08 Mar 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ မတ်လ ( ၈ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ စစ်သင်တန်းဆင်းပွဲနဲ့ လက်နက်တပ်ဆင်မှု CDF ကန်ပက်လက် ပြုလုပ်။

 

လေးလကျော်ကြာမြင့်တဲ့ စစ်ပညာသင်တန်းအပတ်စဉ်(၁) ဆင်းပွဲနဲ့အတူ လက်နက်တပ်ဆင်ခြင်းအခမ်းအနား ပြုလုပ်ခဲ့တယ်လို့ ချင်းကာကွယ်ရေးတပ်ဖွဲ့ - ကန်ပက်လက်က မတ် ၁ရက်နေ့ ကြေညာပါတယ်။

အဲဒီအခမ်းအနားကို ဖေဖော်ဝါရီလ ၂၈ရက်က ပြုလုပ်ခဲ့တာ ဖြစ်ပါတယ်။

ကျင်‌‌ဒွေးမြို့၊ ကန်ပက်လက်မြို့နယ်အပါအဝင် ချင်းပြည်တောင်ပိုင်းတစ်ခုလုံး လွတ်မြောက်နိုင်ခဲ့ပြီဖြစ်လို့ စစ်ဘေးရှောင်ပြည်သူတွေ နေရပ်ပြန်လည်အခြေချတဲ့အချိန်မှာ ပြည်သူလူထုကို နွေးထွေးလုံခြုံစွာ အပြည့်အဝ အကာကွယ်ပေးသွားမယ်လို့ ချင်းကာကွယ်ရေးတပ်ဖွဲ့ - ကန်ပက်လက်ရဲ့ ထုတ်ပြန်ချက်မှာ ဖော်ပြပါတယ်။

လက်နက်တပ်ဆင်ရေးအစီစဉ်ပြုလုပ်နိုင်အောင် ကူညီပေးကြတဲ့ ရက္ခိုင်အမျိုးသားအဖွဲ့ချုပ်/ အာရက္ခတပ်‌တော် (ULA/AA)နဲ့ ပြည်တွင်းပြည်ပ ထောက်ပို့ပြည်သူအားလုံးကို အထူးကျေးဇူးတင်ရှိတယ်လို့လည်း ဆိုပါတယ်။

ကန်ပက်လက်မြို့နယ်၊ ကျင်ဒွေးမြို့ကို မြို့သိမ်းစစ်ဆင်ရေးအဖြစ် ချင်းကာကွယ်ရေးတပ်ဖွဲ့ (ကန်ပက်လက်) နဲ့အတူ CDF, PDF ပူးပေါင်းတပ်က ၂၀၂၃ ဒီဇင်ဘာ ၂၂ ရက်နေ့ စတင်ပြီး ၂ လကျော်ကြာ ဖော်ဆောင်ခဲ့ပါတယ်။

၂၀၂၄ မတ်လ ၇ ရက်နေ့မှာတော့ ‘ချင်းညီနောင်’ စစ်ဆင်ရေးအဖြစ် ထပ်မံကြေညာခဲ့ပြီး ကျင်ဒွေးမြို့ကို အလုံးစုံ ထိန်းချုပ်လိုက်ကြောင်း ‘ချင်းညီနောင်’ က ၂၀၂၄ ဧပြီ ၂၇ ရက်နေ့ ထုတ်ပြန်ပါတယ်။ 

ကန်ပက်လက်မြို့ပေါ်မှာတော့ စစ်ကောင်စီတပ်ဖွဲ့ဝင်တွေ တပ်စွဲနေရာအသီးသီးကနေ စခန်းစွန့်ထွက်ပြေးလို့ စစ်ဆင်ရေးအောင်မြင်တယ်လို့ ‘ချင်းညီနောင်’ က ၂၀၂၄ ဒီဇင်ဘာ ၂၃ ရက်နေ့ ထုတ်ပြန်ပါတယ်။ 

 

========================

 

📌📌 ၂။ မင်းတပ်မြို့ ပြန်လည်ထူထောင်ရေး လုပ်ဆောင်။

 

မင်းတပ်မြို့တွင်း ပြည်သူတွေ ပြန်လည်ဝင်ရောက်နေထိုင်တဲ့ချိန် အဆင်ပြေချော့မွေ့စေဖို့ လုပ်ဆောင်နေတယ်လို့ မင်းတပ်မြို့နယ်ပြည်သူ့အုပ်ချုပ်ရေးအဖွဲ့က မတ်လ ၆ရက်နေ့က ထုတ်ပြန်ပါတယ်။

မင်းတပ်မြို့အတွင်း ပြည်သူများ ပြန်လည်နေထိုင်နိုင်ဖို့ မြို့နယ်ပြည်သူ့အုပ်ချုပ်ရေးအဖွဲ့အနေနဲ့ လမ်းပန်းဆက်သွယ်ရေး၊ သောက်သုံးရေပေးဝေနိုင်ရေး အဓိကလုပ်ဆောင်နေတယ်လို့ ထုတ်ပြန်ချက်မှာ ဖော်ပြပါတယ်။

“ပြည်သူတွေ နေထိုင်နိုင်ဖို့ အထူးသဖြင့် လူ၊ မော်တော်ယာဉ်သွားလာတာ အဆင်ပြေအောင် လမ်းလုပ်တာ၊ နောက်ပြီး ရေသွယ်တန်းတာပေါ့၊ လှောင်ကန်တိုင်းမှာ ရေပြန်ဖြည့်နေတာ ဖြစ်ပါတယ်။” လို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူကပြောကြောင်း The Mindat Postက ဖော်ပြပါတယ်။

မင်းတပ်မြို့ပေါ်မှာ စစ်ကောင်စီထောင်ခဲ့တဲ့ မိုင်းအလုံးရေ ၁၀၀၀ ဝန်းကျင်ကို ရှင်းလင်းထားပြီးဖြစ်တယ်လို့လည်း ချင်းကာကွယ်ရေးတပ်ဖွဲ့ - မင်းတပ် ပြန်ကြားရေးတာဝန်ရှိသူကပြောကြောင်း The Mindat Postက ရေးသားထားပါတယ်။

မင်းတပ်မြို့ထဲ အရပ်သားပြည်သူတွေကို ရက်သတ္တပတ်မှာ ၂ ရက် ဝင်ခွင့်ပြုမယ်လို့ မြို့နယ်ပြည်သူ့အုပ်ချုပ်ရေးအဖွဲ့က ၂၀၂၅ ခုနှစ် ဖေဖော်ဝါရီ ၉ ရက်နေ့ စတင် ကြေညာခဲ့တာပါ။

မြို့ထဲ ပြန်လည်နေထိုင်မယ့် ပြည်သူတွေ လိုက်နာဖို့အချက် ၁၂ ချက်နဲ့ ကုန်စည်တင်ဆောင်ပြီး မြို့ဖြတ်သန်းမယ့် ယာဉ်မောင်းတွေ လိုက်နာဖို့ အချက် ၉ ချက်ကိုလည်း ထုတ်ပြန်ထားပါတယ်။

မင်းတပ်မြို့သိမ်းတိုက်ပွဲမှာ ‘ချင်းညီနောင်’ နဲ့အတူ အာရက္ခတပ်တော် - AA၊ ယောကာကွယ်ရေးတပ် - YDF၊ ယောတပ်တော် - YA နဲ့ မုံရွာခရိုင် PDF တပ်ရင်း ၃ တို့ ရက်ပေါင်း ၄၀ ကျော်ကြာ တိုက်ပွဲဝင်ခဲ့ပြီး ၂၀၂၄ ဒီဇင်ဘာ ၂၁ ရက်နေ့မှာ မြို့တခုလုံး အပြည့်အဝ ထိန်းချုပ်နိုင်ခဲ့ခြင်း ဖြစ်ပါတယ်။

 

========================

 

📌📌 ၃။ ယောဒေသအခြေစိုက် တော်လှန်ရေးအင်အားစု ၃ ခု တပ်တခုအဖြစ်ပေါင်းစည်း။

 

တပ်ဖွဲ့ဖျက်သိမ်းကြောင်း ကြေညာခဲ့တဲ့ ယောပြည်သူ့ကာကွယ်ရေးတပ်ဖွဲ့ - YPDF နဲ့ ယောတပ်တော် - YA အကြား တပ်တစ်ခုတည်းအဖြစ် အတူတည်ဆောက် တိုက်ပွဲဝင်မယ်လို့ ထုတ်ပြန်လာပါတယ်။

စစ်အာဏာရှင်ကို ထိထိရောက်ရောက် ထိုးနှက်တိုက်ခိုက်ဖို့ အင်အားတစ်ခုဖြစ်တယ်လို့လည်း ထုတ်ပြန်ချက်မှာ ဖော်ပြထားပါတယ်။

ယောဒေသပြည်သူ့ကာကွယ်ရေးတပ်ဖွဲ့ - YPDF ကို ၂၀၂၅ မတ်လ ၂ ရက်နေ့က ဖျက်သိမ်းကြောင်း ကြေညာခဲ့တာဖြစ်ပြီး မတ်လ ၃ရက်နေ့မှာ ယောတပ်တော် - YA နဲ့ ပူးပေါင်းမယ့်အကြောင်း ထုတ်ပြန်ချက် ထွက်လာတာ ဖြစ်ပါတယ်။ 

ပြီးခဲ့တဲ့ ဖေဖော်ဝါရီနှောင်းပိုင်းကလည်း NUG – MoD လက်အောက်ခံအဖြစ်က ရပ်နားပြီး ယောဒေသနဲ့ မြန်မာတစ်နိုင်ငံလုံး လွတ်မြောက်တဲ့အထိ Yaw – Army မှာ ဆက်လက် တာဝန်ထမ်းဆောင်မယ်လို့ ယောအခြေစိုက်တော်လှန်ရေးအင်အားစု တခုဖြစ်တဲ့ PDF – GANGAW ဂန့်ဂေါခရိုင်တပ်ရင်းအမှတ် (၁၂) က ကြေညာပါတယ်။

Yaw – Army ဟာ မကွေးတိုင်း၊ ယောဒေသအခြေစိုက် တော်လှန်ရေးအင်အားစုဖြစ်ပြီး ကန်ပက်လက်၊ မတူပီ၊ မင်းတပ်မြို့သိမ်း ‘ချင်းညီနောင်’ စစ်ဆင်ရေးတွေမှာ ပါဝင်ခဲ့ပါတယ်။

#RadioNUGLocalNews

#SpringRevolution