရှိ ရာဇဝတ်မှုကျူးလွန်သူများအပေါ် ထိရောက်သည့် အရေးယူဆောင်ရွက်မှုများ ပြုလုပ်ရန်နှင့် ပြစ်မှုကျူးလွန်သူများကို ဥပဒေ၏ အပြစ်ပေးခြင်းမှ ကင်းလွတ်ခွင့်မရှိစေရေး သေချာဆောင်ရွက်ရန် တိုက်တွန်းကြောင်း နိုင်ငံခြားရေးဝန်ကြီးက တိုက်တွန်းထားပါတယ်။

ထို့ပြင် အာဆီယံ-တရုတ် ပူးပေါင်းပြီး ဥပဒေစိုးမိုးရေး ပူးပေါင်းဆောင်ရွက်မှုများ ပိုမိုအားကောင်းလာစေရန် အဓိကထား ဆောင်ရွက်သွားမည်ဖြစ်ကြောင်း၊ ယင်းသို့ ဆောင်ရွက်ခြင်းဖြင့် နိုင်ငံသားများ၏ လုံခြုံရေးကို ပိုမိုကာကွယ်နိုင်မည့်အပြင် အိမ်နီးချင်းနိုင်ငံများအကြား ပူးပေါင်းဆောင်ရွက်မှု ပိုမိုခိုင်မာလာမည်ဖြစ်ကြောင်း ဝမ်ယိက ဆိုပါတယ်။

 

မကြာသေးမီက ထိုင်း-မြန်မာနယ်စပ် မြဝတီအနီးတွင် တရုတ်ရုပ်ရှင်မင်းသား ဝမ်ရှင်းသည် ကျားဖြန့်ဂိုဏ်းများ၏ လိမ်လည်ခေါ်ဆောင်ခံခဲ့ရပြီးနောက် နှစ်နိုင်ငံသက်ဆိုင်ရာတာဝန်ရှိသူများက ရှာဖွေ၍ ပြန်လည်ခေါ်ထုတ်နိုင်ခဲ့သလို တရုတ်နိုင်ငံသား အများအပြား လူကုန်ကူးခံထားရသည့်အမှုတိုင်ကြားချက်များလည်း ခပ်စိပ်စိပ် ထွက်ပေါ်လာခဲ့ကြောင်း ပြည်တွင်းသတင်းတွေထံကသိရပါတယ်။

 

#RadioNUGLocalNews

#SpringRevolution