14 Apr 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဧပြီလ ( ၁၄ ) ရက်နေ့ ရပြည်တွင်းသတင်းများ

📌📌 1/ ဖလမ်းမြို့ကို ချင်းညီနောင်အဖွဲ့ သိမ်းပိုက်၊ လက်နက်ခဲယမ်းအများပြား သိမ်းဆည်းရမိ

The Matupi Times ၊ ဧပြီ ၉ ၊ ၂၀၂၅

ချင်းပြည်နယ် မြောက်ပိုင်းက ဖလမ်းမြို့ကို ချင်းညီနောင်အဖွဲ့က အပြီးသတ် သိမ်းပိုက်နိုင်ခဲ့ပြီဖြစ်ကြောင်း ဒီကနေ့ ဧပြီ ၉ ရက်နေ့တွင် တရားဝင် သတင်းထုတ်ပြန်လိုက်သည်။
ဖလမ်းမြို့ သိမ်းတိုက်ပွဲတွင် လက်နက်ခဲယမ်းအမြောက်အများ သိမ်းဆည်းရမိခဲ့ကြောင်း သိရသည်။
ဖလမ်းမြို့ သိမ်းစစ်ဆင်ရေးကို ၂၀၂၄ ခုနှစ် နိုဝင်ဘာ ၉ ရက်နေ့မှ စတင်ခဲ့ပြီး ၅ လပြည့်သည့် ဒီကနေ့ ၂၀၂၅ ခုနှစ် ဧပြီ ၉ ရက်နေ့တွင် စစ်ကောင်စီကင်းစင်နယ်မြေ အဖြစ် ဖော်ဆောင်နိုင်ခဲ့ပြီဟု ဆိုသည်။
ဖလမ်းမြို့ကို စစ်ကောင်စီက လေကြောင်းမှ အပြင်းအထန် ဗုံးကြဲ ခုခံတိုက်ခိုက်မှုများအကြားမှ သိမ်းပိုက်နိုင်ခဲ့ခြင်း ဖြစ်သည်။

ချင်းညီနောင် စစ်ဆင်ရေး (Operation CB) ဖလမ်းမြို့ သိမ်းတိုက်ပွဲတွင်
96 Soldiers PDF၊ Anti-Fascist Internationalist Front (AIF)、Burma National Revolutionary Army (BNRA)、Burmese Revolutionary Technical Front (BRTF)、Generation Z Army (GZA)、Giant Revolution Force (GRF)、Harmonious Northern Brothers (HNB)、Kalay Revolution Force (KRF)、Kalay Urban Guerrilla (Kalay UG)、Myingyan Black Tiger (MBT)、National Liberation Army (NLA)、Revolution Ambulance Wolf (RAW Medical Team)、Sagaing Federal Troop (SFT-Sol)、Yaw Defense Force (YDF)、Zo Army (ZA)
နှင့် ကလေးခရိုင် ပကဖနှင့် Drone အဖွဲ့တို့ ပါဝင်ခဲ့ကြောင်း သိရသည်။

ဖလမ်းမြို့ကို သိမ်းပိုက်နိုင်ပြီးနောက် ချင်းညီနောင် ထိန်းချုပ်နိုင်သည့် မြို့ပေါင်း ၅ မြို့ရှိလာပြီဖြစ်သည်။ မတူပီ၊ မင်းတပ်၊ ကန်ပက်လက်နှင့် ကျင်ဒွေးမြို့များကို ချင်းညီနောင် မဟာမိတ်များက သိမ်းပိုက်ထားသည်။

========================

 

📌📌 2/ Matupi Township Health Department မှ ကိုယ်ဝန်ဆောင်မိခင်များနှင့် (၂) နှစ်အောက် ကလေးငယ်များကို ကာကွယ်ဆေး အခမဲ့ထိုးနှံပေး

The Matupi Times ၊ ဧပြီ ၇ ၊ ၂၀၂၅

မတူပီမြို့နယ် ကျန်းမာရေးဌာန (Matupi Township Health Department) မှ မတူပီမြို့ပေါ်ရှိ ကိုယ်ဝန်ဆောင်မိခင်များနှင့် (၂) နှစ်အောက် ကလေးငယ်များကို အခမဲ့ ကာကွယ်ဆေး ထိုးနှံပေးခဲ့ကြောင်း သိရသည်။

ကာကွယ်ဆေး ထိုးနှံပေးခြင်းကို ၂၀၂၅ ခုနှစ်၊ ယမန်နေ့ ဧပြီ ၆ ရက်နေ့မှ စတင်ထိုးနှံခဲ့ခြင်း ဖြစ်ပြီး၊ လိုအပ်သည့် ဆေးဝါးများကို Chin Health Organization မှ ကူညီထောက်ပံ့ပေးကြောင်း သိရသည်။

“ကာကွယ်ဆေးကို (CHO) မှ ကူညီထောက်ပံ့ပေးထားတာပါ။ အကုန်လုံးကို အခမဲ့ ထိုးနှံပေးတာပါ။ မြို့ပေါ်မှာတော့ ကလေးအယောက် ၄၀ ကျော်နဲ့ ကိုယ်ဝန်ဆောင်မိခင် ၁၀ ယောက်ကျော်ကို ထိုးနှံပေးနိုင်ခဲ့တယ်။ ကျေးရွာတွေကိုတော့ ကာကွယ်ဆေး ထိုးနှံနေဆဲပါ။” ဟု တာဝန်ရှိသူတစ်ဦးက The Matupi Times ကို ပြောသည်။

လက်ရှိတွင် မတူပီမြို့နယ် ကျန်းမာရေးဌာနအနေဖြင့် ကျန်းမာရေးဝန်ဆောင်မှု လုပ်ငန်းများ ဆောင်ရွက်ရာတွင် ဝန်ထမ်းအင်အားများ လိုအပ်လျက်ရှိသကဲ့သို့ မကြာမီ ကျရောက်လာမည့် မိုးရာသီကာလအတွက်လည်း ဆေးဝါးများ လိုအပ်လျက်ရှိကြောင်း သိရသည်။

========================

 

📌📌 3/ ချင်းပြည်၊ ဟားခါးမြို့က စကစ ရဲတပ်သားတစ်ဦးနှင့် ပြည်သူ့စစ် (၂) ဦး CDF-Hakha ထံ အလင်းဝင်

The Matupi Times ၊ ဧပြီ ၈ ၊ ၂၀၂၅

ချင်းပြည်နယ် ဟားခါးမြို့တွင်းရှိ စစ်ကောင်စီတပ်ဖွဲ့ဝင် ရဲတပ်သားတစ်ဦးနှင့် ပြည်သူ့စစ် (၂) ဦးသည် Chinland Defense Force – Hakha ထံသို့ လက်နက်နှင့် ကျည်များ ယူဆောင်ကာ အလင်းဝင်လာကြောင်း သိရသည်။

အလင်းဝင်လာသူမှာ ရဲတပ်သား မောင်သန့်ဇင်ဖြိုး (အသက် ၂၅ နှစ်) ဖြစ်ပြီး ၂၀၂၅ ခုနှစ်၊ ဧပြီ ၆ ရက်နေ့တွင် BA 63 (G3) အမျိုးစား သေနတ်တလက်၊ ကျည် (၁၄၇) ချက် နှင့် ကျည်ဘောက် (၁) ခု ယူဆောင်ကာ အလင်းဝင်လာခြင်းဖြစ်သည်။

ထို့အပြင် ၂၀၂၅ ခုနှစ် မတ် ၂၅ ရက်နေ့တွင် ဟားခါးမြို့တွင်းရှိ ပြည်သူ့စစ် နှစ်ဦးသည်လည်း လက်နက်ခဲယမ်းများနှင့်အတူ Chinland Defense Force – Hakha ထံသို့ အလင်းဝင်ခဲ့ကြောင်း သိရသည်။

အဆိုပါ အလင်းဝင်ရောက်လာသူများမှာ စစ်မှုမထမ်းမနေရအမိန့်ကြောင့် ပေါ်တာဆွဲခံရကာ ကလေးမြို့တွင် စစ်သင်တန်း တက်ရောက်ခဲ့ပြီးနောက် ချင်းပြည်နယ် ဟားခါးမြို့ပေါ်တွင် တာဝန် ချမှတ်ခံထားရသူများ ဖြစ်ကြောင်း သိရသည်။

အလင်းဝင်လာသူများကို Chinland Defense Force – Hakha မှ နွေးနွေးထွေးထွေး ကြိုဆိုခဲ့သည့်အပြင် ငွေသားဆုကြေးများ ချီးမြှင့်ခဲ့ပြီး လုံခြုံသောနေရာသို့ ရောက်ရှိအောင် တာဝန်ယူ ဆောင်ရွက်ပေးသွားမည်ဟု သိရသည်။

 

========================

 

📌📌 4/ ဖလမ်းမြို့သိမ်းတိုက်ပွဲမှာ မဟာမိတ်တပ်ဖွဲ့ဘက်က ရဲဘော် ၃၀ ကျော်ကျဆုံးမှုရှိ

ချင်းပြည် ဖလမ်းမြို့သိမ်းတိုက်ပွဲမှာ ချင်းညီနောင်တပ်ဖွဲ့တွေနဲ့အတူ ပူးပေါင်းပါဝင်တိုက်ခိုက်ခဲ့ကြတဲ့ မဟာမိတ်တပ်ဖွဲ့တွေထဲက ရဲဘော် ၃၀ ကျော် ကျဆုံးမှုရှိခဲ့တယ်လို့ သိရပါတယ်။

၂၀၂၄ ခုနှစ် နိုဝင်ဘာလ ၉ ရက်နေ့က စတင်ခဲ့တဲ့ ဖလမ်းမြို့သိမ်းစစ်ဆင်ရေးမှာ ချင်းညီနောင်အဖွဲ့ဝင်တပ်ဖွဲ့တွေအပြင် စစ်ကိုင်း၊ မကွေးဒေသဘက်က မဟာမိတ်တော်လှန်ရေးတပ်ဖွဲ့ ၁၅ ဖွဲ့ကျော်က ပူးပေါင်းပါဝင်တိုက်ခိုက်ခဲ့ကြတာ ဖြစ်ပါတယ်။

၅ လ ကြာမြင့်ခဲ့တဲ့ ဖလမ်းမြို့သိမ်းစစ်ဆင်ရေးမှာ PDF-Zoland က ရဲဘော် ၁၀ ဦး၊ Kalay Revolution Force (KRF) က ရဲဘော် ၅ ဦး၊ Myingyan Black Tiger (MBT) က ရဲဘော် ၇ ဦး၊ Generation Z Army (GZA) က ရဲဘော် ၇ ဦး၊ ဗမာအမျိုးသားတော်လှန်ရေးတပ်မတော် (BNRA) က ရဲဘော် ၂ ဦးနဲ့ 96 Soldiers PDF-အညာတပ်ခွဲက ရဲဘော် ၁ ဦး စုစုပေါင်း ရဲဘော် ၃၂ ဦး ကျဆုံးမှုရှိခဲ့တယ်လို့ သိရပါတယ်။

ချင်းညီနောင်စစ်ဆင်ရေးအဖြစ် ဖော်ဆောင်ခဲ့ကြတဲ့ ဖလမ်းမြို့သိမ်းစစ်ဆင်ရေးဟာ စစ်ဆင်ရေးစတင်ပြီး ၅ လပြည့်တဲ့ ဧပြီလ ၉ ရက်နေ့မှာ အပြီးသတ်သိမ်းပိုက်နိုင်ခဲ့တာ ဖြစ်ပါတယ်။

 

========================

 

📌📌 5/ မင်းတပ်မြို့နယ်တနေရာကို စကစ ဗုံးကြဲတိုက်ခိုက်၊ ကလေးငယ် (၂) ဦး အပါအဝင် ပြည်သူ (၆) ဦး သေဆုံး

The Matupi Times၊ ဧပြီလ ၁၀၊ ၂၀၂၅

ချင်းပြည်နယ် မင်းတပ်မြို့နယ် တနေရာကို အကြမ်းဖက်စစ်ကောင်စီက ယမန်နေ့ ဧပြီလ ၉ ရက်ညပိုင်းမှာ ဗုံးကြဲတိုက်ခိုက်ခဲ့တာကြောင့် အရပ်သားပြည်သူ ကလေးငယ် (၂) ဦးအပါအဝင် ပြည်သူ (၆) ဦး သေဆုံးပြီး၊ (၉) ဦး ဒဏ်ရာရှိကာ နေအိမ် (၁၀) လုံး ပျက်စီးသွားကြောင်း မင်းတပ်ဒေသခံတစ်ဦးထံက သိရပါတယ်။

အကြမ်းဖက်စစ်ကောင်စီ၏ ဗုံးကြဲတိုက်ခိုက်မှုကြောင့် ခရစ်ယာန်ဓမ္မဆရာတစ်ပါးနဲ့ မိသားစုဝင် (၅) ဦး စုစုပေါင်း (၆) ဦး သေဆုံးခဲ့ပြီး၊ သက်ကြီးရွယ်အိုများနှင့် ကလေးသူငယ်များအပါအဝင် ပြည်သူ (၉) ဦး ထိခိုက်ဒဏ်ရာရရှိခဲ့တယ်လို့ သိရပါတယ်။ သေဆုံးသူများထဲတွင် မသန်စွမ်း (၁) ဦး၊ (၇) နှစ်သားအရွယ် တစ်ဦး နှင့် (၈) လသားအရွယ် တစ်ဦး ပါဝင်ကြောင်း သိရသည်။

ဒါ့အပြင် ဗုံးကြဲတိုက်ခိုက်မှုကြောင့် ပြည်သူပိုင် နေအိမ်များနှင့် AG ဘုရားကျောင်း၊ အသင်းတော်နေအိမ်များအပါအဝင် စုစုပေါင်း နေအိမ် ၁၀ လုံးကျော် ပျက်စီးဆုံးရှုံးခဲ့တယ်လို့ သိရပါတယ်။

ချင်းပြည်နယ် မြောက်ပိုင်း တီးတိန်မြို့နယ် ဆိုင်းဇန်ကျေးရွာကိုလည်း စစ်ကောင်စီက ဧပြီလ ၉ ရက်ည သန်းခေါင်ယံမှာ လေကြောင်းဖြင့် ဗုံးကြဲတိုက်ခိုက်တာကြောင့် တအိမ်ထဲနေ မိသားစုဝင် (၆) ဦး ပွဲချင်းသေဆုံးခဲ့ကာ ထိခိုက်ဒဏ်ရာရရှိသူများရှိကြောင်း သိရသည်။

========================

 

📌📌 6/ အင်းတော်မြို့သိမ်းတိုက်ပွဲမှ ထွက်ပြေးသွားသည့် တပ်မ (၇၇) တပ်မမှူးအပါအဝင် စစ်ကောင်စီတပ်ဖွဲ့ဝင် ၁၇၀ ကျော် ဖမ်းဆီးရမိ (ရုပ်/သံ)

The Matupi Times၊ ဧပြီ ၉၊ ၂၀၂၅

စစ်ကိုင်းတိုင်း အင်းတော်မြို့သိမ်းတိုက်ပွဲကနေ ထွက်ပြေးသွားတဲ့ တပ်မ (၇၇) တပ်မမှူး ဗိုလ်မှူးချုပ်အဆင့် အောင်သက်ဦးအပါအဝင် စစ်အုပ်စု အဖွဲ့ဝင် ၁၇၀ ကျော် ဖမ်းဆီးရမိတယ်လို့ သိရပါတယ်။

ပြည်သူ့ကာကွယ်ရေးတပ်မတော် (PDF) နှင့် တော်လှန်ရေးပူးပေါင်းတပ်ဖွဲ့များက အင်းတော်မြို့အား အပြီးသတ်သိမ်းပိုက်ပြီးနောက် ထွက်ပြေးလွတ်မြောက်သွားသည့် စစ်ကောင်စီ ရှေ့တန်းတပ်မ (၇၇) တပ်မမှူး ဗိုလ်မှူးချုပ် အောင်သက်ဦးနဲ့ စစ်အုပ်စုကို ကသာမြို့အနီးတဝိုက်တွင် အရှင်ဖမ်းဆီးရမိခဲ့တာလို့ သိရပါတယ်။

အင်းတော်မြို့သိမ်းတိုက်ပွဲကို ၂၀၂၄ ခုနှစ် ဩဂုတ်လ ၁၆ ရက်နေ့ကတည်းက စတင်ခဲ့ပြီး ၈ လနီးပါးကြာမှ သိမ်းပိုက်နိုင်ခဲ့တာ ဖြစ်ပါသည်။

========================

 

📌📌 7/ တီးတိန်မြို့ရှိ စကစ ရဲဘော် (၂) ဦး လက်နက်အပြည့်အစုံဖြင့် PDF-Zoland ထံအလင်းဝင်

The Matupi Times၊ ဧပြီလ ၈၊ ၂၀၂၅

ချင်းပြည်နယ် တီးတိန်မြို့ရှိ ခလရ (၂၆၉) ကာကွယ်ရေးတပ်မှ စစ်ကောင်စီတပ်သား (၂) ဦး သည် လက်နက်ခဲယမ်းအပြည့်အစုံဖြင့် PDF-Zoland ထံသို့ အလင်းဝင်လာကြောင်း သတင်းထုတ်ပြန်ပါတယ်။

အလင်းဝင်လာသူများမှာ စိုးလင်းအောင် (ရာထူး - ရဲဘော်) နှင့် ဖိုးလပြည့် (ရာထူး - တပ်သား) တို့ဖြစ်ပြီး ၂၀၂၅ ခုနှစ် ယမန်နေ့ ဧပြီလ ၇ ရက်နေ့ နေ့ခင်းပိုင်းမှာ လက်နက်ခဲယမ်းများနှင့်အတူ အလင်းဝင်လာခြင်း ဖြစ်ကြောင်း၊ အလင်းဝင်လာသူ (၂) ဦးကို ဂုဏ်ပြုဆုငွေများ ပေးအပ်ချီးမြှင့်ခဲ့ကြောင်း သိရသည်။

#RadioNUGLocalNews

#SpringRevolution