07 Apr 2025 - (Ethnic language program-Matupi) by The Matupi Times

 

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဧပြီလ ( ၇ ) ရက်နေ့ ရပြည်တွင်းသတင်းများ

📌📌 1/ ZFU / PDF Zoland တည်ထောင်ခြင်း ၄ နှစ်ပြည့် အထိမ်းအမှတ် ကျင်းပ

ZFU / PDF Zoland တည်ထောင်ခြင်း ၄ နှစ်ပြည့် အထိမ်းအမှတ်အခမ်းအနားကို ကျင်းပပြုလုပ်ခဲ့ကြောင်း မတ်လ ၃၀ ရက်နေ့တွင် ZFU / PDF Zoland က ထုတ်ပြန်ခဲ့သည်။

၄ နှစ်တာကာလအတွင်း လမ်းပြပို့ဆောင်သော ဘုရားသခင်နှင့် တော်လှန်ရေးခရီးတစ်လျှောက် အားပေးထောက်ခံသည့် ပြည်သူလူထုအပေါ် ကျေးဇူးတင်ကြောင်း၊ ဒီမိုကရေစီရရှိရေးအတွက် တော်လှန်ရေးအတွင်း အသက်ပေးသွားသူ အာဇာနည်သူရဲကောင်းများအားလည်း လေးစားဂုဏ်ပြုကြောင်း၊ ထို့အပြင် အာဏာဖီဆန်ရေးလှုပ်ရှားမှုတွင် ပါဝင်ခဲ့သော နိုင်ငံဝန်ထမ်းများ၊ ခြေလက်အင်္ဂါဆုံးရှုံးသူများနှင့် ပိုင်ဆိုင်မှုဆုံးရှုံးသူများအားလုံးကိုလည်း လေးစားအသိအမှတ်ပြုကြောင်း ZFU / PDF Zoland က ထုတ်ပြန်ထားသည်။

 

========================

 

📌📌 2/ ငလျင်ဒဏ်ကြောင့် သေဆုံးသူ ၃၃၅၄ ဦးရှိလာ၊ ဒဏ်ရာရသူ ၄၅၀၈ ဦး၊ ပျောက်ဆုံး ၂၂၀ ဦး

၄-၄-၂၀၂၅ ညနေ ၆ နာရီအချိန်အထိ စာရင်းများအရ ငလျင်ဒဏ်ကြောင့် သေဆုံးသူ ၃၃၅၄ ဦး၊ ဒဏ်ရာရသူ ၄၅၀၈ ဦး၊ ပျောက်ဆုံးသူ ၂၂၀ ဦး ဖြစ်ကြောင်း စစ်ကောင်စီလက်အောက်ခံ ပြန်ကြားရေးဝန်ကြီးဌာနက ဧပြီ ၅ ရက်နေ့တွင် သတင်းထုတ်ပြန်ခဲ့သည်။

ငလျင်ကြောင့် လူသေဆုံးမှု၊ အထိအခိုက်အများဆုံးဖြစ်သည်မှာ မန္တလေးတိုင်းဖြစ်ပြီး သေဆုံးသူ ၂၁၂၂ ဦးနှင့် ဒဏ်ရာရသူ ၂၆၀၉ ဦး၊ ဒုတိယအများဆုံးမှာ နေပြည်တော်ကောင်စီနယ်မြေဖြစ်ပြီး သေဆုံးသူ ၆၁၅ ဦး၊ ဒဏ်ရာရသူ ၈၄၃ ဦး ဖြစ်သည်။ စစ်ကိုင်းတိုင်းတွင် သေဆုံးသူ ၅၀၇ ဦး၊ ဒဏ်ရာရသူ ၆၈၈ ဦး၊ ရှမ်းပြည်နယ်တွင် သေဆုံးသူ ၆၆ ဦး၊ ဒဏ်ရာရသူ ၁၃၃ ဦး၊ ပဲခူးတိုင်းတွင် သေဆုံးသူ ၄၄ ဦး၊ ဒဏ်ရာရသူ ၂၃၄ ဦး ရှိကြောင်း စစ်ကောင်စီထုတ်ပြန်ချက်အရ သိရသည်။

 

========================

 

📌📌 3/ မင်းတပ်နဲ့ ကန်ပက်လက်မြို့ကို စကစက (၂) ရက်ဆက်တိုက် ဗုံးကြဲတိုက်ခိုက်

The Matupi Times၊ ဧပြီ ၂၊ ၂၀၂၅

အကြမ်းဖက်စစ်တပ်က ချင်းပြည်နယ် တောင်ပိုင်း၊ မင်းတပ်မြို့နှင့် ကန်ပက်လက်မြို့တို့ကို ဧပြီ ၂ ရက်နေ့တွင် နေ့လည်ပိုင်းတွင် လေကြောင်းဖြင့် ထပ်မံ၍ ဗုံးကြဲတိုက်ခိုက်ခဲ့သည်ဟုသိရသည်။

ချင်းညီနောင်အဖွဲ့ ထိန်းချုပ်ထားသည့် မင်းတပ်နှင့် ကန်ပက်လက်မြို့များကို စစ်ကောင်စီသည် ယမန်နေ့ ဧပြီ ၁ ရက်နှင့် ယနေ့ ဧပြီ ၂ ရက်၊ အချိန်အဆက်မပြတ် (၂) ရက် ဆက်တိုက် တိုက်ခိုက်ခဲ့ခြင်းဖြစ်သည်။

ယမန်နေ့ နံနက်ပိုင်းတွင် ကန်ပက်လက်မြို့ပေါ်ကို ဗုံးကြဲခြင်းနှင့် ညပိုင်းတွင် မင်းတပ်မြို့ရှိ တနေရာကို နှစ်ကြိမ်တိုင်အောင် ဗုံးကြဲတိုက်ခိုက်ခဲ့ကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်သည်။

လေကြောင်းတိုက်ခိုက်မှုအတွင်း ကန်ပက်လက်မြို့ရှိ ပြည်သူ့နေအိမ် ၅ လုံး၊ အစိုးရအဆောက်အဦးများ (ထွေ/အုပ်) ၈ လုံး၊ ခေါ်နူးစုမ်ရိပ်သာ ၁ လုံး၊ ကျေးလက်ဦးစီးမှူးရုံး ၂ လုံး၊ မြို့နယ်ရွေးကောက်ပွဲကော်မရှင်ရုံး ၁ လုံး၊ မြို့နယ်စစ်ကောင်စီရုံး ၁ လုံးနှင့် မြို့နယ်စီမံကိန်းရုံး ၂ လုံး စုစုပေါင်း ၂၀ လုံး ပျက်စီးခဲ့ကြောင်း၊ ပြည်သူအနည်းငယ် ထိခိုက်ဒဏ်ရာ ရရှိခဲ့ကြောင်း သိရသည်။

 

========================

 

📌📌 4/ မလေးရှားမှာ ချင်းအမျိုးသားတစ်ဦး ပေ ၃၀ မြင့် အိမ်မိုးပေါ်မှ မတော်တဆ ပြုတ်ကျ

The Matupi Times၊ ဧပြီ ၃၊ ၂၀၂၅

အမြင့်ကနေ မတော်တဆ ပြုတ်ကျသူမှာ ချင်းပြည်နယ် မတူပီမြို့နယ် ဖနိုင်ကျေးရွာ ဒေသခံဖြစ်ပြီး ခာက်လုပ်ငန်းခွင်တစ်ခုတွင် အလုပ်လုပ်ကိုင်နေသော ချင်းအမျိုးသားတစ်ဦး ဖြစ်သည်။ ဤသူသည် ဧပြီ ၃ ရက် မနက်ပိုင်းက ပေ (၃၀) မြင့် အိမ်မိုးပေါ်တွင် အလုပ်လုပ်နေစဉ် မတော်တဆ ပြုတ်ကျခဲ့ပြီး ပေါင်အရိုးကျိုးမှုရှိကာ အရေးပေါ်ဆေးကုသမှု ခံယူနေသည်ဟုသိရသည်။

အဆိုပါသူသည် အဘဦး - ဗန်ပဲန် ၏ သား ဆလိုင်း - ဗန်ရိုးဆန် ဖြစ်ကြောင်းလည်း သိရသည်။

“သူက ဆောက်လုပ်ရေးမှာ အလုပ်လုပ်တာ။ အမြင့်ကနေ မတော်တဆ ပြုတ်ကျလို့ ပေါင်အရိုးကျိုး၊ လက်အဆစ်လွဲ၊ အရိုးအက်တယ်လို့ ကြားရတယ်။ လက်ရှိမှာ ဆေးကုသမှုခံယူနေတယ်။ သူ့အလုပ်ရှင်ကလည်း ချက်ချင်း ဆေးခန်းပို့ပေးတယ်။ မနက်ဖြစ်စဉ်ကတည်းက အမျိုးတွေကိုလည်း သူ့အလုပ်ရှင်က အကြောင်းကြားပေးထားတယ်။ အခု သူသတိရလာပါပြီ၊ စကားလည်း ပြောနိုင်တယ်။” ဟု ဆွေမျိုးတော်စပ်သူတစ်ဦးက The Matupi Times ကို ပြောသည်။

========================

 

📌📌 5/ ZRA အဖွဲ့က တွန်းဇံမြို့နယ် နတ်ဇန်ရွာကို မီးရှို့ဖျက်စီး၊ တရွာလုံးနီးပါး ပျက်စီး

The Matupi Times၊ ဧပြီ ၅၊ ၂၀၂၅

တွန်းဇံမြို့နယ်၊ နတ်ဇန်ရွာကို Zomi Revolution Army (Eastern Command) တပ်ဖွဲ့က မီးရှို့ဖျက်စီးခဲ့ပြီး တရွာလုံးနီးပါး မီးလောင် ပျက်စီးသွားကြောင်းသိရသည်။

ZRA (Eastern Command) သည် ဧပြီ ၃ ရက်နှင့် ၄ ရက်နေ့များအတွင်း ချင်းပြည်ကောင်စီ ပူးပေါင်းတပ်ဖွဲ့နှင့် တိုက်ပွဲဖြစ်ပွားခဲ့သည်။ ယမန်နေ့ ဧပြီ ၄ ရက်နေ့က တိုက်ပွဲအပြီးတွင် ZRA တပ်ဖွဲ့သည် ဆုတ်ခွာသွားရာ လမ်းကြောင်းပေါ်ရှိ နတ်ဇန် (Nakzang) ရွာကို မီးရှို့ဖျက်စီးခဲ့ကြောင်း Chinland Information Center ၏ သတင်းအရ သိရသည်။

နတ်ဇန်ရွာတွင် အိမ်ခြေ ၈၀ ကျော်ရှိခဲ့ပြီး မီးရှို့မှုကြောင့် ရွာသားများသည် တို့အနီးတွင်ရှိသည့် တွန်းဇံမြို့သို့ စစ်ဘေးတိမ်းရှောင်နေကြသည်။ တိုက်ပွဲအတွင်း ချင်းအမျိုးသားတပ်မတော်နှင့် ပူးပေါင်းတပ်ဖွဲ့က Drone များ၊ လက်နက်နှင့် ခဲယမ်းများ သိမ်းဆည်းရမိကြောင်းလည်း သိရသည်။

 

========================

 

📌📌 6/ တီးတိန်မြို့က စကစအဖွဲ့ဝင် ဒုတပ်ကြပ် (၁) ဦးနှင့် ရဲဘော် (၁) ဦး PDF Zoland ထံ အလင်းဝင်

The Matupi Times၊ ဧပြီ ၃၊ ၂၀၂၅

ချင်းပြည်နယ် တီးတိန်မြို့ရှိ ခလရ (၂၆၉) ကာကွယ်ရေးတပ်မှ စစ်ကောင်စီ ဒုတပ်ကြပ် (၁) ဦးနှင့် ရဲဘော် (၁) ဦး တို့သည် လက်နက်အပြည့်အစုံဖြင့် PDF Zoland ထံသို့ အလင်းဝင်ခဲ့ကြောင်းသိရသည်။

အလင်းဝင်သူ (၂) ဦးမှာ ဒုတပ်ကြပ် မျိုးမင်းကျော် (အသက် ၂၂ နှစ်) နှင့် ရဲဘော် မောင်ဖိုးခွါး (အသက် ၂၃ နှစ်) တို့ဖြစ်ပြီး ဧပြီ ၃ ရက်နေ့တွင် လက်နက်ခဲယမ်းများနှင့်အတူ PDF Zoland ထံသို့ အလင်းဝင်ခဲ့ကြောင်း သိရသည်။

#RadioNUGLocalNews

#SpringRevolution